Kaukolan so Tulong Pian Natalosan so Biblia

SAY Biblia et nikadkaduman libro. Saray managsulat na satan so mangibabagan pinuyanan ira na Dios, tan saray lugan to so mangiiter na dakel a paneknek a say ibabaga ra et tua. (2 Timoteo 3:16) Nilikud ed saratan, ipapanengneng na Biblia no iner so nanlapuan tayo, no akin a wadia itayo, tan no anto so arapen tayo. Maseguron satan so libron makanepegan na panangonsidera tayo!

Nayarin asalim lan abasa so Biblia balet ta nalmoan mon mairap a talosan itan. Anganko et agmo amta no iner so pakaromogan na saray ebat ed tepetepet mo. No ontan, agmo bukbukor. Mipara so kipapasen mo ed samay sakey a laki a nambilay nen inmunan siglo. Sikatoy manbiabiahen akalugan ed karwahe manlapud Jerusalem a mamaarap ed nianakan ton bansa, diad Etiopia. Maksil a manbabasa iyan Etiopen opisyal manlapud mapropetikon libro na Biblia ya Isaias, a nisulat masulok a piton lasus taon lay apalabas.

Bigla, sikatoy imbano na sakey a lakin ombabatik a babansagan toy karwahe. Say laki et si Felipe, sakey a babangatan nen Jesus, tan tinepetan to so Etiope: “Natalosan mo so babasaen mo?” Inmebat so Etiope: “Panon so pakayarik, no anggapo so mangiwanwan ed siak?” Insan to pinasapat si Felipe ed karwahe. Impaliwawa nen Felipe so kabaliksan na babasaen na laki tan intultuloy ton inyabawag ed sikato so “[“maong a balita nipaakar ed,” NW ] si Jesus.”​—Gawa 8:30-35.

 No panon a si Felipe et tinmulong ed samay Etiope nensaman pian natalosan toy Salita na Dios, saray Tastasi nen Jehova natan so ontutulong met ed totoo pian natalosan da so Biblia. Maliket iran ontulong met ed sika. Kaslakan lan sankaabigan so sistematikon panaral ed Biblia, ya onggapo ed saray manunan Makasulatan a bangat. (Hebreos 6:1) Legan kan onaaligwas, nasarag mo lay mangala na tinawag nen apostol Pablo a “taganon anawet”​—salanti, say mas aralem iran katuaan. (Hebreos 5:14) Anggaman say Biblia so aaralen mo, saray arum a publikasyon​—saray katulongan ed panaral na Biblia​—so makatulong ed sika pian naromog tan natalosan iray teksto ed Biblia diad nanduruma iran tema.

Kaslakan lan nayarin iyuksoy so panagaral ed oras tan lugar a kombiniente ed sika. Walaray arum a manaaral ni ingen panamegley na telepono. Say panagaral so aliwan singa paraan ed eskuelaan; satan so diad pribadon paraan pian onadapta ed saray personal a sirkumstansiam, pati ed kabibilay tan ed inaral mo. Agmo kaukolan a bayaran itan a panagaral na Biblia. (Mateo 10:8) Anggapo iray eksamin, tan agka nabaingan. Naebatan so tepetepet mo, tan naaralan mo no panon so onapit ed Dios. Balet, akin a kaukolan mon aralen so Biblia? Konsideraen so pigaran rason no akin a say panagaral na Biblia so mangarum na liket ed bilay mo.