Report na Saray Manangiyabawag na Panarian

Napnek Iray Pankaukolan To’d Espiritual

SAY CYPRUS so sakey ya isla ed bandad amianen-bukig na Dayat Mediteraneo. Diad panaon na Biblia, say Cyprus so bantog lapud gansa tan de-kalidad iran kiew to. Inyabawag di Pablo tan Barnabas so maong a balita na Panarian ditan legan na inmunan impanbaroy da bilang misionaryo. (Gawa 13:4-12) Natan et siansia nin positibo so epekto na maong a balita ed bilay na dakel a taga-Cyprus. Maseguron saya so tua ed biang nen Lucas, sakey a lakin masulok lan 40 to. Oniay insalaysay to:

“Nianak ak ed pamilya a walaay pitoran ananak diad sakey a rantso. Nanlapula’d inkaugaw ko et panliketan ko lay manbasa. Say labalabay kon libro et samay ibubulsan edisyon na Kristianon Griegon Kasulatan. Sanen mantaon ak na samplora, pigara’d sikamin sankakaaro so amorma na melag a grupo na panagaral na Biblia. Balet, satan so agnambayag, lapud sikami so tinawag na arum a mamatakken ed purok bilang erehes.

“Diad saginonor, legan na paneeskuelak ed Estados Unidos, akabat koray totoo a nanlalapud nambabangil a relihyon. Satan so anagyat lamet ed interes ko parad espiritual a bengabengatla. Pigay agew ak ya oonla ed librarya na unibersidad lapud panagaral na nanduruman relihyon. Binisitak met so pigaran simbaan, balet anggaman nansagpot ak et siansian agak ni napnek ed espiritual.

“Kayari impangraduar ko et sinmempet ak ed Cyprus tan inawat koy trabaho bilang direktor na sakey a medikal a laboratoryo. Siak so lanang a bibisitaen ed pantratrabahoan ko na sakey a masiken a manngaran na Antonis, sakey ed Tastasi nen Jehova. Balet ta say ibibisita to so inderlaw na Greek Orthodox Church.

“Ag-abayag et siak so binisita na sakey a teologo pian dismayaen toak a mitongtong ed Tastasi nen Jehova. Lapud nipabangon ed siak a say Greek Orthodox Church so kawalaan na katuaan, inmabobon ak ya agak la mitongtong ed si Antonis tan inggapok met lay pitongtong nipaakar ed Biblia ed saman a teologo. Binisitak met so dakel a monasteryo ed Cyprus. Linma ak ni ingen ed mamaamianen na Gresya tan binisitak so Mount Athos, ya ipapasen a sankasantosan a palandey diad mundo na Orthodox Christian. Balet siansian agni naebatan iray tepet ko nipaakar ed Biblia.

“Kanian nampikasi ak ed Dios pian tulongan to ak a naromog so katuaan. Kayarin tuloy na satan, siak so binisita lamet nen Antonis ed pantratrabahoan ko, tan liknaen kon saya so ebat ed pikakasik. Kanian intundak lan binisita imay teologo tan impaiyaralan ak na Biblia ed si Antonis. Tuloytuloy so aligwas ko, tan nen Oktubre 1997 et insimbolok so dedikasyon ko ed si Jehova diad bautismo ed danum.

“Diad gapo et sumpa so akulaw ko tan say duaran panguloan ya anak min bibii, a diad saman a panaon et manedad na 14 tan 10 . Balet lapud maong a konduktak, denesidi na akulaw ko so onatendi ed miting diad Kingdom Hall. Nandinayewan ton tuloy so nipalikna’d sikaton kaabigan tan personal ya interes na Tastasi. Nagkalautlan akasagyatan to so panguusar da ed Biblia. Bilang resulta, say asawak tan say duaran panguloan ya anak kon bibii so impaiyaralan na Biblia ed Tastasi nen Jehova. Isipen pay liket ko sanen sikaran talo so nampabautismo ed “Mapropetikon Salita na Dios” a Distriton Kombension nen 1999!

“On, say panaanap ko na katuaan so napnek. Natan et say intiron pamilya mi, pati say akulaw ko tan apatiran ananak mi, so nankakasakey ed puron panagdayew ed si Jehova.”