Panangigiya na Dios ed no Panon so Pampili na Kapareha
Panangigiya na Dios ed no Panon so Pampili na Kapareha
“Bilinen taka tan ibangat taka ed dalan a nepeg mo a laen: simbawaen taka a sinenengneng so matak ed sika.”—SALMO 32:8.
1. Antoran bengatla so nakaukolan parad maaligwas a panangasawa?
SAKEY a sirkero so onikban ed manbanlog a babarasan to, insan ompikos, tan sidudunong a mantelektelek ed tagey. Diad pangigawat to, iyunat toray taklay to insan sampaten met na sakey ya akaulsong ed ombabanlog a barasan manlapud sananey a direksion. Sakey a sankapareha so maasigtan manpapaduyosdos ed sakey ya asikop a yelo (ice-skating). Bigbiglan itagey na samay laki so kapareha to insan to ibuntok ed tagey. Samay bii so mantelektelek ed tagey, tan alay abig so idapo na sakey a sali to, insan mantultuloy iran dua ya onliberliber ed asikop a yelo. Singano mainomay iratan a gawaen. Balet, siopa so manali ed saratan no anggapoy panagpasal to, no anggapoy marunong a kapareha to, tan nagkalautla no anggapoy suston panangigiya tan instruksion ed sikato. Mipadpara, nayarin ontan met so kipapasen ed maong a panamaley. Anggaman ontan, akadependi met itan ed maong a kapareha, panagsagpot a walaan na pantutunosan, tan nagkalalo la, say makabat a simbawa. On, importanti so manepeg a panangigiya.
2. (a) Siopa so angiletneg na uksoyan ed panangasawa, tan ed anton gagala? (b) Panon a gagawaen so pigaran uksoyan ed panangasawa?
2 Natural labat ed sakey a balolaki odino marikit so manisip nipaakar ed kapareha—sakey a kaiba ed bilay. Nanlapula nen inletneg itan nen Jehova a Dios, say panasawa na laki tan bii so normal lan dalan na kabibilay. Balet say pilimeron too, si Adan, so ag-amili na asawa to. Si Jehova so maaron angitarya ed asawaen to. (Genesis 2:18-24) Say pilimeron sanasawa so manparakel ta pian diad kaunoran et say dalin so namakmakan na totoo. Kayari na satan ya inmunan impantekep, saray uksoyan ed panangasawa so kaslakan lan gagawaen na saray atateng na nobya tan nobyo, a no maminsan et kayari lan inabobonan na saramay nalalanor. (Genesis 21:21; 24:2-4, 58; 38:6; Josue 15:16, 17) Anggaman kaslakan ni ed arum a daldalin tan kultura so inyareglo lan panangasawa, dakel natan so manpipili no siopay labay dan asawaen.
3. Panon so nepeg a pampili ed sakey a kapareha?
3 Panon so nepeg a pampili na sakey a kapareha? Arum so naayat ed itsura—no anto so makapaliket tan makaroyroyo ed pakanengneng da. Arum so onnenengneng ed materyal iran gunggona, sakey a mangasikaso ed sikara tan manustuni ed saray nakaukolan tan labay da. Balet wala kasi ed saraya labat a paraan so mansumpal ed maliket tan makapnek a relasyon? “Say dakep sikato so mamalingo, tan say kalimgasan sikato so apa,” so kuan na Uliran 31:30, “balet say bii ya antakot ed Jehova, sikato naani narayew.” Tan walay importantin punto na satan: Ikonsidera si Jehova sano manpipili na kapareha.
Maaron Panangigiya na Dios
4. Anton tulong so intarya na Dios nipaakar ed pampili na kapareha?
4 Say maaron mangatatawen ya Ama tayo, si Jehova, so angitarya na nisulat a Salita to pian mangigiya ed sikatayo ed amin a pamaakaran. Inkuanto: “Siak si Jehova a Dios mo, ya angibangat ed sika na nipaakar ed nabang mo, a mangitonton ed sika ed dalan a laen mo komon.” (Isaias 48:17) Agmakapakelaw sirin so pakaromog ed Biblia na saray asubok la ed panaon a panangigiya diad pampili na kapareha. Labay nen Jehova a magmaliw a magnayon tan maliket so panamaley tayo. Kanian intarya to so tulong ed sikatayo pian natalosan tan niyaplika irayan panangigiya. Agta ontan so ilaloan tayo ed maaron Manamalsa tayo?—Salmo 19:8.
5. Anto so makana parad magnayon a liket ed panangasawa?
5 Sanen inletneg nen Jehova so uksoyan ed panangasawa, ginetma to itan a magmaliw a magnayon a pankasakey. (Marcos 10:6-12; 1 Corinto 7:10, 11) Satan so rason no akin a ‘ginula to so pansian,’ a niyabuloy labat no walay agawan “impilawanan.” (Malaquias 2:13-16; Mateo 19:9) Sirin, say pampili na kapareha so sakey ed sankaseryosoan iran kundang a gawaen tayo tan agbalot itan leglemewen. Nayarin walaray desisyon a posiblin manresulta ed liket odino ermen. Bangta say maong a pakapanpili et mamaabig tan mamenek ed bilay na sakey, say makapuy a pampili so mangitarok na agmanganggan ermen. (Uliran 21:19; 26:21) Pian mantultuloy so liket, importanti so makabat a pampili tan pagmaliw a mabulos ed magnayon a pipapaknaan, lapud inletneg na Dios so panangasawa bilang pan-iba ya ombulaslas ed pantunosan tan pantulongan.—Mateo 19:6.
6. Akin a say babalolaki tan mamarikit so nagkalalo lan manalwar sano manpipili na kapareha, tan panon iran makapanggawa na sankakabatan a desisyon?
6 Nagkalalo lan panalwaran na babalolaki tan mamarikit ya agburagasen na pisikal ya itsura tan mabiskeg ya emosyon so pakatebek da sano manpipili ra na kapareha. On, say relasyon a nibase lambengat ed ontan iran bengatla so mainomay ya ontundas ed pangipulisay odino pambusol ni ingen. (2 Samuel 13:15) Diad biek a dapag, say magnayon ya aroan so nabayuboan leleg a nakakabat tayo so kapareha tayo tan no lalo tayo met a natatalosan so inkasikatayon dili. Nakaukolan tayo met a moriaen a say sankaabigan ed sikatayo et aliwan say pipilaleken na puso tayo ed gapo. (Jeremias 17:9) Satan so rason no akin ya importantin tuloy so panangigiya na Dios a naromog ed Biblia. Ontulong itan ed sikatayo pian natebek so panggawa na sankakabatan iran desisyon ed bilay. Oniay kuan na salmistan angirepresenta ed si Jehova: “Bilinen taka tan ibangat taka ed dalan a nepeg mo a laen: simbawaen taka a sinenengneng so matak ed sika.” (Salmo 32:8; Hebreos 4:12) Anggaman napenek na panangasawa so kasiporan lan pankaukolan tayo na aro tan nakaiba, mangipapaarap met itan na saray angat a mankaukolan na inkatakken tan pakatebek.
7. Akin ya ag-aawaten na arum so nibase’d Biblian simbawa nipaakar ed pampili na kapareha, ingen anto so pansumpalan na sayan kurso?
7 Makabat so italineng ed no anto so ibabaga na Manangigapo na panangasawa nipaakar ed pampili na kapareha. Ingen, nayarin agtayo onabobon a tampol sano say nibase’d Biblia a simbawa so nanlapu ed atateng odino ed Kristianon mamatatken. Nayarin liknaen tayo ya agda itayo sigpot a natatalosan, tan say mabiskeg iran pilalek na emosyon so nayarin mamaskar ed sikatayon ontumbok ed inklinasyon na puso tayo. Balet, no nipaarap tayo la ed aktual a kipapasen, nayarin magbabawi itayo no akin ya agtayo tinalineng so makabat a simbawa a pankaabigan tayo. (Uliran 23:19; 28:26) Nayarin nidunget itayo ed panamaley ya andiay aro, a walaan ni na ananak a mairap ya asikasoen tan agmananisia ni ingen ya asawa. Agaylan makapaermen sano say areglo a mangitarok komon ed sikatayo na baleg a liket et panlapuan na pirmin gonigon!
Maridios a Debosyon—Sakey ya Importantin Basiyan
8. Panon a makatulong so maridios a debosyon ed sakey a panamaley pian manbayag tan mangitarok na liket?
8 Tua, say pakaingganyo na balang sakey so mamaelet ed panamaley. Balet saray maabig a prinsipyo odino kalidad a walad balang sakey so lalo ni ingen ya importanti pian say panamaley so manbayag tan mamawalay liket. Say debosyon na balang sakey ed si Jehova a Dios so manmoldi na magnayon a siglaotan tan mangitandoro na pankakasakey diad paraan ya agnagawaan na arum nin basiyan. (Eclesiastes 4:12) Sano isentro na Kristianon sanasawa so kabibilay da ed tuan panagdayew ed si Jehova, sikara so mankasakey ed espiritual, mental, tan moral a paraan. Manaral iran dua na Salitay Dios. Manpikasi iran dua, tan satan so mamakasakey ed kapusoan da. Saniba iran onla ed saray Kristianon miting tan manulop iran dua diad lawak na kimeyan. Amin na saya so mamaelet ed espiritual a bedber a lalon mamaapit ed balang sakey ed sikara. Nagkalalo ni ingen ya importanti, manresulta itan ed panamendision nen Jehova.
9. Anto so ginawa nen Abraham nipaakar ed impananap na asawaen nen Isaac, tan tekep na anton resulta?
9 Lapud maridios a debosyon to, say matoor a patriarkan si Abraham so nanggunaet a mamaliket ed Dios sanen sinmabi panaon na pampili na asawaen na ilalak ton Isaac. Oniay inkuan nen Abraham ed panmamatalekan ton aripen ed sankaabungan to: “Pansambaen ta ka lapu ed Jehova, a Dios na tawen tan Dios na dalin, ya agka naani mangaala na sakey a paasawam ed ana’ko ed saray bibii ya anak na Canaan, a pibabaleyan ko; noag say onla ka ed dalin ko tan diad saray kakanayon ko, tan mangala ka na sakey a paasawam ed ana’ko ya Isaac. . . . Ibaki [nen Jehova] naani anghel to ed unaan mo, et mangala ka naani sakey a paasawam ed ana’ko a manlapud man.” Pinaneknekan nen Rebeca a sikato so matalonggaring ya asawa, ya inadaro nen Isaac.—Genesis 24:3, 4, 7, 14-21, 67.
10. Antoran Makasulatan ya obligasyon so nipasakbat ed kaasawaan a lalaki tan bibii?
10 No anggapo ni asawa tayo bilang Kristianos, say maridios a debosyon so ontulong ed sikatayo pian nabayuboan iray kalidad ya ontulong ed sikatayon makakapet ed Makasulatan iran kakaukolanen ed panangasawa. Indalatdat nen apostol Pablo so kabiangan na saray obligasyon na kaasawaan a lalaki tan bibii: “Sikayo ya asawan bibii, pauleyan kayo ed saray kaasawaan yo a dili, a singa met ed Katawan. . . . Asawan lalaki, aroen yo so saray kaasawaan yo, a singa met si Kristo ya inaro to so iglesia, tan insaklang to so inkasikato nisengeg ed sikato. . . . Nepeg na saray asawan lalaki a panangaro ra ed saray kaasawaan dan dili a singa panangaro ra ed laman dan dili. . . . Balang sakey aroen to so dilin asawa to a bii a singa dilin laman to; et imanoen to komon a say asawan bii nepeg ton takotan so asawa to.” (Efeso 5:22-33) Unong a naimano tayo, nidanet ed saray apuyanan a salita nen Pablo so pankaukolan na aro tan respeto. Say itulok ed sayan simbawa so mangilalanor ed mapagalang a takot ed si Jehova. Mankaukolan itan na sigpot-puson pipapaknaan, marakep man odino andi so kipapasen. Saray Kristiano a mannononot a mangasawa odino miasawa so nepeg a makayarin manakbat ed sayan responsabilidad.
Say Pandesidi ed No Kapigan so Pangasawa o Piasawa
11. (a) Anto so simbawa na Kasulatan nipaakar ed no kapigan so pangasawa? (b) Anton alimbawa so mangipanengneng ed kakabatan na panumbok ed simbawa na Biblia a nikurit ed 1 Corinto 7:36?
11 Importanti so pangamta no akaparaan tayo lan mangasawa o miasawa. Lapud mandurumaan so balang indibidual, agmangigegetar so Biblia no anto so edad. Balet, ipapabitar na saratan a magmaong so panalagar anggad ‘onlabas ni so bolaklak na taon to,’ sano naburagas ni na mabiskeg a liknaan ed sekso so maong a pakatebek. (1 Corinto 7:36) “Sanen naiimanok a midi-date tan miaasawa la ray kakaarok, a dakel ed sikara et tin-edyer ni, mairap no maminsan ya iyaplika iyan simbawa,” so kuan nen Michelle. “Balet amoriak a sayan simbawa et nanlapu ed si Jehova, tan ibabaga to ed sikatayo lambengat so pankaabigan tayo. Legan a manaalagar ni sakbay a miasawa, niyapasakey koy siglaotan ko ed si Jehova tan akagamor ak na eksperiensia ed bilay, ya agnagawaan legan na inka-tinedyer. Kayari na pigaran taon, akaparaan ak lan mangako ed saray responsabilidad ontan met ed saray probleman onlesa ed panamaley.”
12. Akin a makabat so agpan-apura ed panangasawa o pipiasawa legan a malangwer ni?
12 Saramay apuradon mangasawa o miasawa anggaman ugugaw nira so mabetbet a makamoria a manguman iray pankaukolan tan pilalek da legay itatakken da. Namoria da lanlamang a saray bengatlan karoyroyo ra ed gapo et agla importanti. Sakey a marikit a Kristiano so determinadon miasawa ed edad a 16. Akiasawa so bai to ed ontan ya edad, ontan met ed ina to. Sanen sikatoy agni inasawa na balolakin nagugustoan to ed saman a panaon, sikatoy nampili na sananey a mabulos a mangasawa ed sikato. Balet diad saginonor a bilay to, paneermenan to so maganat ya impandesisyon to.
13. Saramay asakbay ya angasawa o akiasawa so mabetbet a kulang na anton bengatla?
13 Sano mannononot kayo lan mangasawa o miasawa, importanti so pakawalaan na matakken a pakatalos ed amin a nalalanor. Say masakbay a panangasawa so nayarin mangitarok na dakel a problema a nayarin mairap a resolbien na malangwer nin sanasawa. Nayarin kulang ira na eksperiensia tan inkatakken a nakaukolan pian napidenengan daray desdes ed panamaley tan ed panamabaleg na ananak. Nepeg ya onloob tayo ed panangasawa no akaparaan itayo la ed pisikal, mental, tan espiritual a paraan parad magnayon a pakapan-iba.
14. Anto so nakaukolan pian natalonaan so makapadesdes iran situasyon ed panamaley?
14 Insulat nen Pablo a saramay mangasawa o miasawa so ‘walaan naani na irap ed laman.’ (1 Corinto 7:28) Onlesa iray problema lapud mandumaan so personalidad dan dua, tan mandumaan niray panmoria ra. Lapu ed ag-inkayadyari bilang too, nayarin mairap a sumpalen so Makasulatan a betang tayo ed uksoyan na panamaley. (1 Corinto 11:3; Colosas 3:18, 19; Tito 2:4, 5; 1 Pedro 3:1, 2, 7) Nakaukolan so inkatakken tan mabiskeg ya espiritualidad pian naromog tan natumbok so panangigiya na Dios a maaron pakaresolbian na makapadesdes iran situasyon.
15. Anto so betang na atateng diad pangiparaan da ed ananak da parad panangasawa o pipiasawa? Iyilustra.
15 Niparaan na atateng so ananak da ed panangasawa diad panulong ed sikaran makatalos ed kaimportantian na panumbok ed panangigiya na Dios. Diad marunong a pangusar ed Kasulatan tan ed saray publikasyon na Kristiano, natulongan na atateng iray anak da pian nadetermina no kasin sikara odino saray prospektibon kapareha ra so akaparaan lan mipaknaan ed panamaley. * Alikna na 18 años a si Blossom a nagugustoan ton maong so sakey a balolaki diad kongregasyon to. Say agin laki et sigpot-panaon a payunir a ministro, tan labay da lay mankasal. Balet inkerew ed sikato na atateng to a manaalagar nira na sakey taon, ta liknaen dan sikatoy ugaw ni. Oniay insulat ed saginonor nen Blossom: “Misalsalamat ak ta dinengel ko iman a makabat a bilin. Diad loob na sakey taon et medyo tinmakken ak ed panmoriak tan anengneng ko a sayan balolaki so andian na saray kalidad na maong a kapareha. Diad saginonor et intalirak toy organisasyon, tan nipaliis ak ed pakaderalan komon na bilay ko. Alay abig so pakawalaan na atateng a walaan na napanmatalkan a pakatebek!”
‘Miasawa Lambengat Unong ed Katawan’
16. (a) Panon a nasubok iray Kristiano no nipaakar ed ‘piasawa lambengat unong ed Katawan’? (b) Sano natutukson mangasawa o miasawa ed agmananisia, anto so nepeg a molimolien na saray Kristiano?
16 Malinew so bilin nen Jehova ed saray Kristiano: ‘Miasawa lambengat unong ed Katawan.’ (1 Corinto 7:39) Saray Kristianon atateng tan say ananak da so nayarin nasubok ed sayan pamaakaran. Panon ya ontan? Nayarin labay la na saray kalangweran so mangasawa o miasawa, balet anggapoy naromog da ed loob na kongregasyon. Nayarin ontan pa lagi so kipapasen. Nayarin dagdaiset so lalaki nen say bibii ed sakey a lugar, odino nayarin anggapo ni ingen so nanengneng a matukoy ed satan a pasen. Say sakey a balolaki ya aliwan dedikado a membro na kongregasyon so nayarin onggusto ed sakey a marikit a Kristiano (odino kabaliktaran), tan wala so desdes ya ikompromiso iray estandarte ya inletneg nen Jehova. Diad ontan iran kipapasen, maabig a molimolien so alimbawa nen Abraham. Sakey a paraan a pinansiansia to so maabig a siglaotan to ed Dios et say impaneguro ton mangasawa so ilalak ton Isaac na sakey a tuan managdayew ed si Jehova. Ontan met so ginawa nen Isaac ed si ilalak ton Jacob. Saya so nansagpotan a maong na amin a nalalanor, balet amaliket itan ed Dios tan nanresulta ed panamendision to.—Genesis 28:1-4.
17. Akin a nayarin makaapektan maong so pangasawa o piasawa ed agmananisia, tan anto so sankaimportantian a rason pian ‘miasawa lambengat unong ed Katawan’?
17 Diad pigaran kaso, say agmananisia et nagmaliw a Kristiano ed saginonor. Balet, say pangasawa o piasawa ed saray agmananisia so mabetbet a makaapektan maong. Saramay manasawa ya agmankapananisia so walaan na saray nandumaan a sisiaen, estandarte, odino kalat. (2 Corinto 6:14) Walaan iya na makapuy ya epekto ed pitatalosan tan ed liket na panamaley. Singa bilang, sakey a Kristianon bii so naermenan a maong lapud ta no sikatoy onsempet kayari makapabiskeg ya impiaral et agto nitongtong iray espiritual a bengatla ed agmananisian masiken to. Siempre, say mas importanti, say ‘piasawa unong ed Katawan’ et panangipanengneng na katooran ed si Jehova. Sano ontumbok tayo ed Salitay Dios, ag-itayo kondenaen na saray kapusoan tayo, lapud gagawaen tayo so “makapaliket ed imaton to.”—1 Juan 3:21, 22.
18. Sano mannononot a mangasawa o miasawa, antoran importantin pamaakaran so nepeg ya imanoen, tan akin?
18 Sano ninonot lay mangasawa o miasawa, say maabig a walna tan espiritualidad na prospektibon kapareha so nepeg a manunan nengnengen. Say personalidad bilang Kristiano, pati say aro ed Dios tan intiron-kamarerwan debosyon ed sikato, so mas importanti nen say pisikal a pakaayatan. Say abobon na Dios so panggayagaan na saramay mangapresia tan manumpal ed obligasyon da a magmaliw a kapareha a mabiskeg ed espiritual. Tan say sankatalonggaringan a biskeg a nagamoran na sanasawa et manlapud debosyon dan dua ed say Manamalsa tan sigpot a pangawat ed panangigiya to. Diad onian paraan et napagalangan si Jehova, tan say panamaley so onggapo ed putel ya espiritual a pundasyon a mamawala na magnayon a pankasakey.
[Paimano ed leksab]
^ par. 15 Nengnengen so Say Panag-Bantayan na Pebrero 15, 1999, pahina 4-8.
Panon Yon Ebatan?
• Akin a nakaukolan so panangigiya na Dios no manpili na maong a kapareha?
• Panon a paeleten na maridios a debosyon so bedber na panangasawa?
• Panon a niparaan na atateng so ananak da parad panangasawa o pipiasawa?
• Akin ya importanti so ‘piasawa lambengat unong ed Katawan’?
[Tepetepet Parad Panagaral]
[Saray litrato ed pahina 17]
Say pangiyaplika ed simbawa na Dios nipaakar ed pampili na kapareha so manresulta ed pirmin liket
[Saray litrato ed pahina 18]
Say mayaman iran bendision so nagamoran ed ‘piasawa lambengat unong ed Katawan’