No Panon a Natalonaan so Pakakadismaya

● Indageyem nen Asap: “Tua tua a lininisan ko so pusok ed maapa, tan inurasan ko so limalimak ed inkaandi kasalanan; ta dia ed amin a dukey na agew asalotan ak, tan adusa ak a kinabuasan.”​—Salmo 73:13, 14.

● Inyey-ey nen Baruc: “Abagey ak la! Natan ta si Jehova inyarum to so ermen ko ed irap ko; naksawan ak ed pantagleey ko et agak makaromog na painawa.”​—Jeremias 45:3.

● Intagleey nen Noemi: “Say Makapanyarin-amin nanagamil na ampaipait ed siak. Pinmaway ak a napno, et si Jehova impawil to ak ed abung a paoypaoy: akin et tawagen yo ak na Noemi, anta si Jehova nantasi a sumpa ed siak, tan say Makapanyarin-amin pinaermen to ak?”​—Rut 1:20, 21.

LUGAN na Biblia so dakerakel ya ehemplo na matoor iran managdayew nen Jehova ya aminsan et tinalonaan na saray liknaan na pakakadismaya. Diad tua et amin tayo bilang ag-ayadyarin totoo so panapanaon a makakaeksperiensia na ontan iran liknaan. Arum ed sikatayo so nayarin mas mainomay a nadismaya​—ompan atekepan ni ingen na dilin-panangabagey​—nen say arum lapud grabe iran naeksperiensia.

Balet, no agnakontrol, deralen na saratan a liknaan so relasyon mo ed arum tan ed si Jehova a Dios. Onia so inaksobi na sakey a Kristianon bii a mainomay ton abageyey inkasikato: “Agko inawat so dakel iran imbitasyon ed sosyal iran aktibidad lapud liknaen kon agak makana a nakalimog na saramay wala ed kongregasyon.” Agaylan makaderal ed bilay na sakey so ontan iran liknaan! Antoy nayarin gawaen mo pian labanan iratan?

Onapit ed si Jehova

Diad Salmo 73, prangkan insulat nen Asap so nipaakar ed kawewetwet to. Sanen ikokompara toy kipapasen to ed maaligwas a kabibilay na saray mauges, sikatoy mangimon. Naimano ton saray agmaridios so mapangta tan marawal, tan ompatnag a singano ag-ira nadudusa. Kanian imbalikas nen Asap iray panduaruwa nipaakar ed kakanaan na pangegemtan to na maptek a kurang na bilay.​—Salmo 73:3-9, 13, 14.

Kasin sika, singa si Asap, so akaimano ed ompatnag ya itatalona na saray marelmeng a mangipapasirayew ed mauges a gawa ra? Panon ya atalonaan nen Asap iray pakakadismaya to? Intuloy to: “Sanen ninonot ko ya amtaen ya, sikato so maot-ot a tuloy nensaman ed siak; angga ed sanen linmoob ak ed santuaryo na Dios; insan ko atalosan so kasumpalan da.” (Salmo 73:16, 17) Ginawa nen Asap so positibo iran kundang diad inyasingger ed si Jehova ed pikakasi. Diad pangusar ed balikas ya inusar nen apostol Pablo ed saginonor, pinokpokan nen Asap so “pisikal a too” diad impamakiwas ed “espiritual a too” ed akindalem to. Lapud apasimbalon espiritual a panmoria, atalosan ton kagula nen Jehova so kaugsan tan diad dugan panaon et nadusa so marelmeng.​—1 Corinto 2:14, 15.

Agaylan makana ya abuloyan so Biblia ya ontulong ed sika a mangiyapasakey ed peteg a kipapasen  na bilay! Papanonotan itayo nen Jehova ya amta to so gagawaen na mauges a totoo. Ibabangat na Biblia: “Agkayo komon nalingo; Say Dios agnayarin naludlurey: ta say antokaman ya itanem na too satan met so anien to . . . Ag-itayo sirin komon nakesawan a manggawa na maabig.” (Galacia 6:7-9) Ipasen nen Jehova so marelmeng “ed andanglel iran paspasen”; ‘ipelag to ra ed kaderalan.’ (Salmo 73:18) Lawas ya ontalona ed kaunoran so madibinon inkahustisya.

Say tuloytuloy a programa na espiritual a katatagano diad dulang nen Jehova tan say maabig a pililimog ed totoo na Dios so ontulong ed sika pian napabiskeg so pananisiam tan natalonaan so pakakadismaya odino arum niran negatibo iran liknaan. (Hebreos 10:25) Singa si Asap, diad pansiansian maapit ed Dios, naeksperiensiam so maaron pananuporta to. Intuloy nen Asap: “Wala ak a lanang ed sika: sika intabin moak ed limak a kawanan. Sika ibasbas moak a pati pamilin mo, tan naani awaten moak ed gloria.” (Salmo 73:23, 24) Sakey a Kristiano a naabuso sanen ugaw ni so akamoria ed kakabatan na sarayan salita. Inkuan to: “Say pansiansian maapit a milimog ed kongregasyon, so angipanengneng ed siak na duman panmoria ed bilay. Apatnagan kon maong a maaro iray Kristianon matatken, ya aliwa iran polis noagta managpastol.” On, saray maabagey a Kristianon mamatatken so walaan na importantin betang ed pangiwaklit na makaderal iran liknaan.​—Isaias 32:1, 2; 1 Tesalonica 2:7, 8.

Awaten so Simbawa nen Jehova

Say sekretaryo nen propetan Jeremias, a si Baruc so inmey-ey lapud kadedetdet to’d emosyon nisengeg ed asainmin to. Balet, mapangasin impaimano nen Jehova ed si Baruc so katuaan. “Anapen mo so saray baleg a bengatla a nipaakar ed sika lanlamang? Agmo ra anapen; ta nia, yakar ko naani mauges ed amin a laman, kuan nen Jehova; balet say bilay mo iter ko naani ed sika a tekmel ed saray amin a pasen a laen mo.”​—Jeremias 45:2-5.

Prangkan impaliwawa nen Jehova a say dilin sinisiblet iran gegemtan nen Baruc so sengegan na kadidismayaan to. Ag-awalaan na gayaga si Baruc ed inter-Dios a kimey to leleg ton aanapen met so baleg iran bengatla parad inkasikato. Nayarin naimanom met a say epektibon paraan pian natalonaan so pakakadismaya et say iyarawi ed saray pakaamperan tan abrasaen so kareenan na nonot a manlalapu ed maridios ya inkakontento.​—Filipos 4:6, 7.

Ag-inabuloyan na abalo lan Noemi so gonigon pian isian toy inkasikato diad Moab sanen inatey so masiken to tan duaran anak ton lalaki. Balet, napatnagan a walay panaon a nanermenan ton tuloy so kipapasen to tan ed duaran manugang ton bibii. Sanen pasesempeten to lara, inkuan nen Noemi: “Sikato so mamaermen ed siak na dakel nipaakar ed sikayo, ta say  lima nen Jehova pinmaway a sumpa ed siak.” Lamet, sanen akasabi ed Betlehem, impilit to: “Agyo ak tatawagen na Noemi [“Say Inkaliket Ko”], tawagen yo ak na Maria [“Maermen”]; ta say Makapanyarin-amin nanagamil na ampaipait ed siak.”​—Rut 1:13, 20.

Balet, ag-insian nen Noemi so inkasikato ed si Jehova tan ed totoo to diad impansiansia ton maermen. Nadngelan to sanen walad Moab a “dinmalaw si Jehova ed baley to ed impangiter to ed sikara na tinapay.” (Rut 1:6) Atalosan ton say sankaabigan a lugar parad sikato et diad limog na totoo nen Jehova. Kaibay manugang ton si Rut, pinmawil si Noemi diad Juda tan marundunong ton inggiya si Rut no panon so nepeg ton ikiwas ed kanayon dan si Boaz, say mananondon to.

Mipadpara natan, natatalonaan na saray matoor, a naandi’d-bilay iray kaasawaan da, so pakadedetdet ed emosyon diad pansiansian okupado ed loob na Kristianon kongregasyon. Singa si Noemi, nantultuloy iran maseseg ed espiritual iran pamaakaran, say pambasan inagew-agew ed Salita na Dios.

Saray Gunggona Manlapud Pangiyaplika ed Maridios a Kakabatan

Sarayan salaysay manlapud Biblia so mangitatarya na pakatebek ed no panon a natalonaan na sakey iray epekto na negatibo iran liknaan. Kinmerew na tulong si Asap ed santuaryo nen Jehova tan maan-anos a nanalagar ed si Jehova. Dinmengel si Baruc ed simbawa tan pinaliisan toy materyalistiko iran pakaamperan. Nansiansian aktibo si Noemi ed limog na totoo nen Jehova, ya imparaan toy malangwer nin Rut ed saray pribilihyo to diad panagdayew ed tuan Dios.​—1 Corinto 4:7; Galacia 5:26; 6:4.

Natalonaan mo so pakadismaya tan arum niran negatibon liknaan diad panmolimoli ed saray madibinon impanbiktorya ya impagamor nen Jehova ed totoo to, bilang sinansakey odino inggrupo. Diad satan a gagala, dalepdepen so supremon kiwas na panangaro nen Jehova diad impangitarya na dondon parad sika. Apresiaen so puron panangaro na Kristianon impanaagi. Iyapasakey moy bilay mo ed asingsingger lan balon mundo na Dios. Tan onkiwas ka komon a singa si Asap: “Maong ed siak so ondere ed abay na Dios: inyan ko so panagmatale’ko ed Jehova a Dios, pian nipaamtak so amin a gawagawam.”​—Salmo 73:28.