“Say Salita nen Jehova so Nantultuloy a Binmulaslas”

“Sikato ibaki to ed unaan so saray ganggan to ed tapew na dalin; say salita to ombatik a sankarlasan.”​—SALMO 147:15.

1, 2. Anton asainmin so inter nen Jesus ed saray babangatan to, tan anto so lalanoren na satan?

 SAKEY ed saray makapakelkelaw a propesiya na Biblia so nabasa ed Gawa 1:8. Sakbay na intokotok to ed tawen, oniay kuan nen Jesus ed saray matoor a patumbok to: “Mangawat kayo na pakayari, no onsabi ed sikayo so espiritu santo: et sikayo so tasik . . . angga ed kasampotan na dalin.” Agaylan kalaknab itan a kimey!

² Parad saratan a daiset a babangatan, say pangiyabawag ed salita na Dios ed intiron dalin so ompatnag a mairap ya asainmin. Konsideraen pa so nalalanor. Kaukolan dan tulongan so totoo a makarandan ed maong a balitay Panarian na Dios. (Mateo 24:14) Kinaukolan met ed pantasi nipaakar ed si Jesus ya inabang ed arum so mapuersa iran bangat to tan ipaliwawa so betang to’d gagala nen Jehova. Niarum ni, sayan kimey so mangilaktip ed panaggaway babangatan ed totoo insan bautismoan ira. Tan saya so gawaen ed sankamundoan!​—Mateo 28:19, 20.

3. Anto so impaseguro nen Jesus ed saray patumbok to, tan panon iran kinmiwas ed kimey a niiter ed sikara?

³ Anggaman kuan, pinaseguroan nen Jesus iray patumbok to a niwala ed sikara so masanton espiritu diad panumpal da ed kimey ya inter to’d sikara. Kanian, anggaman ed kalaknab na asainmin tan ed tuloytuloy tan marawal iran sagpot na sumusumpa a mamatunda’d sikara, saray inmunan babangatan nen Jesus so matalonan akapangisumpal ed ingganggan to. Satan so peteg ya agawa ya agbalot niburi.

4. Panon a pinmatnag so aro na Dios ed ganggan a pulongan tan bangatan so arum?

⁴ Say sankamundoan a kampanya na panagpulong tan panagbangat et sakey a balikas na panangaro na Dios ed saramay agmikabat ed sikato. Angiter itan ed sikara na pankanawnawan onasingger ed si Jehova tan makaawat na panamerdona na saray kasalanan. (Gawa 26:18) Say ganggan a manpulong tan manbangat so angipatnag met ed aro na Dios ed saramay mangitatarok na mensahe, lapud mangiyabuloy itan ed sikara a mangipatnag ed debosyon da ed si Jehova tan mangipatnag ed aro ra ed kapara ran totoo. (Mateo 22:37-39) Pinablin tuloy nen apostol Pablo so Kristianon ministeryo a tinukoy to itan bilang “kayamanan.”​—2 Corinto 4:7, NW.

5. (a) Iner so pakaromogan tayo ed napanmatalkan a tuloy ya awaran na saray inmuunan Kristiano, tan anton imbulaslas so adeskribe ed satan? (b) Akin a makabaliksan so libro na Gawa ed saray lingkor na Dios natan?

⁵ Say napanmatalkan a tuloy ya awaran na panagpulong a kimey na saray inmuunan Kristiano so naromog ed apuyanan a libro na Gawa, ya insulat nen babangatan a Lucas. Rekord itan na makapakelaw tan maples ya imbulaslas. Sayan imbulaslas na pikakabat ed Salita na Dios so mangipapanonot ed sikatayo ed Salmo 147:15, a kuanto: “Ibaki [nen Jehova] ed unaan so saray ganggan to ed tapew na dalin; say salita to ombatik a sankarlasan.” Say salaysay a nipaakar ed saray inmuunan Kristiano, a pinabiskeg na masanton espiritu, so namparan makapaliket tan makabkabaliksan ed sikatayo natan. Mibibiang iray Tastasi nen Jehova ed parehon kimey na panangipulong tan panaggaway babangatan, dia lambengat ed mas malaknab a paraan. Nipapaarap itayo met ed saray probleman mipadpara ed saramay inkidungetan na  saray Kristiano nen inmunan siglo. Diad pangonsidera tayo ed no panon so impamendision tan impamabiskeg nen Jehova ed saray inmuunan Kristiano, napabiskeg so pananisia tayo lapud pananuporta to.

Say Indakel na Saray Babangatan

6. Anton grupo na salita nipaakar ed ibubulaslas so amitlon pinmatnag diad libro na Gawa, tan anto so tutukoyen na satan?

⁶ Say sakey a paraan ed panusisa na kasumpalan na Gawa 1:8 et say pangonsidera ed balikas a “say salita nen Jehova so nantultuloy a binmulaslas,” sakey a grupo na salita ya amitlo labat a pinmatnag diad Biblia tan naromog iratan ya amin ed libro na Gawa, tekep na daiset a pandurumaan. (Gawa 6:7; 12:24; 19:20, NW) “Say salita nen Jehova,” odino “say salita na Dios,” ed sarayan teksto so manutukoy ed maong a balita​—say makapasagyat a mensahe na madibinon katuaan, sakey a mabilay, mapuersan mensahe ya anguman ed kabibilay na saramay angawat ed satan.​—Hebreos 4:12.

7. Anto so pisiglaotan na imbulaslas na salitay Dios ed Gawa 6:7, tan anto so agawa ed agew na Pentecostes 33 K.P.?

⁷ Say primeron impanukoy ed imbulaslas na salita na Dios so naromog ed Gawa 6:7, diad New World Translation. Oniay nabasa tayo: “Lapud ontan, say salita na Dios so nantultuloy a binmulaslas, tan say bilang na saray babangatan so lalon dinmakel a maong diad Jerusalem; tan sakey a baleg ya ulop na saray saserdote so nagmaliw a matulok ed pananisia.” Dia, say ibubulaslas so nisiglaot ed indakel na saray babangatan. Akadkauna ni, diad agew na Pentecostes 33 K.P., nikalbo so masanton espiritu na Dios ed manga 120 a babangatan ya atipon ed silir a walad tagey. Insan angiter si apostol Pedro na makapasagyat a paliwawa, tan diad saramay dinmengel, manga 3,000 so nagmaliw a mananisia ed saman ya agew. Agayla so aligewgewan sanen nilibon totoo so amaarap ed saray bakayas ed Jerusalem pian manpabautismo diad ngaran nen Jesus, say too ya impasak bilang kriminal manga 50 ya agew ed akadkauna!​—Gawa 2:41.

8. Panon a dinmakel iray babangatan ed saray taon kayari na Pentecostes 33 K.P.?

 ⁸ Siempre, gapoan lambengat itan. Sinmaew so tuloytuloy a sagpot na saray Judion relihyoson pangulo a patundaen so panagpulong a kimey. Diad inkadismaya na saraman a papangulo, “say Katawan [Jehova] inyarum to ed [saray babangatan] ya inagew-agew so saray nilaban.” (Gawa 2:47) Agnambayag, “say bilang na lalaki sinmapot a limanlibo.” Kayari na satan, “saray mananisia ed Katawan lalo nin naaruman ira, a dinmakel so bilang na saray lalaki tan bibii.” (Gawa 4:4; 5:14) Diad saginonor a panaon, oniay nabasa tayo: “Dia ed ontan, say iglesia apadeen ed lapag na Judea tan Galilea tan Samaria, et binmiskeg; et manakar ira ed takot ed Katawan tan diad panliligliwa na espiritu santo dinmakel ira.” (Gawa 9:31) Kayari na pigaran taon, nayari a sanen ngalngali 58 K.P., atukoy so ‘pigan libo ya anisia.’ (Gawa 21:20) Manlapud saman, wala met laray Gentil a mananisia.

9. Panon yon deskribien iray inmuunan Kristiano?

⁹ Sayan indakel so makasengeg ed inyarum na balo iran akomberti. Say relihyon et balo​—ingen ta aktibon maong. Aliwan singa saray paspasaray a membro na simbaan, saray babangatan so sigpot a debosyonado ed si Jehova tan ed Salita to, ya aminsan ya akaamta na katuaan manlapud saramay pirmin apasegsegang. (Gawa 16:23, 26-33) Ontan so ginawa na saramay angawat ed Inkakristiano bilang resulta na makatunongan, maalwar ya impandesisyon da. (Roma 12:1) Sikara so abangatan ed daladalan na Dios; say katuaan so walad kanonotan tan kapusoan da. (Hebreos 8:10, 11) Mabulos ira ya ompatey nisengeg ed papanisiaan da.​—Gawa 7:51-60.

10. Anton responsabilidad so inawat na saray inmuunan Kristiano, tan anto so nanengneng tayon pipadparaan natan?

¹⁰ Saramay anayakup ed Kristianon bangat so amidbir ed responsabilidad dan manginabang na katuaan ed arum. Saya so direktan akatulong ed lalon indaak. Inkuan na sakey ya iskolar na Biblia: “Say panangikayat ed pananisia so ag-impasen bilang kanepegan na sankasesegan odino tinuron ebanghelista. Say panag-ebanghelyo so nikaduman pribilihyo tan obligasyon na kada membro na Iglesia. . . . Say mabulos a panangikayat na intiron Kristianon muyongan so angiter na pirmin panamaseseg ed sayan ulopan manlapu la’d gapo.” Insulat to ni: “Say panag-ebanghelyo so mismon pinagka-puersa na inmuuna iran Kristiano.” Tua met itan ed saray tuan Kristiano natan.

Inkayat ed Dakel a Paspasen

11. Anton nengneng na ibubulaslas so adeskribe ed Gawa 12:24, tan panon iyan agawa?

¹¹ Say komaduan impanukoy ed imbulaslas na salitay Dios et naromog ed Gawa 12:24 [NW]: “Say salita na Dios so nantultuloy a binmulaslas tan kinmayat.” Sayan grupo na salita dia so nisiglaot ed inkayat diad dakel a paspasen. Anggaman ed isusumpa na gobierno, nantultuloy ya inmaligwas so kimey. Primeron nikalbo so masanton espiritu diad Jerusalem, tan manlapud saman et maples a kinmayat so salita. Lapud panamasegsegang diad Jerusalem, nitaytayak iray babangatan diad saray rehyon ed intiron Judea tan Samaria. Say resulta? “Saray abuybuyak, nanakarakar ira ed amin a kadalinan ya angipulong na salita.” (Gawa 8:1, 4) Niwanwan si Felipe a manpulong ed sakey a too, a kayarin abautismoan et intarok to met so mensahe diad Etiopia. (Gawa 8:26-28, 38, 39) Tampol a niletneg so katuaan diad Lidda, diad Patar na Sarona, tan Joppe. (Gawa 9:35, 42) Saginonor, nambiahe si apostol Pablo na nilibon kilometro diad dayat tan dalin, ya angiletneg na saray kongregasyon ed dakerakel a bansa na Mediteraneo. Linma si apostol Pedro diad Babilonia. (1 Pedro 5:13) Diad loob na 30 a taon kayari na inkikalbo na masanton espiritu nen Pentecostes, insulat nen Pablo a say maong a balita so “nipulong ed amin a pinalsa ed leksab na tawen,” a posiblin manutukoy ed kabkabat a mundo nensaman.​—Colosas 1:23.

12. Panon a binidbir na saray onsusumpa ed Inkakristiano so inkayat na salitay Dios ed dakel a paspasen?

¹² Anggan saray onsusumpa ed Inkakristiano so amidbir a say salita na Dios so niletneg la ed intiron Empiryo na Roma. Alimbawa, insalaysay na Gawa 17:6 a diad Tesalonica, mamaamianen a Gresya et kinmelyaw iray onsusumpa: “Saraya a mangogotgot na mundo, linma ra dia met.” Niarum ni, kagapo na komaduan siglo, si Pliny the Younger so nansulat ed Romanon Emperador a si Trajan manlapud Bithynia nipaakar ed Inkakristiano.  Oniay inreklamo to: “Aglambengat [itan] niyapasakey ed saray syudad, noagta inkayat na satan so impluensia ra ed limog na kabangibang iran baryo tan bansa.”

13. Diad anton dalan a say inkayat ed dakel a paspasen so pakapatnagan na panangaro na Dios ed katooan?

¹³ Sayan ikakayat ed dakel a paspasen so pakapatnagan na aralem a panangaro nen Jehova ed dondonen a katooan. Sanen naimatonan nen Pedro so ikukurang na masanton espiritu ed si Cornelio a Gentil, inkuanto: “Tua a nanengneng ko a say Dios anggapo so pangiduma to ed saray totoo; noag ingen dia ed balang nasyon akoen to so antakot ed sikato tan manggawa na matunong.” (Gawa 10:34, 35) On, say maong a balita so mensahe nensaman tan natan ed amin a totoo, tan say inkayat na salitay Dios ed dakel a paspasen so angiter na pankanawnawa ed totoon walad nanduruman pasen ya onkiwas ed panangaro na Dios. Diad sayan koma-21 a siglo, say salita na Dios so literal a kinmayat ed intiron parti na dalin.

Say Imbulaslas a Tinmalona

14. Anton nengneng na ibubulaslas so adeskribe ed Gawa 19:20, tan anto so tinalonaan na salitay Dios?

¹⁴ Say komatlon impanukoy ed imbulaslas na salita na Dios so pinmatnag ed Gawa 19:20 [NW]: “Diad makapanyarin paraan, say salita nen Jehova so nantultuloy a binmulaslas tan tinmalona.” Say orihinal a Griegon salita a nipatalos a “tinmalona” so mangiter na ideya na “pangisekar na biskeg.” Insalaysay na inmuuna iran bersikulo a dakel ed Efeso so nagmaliw a mananisia, tan pinoolan na pigaran mangaagamil na panagmahiko iray libro ra diad imaton na amin. Kanian, tinmalona so salitay Dios ed saray palson relihyoson sisiaen. Tinmalona met so maong a balita ed arum niran babeng, a singa say panamasegsegang. Anggapoy makapatunda ed satan. Diad saya et naimano tayo lamet so makapasagyat a piparaan na tuan Inkakristiano ed panaon tayo.

15. (a) Anto so insulat na sakey a manag-awaran na Biblia nipaakar ed saray inmuunan Kristiano? (b) Siopa so indalangirang na saray babangatan lapud intalona ra?

¹⁵ Saray apostol tan arum niran inmuunan Kristiano so angiyabawag ed salitay Dios tekep na seseg. Nipaakar ed sikara, oniay kuan na sakey a manag-awaran na Biblia: “Sano determinado so totoo a mansalita nipaakar ed Katawan da, dakerakel so paraan a panggawa ra’d satan. On, say mamapakiwas ed sarayan lalaki tan bibii so lalon manasagyat ed sikatayo nen saray paraan da.” Anggaman ontan, binidbir na saramay inmuunan Kristiano a say itatalona ra ed ministeryo so ag-akadepende ed sagpot da lambengat. Ingganggan ira na Dios a manumpal ed kimey da, tan susuportaan ira na Dios pian nagawaan da itan. Say espiritual ya ibubulaslas so manlapud Dios. Binidbir itan nen apostol Pablo diad sulat to ed kongregasyon na Corinto. Insulat to: “Siak so angitanem, si Apolos so analog; bangbalet say Dios so amabaleg. Ta sikami kakimeyan na Dios.”​—1 Corinto 3:6, 9.

Onkukurang so Masanton Espiritu

16. Anto so mangipabitar a pinapakpel na masanton espiritu iray babangatan a mansalita?

¹⁶ Tandaan ya impaseguro nen Jesus ed saray babangatan to a say masanton espiritu so walaan na betang ed ibubulaslas na salitay Dios tan say  masanton espiritu so mamabiskeg ed saray babangatan diad panagpulong a kimey da. (Gawa 1:8) Panon iyan agawa? Kayarin tuloy na inkikalbo na espiritu ed saray babangatan nen Pentecostes, si Pedro tan Juan so atawag a mansalita ed arap na Judion Sanhedrin, say sankatageyan a korte ed saman a dalin, a wadtan iray huis a walaan na eebatan ed impatey nen Jesu-Kristo. Kasin onggiwgiw ed takot iray apostol ed arap na ontan ya amayamay tan onsusumpa a duypo? Andin balot! Si Pedro tan Juan so pinabiskeg na masanton espiritu a mansalita tekep na ontan ya inkakpel kanian mankelkelaw iray onsusumpa’d sikara, tan “abidbir da ran akiulop ed Jesus.” (Gawa 4:8, 13) Say masanton espiritu so amakiwas met ed si Esteban a makpel a manpulong ed Sanhedrin. (Gawa 6:12; 7:55, 56) Akadkauna, say masanton espiritu so amakiwas ed saray babangatan a manpulong tekep na inkakpel. Inreport nen Lucas: “Nen akapikasi la ra, saman so pasen a nantitiponan da ginmiwgiw; et napno ra ya amin na espiritu santo, et sinalita ra so salita na Dios a makmakpel.”​—Gawa 4:31.

17. Diad anto niran dalan a tutulongan na masanton espiritu iray babangatan ed ministeryo ra?

¹⁷ Panamegley na makapanyarin masanton espiritu nen Jehova, Sikato tan say apaolin Jesus, so angidirehi ed panagpulong a kimey. (Juan 14:28; 15:26) Sanen nikalbo so masanton espiritu ed si Cornelio, ed saray kanayon to, tan maapit a kakaaro to, amoria nen apostol Pedro a saray ag-agalsiman a Gentil so kualipikadon manpabautismo ed ngaran nen Jesu-Kristo. (Gawa 10:24, 44-48) Diad saginonor, say espiritu so walaan na importantin betang diad inkaturo nen Bernabe tan Saulo (apostol Pablo) parad panagmisionaryon kimey tan ed impangiwanwan ed nepeg dan laen tan aglaen. (Gawa 13:2, 4; 16:6, 7) Satan so angidirehi ed proseso na impandesisyon na saray apostol tan mamasiken diad Jerusalem. (Gawa 15:23, 28, 29) Inwanwan met na masanton espiritu so inkaturo na saray manangasikaso ed Kristianon kongregasyon.​—Gawa 20:28.

18. Panon ya impatnag na saray inmuunan Kristiano so aro?

¹⁸ Niarum ni, pinmatnag met so mismon masanton espiritu ed saray Kristiano, a mamapawala na maridios a kalidad, a singa say aro. (Galacia 5:22, 23) Say aro so amakiwas ed saray babangatan a mantutulongan ed balang sakey. Alimbawa, kayari na Pentecostes 33 K.P., walay pundon pannanagnagan pian nitarya so pisikal a pankaukolan na saray babangatan ed Jerusalem. Oniay salaysay na Biblia: “Anggapo ed sikara so kinmulang; ta amin a walaan na kaumaan odino kaabungan inlako da ra, tan inawit da so bili na saray bengatla ya inlako ra. Et inyan da ed saray salian na apostoles: et agawa so impangiyutob ed sinansakey, unong ed wala a nakaukolan na siopaman.” (Gawa 4:34, 35) Sayan panangaro so aglambengat ninatnat ed saray kapananisiaan noagta ontan met ed arum, namparan diad pananginabang na maong a balita tan diad arum a gawa na panangasi. (Gawa 28:8, 9) Inkuan nen Jesus a say aron atekepan na dilin-panangisakripisyo so pakabidbiran ed saray patumbok to. (Juan 13:34, 35) Maseguron say makanan kalidad na aro so angiyasingger ed totoo diad Dios tan akatulong ed imbulaslas nen inmunan siglo a singa met natan.​—Mateo 5:14, 16.

19. (a) Diad anton taloran dalan a binmulaslas so salitay Dios nen inmunan siglo? (b) Anto so usisaen tayo ed ontumbok ya artikulo?

 ¹⁹ Ami-amin, say balikas a “masanton espiritu” so pinmatnag na 41 a danay ed libro na Gawa. Mabitar, say imbulaslas na saray tuan Kristiano nen inmunan siglo so maapit a misiglaotan ed pakayari tan panangiwanwan na masanton espiritu. Dinmakel so bilang na saray babangatan, say salita na Dios so kinmayat ed dakel a pasen, tan tinmalona itan ed saray relihyon tan pilosopiya ed saman a panaon. Sayan imbulaslas nen inmunan-siglo so mipadpara ed kimey na saray Tastasi nen Jehova natan. Diad ontumbok ya artikulo, usisaen tayo so makapasagyat met ya imbulaslas na salitay Dios ed modernon panaon.

Kasin Nanonotan Yo?

• Panon a dinmakel iray inmuunan Kristiano?

• Diad anton dalan a kinmayat so salita na Dios ed dakel a paspasen?

• Panon a tinmalona so salita na Dios nen inmunan siglo?

• Anto so betang na masanton espiritu ed imbulaslas na salitay Dios?

[Tepetepet Parad Panagaral]

[Litrato ed pahina 12]

Pinulongan nen Felipe so sakey ya Etiope, ya angikayat met ed maong a balita ed dakel a paspasen

[Litrato ed pahina 13]

Inwanwan na masanton espiritu iray apostol tan mamasiken diad Jerusalem

[Picture Credit Line ed pahina 10]

Walad nikawanan ed tagey: Impamawala ed Syudad na Jerusalem diad panaon na Komaduan templo-nipuesto ed sular na Holyland Hotel, Jerusalem