Pabiskegen so Talek Yo ed si Jehova

Sakey a makapatey a plano so peles a gagawaen. Nantotongtong iray atagey ya opisyal na bansa tan nanpapaknaan day pangiproponi na balon ganggan. Labay dan napapatey so siopaman a manggaway relihyoson panagdayew ya ag-aabobonan na Estado.

KASIN singa pamilyar iya ed sikayo? Say awaran so napno na saray alimbawa na totoo a binmaling ed pamawalay karelmengan panamegley na ganggan. Say inkagawa ya abitla ed tagey so agawa diad Imperyo na Persia diad panaon nen propeta Daniel. Onia so nidatak ed ganggan, a talagan impakseb nen Arin Dario: “Anggan siopa a mankerew ed siopaman a dios odino too ed loob na talomploy agew, ya aliwan dia ed [say] ari, sikato naani nibantak ed ungib na saray leon.”​—Daniel 6:7-9.

Antoy gawaen nen Daniel ed ontan a sesgan napapatey? Mantultuloy ni kasin manmatalek ed Dios to, a Jehova, odino ikompromiso to la tan ontulok ed ganggan na ari? Onia so ibabaga ed sikatayo na rekord: “Sanen si Daniel naamtaan to a say sulat apirmaan, linmoob ed abung to bang saray dorongawen to nilukas ira ed silir to ya arap ed Jerusalem; et tinmalimukor ed saray pueg to ya amitlo ed sanagew, tan akikasi, tan akisalamat ed arap na Dios to, singa ginawa to nen inmuna a panaon.” (Daniel 6:10) Kabkabat la so sinmublay ya agawa. Imbantak si Daniel ed ungib na saray leon lapu ed pananisia to, balet “pinepet [nen Jehova] so sangi na saray leon” tan inliktar to so matoor a lingkor to.​—Hebreos 11:33; Daniel 6:16-22.

 Panaon Parad Dilin-Panangusisa

Natan, saray lingkor nen Jehova so manbibilay ed marawal a mundo, naaabet da iray dakel a sesga ed pisikal tan espiritual a pankaabigan da. Alimbawa, dakel a Tastasi so inatey lapud maruksan pambubusol ed rasa diad pigaran bansa. Diad nanduruman pasen, sasagmaken na saray lingkor nen Jehova so kakulangan na tagano, kairapan ed ekonomya, natural iran desyang, graben sakit, tan arum niran manesesga ed bilay a kipapasen. Kaaruman ni, kaukolan dan sungdoan so panamasegsegang, desdes ed pantratrabahoan, tan nanduruma niran pakatuksoan a manggawa na mauges, amin na saraya so manesesga ed espiritualidad da. On, say baleg a Kabusol, si Satanas, so determinadon mamuyak ed saray lingkor nen Jehova ed antokaman a paraan a matalona.​—1 Pedro 5:8.

Sano nipaarap ed oniaran sirkumstansia, anto so nayarin gawaen tayo? Anggaman natural labat so pakaliknay katatakot sano nasesesga so bilay na sakey, kaukolan a lawas tayon nonoten so panamaseguron salita nen apostol Pablo: “Imbaga [nen Jehova]: Agtaka naani taynan, tan agtaka naani ikaindan. Dia ed ontan nayarian tayo ya ibaga a mataletalek: Say Katawan sikato so mananulong ko; agak naani ontakot: Anto so nayarin gawaen ed siak na too?” (Hebreos 13:5, 6) Makapanmatalek itayo ya ontan met so nalilikna nen Jehova ed saray lingkor to natan. Balet, say pangamta ed sipan nen Jehova et agto kabaliksan a kombinsido itayo la a sikatoy onkiwas ed biang tayo. Importantin tuloy sirin ya usisaen tayo so basiyan no iner so akaletnegan na talek tayo ed si Jehova tan gawaen so anggaay nayarian tayo pian napabiskeg tan namantini itan a talek. No gawaen tayo itan, “say deen na Dios, a talonaan ton amin a pakatalos, bantayan to so kapusoan [tayo] tan saray nonot [tayo] ed Kristo Jesus.” (Filipos 4:7) Insan sano onsabi iray pakasubokan, sikatayoy makapanisip na susto tan sikakabat ya arapen itan.

Basiyan na Panmatalek ed si Jehova

Peteg a walaan tayoy dakel a rason pian manmatalek ed Manamalsa tayo, si Jehova. Say manuna ed saraya et say katuaan a si Jehova so maaron Dios a peteg a mangiyaansakit ed saray lingkor to. Walaray agnabilang ya inkagawa a nirekord ed Biblia a manasaglawi ed maaron panangiyansakit nen Jehova ed saray lingkor to. Diad paneskribe ed panatrato nen Jehova ed apilin totoo to, say Israel, oniay insulat nen Moises: “Sikato so aromog to ed sakey a lawak a dalin, tan dia ed mainggew a mankeliaw a lawak, sikato niliktob to, sikato so nantagano ed sikato, sikato so angasikaso ed sikato a singa bukel na mata to.” (Deuteronomio 32:10) Diad modernon panaon, siansian aasikasoen nen Jehova iray lingkor to, bilang grupo odino bilang indibidual. Alimbawa, sanen naeksperiensia na pigaran Tastasi so graben kakulangan na tagano legan na guerra sibil diad Bosnia, sineguro nen Jehova a naawat da so kakkaukolan iran suplay panamegley na saray makpel a sagpot na agagi ra manlapud Croatia tan Austria, ya angirisgay bilay da a manbaroy ed mapeligron maong a teritorya pian awiten so materyal ya abuloy ed saray agagi ra. *

Lapud si Jehova a Dios so Makapanyarin-amin, seguradon sarag ton protektaan iray lingkor to ed antokaman a sirkumstansia. (Isaias 33:22; Apocalipsis 4:8) Balet anggaman aabuloyan nen Jehova so pigara ed saray lingkor to a paneknekan a matoor anggad patey, siansian susustunien to ra tan tutulongan to ran namantini so integridad da, diad ontan et nasarag day mansiansian agnagiing, magayaga, tan kalmado anggad kasampotan. Nayarian tayo sirin so nawalaan na kompiyansa a singa ed salmista: “Say Dios sikato so salimbengan tayo tan biskeg tayo, sikato so sakey a maparparaan a tulong ed gonigon. Kanian ag-itayo ontakot anggan manguman ni so dalin. Tan anggan saray palandey niyalis ira ed pegley na dayat.”​—Salmo 46:1, 2.

Ipaparungtal met na Biblia a si Jehova so Dios na katuaan. Kabaliksan na saya a lawas ton totooren iray sipan to. Diad tua, sikato so deneskribe na Biblia bilang Dios “ya agto nayari manburi.” (Tito 1:2) Lapud naynay ya ibabaga nen Jehova so inkamabulos ton manalimbeng tan mangisalba ed saray lingkor to, sigpot a makaseguro itayo ya agto labat sarag a gawaen itan noagta akaparaan met a manumpal ed saray sipan to.​—Job 42:2.

 Saray Paraan Pian Napabiskeg so Talek Tayo

Anggaman walaan itayo na amin a rason pian manmatalek ed si Jehova, agtayo nepeg a leglemewen iyan bengatla. Makasengeg ta say mundo ed inkalapagan et walaan na melmelag a pananisia ed Dios, tan say ontan ya awawey so magmainomay a mamakapuy ed talek tayo ed si Jehova. Kanian, kaukolan tayon panseetan a pabiskegen tan mantinien itan a talek. Kabat a maong nen Jehova iya, tan sikatoy angitarya na saray paraan pian nagawaan tayo iya.

Unona ed amin, intarya to so nisulat a Salita to, say Biblia, ya akarekord ditan so dakdakel a makapanyari iran gawa a ginawa to nisengeg ed saray lingkor to. Isipen pa labat, panon kabaleg so kompiyansam ed sakey, no say amtam labat et say ngaran to? No wala bilang et samet labat. Kaukolan a naamtaan mo iray paraan to tan saray gawa to pian nawalaan na kompiyansa ed sikato, agta ontan? Legan a babasaen tan dadalepdepen tayo iratan a salaysay ed Biblia, napaaralem so pikakabat tayo ed si Jehova tan saray makapakelkelaw a paraan to, tan nagkalalon naapresia tayo ya agaylan sikatoy napanmatalkan. Diad ontan et napabiskeg so kompiyansa tayo ed sikato. Angipanengneng na ekselentin ehemplo so salmista sanen inkuanto ed masimoon a pikakasi ed Dios: “Salangbiten ko so saray kimkimey nen Jehova; tan nodnonoten ko so gawam a makapakelaw nen ona. Umamengen ko so amin a kimey mo, tan mandalepdep ak ed saray gawagawam.”​—Salmo 77:11, 12.

Kaaruman ni’d Biblia, walaan itayo na daakan a lapuan na espiritual a tagano diad saray publikasyon ed Biblia ya impalapag na organisasyon nen Jehova. Kalaktip ed sarayan palapagan, mabetbet a walay makapatenyeg iran istorya ed bilay na saray lingkor na Dios ed modernon panaon, a mangipapanengneng no panon ya angitarya si Jehova na tulong tan pakainawaan sanen asagmak da so makapasinagem iran kipapasen. Alimbawa, si Martin Poetzinger, a diad saginonor et nagmaliw a membro na Mananguley ya Ulop na Saray Tastasi nen Jehova, so nansakit na grabe legan a manseserbi bilang payunir ed saray lugar ed Europa ya arawi ed nianakan ton bansa. Anggapoy kuarta to, tan anggapoy doktor a malabay ya onla ed sikato. Balet sikatoy ag-inkaindan nen Jehova. Kabekta, say senior consultant na ospital ed saman a lugar so akatongtong. Lapud mapekder a mananisia ed Biblia, sayan mapangasin laki so angasikaso ed si Brother Poetzinger a singa panangasikaso to ed ilalak to, a ginawa to itan ya anggapoy bayar. Say pambasa ed oniaran personal ya istorya so peteg a mamabiskeg ed talek tayo ed mangatatawen ya Ama tayo.

Sakey nin makanakanan tulong ya itatarya nen Jehova pian napabiskeg so talek tayo ed sikato et say mabmablin pribilihyo a pikakasi. Onia so maaron ibabaga ed sikatayo nen apostol Pablo: “Agkayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo.” (Filipos 4:6) Kabiangan ed “ganagana” et saray liknaan, pankaukolan, katatakotan, tan kapapagaan tayo. No lalon maparanay tan impapuso iray pikakasi tayo, nagkalalon ombiskeg so talek tayo ed si Jehova.

Sanen wadiad dalin si Jesu-Kristo, no maminsan et sikatoy oonlan bukor ed mareen a lugar pian manpikasin agnadisturbo. (Mateo 14:23; Marcos 1:35) Antis a manggawa na saray importantin desisyon, sikato ni ingen so nampikasi ed Ama to a sanlabi. (Lucas 6:12, 13) Agpankelawan no akin a si Jesus so walaan na mabisbiskeg a talek ed si Jehova kanian asungdoan to so sankairapan a subok a nipaarap ed siopaman. Saray unor a balikas to ed panamairapan a kiew so: “Ama, dia ed saray limam imatale’ko so espirituk.” Satan a balikas na inkakompiyansa so pakapatnagan ya anggad kasampotan et ag-abawasan so talek to ed Ama to, anggaman agsinmalet si Jehova pian sikatoy isalba.​—Lucas 23:46.

Sakey ni lamet a paraan pian napabiskeg tayoy  talek tayo ed si Jehova et say regular a pililimog ed saray sigpot-puson manmamatalek ed sikato. Ingganggan nen Jehova ed totoo to a mantitipon a regular pian nagkalalon naamtaan da so nipaakar ed sikato tan pian makapanpapasesegan. (Deuteronomio 31:12; Hebreos 10:24, 25) Say ontan a panlilimog so mamabiskeg na talek da ed si Jehova, ya ontulong ed sikaran nasungdoan so grabe iran subok na pananisia. Diad sakey a bansa na Aprika ya insebel so panagpulong a kimey, saray Tastasi nen Jehova so agpinagamoran na salimbeng na polisya, ag-inikdan na papeles ed panbiahe, na saray marriage certificate, na pakatambal ed ospital, tan sikaray ag-inikdan na trabaho. Sanen binmetag so guerra sibil diad sakey a lugar, saray 39 a membro na asingger a kongregasyon, kaiba iray ugugaw, so nanayam ed loob na ngalngali apat bulan diad silong na abebbeban taytay diad desierto pian naliktaran so panagbomba ed baley da. Diad ontan a graben kairapan, say inagew-agew a panisingbat ed teksto ed Biblia tan ed arum iran miting so amabiskeg a maong ed sikara. Kanian asungdoan da so pirmin subok a nansiansian mabiskeg so espiritualidad da. Sayan eksperiensia so mabitar a mangipapanengneng ed kablian na regular a pililimog ed totoo nen Jehova.

Kaunoran, pian napabiskeg so talek tayo ed si Jehova, kaukolan a mansiansia itayon aktibo ed panagpulong na Panarian na kimey, lawas akaparaan ya inabang ed arum so maong a balita. Saya so naimano ed makatenyeg ya eksperiensia na maseseg a kalangweran a manangipalapag diad Canada a walaan na makapatey a sakit a leukemia. Anggaman grabe so sakit to, labay toy magmaliw a regular payunir, salanti, sakey a sigpot-panaon a ministro. Diad aganon inkepa na sakit to, sikatoy maligsan nan-auxiliary payunir a sakey bulan ed ministeryo. Insan linmoor so kondisyon to, tan sikato so inatey kayari pigaran bulan. Ingen, sikato so nansiansian mabiskeg ed espiritual anggad kasampotan, agkinmapuy a balot so talek to ed si Jehova. Nanonotan ni na ina to: “Anggad kasampotan, mas pampapagaan to so arum nen say sikaton mismo. Pasesegen to ran manaral na Biblia, ya ibabaga to’d sikaran, ‘Mannenengneng itayo diad Paraiso.’”

Paneknekan so Talek Tayo ed si Jehova

“Unong a say laman ya asian ed espiritu et inatey, ontan met say pananisia ya andi gawa inatey.” (Santiago 2:26) Say imbaga nen Santiago nipaakar ed pananisia ed Dios so tua met no nipaakar ed panagmatalek tayo ed Sikato. Anggan panon lay pangibaga tayo a manmamatalek itayo ed Dios, andiay kabaliksan itan likud no ipatnag tayo itan a talek ed saray kiwas tayo. Sigpot a nanmatalek si Abraham ed si Jehova tan pinruebaan to itan a talek diad agmasuyat ya intulok ed saray ganggan To, angga diad punton akaparaan a mangibagat ed anak to, si Isaac. Lapud ontan a matalonggaring a panagmatalek tan katutulok, si Abraham so kabkabat bilang kaaro nen Jehova.​—Hebreos 11:8-10, 17-19; Santiago 2:23.

Agtayo kaukolan ya alagaren nin onsabi so graben pakasubokan antis tayon ipatnag so panagmatalek tayo ed si Jehova. Oniay inkuan nen Jesus ed saray patumbok to: “Say matoor ed dagdaiset, matoor met ed dakel; et say agmatunong ed dagdaiset, aliwa met a matunong ed dakel.” (Lucas 16:10) Nepeg tayon aralen so panmatalek ed si Jehova ed saray inagew-agew a kimey tayo, sikatoy unoren tayo anggan diad saray bengatlan ompatnag ya ag-importanti. Sano naimano tayo iray gunggona lapud ontan a katutulok, napabiskeg so talek tayo ed mangatatawen ya Ama tayo, tan satan so ontulong ed sikatayon arapen so babaleg odino mas makapataktakot a subsubok.

Legan a manasingger so mundo ed kagalpong to, maseguron naeksperiensia na totoo nen Jehova so mas dakel iran subok tan kapeligroan. (Gawa 14:22; 2 Timoteo 3:12) Diad pamayubo na mabiskeg tan sigpot a panagmatalek ed si Jehova natan, makapanilalo tayo a niliktar ed insipan ton balon mundo​—balanglan diad kisalbay bilay ed baleg a kairapan odino diad kioli ed bilay. (2 Pedro 3:13) Komon ta agtayon balot abuloyan so antokaman a kakulangan na talek a maneral ed mabmablin relasyon tayo ed si Jehova. Diad ontan et nibaga met ed sikatayo so singa nibaga ed si Daniel kayarin sikatoy inagwat ed ungib na saray leon: “Anggapo so anggan anto a dumsis ya aromog ed sikato, lapu ed nanmatalek ed Dios to.”​—Daniel 6:23.

[Paimano ed leksab]

[Litrato ed pahina 9]

Say pambasa ed saray istorya ed bilay na matoor iran lingkor nen Jehova, a singa si Martin Peotzinger, so makapabiskeg pananisia