Onaabanti Lan Mamaarap ed Ultimon Pambiktorya!

“Nia! sakey ya amputin kabayo; tan say sakey ya akayurong ed tapew na satan so walaan na pana; tan niiter ed sikato so sakey a balanget, et sikatoy pinmaway a manatalo tan pian sumpalen to so pananalo to.”​—APOCALIPSIS 6:2 NW.

1. Antoran ebento ed arapen so anengneng nen Juan ed pasingawey?

 PANAMEGLEY na madibinon inkipuyan, anengneng nen apostol Juan so nagawa ed arapen kayari na manga 1,800 a taon tan deneskribe to so inkitrono nen Kristo bilang Ari. Nakaukolan nen Juan so pananisia pian napanisiaan to so anengneng to’d pasingawey. Sikatayo natan so walaan na malinew ya ebidensia a sayan nipasakbay ya inkitrono so agawa nen 1914. Tekep na mata na pananisia, nanengneng tayo si Jesu-Kristo ya ‘ompapaway a manatalo tan pian sumpalen to so pananalo to.’

2. Panon so inkiwas na Diablo ed inkiletneg na Panarian, tan saya so ebidensia na anto?

 ² Kayari na inkiletneg na Panarian, apagit si Satanas manlapud tawen, kanian sikatoy lalon mitutulot tan lalon sinmanok anggano aglan balot ontalona. (Apocalipsis 12:7-12) Nagmaliw a lalon mapeligro iray kipapasen ed mundo lapud sanok to. Ompatnag a nabubuyak lay sosyedad na too. Parad saray Tastasi nen Jehova et saya so malinew ya ebidensia a say Ari ra so onaabanti la ‘pian sumpalen so pananalo to.’

Napoporma so Sakey a Sosyedad Parad Balon Mundo

3, 4. (a) Antoran pananguman ed organisasyon so ginawa ed Kristianon kongregasyon manlapu la nen niletneg so Panarian, tan akin a nakaukolan iratan? (b) Antoy gunggona na sarayan pananguman, unong ya impasakbay nen Isaias?

³ Sanen niletneg so Panarian, panaon la pian pakurangen so nipawil a Kristianon kongregasyon​—a walaan la natan na apadaak iran responsabilidad ed Panarian​—a mas maapit a mitunosan ed padron na inmunan-siglon Kristianon kongregasyon. Kanian, diad saray paway a Hunyo 1 tan 15, 1938, inusisa naThe Watchtower no panon so nepeg ya ikurang na Kristianon organisasyon. Saginonor, say isyu na Disyembre 15, 1971, so mas malinew ya angipabidbir ed kaplesan a Mananguley ya Ulop ed artikulon “Midumaan so Mananguley ya Ulop ed Legal a Korporasyon.” Nen 1972, saray ulop na mamatatken so aturon mangitarya na tulong tan panangidirehi parad lokal iran kongregasyon.

⁴ Say inkipawil na suston panangasikaso so amabiskeg a maong ed Kristianon kongregasyon. Akatulong met ed saya iray probisyon na Mananguley ya Ulop ya ibangat iray mamatatken ed saray obligasyon da, pati say pangipasal ed sikara diad hudisyal iran pamaakaran. Saray  kalkalnan pananguman a mangilalanor ed saray uksoyan na mangaraldalin ya organisasyon na Dios tan saray makagunggonan resulta na saratan so nipasakbay ed Isaias 60:17: “Lapu ed gansa mangyakar ak naani na balitok, et lapu ed balatyang mangyakar ak naani na pilak, et lapu ed kiew mangyakar ak na gansa, tan lapu ed saray bato mangyakar ak na balatyang. Et gawaen ko naani met so saray panuleyen mo a deen, tan saray manamairap mo gawaen ko ra a matunong.” Sarayan positibon pananguman so angipatnag na panamendision na Dios tan pakapatnagan na abobon to ed saramay maseseg a manusuporta ed Panarian to.

5. (a) Panon so inkiwas nen Satanas ed impamendision nen Jehova ed totoo To? (b) Mitunosan ed Filipos 1:7, panon so inkiwas na totoo nen Jehova ed sanok nen Satanas?

⁵ Say maaron panangasikaso tan panangigiya na Dios ed totoo to kayari na inkiletneg na Panarian so naiimano nen Satanas. Alimbawa, nen 1931 et mapublikon inyabawag na sayan melag a grupo na saray Kristiano ya aliwa labat iran Estudyante na Biblia. Mitunosan ed Isaias 43:10, sikara so Tastasi nen Jehova! Nibanbana man odino andi, amalesa so Diablo na dakerakel tan malaklaknab a panamasegsegang ed intiron globo. Anggan diad saray daldalin a kabkabat a walaay kawayangan ed relihyon, a singa say Estados Unidos, Canada, tan Alemanya, aminpigan apaskar iray Tastasi a mibarangkaan diad korte pian napansiansia ra so kawayangan da ed panagdayew. Kasabi 1988, nirepaso na Korte Suprema na E.U. so 71 a kaso a manasaglawi ed saray Tastasi nen Jehova, tan kakatlo ed saratan so apaboran. Natan, diad intiron mundo, saray pibabarangkaan ed korte so nantultuloy kanian niwala so “panangidepensa tan legal a panangiletneg ed maong a balita,” a singa nen inmunan siglo.​—Filipos 1:7, NW.

6. Kasin naamper na saray pananebel tan panameget so iyaabanti na totoo nen Jehova? Iyilustra.

⁶ Legan na dekaday 1930, diad saray panaon ya amantok ed Guerra Mundial II, saray gobiernon diktador so anebel odino ameget ed kimey na saray Tastasi nen Jehova ed Alemanya, España, tan Hapon, diad pamitla lambengat ed talora. Balet diad taon 2000, sayan taloran bansa labat et walaan lay ngalngali 500,000 ya aktibon manangiyabawag na Panarian na Dios. Satan so maminpulo lawari ed karakel na bilang na Tastasi diad intiron mundo nen 1936! Mabitar, saray pananebel tan panameget so agmakaamper ed totoo nen Jehova diad iyaabanti ra ed silong na mananalon Lider da, si Jesu-Kristo.

7. Anton makatantandan ebento so agawa nen 1958, tan anto so makapakelaw ya agawa manlapud saman?

⁷ Agaylan pakapatnagan itan na sayan iyaabanti sanen naimatonan nen 1958 diad New York City so abalbaleg a kombension a ginawa na saray Tastasi nen Jehova, say Divine Will International Assembly, a walaay pantok ya inmatendi a 253,922. Nen 1970 et alukasan la so kimey da ed taloran bansa ya asalambit ed tagey, nilikud ed kabkabat nensaman a Bukig ya Alemanya. Balet saray Tastasi so nasesebelan ni diad abalbaleg ya Unyon Sobyet tan saray nasyones a kaalyado na satan ed Warsaw Pact. Natan, diad sarayan datin Komunistan nasyon, wala la so masulok a kapalduan milyon ya aktibon Tastasi.

8. Anto so resulta na panamendision nen Jehova ed totoo to, tan anto so nikuan ed Watchtower nen 1950 nipaakar ed saya?

⁸ Abendisionan na idaraak iray Tastasi nen Jehova lapud itutultuloy dan ‘anapen nin unona so panarian tan say inkatunong [na Dios].’ (Mateo 6:33) Diad literal a paraan, say propesiya nen Isaias so nasusumpal la: “Say daiset magmaliw naani a sanlibo, et say melag magmaliw naani a mabiskeg a nasyon: Siak, si Jehova, sikato naani gawaen ko a magano ed panaon to.” (Isaias 60:22) Tan tuloytuloy ni so idaraak. Legan na apalabas lambengat a dekada, say bilang na aktibon manangiyalibansa na uley na Panarian so dinmaak ed masulok a 1,750,000 a totoo. Saraya so boluntaryon nagmaliw a kabiangan na sakey a grupo, ya oniay impabitar na 1950 a Watchtower nipaakar ed satan: “Ipaparaan la natan na Dios so sosyedad a parad balon  mundo. . . . Sayan pinagkapundasyon so niliktar ed Armagedon, . . . say pilimeron grupo a nanengneng ya onkurang ed ‘balon dalin’ . . . , a naorganisa ed teokratikon paraan, a sikakabat ed saray totontonen ed panangorganisa.” Oniay impanampot na artikulo: “Onabanti sirin a tuloytuloy, amin tayon sankakaiba, bilang sakey a sosyedad parad balon mundo!”

9. Panon ya apaneknekan a makanakana iray bengatlan naaralan na saray Tastasi nen Jehova ed loob na dakel a taon?

⁹ Kaleganan ni, sayan onaaligwas a sosyedad parad balon mundo so akaaral la no panon a gawaen a maaligwas iray bengatla, ya apaneknekan a makanakana natan tan nayarin angga ni ingen ed panangapiger a kimey kayari na Armagedon. Alimbawa, naaralan la na saray Tastasi so mangorganisa na angkakabaleg iran kombension, mangitarya na maples ya itutulong, tan maples a panagpaalagey na saray bilding. Dakel so mandinayew tan manrerespeto ed saray Tastasi nen Jehova lapud sayan kimey.

Panangipetek ed Saray Lingon Pakamoria

10, 11. Iyilustra no panon a nipetek iray lingon pakamoria ed saray Tastasi nen Jehova.

¹⁰ Anggaman ontan, iyaakusa na arum a totoo a sumlang iray Tastasi nen Jehova ed sosyedad na too. Say manunan rason et say nibase’d Biblian talindeg na saray Tastasi nipaakar ed panagpasaksak na dala, neutralidad, panagsigarilyo, tan moralidad. Balet lalon bibidbiren na publiko a kaukolan a pablien iray panmoria na Tastasi. Alimbawa, tinawagan na sakey a doktora ed Polandiya so administratibon opisina na saray Tastasi nen Jehova tan inkuan ton pigay oras dan impandebatian a kaiba iray kapara ton doktor ed ospital so nipaakar ed panagpasaksak na dala. Ginmapo itan a diskusyon lapud sakey ya artikulon pinmaway ed saman ya agew diad inagew-agew a dyaryo ed Polandiya, say Dziennik Zachodni. Oniay inaksobi na doktora: “Maermen ak a mismo lapud alablabas so inkausar lay dala ed lawak na medisina. Nepeg iyan nauman,  tan maliket ak ta walay angibangon ed sayan tema. Labay koy nawalaan ni na dakel ya impormasyon.”

¹¹ Legan na sakey a komperensia nen imbeneg a taon, saray autoridad ed medisina a nanlapud Canada, Europa, Israel, tan Estados Unidos so aningbat ed pamaakaran a denesinyon ontulong ed saray doktor a manambal ed saray pasienti ya ag-uusaran na dala. Misumlangan ed maslak ya opinyon, nipabitar ed sayan miting ed Switzerland, a diad tua et mas dakel so ompapatey a pasienti a sinaksakan na dala nen saramay pasientin agnampasaksak na dala. Saray Tastasin pasienti so kaslakan ya ag-ombabayag ed ospital nen saramay tatambalen ya uusaran na dala, a bilang resulta et pakagimperan ni na gastos ed panagpatambal.

12. Mangiter na alimbawa ed no panon a nandinayewan na saray prominentin totoo so talindeg na saray Tastasi nen Jehova nipaakar ed neutralidad da ed politika.

¹² Dakel met iray positibon komento nipaakar ed neutral a talindeg na saray Tastasi nen Jehova sakbay tan legan na Guerra Mundial II sanen sinungdoan da so panangataki na Nazi. Say video a Jehovah’s Witnesses Stand Firm Against Nazi Assault, a pinawala na saray Tastasi nen Jehova tan matukoy a nipresenta diad Ravensbrück a panangipangawan a kampo ed Alemanya nen Nobyembre 6, 1996, so nanresulta ed dakel a paborabli iran komento. Diad inagurasyon na ontan met a presentasyon diad kabkabat a panangipangawan a kampo ed Bergen-Belsen nen Abril 18, 1998, oniay inaksobi nen Dr. Wolfgang Scheel, a direktor na Center for Political Education diad Lower Saxony: “Sakey ed saray kababaing a katuaan ed awaran et say impangipulisay na saray Tastasi nen Jehova ed National Socialism a walaay mabiskeg a determinasyon nen saray Kristianon iglesia. . . . Antokaman so nalilikna tayo nipaakar ed saray bangat tan relihyoson inkaseseg na saray Tastasi nen Jehova, say inkapekder da legan na uley na Nazi so makanepegan a respetoen.”

13, 14. (a) Anton makabat ya obserbasyon ed biang na saray inmuunan Kristiano so nanlapu ed sakey a toon ag-inilaloan a mansalita? (b) Mangiter na saray alimbawa na paborabli iran komento nipaakar ed totoo na Dios natan.

¹³ Sano pabor ed saray Tastasi nen Jehova iray prominentin indibidual odino saray desisyon ed korte nipaakar ed saray kontrobersyal iran isyu, nayarin nabawasan so panangidumaduma tan magmaliw a lalon positibo so panmoria ed saray Tastasi. Saya so mabetbet a mangilulukas na pankanawnawa pian nakatongtong so totoon agnin balot apitongtongan. Papablien sirin iratan ya agawaan, tan saratan so peteg ya aapresiaen na saray Tastasi nen Jehova. Saya so mangipanonot ed sikatayo ed say agawa nen inmunan-siglo diad Jerusalem. Sanen say Sanhedrin, say atagey a korte na Judio, so angigagaem a mangupot ed saray Kristiano lapu ed maseseg a panagpulong da, si Gamaliel, a “makabat ed ganggan, tan toon magalang ed baley,” so amasakbay tan inkuanto: “Sikayo, lalaki a taga-Israel, manlikas kayo ed gawaen yo ed sarayan totoo. . . . Agyo pibiangan so sarayan totoo, et paulyan yo ra lambengat: ta no sayan kanonotan odino sayan gawa nanlapu ed saray totoo, nabuyak naani: Balet no nanlapu ed Dios agyo ra nayarian a bagbagen; ompan la ingen no ompatnag kayo a misepakan ed Dios.”​—Gawa 5:33-39.

¹⁴ Singa si Gamaliel, saray prominentin indibidual so agano nin nansalita a pabor ed relihyoson kawayangan na saray Tastasi nen Jehova. Alimbawa, oniay inkatunongan na datin tsirman na International Academy for Freedom of Religion and Belief: “Saray relihyoson kanepegan na sakey a relihyon so agnepeg ya ibaliwala makasengeg labat ed saray sisiaen da ya ag-aabobonan odino nidumaduma ed sosyedad.” Tan oniay misiglaotan ya intepet na sakey a propesor na sientipikon panagaral ed relihyon diad unibersidad ed Leipzig nipaakar ed sakey a komite a tinugyop na gobierno, a mangimbestiga ed saray tatawagen a relihyoson sekta: “Akin a saray angkekelag a relihyon labat so susurien ya aliwan say duaran angkakabaleg ya iglesia [say Iglesia Katolika Romana tan say Lutheran Church]?” Mainomay tayon naromog so ebat ed saray salita na  sakey a datin Aleman ya opisyal, ya angisulat: “Anggapoy duaruwa a say nandikta ed mapolitikan kurang na [sayan] komite na gobierno et saray panatiko na iglesia.”

Siopa so Ilaloan Tayo Parad Tulong?

15, 16. (a) Akin a limitado so inka-epektibo na kiwas nen Gamaliel? (b) Panon a limitado so agawaan na talora nin maimpluensian indibidual ed biang nen Jesus?

¹⁵ Say imbaga nen Gamaliel so mangipapabitar lambengat ed katuaan ya agbalot onsaew so kimey a susuportaan na Dios. Maseguron agunggonaan iray inmuunan Kristiano ed saray imbaga to ed Sanhedrin, balet agda met nalingwanan a tua iray salita nen Jesus nipaakar ed kapasegsegang na saray patumbok to. Say kiwas nen Gamaliel so angamper ed saray plano na relihyoson lider a mamatey ed sikara, balet ag-itan sigpot ya amatunda ed panamasegsegang, lapud oniay nabasa tayo: “Et inabobonan da so simbawa to, et nen impatawag da so saray apostoles, tan kayari da ran nilewet imbilin da ed sikara ya agda salitaen so ngaran nen Jesus, et imbulos da ra.”​—Gawa 5:40.

¹⁶ Sanen inusay si Jesus et sikatoy sinali nen Poncio Pilato ya ibulos lapud anggapoy naromog ton kasalanan to. Balet sikatoy agtinmalona. (Juan 18:38, 39; 19:4, 6, 12-16) Anggan say duaran membro na Sanhedrin, a si Nicodemus tan si Jose na Arimatea, a pabor ed si Jesus et limitado so agawaan da pian amperen so korte a mandesisyon sumpad si Jesus. (Lucas 23:50-52; Juan 7:45-52; 19:38-40) Limitado lambengat so resulta a nagamoran na totoon mangidepensa ed totoo nen Jehova, antokaman so rason. Saray tuan patumbok nen Kristo so tuloytuloy a busolen na mundo, no panon a sikato met so ginula na mundo. Si Jehova lambengat so panlapuan na nagnap a tulong.​—Gawa 2:24.

17. Anto so realistikon panmoria na saray Tastasi nen Jehova, balet akin ya ag-ira onkakapuy ed determinasyon dan mantultuloy a mangipulong ed maong a balita?

¹⁷ Diad tua, iilaloan na saray Tastasi nen Jehova a mantultuloy ni so panamasegsegang. Ontunda lambengat so isusumpa sano mangangga lay sistema nen Satanas. Ingen, sayan panamasegsegang, anggaman makapasinagem, so agmamatunda ed saray Tastasi diad panusumpal da ed niganggan ed sikara a mangipulong ed Panarian. Akin a napatunda itan, anta tutulongan ira na Dios? Maniilalo ira ed makpel a Lider da, si Jesu-Kristo, bilang say manepeg ya aligen da.​—Gawa 5:17-21, 27-32.

18. Anton kairapan so manatalaran ed saray Tastasi nen Jehova diad arapen, balet kombinsido ira ed anton pansumpalan?

¹⁸ Manlapu la’d inggapo na tuan relihyon, nipaarap itan ed pirmin isusumpa. Satan so magano lan magmaliw a puntirya na inkalapagan a panangataki nen Gog, si Satanas diad niyabeban kipapasen to manlapu la’d inkibasileng to manlapud tawen. Balet mansiansia so tuan relihyon. (Ezequiel 38:14-16) Insan “saray arari na amin a mundo,” diad panangigiya nen Satanas, so “mibakal ira sumpa ed Kordero, et say Kordero sikara so taloen to, ta sikato so Katawan na saray kakatawan, tan Ari na saray arari.” (Apocalipsis 16:14; 17:14) On, say Ari tayo so onaabanti la a mamaarap ed ultimon pambiktorya to tan magano to lan ‘sumpalen so pananalo to.’ Agaylan pribilihyo so piulop ed sikato, lapud amta tayo a diad maganon panaon et anggapo lan balot so onsumpa ed saray mandadayew ed si Jehova sano ikuan dan: ‘Say Dios gampi ed sikami’!​— Roma 8:31; Filipos 1:27, 28.

Kasin Nipaliwawa Yo?

• Anto so ginawa la nen Jehova pian pabiskegen so Kristianon kongregasyon nanlapu la’d inkiletneg na Panarian?

• Anto so ginawa la nen Satanas pian amperen so panumpal nen Kristo ed pananalo to, tan tekep na antoran resulta?

• Anton asimbang a panmoria so nepeg a niwala ed sikatayo nipaakar ed paborablin kiwas na aliwan-Tastasi?

• Anto so magano lan gawaen nen Satanas, tan tekep na anton resulta?

[Tepetepet Parad Panagaral]

[Litrato ed pahina 18]

Saray kombension so pakapatnagan na iyaabanti na totoo nen Jehova

[Saray litrato ed pahina 20]

Say neutralidad na Tastasi legan na Guerra Mundial II so siansia nin mangidadayew ed si Jehova