Idayew si Jehova Lapud Angkakabaleg Iran Gawa To!
Idayew si Jehova Lapud Angkakabaleg Iran Gawa To!
“Itandoro na kamarerwak so Katawan [a Jehova] . . . ta say Makapanyari nanggawa ed siak na angkakabaleg a bengatla.”—LUCAS 1:46-49.
1. Lapud antoran angkakabaleg a gawa a makanepegan tayon idayew si Jehova?
SI Jehova so makanepegan a nidayew lapud saray angkakabaleg a gawa to. Sanen insalaysay nen propeta Moises so inkiliktar na Israel manlapud Ehipto, oniay inyabawag to: “Saray matamata yo anengneng da so amin a manuna a gawa nen Jehova.” (Deuteronomio 11:1-7) Mipadpara, sanen inyanunsio nen anghel Gabriel ed sakey a birhen, a si Maria, so kianak nen Jesus, inkuanto: “Itandoro na kamarerwak so Katawan . . . ta say makapanyari nanggawa ed siak na angkakabaleg a bengatla.” (Lucas 1:46-49) Bilang Tastasi nen Jehova, sikato so itatandoro tayo lapud saray angkakabaleg a gawa a singa say inkibulos na Israel manlapud panangaripen na Ehipto tan say mamilagron inkianak na pinabpabli ton Anak.
2. (a) Anto so kabaliksan na “magnayon a gagala” na Dios parad matulok a katooan? (b) Anto so naeksperiensia nen Juan dia ed isla na Patmos?
2 Dakel ed saray angkakabaleg a gawa nen Jehova so misiglaotan ed “magnayon a gagala” to a bendisionan so matulok a katooan panamegley na Mesias tan say uley to ed Panarian. (Efeso 3:8-13, NW) Satan a gagala so progresibon nagagawa sanen nipanengneng ed si masiken lan apostol Juan so pasingawey a nipaakar ed akalukas a puerta ed tawen. Nadngel to so singa-trumpetan bosis a nankuan: “Segep ka dia, tan ipanengneng ko ed sika so saray bengatlan nakaukolan a nagawa ed kayari na saraya.” (Apocalipsis 4:1) Sanen sikatoy imbantak na gobierno na Roma dia ed isla na Patmos ‘lapu ed impansalita nipaakar ed Dios tan impantasi ed si Jesu-Kristo,’ akaawat si Juan na “puyan nen Jesu-Kristo.” Say anengneng tan nadngel na apostol so angiparungtal na dakel a bengatla nipaakar magnayon a gagala na Dios, a mangitatarya na espiritual a pakaliwawaan tan nipanpanaon a panamaseseg ed amin a tuan Kristianos.—Apocalipsis 1:1, 9, 10.
3. Siopa so irerepresenta na 24 a mamatatken ya anengneng nen Juan ed pasingawey?
3 Panamegley na satan ya akalukas a puerta ed tawen, anengneng nen Juan so 24 a mamatatken, a nitrono tan abalangetan a singa arari. Dinmakmomo ira ed arap na Dios tan inkuan da: “Sika so manepeg, Katawan mi tan Dios mi, a mangawat na gloria tan dayew tan pakayari: ta sika pinalsam so lapag a bengatla, tan lapu ed linawam wala ra tan sikara so apalsa.” (Apocalipsis 4:11) Irerepresenta na saratan a mamatatken so amin ya apaolin alanaan a Kristianos diad nitandoron kipapasen da unong ya insipan na Dios parad sikara. Sikara so apakiwas a mangidayew ed si Jehova lapud angkakabaleg iran gawa ton misiglaotan ed palsa. Mankelkelaw tayo met ed ebidensia na ‘andi-anggaan a pakayari tan inkadibino’ nen Jehova. (Roma 1:20) Tan no lalo tayon naaaralan so nipaakar ed si Jehova, lalo itayon nawalaan na rason pian sikatoy itandoro tayo lapud angkakabaleg iran gawa to.
Iyabawag so Makapadinayew Iran Gawa nen Jehova!
4, 5. Mangiter na saray alimbawa no panon so impangidayew nen David ed si Jehova.
4 Indayew na salmistan David so Dios lapud angkakabaleg iran gawa To. Alimbawa, oniay inkanta nen David: “Mankanta kayo na pangidaydayew ed Jehova a manaayam ed Sion; ipaamta yo ed utel na saray katooan so gawagawa to. Kasian moak, O Jehova; imanom so gonigon a liliknaen ko ed saray manggula ed siak, sika a mangitatagey ed siak a manlapu ed saray pinto na ipapatey; pian niparungtal ko so amin a dayew mo. Ed saray pinto na bii ya anak na Sion.” (Salmo 9:11, 13, 14) Kayari ton inter ed ilalak ton si Solomon so desinyo na templo, si David so amendito tan angidayew ed Dios, a kuanto: “Kien mo, O Jehova, so kinabalgan, tan say pakayari, tan say gloria; tan say palabo, tan say katageyan . . . kien mo so nanarian, O Jehova, tan nipaatagey ka a singa ulo ed labas na amin. . . . Natan sirin, Dios mi, misalamat kami ed sika, tan idayew mi so magloria a ngaran mo.”—1 Awaran 29:10-13.
5 Say Kasulatan so aminpigan mangisasagyat—on, mamapaseseg—ed sikatayon idayew so Dios, a singa ginawa la nen David. Wala ed libro na Salmos so dakerakel a balikas na panangidayew ed Dios, tan ngalngali kapaldua na saratan a kanta so nanlapu ed si David. Sikato so naynay ya angidayew tan akisalamat ed si Jehova. (Salmo 69:30) Niarum ni, saray impuyan na Dios a sulsulat nen David tan arum ni so uusaren la nensaman a panaon pian idayew si Jehova.
6. Panon a napaneknekan a mausar ed sikatayo iray apuyanan a Salmos?
6 Agaylan mausar so Salmos parad saray mandadayew ed si Jehova! Sano labay tayoy misalamat ed Dios lapu ed amin ya angkakabaleg iran ginawa to parad sikatayo, marakep no ipaarap tayoray kanonotan tayo ed saray alay santing a balikas a naromog ed Salmos. Singa bilang, no ombangon itayo ed kabuasan, napakiwas itayon mangibalikas ed onia met iran salita: “Say panangiter na saray pisasalamat ed Jehova, sikato so sakey a sankaabigan a pamaakaran, tan say pankanta na saray daydayew na ngaran mo, O Sankatageyan; say panangipanengneng na maaro ya abig na linawam no kabuasan, tan say katooran mo a labilabi, . . . ta sika, Jehova, pinaliket moak ed panamegley na kimey mo: dia ed saray gawagawa na limalimam so panaloan ko.” (Salmo 92:1-4) Sano natalonaan tayo so sakey a babeng ed espiritual ya iyaaligwas tayo, nayarin onkiling itayon mangibalikas na gayaga tan pisasalamat diad pikakasi, unong a ginawa na salmista sanen inkanta to: “O gali dia, ta kantaan tayo si Jehova; manggawa itayo na sakey a magayaga a tanol ya ipaakar ed Batondampay na kilalaban tayo. Ondago itayo ed arapan to a tarok so pisasalamat; tan manggawa itayo na sakey a magayaga a tanol na saray salmo ya ipaakar ed sikato.”—Salmo 95:1, 2.
7. (a) Anto so makatantanda nipaakar ed dakel iran kinanta na saray Kristiano? (b) Anto so sakey a rason pian onsabi itayon masakbay tan mansiansia itayo anggad nasumpal iray miting?
7 Mabetbet tayon ikelyaw iray bosis tayo ed saray kanta na panangidayew ed si Jehova diad saray miting ed kongregasyon, asamblea, tan kombension. Makatantanda ta dakel ed sarayan kanta so nibase ed apuyanan iran punto a nanlapud libro na Salmos. Agaylan liket tayo ta walaan itayo na nipanpanaon a koleksion na saray makapaligsay-puson kanta na panangidayew ed si Jehova! Say pankanta na saray panangidayew ed Dios so sakey a sankaabigan a rason pian onsabi itayon masakbay ed saray aral tayo tan presenti anggad nasumpal, a miulop itayo ed saray kapananisiaan diad panangidayew ed si Jehova panamegley na kanta tan pikakasi.
‘Idayew si Jah, Sikayon Totoo!’
8. Anto so nipabitar ed salitan “Hallelujah,” tan panon itan a kaslakan a nipapatalos?
8 Say panangidayew ed si Jehova so lugan na salitan “Hallelujah,” a transliteration na sakey a Hebreon balikas a naynay lawarin nipatalos ya “Idayew si Jah, sikayon totoo.” Alimbawa, diad Salmo 135:1-3, naromog tayo iyan maligsa, madanet ya imbitasyon: “Idayew yo si Jehova [sikayon totoo]. Idayew yo so ngaran nen Jehova; idayew yo, O sikayon ariripen nen Jehova, sikayo a manaalagey ed abung nen Jehova, dia ed saray panagpasyaran ed abung na Dios tayo. Idayew yo si Jehova; ta si Jehova maong: mankanta kayo na pandayew ed ngaran to; ta sikato so makapalikliket.”
9. Anto so mamapakiwas ed sikatayo a mangidayew ed si Jehova?
9 No momolimolien tayo so makapakelaw iran kimey na Dios ed palsa tan amin a gawa to nisesengeg ed sikatayo, say masimoon ya apresasyon so mamakiwas ed sikatayo a mangidayew ed sikato. Sano morekdeken tayo iray makapakelaw a bengatlan ginawa nen Jehova parad totoo to nensaman, say kapusoan tayo so napakiwas a mangitandoro ed sikato. Tan no dalepdepen tayo iray sipan nipaakar ed angkakabaleg iran bengatlan gawaen ni nen Jehova, mananap tayoray paraan pian nibalikas so panangidayew tan pisasalamat tayo.
10, 11. Panon a say mismon kiwawala tayo so mangiter ed sikatayo na rason pian idayew so Dios?
10 Say mismon kiwawala tayo so mangiter ed sikatayo na makatunongan a rason pian idayew si Jah. Inkanta nen David: “Pisalamatan taka [Jehova] ta makapataktakot tan makapakelkelaw so inkagawa na inkasiak: pankelkelawan so gawagawam; tan kabat a maong na kamarerwak.” (Salmo 139:14) On, sikatayo so ‘makapakelkelaw ya agawa’ tan walaan itayo na mabli iran langkap a singa say pakanengneng, pakadngel, tan abilidad a manisip. Agta nepeg tayo sirin so manbilay ed paraan a makapangidayew ed Nanggawa ed sikatayo? Ontan met so inkuan nen Pablo sanen oniay insulat to: “Anggan mangan kayo sirin, odino oninum, odino antokaman a gawaen yo, gawa yo ya amin ed gloria na Dios.”—1 Corinto 10:31.
11 Gawaen tayon amin so bengatla pian nigloria si Jehova no sikatoy talagan inaro tayo. Inkuan nen Jesus a say pilimeron ganggan et: “Aroen mo so Katawan a Dios mo ed amin a pusom, tan ed amin a kamarerwam, tan ed amin a nonot mo, tan ed amin a biskeg mo.” (Marcos 12:30; Deuteronomio 6:5) Maseguro a nepeg tayon aroen si Jehova tan idayew bilang Nanggawa ed sikatayo tan say Manangiter na “amin a maong a palangkap tan amin ya ayadyarin palangkap.” (Santiago 1:17; Isaias 51:13; Gawa 17:28) Makatunongan itan a gawaen lapud say pakasarag tayon mankatunongan, say espiritual a kapasidad tayo, tan say pisikal a biskeg tayo—amin a kalidades tan abilidad tayo—so nanlapu ed si Jehova. Bilang Manamalsa tayo, sikato so makanepegan na aro tan panangidayew tayo.
12. Anto so liknaan yo nipaakar ed angkakabaleg iran gawa nen Jehova tan saray balikas ed Salmo 40:5?
12 Saray angkakabaleg a gawa nen Jehova so mangiter ed sikatayo na dakerakel a rason pian sikatoy aroen tan dayewen tayo! Oniay inkanta nen David: “Amayamay ira, O Jehova a Dios ko, so saray makapakelaw a gawam a ginawam, tan saray nonot mo nipaakar ira ed sikami: ag-ira nisalaysay a mauksoy ed sika: no komon ta ipaliwawak tan salitaen ko ra, dakel ni ra nen saray nayari a bilangen.” (Salmo 40:5) Agnibinsabinsa nen David, nisay sikatayo, so amin a makapakelaw iran kimey nen Jehova. Balet lawas tayo komon ya idayew so Dios sano nipaimano ed sikatayo so antokaman ed saray angkakabaleg a gawa to.
Saray Gawa a Nisiglaot ed Magnayon a Gagala na Dios
13. Panon a maapit a nisiglaot so ilalo tayo ed saray angkakabaleg a gawa na Dios?
13 Say ilalo tayo ed arapen so maapit a nisiglaot ed angkakabaleg tan makapadinayew iran gawa a misiglaotan ed magnayon a gagala na Dios. Kayari na rebelyon ed Eden, inter nen Jehova so pilimeron propesiya a napnoay-ilalo. Diad impansentensia to ed uleg, oniay inkuan na Dios: “Mangiyan ak na gulaan ed sika tan say bii, tan gulaan ed saray ilalak mo tan ilalak to; sikato sugaten to so ulom, et sika sugaten mo so mukor to.” (Genesis 3:15) Say walan ilalo ed insipan a Bini na bii so nansiansia ed kapusoan na saray matoor a totoo kayari na makatantandan ginawa nen Jehova diad impangiliktar to ed si Noe tan say pamilya to diad ingglobon Delubio a nanyanep ed marelmeng a mundo. (2 Pedro 2:5) Saray mapropetikon sipan ed saray totoo na pananisia a singa si Abraham tan David so angiter na kaaruman ya aralem a pakatalos ed no anto so sumpalen nen Jehova panamegley na satan a Bini.—Genesis 22:15-18; 2 Samuel 7:12.
14. Anto so sankatalonggaringan ya alimbawa na angkakabaleg iran gawa nen Jehova nisesengeg ed katooan?
14 Say sankatalonggaringan a panangiparungtal nen Jehova bilang say nanggawa na angkakabaleg iran gawa nisesengeg ed katooan so agawa sanen inter toy bogbogtong ya Anak to—say insipan a Bini, si Jesu-Kristo—bilang dondon bagat. (Juan 3:16; Gawa 2:29-36) Intarya na dondon so basiyan pian makapipulangan ed Dios. (Mateo 20:28; Roma 5:11) Tinipon nen Jehova diad Kristianon kongregasyon iramay pilimeron akapipulangan, a niletneg nen Pentecostes 33 K.P. Diad tulong na masanton espiritu, impulong da so maong a balita ed nanduruman pasen, a mangipapanengneng ed no panon a say impatey tan inkioli nen Jesus so angilukas na pankanawnawa parad matulok a katooan pian napanggayagaan da so magnayon iran bendision diad silong na uley na mangatatawen a Panarian na Dios.
15. Panon so makapakelaw ya inkiwas nen Jehova diad panaon tayo?
15 Diad panaon tayo, si Jehova so kinmiwas ed makapakelaw a dalan pian tiponen so nakekeraan niran alanaan a Kristiano. Pinokpokan ni iray dagem na kadederal pian natatakan iray nakekeraan na 144,000, a manuley a kaiba nen Kristo diad tawen. (Apocalipsis 7:1-4; 20:6) Sineguro na Dios a saray alanaan a Kristiano so nibulos manlapud espiritual a panangaripen na “Babilonia a Baleg,” say sankamundoan ya empiryo na palson relihyon. (Apocalipsis 17:1-5) Say inkibulos da nen 1919 tan say madibinon proteksion a naeksperiensia da la manlapula’d saman so angiyabuloy ed saray alanaan a nakdaan a manggawa na anto? Pian onsinag diad unor a panagtasi ra sakbay a panganggaen nen Jehova so mauges a sistema na bengabengatla nen Satanas diad manasingger lan “baleg ya irap.”—Mateo 24:21; Daniel 12:3; Apocalipsis 7:14.
16. Anto so nagagawa bilang resulta na peles a sankamundoan a kimey na panangipulong ed Panarian?
16 Saray alanaan a Tastasi nen Jehova so maseseg ya angidaulo ed sankamundoan a kimey na panangipulong ed Panarian. Bilang resulta, say ondaraak a bilang na “arum a karnero” so magmamaliw la natan a managdayew ed si Jehova. (Juan 10:16) Manliket itayo ta lukas ni so pankanawnawa parad saray mauyamo ed dalin pian makapiulop ira ed sikatayo diad panangidayew ed si Jehova. Saramay onkiwas ed imbitasyon a “gala” so makagamor na kilalaban ed baleg a kairapan, tekep na ilalon mangidayew ed si Jehova ed ando lan ando.—Apocalipsis 22:17.
Nilibolibo so Ondadagsa ed Tuan Panagdayew
17. (a) Panon a misiglaotan so panggagawa nen Jehova na angkakabaleg iran gawa ed panagpulong a kimey tayo? (b) Panon a nasusumpal so Zacarias 8:23?
17 Si Jehova so manggagawa natan na angkakabaleg tan makapadinayew iran gawa a misiglaotan ed panagpulong a kimey tayo. (Marcos 13:10) Diad imbeneg iran taon, ‘inlukas to laray angkakabaleg a puerta a mangitonton ed kimey.’ (1 Corinto 16:9) Lapud saya et niyaabawag la so maong a balita ed maawang iran teritorya a datin insebel na kakabusol na katuaan. Dakel ed saray datin nambilay ed espiritual a kabilungetan so onkikiwas la natan ed imbitasyon a dayewen si Jehova. Sikara so manusumpal ed sarayan mapropetikon salita: “Onia so kuan nen Jehova na saray ehersito: Dia ed saraman ya agew nagawa naani a samploran lalaki ompeket ira, naani manlapu ed saray amin a pansasalita na saray nasyon, sikara naani ompeket ed saloy na kawes na saman so Judio, a kuan da, Sikami mila kami naani ed sikayo, ta sikami nadngelan mi a [sikayon totoo] say Dios wala ed sikayo.” (Zacarias 8:23) Sarayan “totoo” et saray espiritual a Judio, say kaplesan a nakdaan na alanaan a Kristianos. Lapud say samplora et mangirerepresenta na inkakompleto ed mangaraldalin a paraan, say “samploran lalaki” so mangirerepresenta ed “baleg ya ulop” ya akiulop ed “Israel na Dios,” pian natipon ira bilang “sakey a pulok.” (Apocalipsis 7:9, 10; Galacia 6:16) Agaylan gayaga so pakanengneng ed dakerakel natan a mankakasakey a mangisasaklang na sagradon panaglingkor bilang managdayew ed si Jehova a Dios!
18, 19. Anto so walan ebidensia a bebendisionan nen Jehova so panagpulong a kimey?
18 Naliliketan itayo ta say pigamplon nilibo—on, nilasus nilibo—so manasayakup ed tuan panagdayew diad daldalin a datin kokontrolen na palson relihyon a singano anggapo lay totoon mangawat ed maong a balita. Bukayen so kaplesan a Yearbook of Jehovah’s Witnesses, tan imanoen iray daldalin a manrereport la natan na manlapud 100,000 anggad ngalngali 1,000,000 a manangipalapag na Panarian. Saya so mabiskeg a prueba a say kimey na panagpulong na Panarian so bebendisionan nen Jehova.—Uliran 10:22.
19 Bilang totoo nen Jehova, dadayewen tan pisasalamatan tayo so mangatatawen ya Ama tayo lapud pangiiter to ed sikatayo na peteg a gagala ed bilay, makapatumang a kimey ed panagserbi ed sikato, tan say masnag ya ilalo ed arapen. Pirmi so panatalaran tayo ed kasumpalan na amin a sipan na Dios tan determinado itayon ‘mansiansia ed panangaro na Dios, a walaan na ilalon andi-anggaan a bilay.’ (Judas 20, 21) Agaylan liket tayon naiimatonan a say baleg ya ulop a mangidadayew ed Dios so manbilang la natan na manga 6,000,000! Tekep na mapatnag a panamendision nen Jehova, saray alanaan a nakdaan tan say kakaiba ran arum a karnero so naorganisa la ed manga 91,000 a kongregasyon ed 235 a daldalin. Amin tayo so natataganon maong ed espiritual lapud tuloytuloy a pansasagpot na “matoor tan makabat ya aripen.” (Mateo 24:45) Say maaligwas a teokratikon organisasyon a walaan na maaron panangasikaso so mangiimaton ed kimey na Panarian panamegley na 110 a sangan opisina na Tastasi nen Jehova. Misalsalamat itayo ta pinakiwas nen Jehova so kapusoan na totoo to a ‘mangigalang ed sikato panamegley na saray ankablin kayarian da.’ (Uliran 3:9, 10) Bilang resulta, say sankamundoan a panagpulong a kimey tayo so mantutultuloy, a walaan na saray pasilidad ed panag-imprinta, saray ayaman a Bethel tan misionaryo, saray Kingdom Hall, tan Assembly Hall a nipapaalagey no nakaukolan.
20. Panon itayon naapektoan ed panmolimoli ed angkakabaleg tan makapadinayew iran gawa nen Jehova?
20 Agtayo nabitlan amin so angkakabaleg tan makapadinayew iran gawa na mangatatawen ya Ama tayo. Balet nitepel kasi na siopaman a maptek-impanpuso so agmibansag ed ulop na saray mandadayew ed si Jehova? Siempre andi! Sirin, komon ta amin a manangaro ed Dios so magayagan onkelyaw na: “Idayew yo si Jehova. Idayew yo si Jehova a manlapu ed saray katawenan: idayew yo ed saray tagetagey. Sikato so idayew yo, amin yo ya angheles to: . . . [sikayon] tobonbalo a lalaki, tan birhenes; mamasiken, tan saray ugugaw: Idayew da so ngaran nen Jehova; ta say ngaran to labat so masuri; say gloria to wala ed tagey na dalin tan katawenan.” (Salmo 148:1, 2, 12, 13) On, natan tan ed ando lan ando, komon ta idayew tayo si Jehova lapud angkakabaleg iran gawa to!
Panon Yon Ebatan?
• Anto so pigara ed saray makapadinayew a gawa nen Jehova?
• Akin a napapakiwas kayon mangidayew ed si Jehova?
• Panon a misiglaotan so ilalo tayo diad angkakabaleg iran gawa nen Jehova?
• Panon a misiglaotan so panggagawa nen Jehova na makapadinayew iran gawa ed kimey a panangipulong ed Panarian?
[Tepetepet Parad Panagaral]
[Litrato ed pahina 10]
Kasin sigpot-puso kayon mibabansag ed saray kanta na panangidayew ed si Jehova?
[Saray litrato ed pahina 13]
Manliket itayo ta lukas ni so pankanawnawa parad saray mauyamo a miulop ed sikatayo diad pandayew ed si Jehova