Agnalingwanan Iran Impresyon

KADA taon, mandaragup iray Tastasi nen Jehova ed nagkasikasikmat a bansa ra diad saray Kristianon asamblea tan kombension. Gagawaen da iya pian panggayagaan so makapabiskeg ed espiritual a panamilin tan panlilimog. Balet wala niray aspekto na saray pandaragup da a makapangititilak met na agnalingwanan ya impresyon ed saray bisita.

Alimbawa, nen Hulyo 1999, nilibon Tastasi diad Mozambique so nantitipon parad taloy agew a makapabiskeg a “Mapropetikon Salita na Dios” iran Distriton Kombension. Dakel so primero day inmatendi ed kombension. Nandinayew ira aliwa lambengat ed saray salitan nadngel da manlapud plataporma noagta ontan met ed naimatonan da’d kaliberliber da.

Oniay nikomento nipaakar ed Maputo Assembly Hall: “Agko nin balot akanengneng na onian karakep a lugar ed intiron bilay ko! Saray banyo so walaay sabon tan espiho, tan ambalingit ni ingen. Marendeen so kaliberliber, ya anggapo so ingal na mansesebeg ya ugugaw. Tan anggapoy pantutulakan! Naimatonan koray maliket a kalangweran a mantotongtong na makapaseseg a bengatla. Pandinayewan ko met ta amin so akapineng. Diad onsublay et ipilak iray anak ko tan kombinsien koy masiken kon onatendi ed sayan kombension.”

On, say inkamatua, integridad, tan pisikal a kalinisan na saray Tastasi nen Jehova so naiimano. Akin a duma iray Tastasi? Lapud talagan panggugunaetan dan iyaplika so naaaralan da manlapud Biblia. Akin ya agmitipon ed sikara ed sayan taon ed saray kombension da a nagagawa ed interon bansa odino ed sinimba iran miting da diad lokal a Kingdom Hall pian naimatonan yon mismo?

[Litrato ed pahina 32]

ZAMBIA

[Litrato ed pahina 32]

KENYA

[Litrato ed pahina 32]

MOZAMBIQUE