Kasin ‘Aanamoten Yo so Panaon’?

SINIMBAWA nen apostol Pablo iray Kristianon taga-Efeso nen inmunan siglo: “Nengneng yo sirin a tinekepan na panlikas no panon so panakar yo, aliwan singa andi kalakal, noag ingen singa makalakal; ya anamoten yo so panaon, ta saray agew sikara so mauges.” (Efeso 5:15, 16) Akin a kaukolan iyan simbawa? Say ebat ed satan a tepet so mankaukolan na pikakabat ed saray kipapasen a nidungetan na Kristianos ed satan a syudad nensaman.

Kabkabat so Efeso lapud daakan a kayamanan, graben imoralidad, kasmak a krimen, tan nanduruman demonikon agagamil. Kaaruman ni, saray Kristiano diman so kaukolan a mipuligesgesan ed saray pilosopikon sisisiaen nipaakar ed panaon. Saray aliwan Kristianon Griego diad Efeso so agmanisia a say panaon so onkukurang ed saksakey a direksion. Imbangat na pilosopiya na Griego a say bilay so naulit ed agmangangga iran sikulo. Say sakey a toon dinarak to so panaon to ed sakey a sikulo na bilay so makabawi diad sananey a sikulo. Sayan klase na kaisipan so nayarin angimpluensia ed saray Kristianon taga-Efeso pian agamilen so agpangisengansengan nipaakar ed panag-orasan nen Jehova na saray ebento, pati say panag-orasan to parad madibinon panangukom. Kanian, say simbawa nen Pablo ya ‘anamoten so panaon’ so matukotukoy.

Si Pablo so agmangitotongtong nipaakar ed panaon ed inkalapagan lambengat a panmoria. Say Griegon salita ya inusar to so mankabaliksan a walay aturon panaon, matukoy a panaon parad espisipikon gagala. Sisimbawaen nen Pablo iray inmunan siglon Kristiano a makabat a mangusar ed pankanawnawa nin peryodo, odino panaon na panamalabo, a peles dan panggagayagaan, sakbay a mangangga itan tan sakbay a say panangasi na Dios tan say iyoopresin kilalaban so naandi la.​—Roma 13:11-13; 1 Tesalonica 5:6-11.

Manbibilay itayo ed mipadparan pankanawnawa nin peryodo na panaon. Imbes a daraken so aglan balot naulit a panaon na panamalabo diad pangegemtan ed saray temporaryon liket ya iyoopresi na mundo, makabat iray Kristiano no usaren da so walan panaon diad panggawa na “saray gawa na maridios a debosyon” tan diad ontan et paeleten da so relasyon da ed say Manamalsa, si Jehova a Dios.​—2 Pedro 3:11; Salmo 73:28; Filipos 1:10.