Manggayagan Kaiba so Maliket a Dios

“Kaunoran, agagi, manliket kayo, . . . tan say Dios na aro tan kareenan manayam ed sikayo.”​—2 CORINTO 13:11.

1, 2. Akin a dakel so nanaermenan ed bilay? (b) Anto so gayaga, tan panon tayo itan a nabayuboan?

 DIAD sarayan mauddiem a panaon, agtanton makapanliliket so dakel a totoo. Sano onsabi so duknal ed sikara odino ed sakey ya inad-aro ra, nayarin nalikna ra met so liknaan nen Job nensaman, a kuanto: “Say too a nianak ed bii, daiset so saray agew to, tan napno [na] gonigon.” (Job 14:1) Saray Kristiano so apektado ed saray pakadetdetan tan pakabanalan ed sarayan “maatap a panaon a mairap a pidenengan,” tan aliwan makapasurprisa no akin a nadidismaya no maminsan iray matoor a lingkor nen Jehova.​—2 Timoteo 3:1, NW.

² Siansia, saray Kristiano so makapanggayaga anggano nasusubok ira. (Gawa 5:40, 41) Pian natalosan tayo no panon iyan posibli, konsideraen ya unona no anto so kabaliksan na gayaga. Say gayaga so naukeran bilang “say emosyon a nalilikna lapud pakakagamor odino paniilalo ed bengatlan makapaliket.” * Kanian, no ipanaon tayon nodnonoten iray bendision tayo natan legan a dadalepdepen iray panggayagaan tayo ni ed balon mundo na Dios, magmaliw itayon magayaga.

3. Diad anton pantalos ya anggan panon et amin so walaan na saray rason pian manliket?

³ Amin so walaan na saray bendision a kaukolan a pisalamatan. Nayarin naandi so trabaho na sakey ya ulo na pamilya. Natural labat a sikatoy naaburido. Labay ton legpeten iray inad-aro to. Anggaman ontan, no sikato so mabiskeg ed pisikal tan mabunigas, pisalsalamatan to itan. No sikatoy makalmoy trabaho, nayarian to so impasyan mankimey. Diad biek a dapag, nayarin nawalaan so sakey a Kristianon bii na makapaletey a sakit. Ingen, sikato so misalsalamat ed suporta na maaron kakaaro tan kapamilyaan to, ya ontutulong ed sikaton mangarap ed sakit to tekep na dignidad tan pakpel. Tan amin a tuan Kristiano, antokaman iray kipapasen da, so makapanliket ed pribilihyon pakapikabat ed si Jehova, “say maliket a Dios,” tan si Jesu-Kristo, “say maliket tan alenleneg a [makapanyarin] Manuley.” (1 Timoteo 1:11; 6:15) On, si Jehova a Dios tan si Jesu-Kristo so sankamaliketan. Apansiansia ra so gayaga ra anggaman miduman tuloy iray kipapasen diad dalin ed ginetma nen Jehova ed gapo. Dakel so naaralan tayo ed alimbawa  ra nipaakar ed no panon tayon pansiansiaen so gayaga tayo.

Agbalot Naandi so Gayaga Ra

4, 5. (a) Panon so inkiwas nen Jehova sanen nanrebeldi so inmunan totoo? (b) Diad anton dalan a pinansiansia nen Jehova so positibon awawey nipaakar ed katooan?

⁴ Diad hardin na Eden, nanggayagaan nen Adan tan Eva so ekselentin bunigas tan walaan ira na naspot a kanonotan. Walaan ira na mabungan kimey tan marakep a kaliberliber a pankimeyan. Sankarakpan ed amin, walaan ira na pribilihyon makapitongtong a naynay ed si Jehova. Gagala na Dios a panggayagaan da komon so maliket ya arapen. Balet say inmunan atateng tayo so agnapnek ed sarayan amin a maabig a langkap; tinakew da so insebel a bunga manlapud ‘kiew na pikakabat na maong tan mauges.’ Sayan intunganga so gapoan na amin a kaermenan a nasasagmak tayo natan, bilang kapolian da.​—Genesis 2:15-17; 3:6; Roma 5:12.

⁵ Balet, ag-inabuloyan nen Jehova a naandi so gayaga to lapud anggapoy pisasalamat ya awawey nen Adan tan Eva. Sikato so matalek a napakiwas so kapusoan na arum ed saray ilalak da pian manserbi ed sikato. Diad tua, sikato so matalek lan tuloy sakbay ni ingen a nianak so panguloan ya anak nen Adan tan Eva kanian inyabawag to so gagala to a manondon ed matulok a kapolian da! (Genesis 1:31; 3:15) Diad saray siglon sinmaginonor, tinumbok na karaklan ed katooan so ginawa nen Adan tan Eva, balet ag-inkaindan nen Jehova so sankatooan lapud ontan a kasmak ya itutunganga. Imbes, insentro to so imano to ed lalaki tan bibii ya ‘amaliket ed puso to,’ saramay nansagpot a tuloy a mamaliket ed sikato lapud sikatoy inaro ra.​—Uliran 27:11; Hebreos 6:10.

6, 7. Antoran sengegan so akatulong ed si Jesus pian mansiansian maliket?

⁶ Komusta met si Jesus​—panon ton pinansiansia so gayaga to? Bilang makapanyarin espiritun pinalsa ed tawen, si Jesus so awalaan na amin a pankanawnawa pian imatonan iray gagawaen na lalaki tan bibii diad dalin. Sankaimano to so agda inkayadyari, ingen ta inaro ira nen Jesus. (Uliran 8:31) Saginonor, sanen sikato so linma diad dalin tan aktual a “nanayam ed limog” na totoo, ag-anguman so panmoria to ed katooan. (Juan 1:14, NW) Anto so akatulong ed ayadyarin Anak na Dios a manmantini ed ontan a positibon panmoria ed makasalanan a sankatooan?

⁷ Unona ed amin, si Jesus so makatunongan ed saray iilaloan to ed inkasikaton dili tan ed arum. Amta to ya agto nakomberti so intiron mundo. (Mateo 10:32-39) Kanian sikatoy nanliket anggano saksakey a masimoon a too so kinmiwas a paborabli ed mensahe na Panarian. Anggaman say kondukta tan awawey na saray babangatan to so aliwan lawas maabig, atebek nen Jesus a kaliktan dan talaga a gawaen so linawa na Dios, tan inaro to ra lapud satan. (Lucas 9:46; 22:24, 28-32, 60-62) Makatantanda, diad pikakasi to ed mangatatawen ya Ama to, sinegek nen Jesus so positibon inkiwas na saray babangatan to anggad satan a bekta: “Inunor da so salitam.”​—Juan 17:6.

8. Mamitla pa na pigaran paraan a naalig tayo si Jehova tan si Jesus nipaakar ed panmantini tayo na gayaga tayo.

⁸ Andi-duaruwa, amin tayo so nagunggonaan ed panmolimoli ed ehemplon impanengneng nen Jehova a Dios tan si Kristo Jesus nipaakar ed saya. Sarag tayo kasin sigpot ya aligen si Jehova a nayarin, agmapagpaga sano ag-agawa iray bengatla unong ed inilaloan tayo? Natumbok tayo kasin maap-apit iray bakat nen Jesus diad panmantini na positibon panmoria ed kaplesan iran kipapasen tayo, ontan met ed pagmaliw a makatunongan ed iilaloan tayo ed inkasikatayon dili tan ed arum? Imanoen tayo no panon a praktikal ya onaplika so arum ed sarayan prinsipyo diad sakey ya aspekton papablien na saray maseseg a Kristiano ed inerman a pasen​—say lawak na ministeryo.

Pansiansiaen so Positibon Panmoria ed Ministeryo

9. Panon ya apasimbalo so gayaga nen Jeremias, tan panon ya ontulong ed sikatayo so alimbawa to?

⁹ Kaliktan nen Jehova a manliket itayo ed panagserbi ed sikato. Say gayaga tayo so agnepeg ya akadependi ed saray resultan nagamoran tayo. (Lucas 10:17, 20) Pigay taon a nampulong  si propeta Jeremias diad agmabungan teritorya. Sanen inyapasakey to so imano to ed negatibon reaksion na totoo, naandi so gayaga to. (Jeremias 20:8) Balet sanen sikatoy nandalepdep ed karakpan a mismo na mensahe, apasimbalo so gayaga to. Oniay kuan nen Jeremias ed si Jehova: “Saray salitam aromog ira, et kinan kora; et saray salitam sikara nensaman ed siak so sakey a liket tan gayaga na pusok: ta natawag ak ed panamegley na ngaran mo, O Jehova.” (Jeremias 15:16) On, nanliketan nen Jeremias so pribilihyo ton mangipulong ed salita na Dios. Nagawaan tayo met itan.

10. Panon tayon napansiansia so gayaga tayo ed ministeryo tayo anggano agmabunga so teritorya tayo ed kaplesan?

¹⁰ Anggaman say karaklan et ag-ondengel ed maong a balita, walaan itayo na sankaabigan a rason pian manggayaga legan a mibibiang ed lawak na ministeryo. Nodnonoten a mapatnag so panmamatalek nen Jehova a walaray totoon onkiwas a manlingkor ed sikato. Singa si Jehova, agtayon balot naandiay ilalo ya anggan panon et walaray makapikabat nipaakar ed sankatalbaan ya isyu tan mangawat ed mensahe na Panarian. Agtayo nepeg a lingwanan a manguuman iray kipapasen na totoo. Sano nipaarap ira ed pigaran agnailaloan a trahedya odino kairapan, anggan say sankakontentoan lan too ed inkasikaton dili so nayarin manumameng la ed kabaliksan na bilay. Kasin wadman kayon ontulong sano satan a too et magmaliw lan ‘sinononot ed espiritual a pankaukolan to’? (Mateo 5:3) Ompano akaparaan lan ondengel na maong balita so arum diad teritorya yo no ondalaw kayo ed saginonor!

11, 12. Anto so agawa ed sakey a baley, tan anto so naaralan tayo ed satan?

¹¹ Manguman met so kipapasen na teritorya yo. Nonoten pa iyan alimbawa. Diad sakey a melag a baley, manaayam ditan so maapit a grupo na kalangweran niran sanaasawa a walaay ananak. Sanen dinmalaw iray Tastasi nen Jehova, parpareho so ebat na totoo ed kada puerta, “Agkami interesado!” No walay nan-interes ed mensahe na Panarian, sikatoy dismayaen a tampol na kakaabay ya agla mitotongtong ed saray Tastasi. Mapatnag, sakey ya angat so manpulong diman. Anggaman kuan, saray Tastasi so agtinmunda; nantultuloy iran nampulong. Anto so resulta?

¹² Sinmabi panaon, karaklan ed saray ananak ed satan a baley so binmaleg la, angasawa, tan nanpirmi diman. Lapud amoria ra ya aliwan peteg a maliket so paraan na kabibilay da, arum ed sarayan wala la’d edad so nananap na katuaan. Aromog da itan sanen sikaray paborablin kinmiwas ed maong a balita ya inyabawag na Tastasi. Kanian kayari na dakel a taon insan binmulaslas so melag a kongregasyon. Isipen pa so liket na saray manangipalapag na Panarian ya agtinmunda! Komon ta say inkamapeleng ed pananginabang na maglorian mensahe na Panarian so pakagamoran tayo met na gayaga!

Tulongan Kayo na Saray Kapananisiaan

13. Siopa so asinggeran tayo sano nadidismaya itayo?

¹³ Sano onloor iray pakadesdesan odino sano nasabian kayo na kalamidad, siopay naasinggeran yo parad ligliwa? Minilyon a dedikadon  lingkor nen Jehova so ontupleg nin unona ed si Jehova diad pikakasi, insan ed saray Kristianon agagi ra. Legan a wadiad dalin, pinablin mismo nen Jesus so suporta na saray babangatan to. Diad samay labi sakbay na impatey to, tinukoy to ira bilang “nansiansia ed siak ed saray inkatuktukso.” (Lucas 22:28) Siempre, ag-ayadyari iratan a babangatan, balet say katooran da so sakey a ligliwa ed Anak na Dios. Sikatayo met so makagamor na biskeg manlapud saray kapananisiaan.

14, 15. Anto so akatulong ed sakey a sanasawa pian natalonaan da so impatey na anak dan laki, tan anto so naaralan yo ed eksperiensia ra?

¹⁴ Amoria na sakey a Kristianon sanasawa a manngaray Michel tan Diane so kaimportantian na suporta na saray agagi ra. Say 20 años ya anak da, si Jonathan, sakey a makitkitsing a Kristiano tan walaan na masnag iran iilaloan, so naamtaan a walaay tumor ed utek. Sikato so makpel ya insalba na saray doktor, balet ta linmoor so kipapasen nen Jonathan anggad sinmabi so sakey a mansirunget, sikatoy inatey. Maer-ermen si Michel tan Diane. Anonotan da a ngalngali la manaya nasumpal so Service Meeting, ya akaeskedyul ed satan a simba. Balet, lapud mankaukolan iran maong na ligliwa, impaipatnubang ira ed sakey a matatken a kaiba ra ed Kingdom Hall. Sinmabi ra legan ya iyaanunsio ed kongregasyon so impatey nen Jonathan. Kayari na aral, sarayan mannangnangis ya ateng so apaliberan na agagi a nanlalakap tan nanliligliwa ed sikara. Oniay nanonotan nen Diane: “Maer-ermen kamin sinmabi ed hall, balet agayla so impanligliwa na agagi ed sikami​—agaylay impanambayo ra’d sikami! Anggaman agda naekal so ot-ot a nalilikna mi, tinulongan da kamin makapansiansia ed ontan a pakadesdesan!”​—Roma 1:11, 12; 1 Corinto 12:21-26.

¹⁵ Lapud makapasinagem ya agawa ed si Michel tan Diane, lalon apaapit ira ed saray agagi ra. Lalo met iran inmapit ed sakey tan sakey. Oniay kuan nen Michel: “Lalon naaralan kon pablien so inadarok ya asawa. Diad panaon na pakakadismaya, pantongtongan mi so nipaakar ed katuaan na Biblia tan no panon kamin susustunien nen Jehova.” Inyarum ni nen Diane: “Lalon makabkabaliksan ed sikami natan so ilalo nipaakar ed Panarian.”

16. Akin ya importantin ipaamta tayo lan tampol ed agagi tayo so nipaakar ed saray pankaukolan tayo?

¹⁶ On, saray Kristianon agagi tayo so onkana bilang “manamabiskeg a tulong” ed sikatayo legan na mairap iran panaon na bilay tan natulongan da itayon mansiansian magayaga. (Colosas 4:11) Siempre, agda nabasa iray walad kanonotan tayo. Sano nakaukolan tayo so tulong, sirin, maabig ya ipaamta la ed sikara. Insan nibalikas tayo so puron apresasyon ed antokaman a ligliwa ed sikatayo na agagi tayo, a moriaen itan a nanlapud si Jehova.​—Uliran 12:25; 17:17.

Onnengneng ed Kongregasyon Yo

17. Antoran angat so aarapen na sakey a mansusulon ina, tan panon so panmoria tayo ed totoon singa sikato?

¹⁷ No maapit yon iimanoen iray kapananisiaan, lalon naaralan yon pablien ira tan panggayagaan yo so pililimog da. Onnengneng ed kongregasyon yo. Anto so naimano yo? Wala kasi so mansusulon ateng a mangitatalikarkar pian napabaleg so ananak to diad dalan na katuaan? Ninonot yo la kasin maong so maabig ya alimbawan ipapanengneng to? Salien pan isipen so pigara ed saray probleman aarapen to. Nia so pigaran sinalambit na sakey a mansusulon ina a manngaran na Jeanine: ermen, imoral a panag-anamot na saray lalaki diad trabaho, limitadon badyet. Balet say sankabalegan a babeng ed amin, kuanto et mangilalanor ed emosyonal iran pankaukolan na ananak to, lapud miduma so kada ugaw. Sinaglawi nen Jeanine so sananey nin problema: “Peteg ya angat so pangipulisay ed tendensia a pangidauloen so anak mon laki diad sankaabungan pian akoen to so responsabilidad na sakey ya asawan laki. Walay marikit ko, tan mairap a nanonotan a sikatoy agnepeg a pabelatan diad pagmaliw ton panagdaleman ko.” Singa saray nilibon matakot ed Dios a mansusulon atateng, si Jeanine so sigpot-panaon a mantratrabaho tan mangaasikaso ed sankaabungan to. Iyaaralan to met na Biblia iray ananak to, ipapasal to ra ed ministeryo, tan aawiten to ra ed saray miting ed kongregasyon. (Efeso 6:4) Agaylan  liket nen Jehova no naynay ton naiimano iray sagpot na sayan pamilya a manmamantini ed integridad da! Agta makakaliket itayo no kalimog tayo iratan? On.

18, 19. Iyilustra no panon tayon napaaralem so apresasyon tayo ed saray membro na kongregasyon.

¹⁸ Onnengneng lamet ed kongregasyon yo. Nayarin naimano yoray matoor ya abalo ya “agbalot onsasaew” ed saray miting. (Lucas 2:37, NW) Kasin naeermenan ira no maminsan? Siempre. Kail-iliw daray kapareha ra! Balet ta tuloytuloy iran okupado ed serbisyo ra ed si Jehova tan walaan iray personal ya interes ed arum. Say malet, positibon awawey da so mangarum na gayaga ed kongregasyon! Sakey a Kristianon nanserbi ed sigpot-panaon a ministeryo ed loob la na masulok a 30 a taon so nankuan: “Sakey ed sankabalegan a gayagak et say pakanengneng ed maedad laran agagi ya akasagmak na dakel a subok tan matoor nin siansia ed panaglingkor ed si Jehova!” On, saray maedad laran Kristiano ed limog tayo so baleg a panamaseseg ed saray kalangweran.

¹⁹ Panon balet iramay balobalo a kagapogapo da ni labat a milimog ed kongregasyon? Agtayo kasi nasasagyat sano ibabalikas day pananisia ra ed saray miting? Isipen pa so aligwas ya agawaan da la manlapud inggapo ran nanaral na Biblia. Si Jehova so naliliketan a maong ed sikara. Ontan tayo kasi? Kasin ibabalikas tayoy panangabobon tayo’d sikara, a kokomendaan tayo ira lapud saray sagpot da?

20. Akin a nibagan kada membro na kongregasyon so walaan na importantin betang ed kongregasyon?

 ²⁰ Kasin walay asawa yo, walad kasuloan, odino mansusulon ateng? Kasin sakey kayon ulila (ed ina odino ed ama), abalon bii odino abalo a laki? Kasin abayag kayo lan mililimog ed kongregasyon odino kagapogapo yo ni labat a mililimog? Napaseguroan kayo a say matoor ya alimbawa yo so makapaseseg ed sikamin amin. Tan sano mibabansag kayon mangansion ed sakey a kanta na Panarian, sano mankomento kayo odino iprepresenta yo so betang yo ed Teokratikon Eskuelaan Parad Ministeryo, makaarum kayo ed liket mi. Mas importanti ni, mangitarok itan na gayaga ed puso nen Jehova.

21. Anto so dakel a rason a walad sikatayo pian manliket, balet antoran tepet so onlesa?

²¹ On, anggan ed sarayan makapagonigon a panaon, makapanggayaga itayo diad pandadayew ed maliket a Dios tayo. Walaan itayo na dakel a rason pian onkiwas ed panamaseseg nen Pablo: “Manliket kayo, . . . tan say Dios na aro tan kareenan manayam ed sikayo.” (2 Corinto 13:11) Panon balet, no nidunget itayo ed natural a desyang, panamasegsegang, odino pirmin kairapan ed bilay? Kasin posibli nin mantinien so gayaga tayo ed ontan iran kipapasen? Manibukel kayo na konklusyon yo legan yon kokonsideraen so onggendan ya artikulo.

[Paimano ed leksab]

Kasin Naebatan Yo?

• Panon ya adeskribe so gayaga?

• Panon a makatulong so panmantini ed positibon awawey pian mansiansia itayon maliket?

• Anto so makatulong ed sikatayo pian nawalaan itayo na positibon panmoria ed teritorya na kongregasyon tayo?

• Diad antoran dalan a papablien yo iray agagi ed kongregasyon yo?

[Tepetepet Parad Panagaral]

[Saray litrato ed pahina 10]

Nayarin manguman so totoo ed teritorya tayo

[Litrato ed pahina 12]

Antoran angat so aarapen na saramay kakongregasyonan yo?