“Agnalilikas a Mamepeligro’d Bunigas na Publiko”

MAKAPAKELAW a kakatlo na saray wala la’d edad a manguusar na Internet diad Estados Unidos so ninmengneng la ed sakey a klase na website nipaakar ed sekso, ontan so imparungtal na agano nin surbi nipaakar ed on-line sex. Dakel a totoo la natan so mamepenek ed saray seksual a pankaliktan da diad panamegley na Internet. “Saya so onkakasmak ya agnalilikas a mamepeligro’d bunigas na publiko, lapud pigara labat so makakamoria ya ontan odino mangipapasen ed satan a seryoso,” kuan nen Dr. Al Cooper, say sikolohista ya angidaulo na surbi.

Sioparay main-inomay a naayat ed ontan a cybersex? “Saramay manguusar a say seksualidad da et nayarin apugeran tan ageteran legay pambibilay da” balet ta “biglan makaromog na anggapoy anggaan a suplay na posiblin pankanawnawa nipaakar ed sekso” ed Internet, kuan nen Dr. Cooper.

Balet, maslak ed saramay mabetbet a manbabantay ed saray sexual site, so mangipapasen ed satan ya agamil ya agmakapuy. Kasin ontan? No panon a say sakey ya adik ed druga et nabayuboan toy pakaadik to ed druga, panggunaetan na dakel iran adik ed cybersex a paatageyen so “sukat” na seksualidad panamegley na Internet pian peneken iray kagletan da. On, anggan naandi ni ingen so trabaho tan relasyon da ed asawa ra!

Balet, saramay labay dan paliketen so Dios so walaan na kaaruman a rason pian paliisay pambantay ed saray sexual website a walad Internet. Oniay isisimbawa na Salita na Dios: “Pateyen yo sirin so kabiangan [na laman] yo a wadia ed tapew na dalin; panaglawan, inkarutak, kaalakan, mauges a getma, tan agum, say panagdayew ed talintao; nipaakar ed saraya sikaray sengeg na isabi ingongot na Dios.” (Colosas 3:5, 6) Ta pian ‘napatey iray kabiangan na laman’ no nipaakar ed marumsis a seksual a kagletan, nakaukolan a bayuboan na sakey a too so mabiskeg a panangaro ed si Jehova a Dios. (Salmo 97:10) No naromog toy inkasikaton naiingganyo ed cybersex a pakakapeligroay bunigas na publiko, nepeg ton pabiskegen so panangaro to ed si Jehova diad panaral na Salitay Dios, say Biblia. Baleg so nitulong na makagunggonan pililimog ed Tastasi nen Jehova diad lokal a Kingdom Hall ed sakey a too pian napabiskeg to so determinasyon ton paliketen so Dios.