Akin ya Aralen so Biblia?
Akin ya Aralen so Biblia?
SI Bill so ugaw ni, mabiskeg so laman to, de-aral, tan walaan da. Ingen, sikatoy agkontento. Anggapoy direksion na bilay to, tan satan so panaaburidoan ton maong. Diad panaanap to na gagala ed bilay, inusisa toy nanduruman relihyon, balet agto aromog so aanapen to. Nen 1991 akatongtong toy sakey ed saray Tastasi nen Jehova ya angitilak ed sikato na libro a mangisisingbat ed ibabaga na Biblia nipaakar ed kabaliksan na bilay. Inyareglo so panagaral na Biblia pian napaliwawaan si Bill ed sayan tema ontan met ed arum nira.
Nanonotan ni nen Bill: “Agawa so primeron impanaral mi, tan lapud naynay kamin ontutupleg ed Biblia, amtak a saya la imay aanapen ko. Saray ebat ed Biblia so makapalikliket a tuloy. Kayari na satan ya impanaral, nanmaneho ak ya amaarap ed kapalandeyan, inmepas ak ed trak ko, tan kinmelyaw ak na maksil lapud pirmin gayaga. Aliketan ak ta naamtaan kon siansia iray ebat ed tepetepet ko.”
Siempre, aliwan amin a makakaamta ed katuaan na Biblia so literal ya onkelyaw lapud panliket. Mateo 13:44.
Ingen, parad dakel et sakey a makapalikliket ya eksperiensia so pakaamta ed saray ebat ed importante iran tepet nipaakar ed bilay. Mipadparay liknaan da ed laki diad parabolo nen Jesus ya akalmo na kayamanan ya akaamot ed uma. Oniay inkuan nen Jesus: “Dia ed like’to onla tan ilako toy amin a walad sikato, tan saliwen to man ya uma.”—Say Tombok ed Makabaliksan a Bilay
Inumameng nen Bill so manunan tepet ya, Anto so gagala na bilay? Nanggunaetan ya ebatan na saray pilosopo, teologo, tan sientista itan a tepet ed loob la na saray milenyo. Dakerakel lan libro so insulat na saray indibidual a manasalin mangebat ed satan. Sinmaew iray sagpot da, tan dakel so angibaga lan agnaebatan itan a tepet. Ingen, wala so ebat. Anggaman aralem, satan so aliwan komplikado. Satan so impaliwawa diad Biblia. Say tombok ed maliket, makabaliksan a bilay et saya: Kaukolan a walaan itayoy suston relasyon ed si Jehova, say Manamalsa tan mangatatawen ya Ama tayo. Panon tayon nadampot itan?
Ompatnag a walay duaran mankontraan ya aspekto diad iyapit ed Dios. Saramay onaapit ed sikato so namparan ontakot tan mangaro ed sikato. Konsideraen tayo so duaran teksto a manusuporta ed satan. Nensaman, say makabat ya Arin Solomon so maalwar ya angusisa nipaakar ed sankatooan tan inrekord toray nalmoan to diad libro na Biblia ya Eclesiastes. Diad panegek ed saray obserbasyon to et oniay insulat to: “Saya sikato so anggaan na kanonotan; amin, sikara so nadngel: Takotan mo so Dios, tan unoren mo so saray ganggan to; ta saya sikato so katiponan na kanepegan na too.” (Eclesiastes 12:13) Pigaran siglo diad saginonor, sanen tinepetan no anto so sankabalgan a ganggan diad niiter a Ganggan ed si Moises, inmebat si Jesus: “Aroen mo so Katawan a Dios mo ed masimoon a pusom, tan dia ed masimoon a kamarerwam, tan dia ed masimoon a nonot mo.” (Mateo 22:37) Kasin nikaduma parad sika a kaukolan tayon takotan tan aroen so Dios? Usisaen tayo pa so kaimportantian na takot tan aro tan no panon iratan a mamawala na makapenek a relasyon ed Dios.
No Anto so Kabaliksan na Takot ed Dios
Say mapagalang a takot so kaukolan no labay tayon naabobonan so panagdayew tayo ed Dios. Oniay inkuan na Biblia: “Say katatakot ed Jehova sikato so sengeg na kakabatan.” (Salmo 111:10) Insulat nen apostol Pablo: “Wala komon so grasya tayo a sikato so panlingkoran tayo ed Dios na makapaliket ed sikato a tukoyan na galang tan takot.” (Hebreos 12:28) Mipadpara, sakey ya anghel diad pegley na tawen ya anengneng diad pasingawey nen apostol Juan so angigapo na proklamasyon to ed maong a balita diad saray salitan: “Takotan yo so Dios, tan iter yo ed sikato so gloria.”—Apocalipsis 14:6, 7.
Sayan takot ed Dios, a makanakana parad makabaliksan a bilay, so aliwan agmabunigas a takot. Nayarin nalikna tayo so panggiwgiw no taktakoten itayo na maruksa tan mapeligron kriminal. Balet say takot ed Dios—odino maridios a takot—so mapagalang a takot parad say Manamalsa. Kabiangan met na satan so manepeg ya itakot ed agpamaliket ed Dios lapud sikato so Supremon Ukom tan Makapanyarin-amin, a walaan na pakayari tan autoridad a manusa ed saramay ag-ontulok.
Mantunosan so Takot tan Aro
Anggaman kuan, aglabay nen Jehova a saray totoo so manserbi ed sikato lapu labat ta natatakot ira ed sikato. Si Jehova so matalonggaring a tuloy a Dios na aro. Apakiwas si apostol Juan a mansulat: “Say Dios sikato so aro.” (1 Juan 4:8) Maaron tuloy ya akideneng si Jehova a Dios ed katooan, tan labay ton onkiwas iray totoo a mangaro met ed sikato. Balet, panon a mitukoyan so ontan ya aro ed maridios a takot? Diad tua et mantunosan a tuloy iyan dua. Insulat na salmista: “Say pikakaaro ed Jehova wala ed saray ontakot ed sikato.”—Salmo 25:14.
Isipen pa labat so naliliknan respeto tan takot na sakey ya anak ed mabiskeg tan makabat ya ama. Ontan met, satan ya anak so onkiwas ed panangaro na ama. Manmatalek so anak ed ama to tan manilalo ed sikato parad panangiwanwan, a matalek a sayan panangiwanwan so mangitarok na saray gunggona. Mipadpara, no inaro tan tatakotan tayo si Jehova, unoren tayo so panangidirehi to, tan saya so mangunggona ed sikatayo. Imanoen no anto so inkuan nen Jehova nipaakar ed saray Israelita: “O wala komon so onia a nengneng na puso ed loob da, a takotan da ak, tan unoren da a naynay so amin a ganggan ko pian makapaabig ed sikara, tan dia ed saray anak da a siansia lawas!”—Deuteronomio 5:29.
On, say maridios a takot so mangitonton aliwan diad kaaripen noagta diad kawayangan, aliwan diad kaermenan noagta diad panggayaga. Nampropesiya si Isaias nipaakar ed si Jesus: “Say liket to wala naani ed takot ed Jehova.” (Isaias 11:3) Tan insulat na salmista: “Mapalar [“maliket,” NW] so too ya antakot to si Jehova, a maliket a tuloy ed saray ganggan to.”—Salmo 112:1.
Mapatnag, agtayo nayarin takotan odino aroen so Dios no sikato so agtayo kabat. Kanian satan no akin a say panagaral na Biblia et importantin tuloy. Ontulong itan a panagaral ed sikatayo pian natalosan so personalidad na Dios tan pian naapresia so kakabatan na panumbok ed panangidirehi to. Legan ya onaapit itayo ed Dios, labay tayon gawaen so panlabayan to tan napapakiwas itayon unoren iray ganggan to, ta amta tayon saratan so mangunggona ed sikatayo.—1 Juan 5:3.
Makapaliket so pakaamta a say sakey so wala ed dugan dalan na bilay. Ontan so kipapasen nen Bill, ya asalambit ed gapo. Inkuan to ed agano ni: “Diad linmabas a siam taon nanlapula’d inmunan impanaral ko na Biblia, inmelet so relasyon ko ed si Jehova. Samay inmunan impakaliknak na pirmin gayaga so nansumpal ed peteg a maliket a kabibilay. Siak so walaan lawas na positibon panmoria ed bilay. Napno na makabaliksan a kimey iray agew ko, ya aliwan diad andiay gagalan panaanap na liket. Nagmaliw a peteg a persona ed siak si Jehova, tan amtak a sikatoy walaan na masimoon a panangiyansakit ed siak.”
Diad onsublay ya artikulo, konsideraen tayon nagkalalo no panon a say pikakabat ed si Jehova so mangitarok na gayaga tan saray gunggona ed saramay mangiyaplika ed satan ed kabibilay da.
[Blurb ed pahina 5]
Say iyapit ed Dios et kabaliksan toy pangaro tan itakot ed sikato
[Litrato ed pahina 6]
Maliket si Jesus diad intakot ed si Jehova