Panangipatua a Mangitonton ed Espiritual ya Iyaabig

“BANGNEN agak oneseesel, saray pukel ko natming ira ed panaglem ko a sanagew. Ta agew tan labi a say limam ambelat nensaman ed siak: say kalambotan ko nagmaliw a kelang na tiagew.” (Salmo 32:3, 4) Nayarin ipapatnag na saratan a maermen a balikas so pirmin ot-ot ed emosyon ya alikna nen Arin David na kadaanan ya Israel, ot-ot ya intarok to’d sikaton dili lapud impangiyamot to imbes ya impatua so sakey a seryoson kasalanan.

Si David so lakin walaan na matalonggaring iran abilidad. Sikatoy sakey a masebeg a mibabakal, marunong ya estadista, manag-anlong, tan musikero. Balet, agto nanmatalkan iray abilidad to, noagta dia ed Dios to. (1 Samuel 17:45, 46) Sikato so atukoy bilang sakey a lakin say puso to so “naskey ed si Jehova.” (1 Arari 11:4) Balet walay kasalanan ya agawa to a makanepegan na panamaat, tan nayarin sinaglawi to itan ed Salmo 32. Makaaral tayo na dakel diad pangusisa ed saray kipapasen ya angitonton ed impankasalanan to. Natebek tayo iray patit a paliisan ontan met a natalosan so pankaukolan na pangipatua ed saray kasalanan tayo pian nipawil so pisisiglaotan tayo ed Dios.

Akapankasalanan so Matoor ya Ari

Say nasyon na Israel so walad pibabakal sumpad saray Amonita, balet si David so walad Jerusalem. Sakey a labi legan a manaakarakar ed toktok na palasyo to, naimano to so biin maganggana a manaames diad sakey ya abung ya asingger ed palasyo. Agpinokpokan nen David so inkasikato tan sikatoy pinilalek ton tuloy. Nen naamtaan ton sikato si Bat-seba, say asawa nen Urias, a sakey a sundalo ed armada to, sikatoy impatawag nen David, tan akikalugoran ed sikato. Sinmabi panaon et pinakabatan nen Bat-seba si David a sikatoy malukon.​—2 Samuel 11:1-5.

Akalotan si David. No niwalwal so kasalanan da, say dusa ran dua et patey. (Levitico 20:10) Kanian sikatoy nanisip na sakey a plano. Pinasempet toy asawa nen Bat-seba, si Urias, manlapud bakal. Kayari ton tinepetan a maong nipaakar ed bakal, binilin nen David si Urias ya onsempet ed abung to. Nanilalo si David a diad onian paraan et napapaway a si Urias so ama na lukon nen Bat-seba.​—2 Samuel 11:6-9.

Agonigon si David ta agnila nen Urias so asawa to. Inkuan nen Urias ya agmakatunongan parad sikato ya onsempet bangta say armada so mipapairapan ed bakal. Sano say Israelitan armada so walad pibabakal, papaliisan na saray lalaki so seksual a piaakdol, anggan diad mismon kaasawaan da. Nepeg day mansiansian malinis unong ed seremonya. (1 Samuel 21:5) Lapud saya et inimbitaan nen David si Urias a midungo ed sikato tan sikatoy binuek to, balet siansian agsinmempet ed asawa to. Kinondena na matoor a kondukta nen Urias so graben kasalanan nen David.​—2 Samuel 11:10-13.

Lalon napapatitan si David na saray nansumpalan na mismon kasalanan to. Diad inkadesperado to et anonotan to so alenleneg a solusyon. Pinapawil toy Urias diad bakal tekep na sakey a sulat ed say heneral na armada, si Joab. Malinew so getma na antikey a sulat: “Ipasen mo si Urias ed arap na ampetang a bakal, tan ontaynan kayo manlapu ed sikato, pian nakabil tan ompatey.” Diad panamegley labat na sulat, ompatnag ya asakbongan na makapanyarin ari iray ginawa to diad impangibaki ed si Urias diad kipapatey to.​—2 Samuel 11:14-17.

Kayarin tuloy na impanermen nen Bat-seba ed say asawa to, sikato so inasawa nen David. Linmabas so panaon, et nianak so anak da. Kaleganan  na sarayan agawgawa, ag-inmesel si David nipaakar ed saray kasalanan to. Nayarin sasalien ton ikatunongan iray ginawa to ed inkasikato. Agta mapagalang so impatey nen Urias ed bakal a singa met ed impatey na arum? Sakey ni, agta sikato so sinmunggay ed ari to diad agto inyakar ed asawa to? Say ‘puson manamalingo’ et usaren toy amin a nengneng na panagkatunongan pian salien ya ipetek so kasalanan.​—Jeremias 17:9; 2 Samuel 11:25.

Saray Lingon Kundang ya Angitonton ed Kasalanan

Panon ya agawaan nen David, a sakey a manangaro na inkatunong, a pinabanday so inkasikato ed pikakalugoran tan impamatey? Saray bukel na kasalanan to so mabitabitar a nitanem ed loob na peryodoy panaon. Nayarin nitepet tayo no akin ya agkaiba nen David iray sundalo to, pian onsuporta ed pibabakal da sumpad saray kakabusol nen Jehova. Diad pisunian, si David so manpapainawa ed palasyo to, a no sikato komon so walad bakalan et agton balot nanonotan so mauges a pilalek to ed asawa na sakey a matoor a sundalo. Natan, sakey a proteksion parad saray tuan Kristiano so aktibon pibibiang ed espiritual iran gegemtan diad saray kongregasyon da tan say maparanay a pibibiang ed say panag-ebanghelyon kimey.​—1 Timoteo 6:12.

Say bilin ed Israelitan ari et manggawa na kopya na Ganggan tan basaen itan ya inagew-agew. Iiter na Biblia so rason parad saya: “Pian naaral to so ontakot ed Jehova a Dios to, pian agamilen so sasalitaen na saya a panamatontonan, tan saray uliran, pian gawaen to ra; pian ag-onkinon so puso to ed saray agagi to, pian ag-onkasipa naani ed ganggan a mamakawanan odino mamakawigi.” (Deuteronomio 17:18-20) Ompatnag a posiblin agtutumboken nen David itan a bilin sanen agawa to irayan graben kasalanan. Say regular a panagaral tan panagdalepdep ed Salita na Dios so seguradon makatulong pian nasalimbengan itayo manlapud gawan mauges diad sarayan maatap a panaon.​—Uliran 2:10-12.

Niarum ni, espisipikon imbaga na say unor ed saray Samploran Ganggan: “Agmo iibegan so asawa na kaparam a too.” (Exodo 20:17) Diad saman a bekta et walaan si David na pigaran asawa tan kabit. (2 Samuel 3:2-5) Balet ag-itan analimbeng ed sikato ya onibeg ed sananey nin makaroyroyon bii. Ipapanonot ed sikatayo na sayan salaysay so inkaseryoso na saray salita nen Jesus: “Balang sakey ya onlimgis ed sakey a bii ed pangagum to, akilawanan la ed sikato diad puso to.” (Mateo 5:28) Imbes ya abuloyan so ontan iran agmanepeg a pilalek, alisto tayon iwaklit iratan ed isip tan puso tayo.

Panagbabawi tan Panangasi

Say malinew a salaysay na Biblia nipaakar ed kasalanan nen David so seguradon ag-insulat pian mamenek ed pilalek na sakey nipaakar ed sekso. Itatarya na rekord ed sikatayo so pankanawnawa a paneknekan so mabiskeg tan makatenyeg a balikas na sakey ed saray matalonggaring a kalidad nen Jehova​—say panangasi to.​—Exodo 34:6, 7.

Kayarin inyanak nen Bat-seba so ugaw a laki, imbaki nen Jehova si propeta Natan pian miarap ed si David. Sakey iyan kiwas na panangasi. No ag-inasinggeran tan nansiansian ag-inmesel si David, nayarin sikato so manpaawet ed gawan kasalanan. (Hebreos 3:13) Makapaliket ta kinmiwas si David unong ed panangasi na Dios. Say mataktika bangta mabitar iran balikas nen Natan so angonigon ed konsiensia nen David, tan mapaabeba ton binidbir a sikatoy nankasalanan ed Dios. Diad tua, say Salmo 51, a manutukoy ed kasalanan nen David nipaakar ed si Bat-seba, so insulat kayari ton nagbabawi tan impatua so graben kasalanan to. Agtayo komon abuloyan so puso tayo a manpaawet no sikatayo so akagawa na seryoson kasalanan.​—2 Samuel 12:1-13.

Si David so aperdona, balet sikatoy agnipaliis ed disiplina odino saray nansumpalan na kasalanan to. (Uliran 6:27) Panon to no ag-adisiplinay David? No imbaliwala labat na Dios so amin a bengatla, saray estandarte to so nibaliwala. Sikatoy magmaliw ya ag-epektibo a singa say Atagey a Saserdoten si Eli, ya agto binaat a tanto iray marelmeng ya ilalak to tan inabuloyan toran mantultuloy ed mauges iran gawa ra. (1 Samuel 2:22-25) Ingen, agkakaputan nen Jehova so sakey a magbabawi ed maaron abig na linawa To. Say panangasi to, a singa makarepresko tan ambetel a danum, so ontulong ed nankasalanan pian nasungdoan iray epekto na kasalanan to. Say inkapetang na panamerdonay Dios tan  say makapabiskeg a pililimog ed saray kaparan managdayew so makapangipawil na espiritualidad na sakey a nankasalanan. On, diad basiyan na dondon nen Kristo, say sakey a magbabawi so makalikna ed “kayamanan na grasya [na Dios].”​—Efeso 1:7.

“Sakey a Malinis a Puso” tan “Matunong ya Espiritu”

Kayarin nampatua si David, sikatoy agsinmuko ed negatibon liknaan na inkaandi-kana. Saray balikas to diad saray salmo ya insulat to nipaakar ed panangipatua so mangipapatnag na impakainawaan to tan say determinasyon to a manlingkor ed Dios a sitotoor. Alimbawa, imanoen pa so Salmo 32. Nabasa tayo diad bersikulo 1: “Mapalar so naperdona so saray insusumlang to, say asakbongan so kasalanan to.” Anggan panon lay kaseryoso na kasalanan, say maliket a pansumpalan so posibli no masimoon so sakey a too ed panagbabawi. Say sakey a paraan pian nipatnag iyan inkasimoon et say pangawat ed sigpot ya eebatan ed saray inkiwas na sakey, singa ginawa nen David. (2 Samuel 12:13) Agto sinalin inkatunongan so inkasikato ed arap nen Jehova odino nanggetman tetelen so arum. Ibabaga na bersikulo 5: “Bidbiren ko so kasalanan ko ed sika, tan say kasulitan ko agko inyamot. Inkuan ko, ipatuak ed Jehova so saray insusunggay ko; et sika perdonaen mo so kasulitan na kasalanan ko.” Mangitatarok na pakainawaan so puron panangipatua, pian agla nagonigon so sakey a too lapud saray apalabas a lingo.

Kayarin akikasi si David parad panamerdona nen Jehova, kinerew to: “Palsaen mo dia ed loob ko so sakey a malinis a puso, O Dios; tan mamasimbalo ka na matunong ya espiritu dia ed loob ko.” (Salmo 51:10) Diad pikekerew to na “sakey a malinis a puso” tan ‘sakey a balon espiritu’ et mangipapatnag a mapaga si David ed makasalanan a tendensia to kanian kinaukolan to so tulong na Dios diad panlinis ed puso to tan manpasimbalo. Imbes ya onsuko ed dilin-panangabagey, sikatoy determinadon mantultuloy ed serbisyo to ed Dios. Impikasi to: “O Jehova, biswaten mo so saray bibil ko; pian say sangik nibesngaw to so dayew mo.”​—Salmo 51:15, NW.

Antoy reaksion nen Jehova ed masimoon a panagbabawi tan determinadon sagpot nen David a manlingkor ed sikato? Inter to’d si David iyan makapaligsay-puson panamaseguro: “Bilinen taka tan ibangat taka ed dalan a nepeg mo a laen. Simbawaen taka a sinenengneng so matak ed sika.” (Salmo 32:8) Panamaseguro iya ed mismon pangiimano nen Jehova ed saray liknaan tan pankaukolan na sakey a magbabawi. Kinmiwas  si Jehova pian ikdan si David na aragdalem a pakatalos, say abilidad a talosan so akindalem a nengneng na saray pamaakaran. No nipaarap ed pakatuksoan diad arapen, nayarian ton tebeken so pansumpalan tan say epekto na saray kiwas to ed arum, tan nayarian toy onkiwas a sikakabat.

Sayan salaysay ed bilay nen David so onkanan pakapasesegan na amin a naplag ed seryoson kasalanan. Diad pangipatua na kasalanan tayo tan pangipanengneng na masimoon a pagbabawi, nipawil tayo so sankablian a kayarian tayo, say pisisiglaotan tayo ed si Jehova a Dios. Say temporaryon ot-ot tan kababaingan a nayarin sungdoan tayo so nagkalalon magmaong nen say panirap a sengeg na ag-iyesel, odino say makadesyang a pansumpalan ed pangiyabuloy na inkasikatayon manpaawet ed rebelyoson kurang. (Salmo 32:9) Imbes, nalikna tayo so petang na panamerdona na maaro, mapangasin Dios, “say Ama na saray panangasi tan Dios na ami’ ligliwa.”​—2 Corinto 1:3.

[Litrato ed pahina 31]

Inilaloan nen David a napaliisan toray pansumpalan na kasalanan to diad impangibaki ed si Urias ed kipapatey to