Panulong ed Saray Abalo Diad Saray Kairapan Da

SAKEY ed saray bantog ya istorya nipaakar ed saray abalo et say salaysay ed Biblia nipaakar ed si Rut tan say katulangan ton bii, si Noemi. Pareho iran balo. Balet, aliwan say masiken nen Noemi labat so inatey noagta ontan met ed say duaran anak ton lalaki, a samay sakey et asawa nen Rut. Lapud diad lugar a panaayaman da et panagdalus so anapan, a mandedependin tuloy ed lalaki diad inkalapagan, say kipapasen da so talagan makapasinagem.​—Rut 1:1-5, 20, 21.

Balet, si Noemi so walaan na matalonggaring a kaaro tan managligliwa, salanti say manugang ton bii a si Rut, ya agto nilabay so ontaynan. Asabi panaon, apaneknekan a si Rut “so magmaong ed [si Noemi] nen say pitoran anak a lalaki”​—aliwa labat a lapud aralem a panangaro to ed si Noemi noagta lapu met ed panangaro to ed Dios. (Rut 4:15) Sanen insimbawa nen Noemi ed si Rut ya ompawil la ed Moabitan pamilya tan kakaaro to, inmebat si Rut ed sakey ed saray makapatenyeg a balikas na katooran a nirekord ed kapiganman: “Anggan iner a laen mo, onla ak tan iner a tundaan mo, ontunda ak; say baley mo sikato  so baley ko tan say Dios mo, Dios ko; no iner so pateyan mo, ditan so pateyan ko, tan ditan so kiponponan ko; si Jehova gawaen to komon so ontan ed siak, tan laut met, no arum ya agsalambengat so patey so mamasian ed sika tan siak.”​—Rut 1:16, 17.

Say awawey nen Rut so naimano nen Jehova a Dios. Benendisionan to so melag a pamilya nen Noemi tan Rut, tan ag-abayag et akiasawa si Rut ed Israelitan si Boaz. Say anak da, a nagmaliw ya inmunan ateng nen Jesu-Kristo, so kinomponi nen Noemi a singa dilin anak to. Sayan eksperiensia so sakey ya alimbawa no panon a papablien nen Jehova iray abalo ya onapit tan manmatalek ed sikato. Niarum ni, ibabaga ed sikatayo na Biblia a papablien to iramay maaron ontutulong ed saray abalo diad saray kairapan da. Kanian panon tayo natan a suportaan iray abalo a walad limog tayo?​—Rut 4:13, 16-22; Salmo 68:5.

Ontulong Balet Aliwan Diad Dominanten Paraan

Sano ontutulong ed abalo, maabig so pagmaliw a malinew tan espisipiko ed itulong balet aliwan diad dominanten paraan. Paliisan so aliwan piho iran komento a singa say, “No walay kaukolan mo ibagam labat ed siak.” Mipadpara itan ed panangibagan, “Naimengan tan napesel [ka] komon” ed sakey a mankayegkeg tan narasan balet ta anggapoy gagawaen mo pian natulongan. (Santiago 2:16) Dakel a totoo so ag-onkerew na tulong sano walay pankaukolan da; imbes, maniirap iran agda ibaga iray kaukolan da. Ta pian natulongan iratan et kaukolan so pakatebek, imanoen no antoray pankaukolan da. Diad biek a dapag, say pandomina​—a panangontrol ed bilay na abalo​—so nayarin mansumpal ed pakasakitan na liknaan odino pakagotgot. Kanian, idadanet na Biblia a kaukolay inkabalansi diad pidedeneng ed arum. Anggaman papasesegen itayon ag-ikibot so personal ya interes ed totoo, papanonotan itayo na satan ya agmagmaliw a mibabali.​—Filipos 2:4; 1 Pedro 4:15.

Impanengneng nen Rut so ontan ya asimbang ya awawey ed si Noemi. Anggaman matoor a nansiansia ed katulangan to, si Rut so agnagmaliw a mapilit odino dominante ed sikato. Sikato so makatunongan a tinmulong, singa say pangala na tagano parad sikaran dua nen Noemi, balet tinumbok to met iray bilin nen Noemi.​—Rut 2:2, 22, 23; 3:1-6.

Siempre, nayarin baleg so pandumaan na pankaukolan na sakey a too ed sananey. Si Sandra, ya asalambit nen niman, so angikuan: “Walad siak so kaukolan ko ed kagogonigon ko​—saray pinabli tan maaron kakaaro a dinmomog ed siak.” Diad biek a dapag, kinaukolan nen Elaine, ya asalambit nen niman, so panaon a manbukbukor ni. Kanian, say pagmaliw a matulong et kabaliksan toy pagmaliw a makatebek tan balansi nipaakar ed panrespeto ed privacy na sakey tan ed pagmaliw ya akaparaan ya ontulong sano kaukolan.

Suporta Manlapud Pamilya

Baleg so nagawaan na maligsa tan maaron pamilya, no bilang wala, pian paseguroan so abalo ya ontalona. Anggaman arum ed membro na pamilya so nayarin nagkalalon makatulong nen say arum, amin so nayarin ontulong. “No wala so balo a wala’ra so anak to odino apo, amtaen na saraya komon ya unona ya ipanengneng so kasimpitan da ed kaamong da’n dili, tan tumangan da so kaatengan da: ta saya sikato so makapalikliket ed arap na Dios.”​—1 Timoteo 5:4.

Diad dakel iran kipapasen, nayarin say pinansyal a suporta odino ‘tumang’ so agla nakaukolan. Arum a balo so walaan na magenap iran tipon parad saray pankaukolan da, tan walaray kinmualipika ed benepisyo ya iiter na gobierno,  a nipapagamor na arum iran bansa. Balet nepeg ya ontulong iray membro na pamilya ed pankaukolan na saray abalo. No anggapoy maapit a kakanayon na abalo pian manuporta ed sikato odino agsarag na saratan a kanayon so ontulong, papasesegen na Kasulatan iray kapananisiaan ya ontulong ed sikato: “Say relihyon a malinew tan andi tilol ed arap na Dios tayo tan Ama sikato ya: Dalawen so saray ulila tan babalo a bibii ed kaermenan da.”​—Santiago 1:27.

Saramay onkiwas unong ed sarayan prinsipyo ed Biblia so talagan ‘mamapagalang ed saray abalo.’ (1 Timoteo 5:3) Say pamagalang ed sakey a too et kabaliksan toy panrespeto ed sikato. Nalikna na totoo a sikara so papablien, aapresiaen, walaan na dignidad no papanengnengan ira na galang. Agda liknaen a tutulongan ira labat na arum lapud naoobliga ira. Anggaman si Rut so abalo ya agano et inggalang to si Noemi diad mabulos tan maaron paneguro a say pisikal tan emosyonal iran pankaukolan nen Noemi et naasikaso. Diad tua, lapud awawey nen Rut et sikaton tampol so akagamor na maabig a reputasyon, a nikuan na magmaliw ya asawa to ed sikato ya: ‘Amin ed syudad na baley ko amta to a sika magalang ka a bii.’ (Rut 3:11) Ontan met, say panangaro nen Noemi ed Dios, say inkamakatunongan to, tan say aralem ya apresasyon to ed saray sagpot nen Rut ed sikato so andi-duaruwan nanliketan nen Rut pian tulongan to. Agaylan maabig ya ehemplo natan si Noemi ed saray abalo!

Onapit ed Dios

Siempre, agnapanoan na saray membro na pamilya tan kakaaro so lugar na inatey ya asawa. Lapud satan a rason et importanti ed inateyan ya onapit a nagkalalo ed “say Ama na saray panangasi tan Dios na ami’ ligliwa. A sikato so manligliwa ed sikatayo ed amin a panermenan tayo.” (2 Corinto 1:3, 4) Konsideraen so alimbawa nen Ana, sakey a debosyonadon balo a manedad lay 84 sanen nianak si Jesus.

Sanen inatey so asawa nen Ana kayari labat na pitoy taon da bilang sanasawa, sikato so inmasingger ed si Jehova parad tambayo. “[Sikato so] agla onaalis ed templo a manlilingkor ed labi tan agew pati panagayunal tan pikakasi.” (Lucas 2:36, 37) Kasin inebatan nen Jehova so maridios a debosyon nen Ana? On! Impanengneng to so aro to ed sikato diad nikadkaduman paraan panamegley na impangiyabuloy ed sikaton nanengneng so ugaw ya ombaleg pian magmaliw a Manangisalba na mundo. Agaylan amaliket tan akaligliwa iya ed si Ana! Malinew a naeksperiensia to so katuaan na Salmo 37:4: “Manliga ka a dili met ed Jehova: et iter to ed sika so saray pirawat na pusom.”

Onkikiwas so Dios Panamegley na Saray Kaparan Kristiano

Si Elaine so angikuan: “Diad abayag a panaon kayari na impatey nen David, walay naliliknak ya ansakit, a singa no kutsilyon ikakalikal ed taglang ko. Abaloan ko no agak natetenawan. Sakey ya agew et linmoor itan kanian inisip koy manpadoktor. Sakey a makatebek ya espiritual ya agin bii tan kaaro so angisuheri ya ompan say paneermen ko so sakey a rason tan pinaseseg to ak ya onkerew na tulong tan tambayo ed si Jehova. Tampol kon dinengel so simbawa to tan impapuson nampikasi ak, a kinerew kon tulongan ak nen Jehova ed paneermen ko. Tan tinulongan to ak!” Nainawaan so liknaan nen Elaine, tan ag-abayag kayari na saman et naandi met so ot-ot a nalilikna to.

Saray matatken ed kongregasyon so nayarin mapangasin kaaroen daray maneermen a balo. Panamegley na panangitarya na regular ya espiritual a suporta tan ligliwa diad mataktika tan makatebek a paraan, makatulong so mamatatken ed sikara a mansiansian maapit ed si Jehova anggaman ed saray kairapan da. No nakaukolan, ontulong met so mamatatken diad pangiyuksoy parad materyal a suporta. Say ontan a maabagey, makatebek a mamatatken so talagan magmaliw ‘ya amotan manlapud dagem.’​—Isaias 32:2; Gawa 6:1-3.

Permanentin Pakaligliwa Manlapud Balon Ari na Dalin

Samay nanliketan nen Ana a nanengneng manga duan libon taon lay apalabas so nagmaliw la natan a Mesianikon Ari na mangatatawen a Panarian. Sayan gobierno so magano lan sigpot a mangekal ed amin a pansesengegan na ermen,  pati say patey. Nipaakar ed saya, inkuan na Apocalipsis 21:3, 4: “Nia, so tabernakulo na Dios wala ed saray totoo . . . Tan punasen to so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.” Kasin naimano yo a sayan teksto so manutukoy ed “saray totoo”? On, nibulos iray totoo manlapud patey tan amin ya ermen tan pannangis ya itatarok na satan.

Balet wala ni so nagkalalon maong a balita! Insipan met na Biblia so kioli na saray inaatey. “Onsabi oras, ya amin so saray wala ed saray lubok narengel da so bosis [nen Jesus] et ompaway ira.” (Juan 5:28, 29) Singa si Lazaro a pinaoli nen Jesus manlapud inaatey, sikara so onoli bilang totoo, aliwan espiritun pinalsa. (Juan 11:43, 44) Saramay ‘manggawa na maabig iran bengatla’ diad saginonor so nitarok la’d inkayadyari bilang totoo tan personal dan gamoran so singa-aman panangasikaso nen Jehova legan a ‘bubuskagen to so lima to, tan pepeneken so pilalek na ami’ bengatlan mabilay.’​—Salmo 145:16.

Saramay naandi’d-bilay so inad-aro ra tan manisia ed sayan seguradon ilalo et naromog dan saya so lapuan na baleg a pakaligliwaan. (1 Tesalonica 4:13) Kanian no sakey kan balo, seguroen moy ‘manpikasi ya andi tunda’ parad pakatambayo tan tulong a kaukolan mo ya inagew-agew pian nasarag mo iray nanduruman pakabebelatan. (1 Tesalonica 5:17; 1 Pedro 5:7) Tan mangigana na panaon ed kada agew pian manbasa na Salita na Dios ta pian say nonot na Dios so manligliwa ed sikayo. No gawaen yo irayan bengatla, personal yon naeksperiensia no panon kayon tulongan nen Jehova a naromog so kareenan anggaman ed amin niran pakasubokan tan angat a kipaarapan yo bilang balo.

[Blurb ed pahina 5]

Say pagmaliw a matulong et kabaliksan toy pagmaliw a balansi nipaakar ed panrespeto ed privacy na sakey tan ed pagmaliw ya akaparaan ya ontulong sano kaukolan

[Litrato ed pahina 7]

Say maedad lan balo a si Ana so benendisionan na Dios