Tepetepet Manlapud Saray Managbasa

Kapigan so inkalanaan na “Masanto na Saray Masanto,” a singa nipasakbay ed Daniel 9:24 unong ed New World Translation?

Say Daniel 9:24-27 so propesiyan nipaakar ed kiwawala na “Mesias a Lider”​—say Kristo. Sirin, say nipasakbay a kalanaan na “Masanto na Saray Masanto,” so ag-ontutukoy ed pakalanaan na Sankasantosan a pasen ed templo na Jerusalem. Imbes, say balikas a “Masanto na Saray Masanto” so ontutukoy ed mangatatawen a santuaryo na Dios​—say mangatatawen a Sankasantosan​—diad baleg ya espiritual a templo nen Jehova. *​—Hebreos 8:1-5; 9:2-10, 23.

Kapigan so inggapon inkurang na espiritual a templo na Dios? Bueno, imanoen no anto so agawa sanen impresenta nen Jesus so inkasikato parad bautismo nen 29 K.P. Nanlapula’d saman, sinumpal nen Jesus iray balikas ed Salmo 40:6-8. Diad saginonor, impaimano nen apostol Pablo a nampikasi si Jesus ed Dios: “Bagat tan patanir sikara so agmo ginabay, ingen sakey a laman so imparaan mo ed siak.” (Hebreos 10:5) Amta nen Jesus ya ‘agginabay’ na Dios iray bagat ya ayep a mantultuloy ya iyapay diad templo na Jerusalem. Imbes, intarya nen Jehova so ayadyarin atooan a laman nen Jesus pian iyapay bilang bagat. Diad pangibabalikas na impapuson pilalek to, intuloy nen Jesus: “Nia, siak onsabi ak (dia ed lukot na libro walan nisulat so nipaakar ed siak), pian gawaen ko, O Dios, so linawam.” (Hebreos 10:7) Et anto so ebat nen Jehova? Say ebanghelyo nen Mateo inkuanto: “Et si Jesus, sanen abinyagan la, tinmatdang a tampol a nanlapu ed danum; et nia, alukasan so saray tawen ed sikato, et anengneng to so espiritu na Dios ya onleleksab a singa sakey a malapati, tan oonla ed sikato. Tan nia, sakey a bosis a nanlapu ed saray katawenan a kuanto: Saya so Ana’ko ya inararok; napaliketak a maong ed sikato.”​—Mateo 3:16, 17.

Say impangawat nen Jehova a Dios ed inkisaklang na laman nen Jesus bilang bagat et kabaliksan ton inmapireng so sakey ya altar a babaleg nen say literal ya altar ed templo na Jerusalem. Saya so altar na “linawa” na Dios, odino uksoyan ed pangawat na atooan a bilay nen Jesus bilang sakey a bagat. (Hebreos 10:10) Say inkalanaan nen Jesus na masanton espiritu et kabaliksan ton intarok la natan na Dios so intiron uksoyan to ed espiritual a templo. * Kanian, diad inkabautismoan nen Jesus, say mangatatawen ya ayaman na Dios so alanaan, odino nibiig, bilang “Masanto na Saray Masanto” diad baleg ya uksoyan na espiritual a templo.

[Saray paimano ed leksab]

[Litrato ed pahina 27]

Alanaan so “Masanto na Saray Masanto” sanen abautismoan si Jesus