Pansiansiaen Yo so Gayaga Yo diad Panagserbi ed si Jehova
Pansiansiaen Yo so Gayaga Yo diad Panagserbi ed si Jehova
“Manggayaga kayo ed Katawan lawas: kuan ko lamet, Manggayaga kayo.”—FILIPOS 4:4.
1, 2. Panon ya apansiansia na sakey ya agin laki tan say pamilya to so gayaga ra anggaman aperdi iray kayarian da?
SI James, a 70 años lan Kristiano a manaayam ed Sierra Leone, so nanseet ed intiron bilay to. Nonoten pa so gayaga to sanen sikatoy akapangipundar a siansia na abung a walaay apatiran kuarto! Balet, ag-abayag sanen panaayaman la itan nen James tan say pamilya to, tinmerak so guerra sibil ed satan a bansa, tan apoolan so abung da. Aperdi so abung da, balet agnaandi so gayaga ra. Akin ya andi?
2 Inyapasakey nen James tan say pamilya to so kanonotan da ed no anto so atilak ni, aliwan ed saray aperdi ed sikara. Impaliwawa nen James: “Anggan diad makapatalagnaw a panaon, nantitipon kami ni, nambasa na Biblia, sankakaiban nampikasi, tan innabang mi ed arum so daiset a walad sikami. Apansiansia mi so gayaga mi lapud inyapasakey mi so alay abig a siglaotan mi ed si Jehova.” Diad impanmolimoli ra ed saray bendision ed sikara, a say sankabalegan ed saratan et say impakawalaan da na maapit a relasyon ed si Jehova, sarayan matoor a Kristiano so ‘akapantultuloy a maliket.’ (2 Corinto 13:11) Siempre, mairap a sungdoan iray makapagonigon a sirkumstansia ra. Balet ag-ira tinmundan manliket ed si Jehova.
3. Panon ya apansiansia na pigaran inmuunan Kristiano so gayaga ra?
3 Nidunget met iray inmuunan Kristiano ed subsubok a mipara ed asagmak di James tan say pamilya to. Ingen, insulat nen apostol Pablo irayan salita ed saray Hebreon Kristiano: “Inako yo a sililiket so panamsam ed saray kayarian yo.” Insan impaliwawa nen Pablo so lapuan na gayaga ra: “Ta amta yo a wala ed sikayon dili ed tawen so sakey a magmaong a kayarian yo tan maando.” (Hebreos 10:34) On, saraman a Kristiano nen inmunan-siglo so walaan na mabiskeg ya ilalo. Sikara so matalek a nanilalo ed pakaawat na bengatlan agnasamsam—say magnayon a “balanget na bilay” diad mangatatawen a Panarian na Dios. (Apocalipsis 2:10) Natan, say ilalo tayo bilang Kristiano—mangatatawen man odino mangaraldalin—so makatulong ed sikatayo pian napansiansia tayo so gayaga tayo anggano nidunget itayo ed saray kairapan.
“Manliket ed Ilalo”
4, 5. (a) Akin a nipanpanaon parad saray taga-Roma so bilin nen Pablo a “manliket ed ilalo”? (b) Anto so nayarin sengegan a naandi ed kanonotan na sakey a Kristiano so ilalo to?
4 Pinaseseg nen apostol Pablo iray kapanisiaan to diad Roma a ‘manliket ira ed ilalo’ nipaakar ed andi-anggaan a bilay. (Roma 12:12) Satan so nipanpanaon a bilin ed saray taga-Roma. Kulang a sakey a dekada kayarin sinulat ira nen Pablo, sikaray nidunget ed pirmin panamasegsegang, tan arum so apairap anggad impatey da lapud ganggan nen Emperador Nero. Say pananisia ra ed ipagamor na Dios ed sikara ya insipan a balanget na bilay so maseguron anustuni ed sikara diad paniirap da. Komusta tayo met natan?
5 Bilang Kristianos, ilaloan tayo met a napasegsegang itayo. (2 Timoteo 3:12) Niarum ni, amta tayo ya onsabi ed sikatayon amin so “panaon tan ag-ilaloan a nagawa.” (Eclesiastes 9:11, NW) Nayarin naandi ed bilay so sakey ya inadaro tayo lapud aksidenti. Nayarin tigwayen na makapatey a sakit so sakey ya ateng odino maapit a kaaro. No agtayo iyapasakey so ilalo tayo ed Panarian, napepeligro itayo ed espiritual sano onsabi iratan a subok. Mitunosan ed satan, maabig ya itepet tayo’d inkasikatayo, ‘Kasin ‘manliliket ak ed ilalo’? Panon kabetbet so panaon na pandadalepdep ko ed satan? Kasin peteg ed siak so onsabin Paraiso? Kasin wadman ak? Kasin pitamitam ko so onsabin anggaan na kaplesan a sistema na bengatla a singa nen naamtaan koy katuaan?’ Say unor a tepet so manepeg a nonoten a maong. Akin? Lapud no maong so bunigas tayo, komportabli so panagbilay tayo, tan manbibilay itayo ed parti na dalin ya agtanton naaapektoan na bakal, kakisiran na tagano, odino natural a desyang, ompan diad kaplesan et naandi ed kanonotan tayo so pankakkaukolan lan isabi na balon mundo na Dios.
6. (a) Sanen sinagmak di Pablo tan Silas so kairapan, anto so inyapasakey da ed kanonotan da? (b) Panon itayon napaseseg natan ed alimbawa nen Pablo tan Silas?
6 Insimbawa ni nen Pablo ed saray taga-Roma a “masungdo ed kairapan.” (Roma 12:12) Kabisado nen Pablo so kairapan. Aminsan, anengneng to ed sakey a pasingawey so sakey a toon mangiimbita ed sikato ya ‘onla ed Macedonia’ pian tulongan iray totoo diman a manaral nipaakar ed si Jehova. (Gawa 16:9) Diad saman, si Pablo, kaiba ra di Lucas, Silas, tan Timoteo, so nanlayag ya amaarap ed Europa. Anto so manaalagar ed sarayan maseseg a misionaryo? Kairapan! Kayari ran nampulong ed syudad na Filipos ed Macedonia, alewet tan nipangaw si Pablo tan Silas. Mabitar, arum ed saray ombaley ed Filipos so aglambengat angipulisay ed mensahe na Panarian—sikara so pirmin sinmumpa. Kasin naandi lay gayaga na sarayan maseseg a misionaryo lapud saratan ya agawa? Andi. Kayari na inkapekpek tan inkipangaw da, “dia ed pegley labi, nen si Pablo tan si Silas manpipikasi ra, nankakanta ra na himno [na panangidayew] ed Dios.” (Gawa 16:25, 26) Siempre, say ot-ot a resultay impamekpek ed si Pablo tan Silas so agmakapaliket, balet aliwan satan so ninodnonot dan dua. Niyapasakey so kanonotan da ed si Jehova tan ed saray paraan na impamendision to ed sikara. Diad magayagan ‘impansungdo ra ed kairapan,’ si Pablo tan Silas so kinmanan maabig ya alimbawa ed saray agagi ra ed Filipos tan ed nanduruman pasen.
7. Akin ya ilaktip so pisasalamat ed saray pikakasi tayo?
7 Insulat nen Pablo: “Mansiansia a malet ed pikakasi.” (Roma 12:12) Kasin manpipikasi kayo sano naaaburido kayo? Anto so ipipikasi yo? Nayarin bitlaen yoray problema yo diad espisipikon paraan tan onkerew na tulong nen Jehova. Balet nayarian yo met ya ilaktip iray balikas na pisasalamat parad saray bendision a panggagayagaan yo. Sano onlesa iray problema, say panmolimoli ed kamaongan nen Jehova a gagawaen to ed sikatayo so ontulong pian ‘manliket itayo ed ilalo.’ Oniay insulat nen David, a napnoy problema so bilay to: “Amayamay ira, O Jehova a Dios ko, so saray makapakelaw a gawam a ginawam, tan saray nonot mo nipaakar ira ed sikami: ag-ira nisalaysay a mauksoy ed sika: no komon ta ipaliwawak tan salitaen ko ra, dakel ni ra nen saray nayari a bilangen.” (Salmo 40:5) No singa si David et maparanay tayon dalepdepen iray bendision a nagagamoran tayo ed si Jehova, maseguron magmaliw itayon magayaga.
Pansiansiaen so Positibon Awawey
8. Anto so makatulong ed sakey a Kristiano pian mansiansian maliket sano napapasegsegang?
8 Pinaseseg nen Jesus iray patumbok to a pansiansiaen da so positibon awawey sano nidudunget ira ed nanduruman subok. Inkuanto: “Mapalar kayo sano balawen da kayo na totoo, tan pasegsegangen da kayo, tan salitaen day amin a nengneng na mauges a sumpa’d sikayo, nisengeg ed siak, a mantila ra.” (Mateo 5:11) Anto so walan rason tayo pian manliket anggaman ed ontan iran kipapasen? Say pakayari tayo a natalindegay isusumpa so prueba a walad sikatayo so espiritu nen Jehova. Oniay kuan nen apostol Pedro ed kapara toran Kristiano nen panaon to: “No napabpabanday kayo ed ngaran nen Kristo, mapalar kayo, ta say espiritu na gloria tan espiritu na Dios dia ed sikayo so panayaman da.” (1 Pedro 4:13, 14) Panamegley na espiritu to, sikatayo so tulongan met nen Jehova pian mansungdo tan, bilang resulta et napansiansia tayo so gayaga tayo.
9. Anto so akatulong ed pigaran agagi pian naromog da iray rason a manliket sanen apriso ra lapud pananisia ra?
9 Anggano nidunget itayo ed makapasinagem a tuloy iran kipapasen, walaray rason pian manliket itayo. Ontan so naeksperiensia na sakey a Kristianon manngaran na Adolf. Sikatoy manaayam ed sakey a bansa a pigay taon lan asebelan so kimey na saray Tastasi nen Jehova. Si Adolf tan pigara ed saray kaiba to so naaresto tan asentensiaan na andukey a pakapriso lapud agda italirak iray nibase’d Biblian sisiaen da. Mairap so napriso, balet singa si Pablo tan Silas, si Adolf tan saray kakaiba to so walaan na saray rason a misalsalamat ed Dios. Unong ed sikara, say naeksperiensia ra ed prisoan so amabiskeg ed pananisia ra tan abayuboan da so mablin kalidades na Kristiano, a singa say inkamabunlok, empatya, tan aro na sanaagi. Alimbawa, sano makaawat na pawit so sakey a priso manlapud abung to, inabang to itan diad saray kapananisiaan to, a momoriaen ton kaaruman irayan probisyon nen Jehova, say mogmon Manangiter na “amin a maong a palangkap tan amin ya ayadyarin palangkap.” Satan a kiwas na panangasi so makapagayaga ed parehon angiter tan ed saray angawat. Kanian say mismon sinagmak da a niganan mamuyak ed pananisia ra so diad tua et amabiskeg ed sikara diad espiritual!—Santiago 1:17; Gawa 20:35.
10, 11. Panon ya inarap na sakey ya agin bii so maruksan panangusisa a tinumbokan na andukey ya impakapriso?
10 Si Ella, a manaayam met ed sakey a bansan abayag lan nisebel so kimey ed Panarian, so naaresto lapud inanabang to ed arum so ilalo to bilang Kristiano. Diad loob na waloy bulan, sikato so nidunget ed maruksan panangusisa. Sanen sikatoy abista ed saginonor, sikatoy senentensiaan na samploy taon ed prisoan a bukor to labat so mandadayew ed si Jehova. Si Ella so 24 años lambengat ed saman a panaon.
11 Siempre, ag-ilaloan nen Ella a nausar to so taon na kalangweran to diad prisoan. Balet lapud ta agto nauman so kipapasen to, denesidi ton umanen so panmoria to. Unong ed satan, minoria to so prisoan bilang personal a teritorya ton pampulongan. “Dakerakel so pulongan,” kuanto, “a maples a linmabas so dakel a taon.” Kayari na masulok a limay taon, si Ella so inusay lamet. Lapud amoria ran ag-abuyak na saray rehas so pananisia to, oniay kuan ed sikato na saray manag-usay: “Agmi ka ibulos; agka ni anguman.” “Balet anguman ak la!” so mapekder ya ebat nen Ella. “Walaan ak na magmaong ya awawey natan nen say nen kalooloob ko ni ed prisoan, tan say pananisiak so mas mabiskeg nen say dati!” Tan inyarum to: “No agyo ak labay ya ibulos, mansiansia ak dia angga ed pangibulos ed siak nen Jehova.” Agnaandi so gayaga nen Ella ed loob na limara tan kapalduan taon na inkipangaw to! Naaralan to so mankontento ed antokaman a kipapasen ya inkidungetan to. Wala ta so naaralan yo ed alimbawa to?—Hebreos 13:5.
12. Anto so mamawalay kareenan na nonot ed sakey a Kristiano diad mairap iran kipapasen?
12 Agyo iisipen a walaan si Ella na nikadkaduman langkap ya angiyabuloy ed sikaton mangarap ed ontan iran angat. Diad impanukoy to ed panaon na panguusisa ra ed sikato a sinagmak to ed pigaran bulan sakbay na inkasentensiaan to, oniay inaksobi nen Ella: “Nanonotan ko ni so panggiwgiw ko, tan singa ak ataktakot ya anuyaw.” Balet, si Ella so walaan na mabiskeg a pananisia tan naaralan toy manmatalek ed si Jehova. (Uliran 3:5-7) Bilang resulta, lalon nagmaliw a petepeteg ed sikato so Dios. Oniay impaliwawa to: “Kada onloob ak ed kuarton panguusayan da ed siak, aliknak so deen ed akindalem ko. . . . No lalon makapataktakot so kipapasen, lalon naliliknak so deen.” Si Jehova so lapuan na satan a deen. Impaliwawa nen apostol Pablo: “Agkayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios, a talonaan ton amin a pakatalos, bantayan to so kapusoan yo tan saray nonot yo ed Kristo Jesus.”—Filipos 4:6, 7.
13. Anto so mangipaseguro ed sikatayo a nawalaan itayo na biskeg a mansungdo no nidunget itayo ed sakey a kairapan?
13 Manlapu la’d inkibulos nen Ella, apansiansia to so gayaga to anggaman ed irap. Agawaan to iya, aliwa ed dilin biskeg to, noagta diad biskeg ya inter nen Jehova ed sikato. Mipadpara met itan ed si apostol Pablo, ya angisulat: “Kanian sankabalgan so liket a lablabay ko so manpasirayew ed saray kakapuyan ko, pian say pakayari nen Kristo manayam ed siak. . . . Ta sano siak so makapuy, dia ed satan mabiskeg ak.”—2 Corinto 12:9, 10.
14. Iyilustra no panon a nawalaan so sakey a Kristiano na positibon panmoria ed makapasubok a kipapasen tan no anto so nayarin resulta.
14 Nayarin midumaan iray pakadesdesan a kipapaarapan yo natan ed saramay asalambit dia. Balet, antokaman iratan, mairap a talonaan iray pakadesdesan. Alimbawa, nayarin sisitaen a maong na amo yo so trabaho yo nen say kimey na arum iran empleyado a kabiangan na arum a relihyon. Nayarin mairap ed sikayo so mananap na sananey a trabaho. Panon yon pansiansiaen so gayaga yo? Nodnonoten si Adolf tan saray kakaiba to, ya akabayubo na saray makanan kalidad lapud inkipriso ra. No masimoon yon pansagpotan so pamaliket ed amo yo—anggan ed samay “mairap a paliketen”—nabayuboan yo so ontan iran kalidad na Kristiano a singa say panagsungdo tan panag-anos. (1 Pedro 2:18, NW) Niarum ni, nayarin magmaliw kayon makanakana bilang empleyado, a lalon mangiter na saray pankanawnawa pian makaromog na mas maabig a trabaho ed saginonor. Konsideraen tayo natan so pigara nin paraan a namantini tayo so gayaga tayo ed serbisyo ed si Jehova.
Say Pamasimpli so Mangitonton ed Gayaga
15-17. Anto so naaralan na sakey a sanasawa a pakainawaan da manlapud pakakadesdesan, anggaman agsigpot a naekal so sengegan na satan?
15 Nayarin agkayo tanton makapanpili na klase na trabaho odino no iner so pantrabahoan yo, balet nayarin wala niray arum ya aspekto ed bilay yo a nayarian yon desisyonan. Konsideraen so onggendan ya eksperiensia.
16 Inimbitaan na sakey a Kristianon sanasawa so sakey a matatken diad abung da parad pangdem. Kaleganan na satan a labi, impaamta na sanasawa ed sikato a nalilikna dan natatalonaan laray pakakadesdesan ed bilay. Anggaman pareho iran mantratrabaho ed sigpot-panaon, agda nasarag so mananap na arum nin trabaho. Nanumamengan da no kaunongan nin kabayag so pananos da ed satan.
17 Sanen kinmerew iray simbawa, inmebat so matatken, “Manpasimpli.” Panon? Sikaran sanasawa so taloy oras a manbiabiahe paonla tan pasempet diad kada agew manlapud trabaho. Lapud kabkabat ira na matatken, insuheri to a nonoten da so iyalis diad asingger ed pantratrabahoan da, ta pian nabawasan so oras na pambiabiahe ra kada agew. Say oras a nagimper so nayarin usaren ed arum nin importanti iran bengatla—odino pampainawa. No sasamsamen la na saray pakadesdesan ed bilay so gayaga yo, akin ta no usisaen yoy kipapasen yo no nainawaan kayo ed panggawa na pigaran pananguman?
18. Akin a makana so maalwar a pannonot sakbay a mandesisyon?
18 Sananey nin paraan pian nabawasan so pakakadesdesan et say maalwar a pannonot sakbay a mandesisyon. Alimbawa, denesidi na sakey a Kristiano so mangipaalagey na abung. Pinili to so malabor a desinyo, anggano agto nin balot asali so nampaalagey na abung. Amoria to ya apaliisan to komon iray agnakaukolan iran problema no ‘ninonot ton maong iray kundang a gawaen to’ sakbay a nanpili na desinyo na abung to. (Uliran 14:15, NW) Sakey nin Kristiano so inmabobon a manggarantiya ed walan impaotang ed sakey a kapananisiaan. Unong ed paknaan, no agnabayaran na binmayes so inotang, obligado imay nanggarantiya ed satan. Diad pilimero et anggapo niray problema, balet sinmabi panaon et agla tinoor na binmayes imay akipaknaan to. Apagaan so nampaotang kanian sisingilen to so intiron otang ed samay nanggarantiya ed satan. Satan so pirmin anesdes ed samay nanggarantiya. Agta apaliisan komon itan no ninonot to nin maong so amin a bengatla sakbay ton akoen so responsabilidad ed satan ya otang?—Uliran 17:18.
19. Anto so pigaran dalan a nabawasan tayo iray pakakadesdesan ed bilay tayo?
19 Sano naksawan itayo, agtayo iisipen a nabawasan so pakakadesdesan tayo tan napansiansia tayo so liket tayo no bawasan tayoy panaon parad personal a panagaral na Biblia, lawak na kimeyan, tan piaaral. Agayla, saraya so importantin paraan pian nagamoran tayo so masanton espiritu nen Jehova, a say bunga na satan et gayaga. (Galacia 5:22) Saray kimey na Kristiano so lawas makaparepresko tan diad kaslakan et aliwan makapabanal. (Mateo 11:28-30) Nayarin say sekular a trabaho odino panligliwaan so kababanalan tayo, aliwan saray espiritual a kimey. No naugip tayo ed suston oras, makapainawa itayo. Say malaglaem nin panagpainawa so makagunggunan tuloy. Si N. H. Knorr, a nanlingkor bilang membro na Mananguley ya Ulop na saray Tastasi nen Jehova anggad impatey to, so naynay a mangibabaga’d saray misionaryo: “Sano nadidismaya kayo, say pilimeron gawaen yo et manpainawa kayo. Nasurprisa kayo a singa main-inomay lan naresolbi so amin lawarin problema kayari na maitlep ya ugip ed labi!”
20. (a) Segeken so pigaran dalan a napansiansia tayo so gayaga tayo. (b) Antoran rason so nanonotan yo ed pagmaliw a magayaga? (Nengnengen so kahon ed pahina 17.)
20 Saray Kristiano so apribilihyoan a manlingkor ed “maliket a Dios.” (1 Timoteo 1:11, NW) Unong a naimano tayo la, napansiansia tayo so gayaga tayo anggano nadidismaya itayo lapud saray ambelat a problema. Komon ta mansiansia ed kaisipan tayo so ilalo ed Panarian, umanen so panmoria tayo no nakaukolan, tan pansiansiaen a simpli so kabibilay tayo. Insan, antokaman so situasyon a kidungetan tayo, onkiwas itayo unong ed saray salita nen apostol Pablo: “Manggayaga kayo ed Katawan lawas: kuan ko lamet, Manggayaga kayo.”—Filipos 4:4.
Morekdeken a Maong Irayan Tepet:
• Akin nepeg ya iyapasakey a maong na saray Kristiano ya iyapasakey so ilalo ra ed Panarian?
• Anto so makatulong ed sikatayo pian napansiansia so gayaga tayo anggaman ed mairap iran kipapasen?
• Akin a kaukolan tayon pasimplien so kabibilay tayo?
• Diad antoran aspekto a pinasimpli la na arum so kabibilay da?
[Tepetepet Parad Panagaral]
[Kahon/Saray litrato ed pahina 17]
Kaaruman Iran Rason ed Pagmaliw a Magayaga
Bilang Kristiano, dakel so rason tayo pian manliket. Konsideraen so onggendan:
1. Kabat tayo si Jehova.
2. Naaaralan tayo la so katuaan na Salitay Dios.
3. Naperdona iray kasalanan tayo panamegley na pananisia ed bagat nen Jesus.
4. Manuuley la so Panarian na Dios—magano lan onsabi so balon mundo!
5. Sikatayo so intipon nen Jehova diad espiritual a paraiso.
6. Panggagayagaan tayo so makagunggunan pililimog bilang Kristiano.
7. Walaan itayo na pribilihyon mibiang ed panagpulong a kimey.
8. Mabilay itayo, tan walaan itayo na sukat na biskeg.
Pigara niran rason so nabitla yo pian manggayaga?
[Litrato ed pahina 13]
Nanggayaga si Pablo tan Silas anggano wala ra’d prisoan
[Saray litrato ed pahina 15]
Kasin niyapasakey so imano yo ed magayagan ilalo ed balon mundo na Dios?