Siopan Estandarte so Napanmatalkan Yo?

Asagyat so inkaupapet na sakey a bisitan pilpilimero toy linma ed Aprika ed impakanengneng to’d sakey a lakin akaalagey a mapmaptek diad gilig na dalan. Naimano ton kada pigaran minuto, idere na laki iray sali to tan kalkalnan ombiek bangta mapmaptek nin akaalagey. Amoria lanlamang na bisita ed saginonor no akin ya onman so gagawaen na laki. Sikato so manggugunaet manayan nasiruman na poste na telegrapo. Kalkalnan ondedere so anino leleg a say agew ed kaagwan so manguuman na direksion.

SINGA say anino a manguuman lapud agew, saray pakurang tan estandarte na too so mansasalat tan manguman-uman. Diad kasunian, si Jehova a Dios, say “Ama na saray liwawa,” so agmanguman. Insulat nen babangatan a Santiago: “Dia ed sikato anggapo so kasala’to anggan anino na kauuman.” (Santiago 1:17) Inkurit na Hebreon propeta a si Malaquias so deklarasyon a mismo na Dios: “Siak si Jehova, agak manguman.” (Malaquias 3:6) Inkuan na Dios ed nasyon na Israel diad panaon nen Isaias: “Angga ni ed inkamasiken Siak iman, tan angga ni ed panuban awiten ta kayo: ginawak la.” (Isaias 46:4) Kanian, ag-uumanen na onlalabas a panaon so pankompiyansa tayo ed saray sipan na Makapanyarin-amin.

Leksion Manlapud Ganggan

No panon a saray sipan nen Jehova so napanmatalkan tan agmanguman, ontan met iray estandarte to nipaakar ed duga tan aliwa. Kasin pampiaan mo so managlako a manguusar na mandumaan a simbangan, a sakey labat so susto? Seguradon  andi. Ontan met, “say sakey a mauges a simbangan sikato so kagula nen Jehova; balet say maong a simbang sikato so kalikliket to.” (Uliran 11:1; 20:10) Diad Ganggan ya inter nen Jehova ed saray Israelita, inlaktip to iyan bilin: “Agyo gagawaen so kapikewetan ed panangukom, dia ed saray panagsukat na karukey, dia ed saray panimbang odino dia ed kinarakel. Saray nagnap a simbangan, saray nagnap a panimbang, nagnap ya efa, tan sakey a nagnap a hin so nepeg yo ya agamilen: Siak si Jehova a Dios yo, ya angipaway ed sikayod’man ed dalin a Ehipto.”​—Levitico 19:35, 36.

Say intulok ed satan a bilin so angitarok ed saray Israelita na pabor na Dios ontan met na dakel a materyal iran gunggona. Mipadpara, say katooran ed agmanguman iran estandarte nen Jehova, aliwa lambengat ed saray simbang tan sukat noagta diad amin iran aspeto na bilay, so manresulta ed saray bendision parad saray managdayew a manmamatalek ed sikato. Inyabawag na Dios: “Siak si Jehova a Dios mo, ya angibangat ed sika na nipaakar ed nabang mo, a mangitonton ed sika ed dalan a laen mo komon.”​—Isaias 48:17.

Akin ya Onaabeba Iray Estandarte Natan?

Ipapabitar na Biblia so rason no akin ya onaabeba iray estandarte natan. Say unor a libro na Biblia, say Apocalipsis, so aneskribe ed bakal ed tawen, a say resulta na satan so angapekta ed amin a totoo anggad sayan panaon. Oniay insulat nen apostol Juan: “Agawa so sakey a baleg a bakal ed tawen: si Miguel tan saray anghel to pinmaway iran akibakal ed dragon: et samay dragon tan saray anghel to akibakal ira. Et ag-ira analo, tan agmet la aromog so dinan man a pasen da ed tawen. Tan nibantak dia ed dalin so baleg a dragon, say daan ya uleg, a manngaran na Diablo tan si Satanas, a sikato so mantila ed lapag na sankamundoan; nibantak dia ed dalin, tan saray anghel to nibantak ira ya alanor ed sikato.”​—Apocalipsis 12:7-9.

Antoy tampol ya epekto na satan a bakal? Intuloy nen Juan: “Kanian manliket kayo, O katawenan, tan sikayon manaayam ed sikara. Kasi lara so dalin tan dayat: ta say Diablo inmakseb ed sikayo, a wala ed baleg a sanok to, ya amta to a daiset la so panaon to.”​—Apocalipsis 12:12.

Ginmapon ‘kaskasi so dalin’ nen binmetag so Guerra Mundial I nen 1914 ya angitarok met na impanampot na panaon na saray estandarte a duman tuloy natan. “Say Baleg a Bakal na 1914-18 so pakapatnagan na kidumaan na panaon nensaman ed panaon tayo natan,” so inkuan na manag-awaran a si Barbara Tuchman. “Diad impanigway ed dakerakel a bilay a makanakana komon ed tinmumbok iran taon, diad impaneral ed saray tuan sisisiaen, impanguman ed saray ideya, tan impangitarok na agnatambal iran epekto na impakadismaya et nanresulta ed pisikal ontan met ed sikolohikal iran pandumaan na duaran panaon.” Say sananey nin manag-awaran a si Eric Hobsbawm so inmabobon: “Manlapu la’d 1914, walay mapatnag ya iyaabeba na saray estandarte ya ipapasen nensaman bilang normal ed maaligwas iran bansa . . . Agmainomay a tebeken so kalaknab na say makapaermen a kapeles na kipawil  ed dati a say tawag na koma-labinsiam a siglon inmuunan atateng tayo et saray estandarten barbarismo.”

Diad libro ton Humanity​—A Moral History of the Twentieth Century, say autor a si Jonathan Glover so angikuan: “Say sakey a pakabidbiran ed panaon tayo et say kaaandi na say moral a ganggan.” Anggaman panduaruwaan to so moral a ganggan manlapud akinpaway iran lapuan lapud kakukusbo na relihyon diad bandad Sagur na mundo, impasakbay to: “Sikatayo ‘ran andian na mapekder a kombiksion ed relihyoson moral a ganggan so nepeg a siansia nin onaburido ed kaaandi la na satan.”

Say inkaderal ed panagmatalek natan​—balanglan diad komersyo, politika, odino relihyon odino anggan diad personal tan pamilya iran relasyon​—tan say makapataktakot iran pansumpalan, so kabiangan na marelmeng a pakana na Diablo pian mangitarok na irap ed saray manaayam ed dalin. Determinado si Satanas a mibakal anggad kasampotan tan ed pangilanor ton nagalpong met a kaiba iramay amin a manbabanikel a manbilay unong ed saray estandarte na Dios.​—Apocalipsis 12:17.

Wala ni kasi paraan, sakey a solusyon ed kasmak ya impaneral ed panagmatalek? Oniay ebat nen apostol Pedro: “Unong ed sipan [na Dios] alagden tayo so saray tawen a balo tan dalin a balo, a sikara so panayaman na katunongan.” (2 Pedro 3:13) Napanmatalkan tayo itan a sipan lapud aglambengat walaan so Dios na pakayarin manumpal ed gagala to noagta gagarantiyaan to met so kasumpal na satan. No nipaakar ed antokaman a ‘salita ya ompaway ed sangi to’ inyabawag nen Jehova: “Sikato naani ag-ompawil ed siak a paoypaoy, noag ingen sumpalen to naani so kaliktan ko, tan onaligwas naani ed bengatla a pangyakaran ko ed sikato.” Talagan napanmatalkan a sipan!​—Isaias 55:11; Apocalipsis 21:4, 5.

Pambilay Unong ed Saray Estandarte na Dios

Diad mundon walaan na manguman-uman tan onaabeba iran estandarte, pambabanikelan na saray Tastasi nen Jehova a manbilay unong ed saray estandarte ed kondukta ya iyoopresi na Biblia. Bilang resulta, miduma ira ed karaklan, tan saya so mabetbet a manasagyat na imano​—tan panamalaw​—na arum.

Diad sakey a kombension na saray Tastasi nen Jehova diad London, say pinagkasangiyan so tinepetan na sakey a reporter ed TV no kasin saray Tastasi nen Jehova so peteg a Kristianos. Oniay ebat to: “On, petepeteg lapud si Jesus so tutumboken mi. Kasmak so inkasiblet ed mundo, tan sikami so mangiyaapasakey ed si Jesu-Kristo bilang say dalan, say katuaan, tan say bilay. Manisia kami a sikato so Anak na Dios, ya aliwan kabiangan na Trinidad, kanian say pakatalos mi ed Biblia so duma manlapud bantog a relihyon.”

Sanen nipalabas so interbio ed BBC television, sinampotan na reporter so programa diad impangikuan: “Dakdakel ni so naaralan ko no akin ya ontotoktok ed puerta tayo iray Tastasi nen Jehova. Agak ni akanengneng na singa onian 25,000 a totoon masimpit so panangawes tan mauk-uksoy a mankakaiba ed sakey a pasen tan bekta.” Talagan maabig a pantasi manlapud taga-paway a makakaimaton ed kakabatan na itulok ed agmanguman iran estandarte na Dios!

Anggaman nayarin ipulisay na arum so ideyan pambilay unong ed saray estandarten agnanlapud sikara, papasesegen mi kayon usisaen ed mismon Biblia yo tan aralen no antoray estandarte na Dios. Balet agmankontento ed paspasaray a panangusisa. Tumboken so bilin nen apostol Pablo: “Agkayo miaabobon unong ed sayan mundo: noag ingen manguman kayo lapu ed kapasimbalo na kanonotan yo, pian nasali yo no anto so maong, tan makapaliket, tan nasnaspot a linawa na Dios.” (Roma 12:2) Bisitaen yo so Kingdom Hall ed lugar yo, tan kabaten iray Tastasi ditan. Naimano yon ordinaryo met iran totoo a manmamatalek ed saray sipan na Biblia tan ipapatnag day kompiyansa ra ed Dios diad panggugunaet dan manbilay unong ed saray estandarte to.

Say pansiansia ed agmanguman tan napanmatalkan iran estandarte na Dios ed mismon bilay yo so maseguron mangitarok na saray bendision ed sikayo. Talinengen so mismon imbitasyon na Dios: “O no komon ta dinengel mo so saray bilin ko! Dia ed ontan say deen mo singa komon sakey ya ilog, tan say inkatunong mo singa komon daluyon na dayat.”​—Isaias 48:18.

[Saray litrato ed pahina 5]

Natan, wala so inkaderal na panagmatalek diad komersyo, politika, relihyon, tan diad relasyon ed pamilya