Mibiang diad Liket ed Panangiter!

“Lalo a mapalar so mangiter nen say mangawat.”​—GAWA 20:35.

1. Panon so ya ipapatnag nen Jehova so liket ed panangiter?

 SAY liket ed pakaamta ed katuaan tan saray gunggonan nagamoran ed satan et mabli iran langkap a manlalapud Dios. Saramay makapikakabat ed si Jehova so walaan na dakel a rason a manliket. Balet, anggaman wala so liket ed pakaawat na sakey a regalo, wala met so liket ed pangiter. Si Jehova so Manangiter na “amin a maong a palangkap tan amin ya ayadyarin palangkap,” tan sikato so “maliket a Dios.” (Santiago 1:17; 1 Timoteo 1:11, NW) Inanabang toray makagunggonan bangat ed amin ya ondengel, tan panliliketan to so panguunor na saramay ibabangat to, no panon a saray atateng so manliket sano ontulok so ananak da ed maaron panamilin da.​—Uliran 27:11.

2. (a) Anto so imbaga nen Jesus nipaakar ed panangiter? (b) Anton liket so nalikna tayo sano ibangat tayo ed arum so katuaan na Biblia?

² Ontan met, sanen wadiad dalin si Jesus et panliliketan ton nanengneng so positibon ikikiwas na totoo ed ibabangat to. Inaon nen apostol Pablo so inkuan nen Jesus: “Lalo a mapalar so mangiter nen say mangawat.” (Gawa 20:35) Say liket a nalikna tayo sano ibabangat tayo ed arum so katuaan na Biblia so aliwa lambengat ya inkapnek ya inmabobon so sakey a too ed saray relihyoson sisiaen tayo. Nagkalalo ni nen say satan, manliket itayo lapud amta tayon mangiiter itayo na bengatlan puro tan walaan na magnayon a kablian. Diad pangiter ed espiritual a paraan, natulongan tayo so totoo a nagunggonaan natan tan diad ando lan ando.​—1 Timoteo 4:8.

Say Panangiter so Mangitarok na Liket

3. (a) Panon ya impatnag di apostol Pablo tan Juan so liket da ed impanulong ed arum diad espiritual a paraan? (b) Akin a say panginabang na katuaan na Biblia ed ananak tayo so balikas na panangaro?

³ On, no panon a panliliketan nen Jehova tan si Jesus so panginabang ed saray espiritual a langkap, ontan met ed saray Kristiano. Alikna nen apostol Pablo so liket ed pakaamtan atulongan to  so arum a makaaral ed katuaan na Salitay Dios. Oniay insulat to ed kongregasyon na Tesalonica: “Anto ta so ilalo mi, odino gayaga, odino balanget mi a kidayewan? Aliwa ta [a] sikayo, dia ed arap na Katawan tayo a Jesus dia ed isasabi to? Ta sikayo so gloria mi tan gayaga mi.” (1 Tesalonica 2:19, 20) Diad ontan met a paraan, oniay insulat nen apostol Juan sanen tinukoy toray espiritual ya ananak to: “Anggapo so babaleg a liket ko nen say saya, salanti say pakadngel ko a saray ana’ko manaakar ira ed katuaan.” (3 Juan 4) Isipen met so liket ed pakatulong ed mismon ananak tayo a magmaliw ya espiritual ya ananak tayo! Say pamabaleg ed ananak “ed kadudusa tan panamilin na Katawan” so panangipatnag na panangaro na saray atateng. (Efeso 6:4) Nipapanengneng sirin na atateng a pampapagaan da so magnayon a pankaabigan na malangwer nin ananak da. Sano onkiwas iraya, nalikna na atateng so pirmin liket tan inkapnek.

4. Anton eksperiensia so mangipapabitar ed liket ed espiritual a panangiter?

⁴ Si Dell so sigpot-panaon a payunir a ministro tan walaan na limaran anak. Inkuan to: “Naliliknak iray balikas nen apostol Juan lapud misalsalamat ak ta apatira ed ananak ko so ‘manaakar ed katuaan.’ Amtak a mangitarok na galang tan gloria ed si Jehova sano nankakasakey iray pamilya diad tuan panagdayew, kanian napnapnek ak ed pamebendisyon to ed saray sagpot kon mangipurek na katuaan ed ananak ko. Say alay abig ya iilaloan ya andi-anggaan a bilay diad Paraiso kaiba so pamilyak so mangiiter ed siak na ilalo tan mamapakiwas ed siak a mansungdo anggaman ed saray irap tan babeng.” Makapaermen, sakey ed saray marikit nen Dell so adispelosip ed kongregasyon makasengeg ed agmakristianon kurang. Balet, nanggunaetan nen Dell a pansiansiaen so positibon awawey. “Pirawrawat kon onsabi so agew a manpaabeba tan masimoon ya ompawil so anako ed si Jehova,” so kuanto. “Balet misalamat ak ed Dios ta karaklan ed ananak ko so matoor a manlilingkor ed sikato. Say liket a naliliknak so peteg a mamapabiskeg ed siak.”​—Nehemias 8:10.

 Pamawala na Magnayon a Kakaaro

5. No isesekar tayoy inkasikatayo ed panaggaway babangatan a kimey, anton pakaamta so mangiter ed sikatayo na inkapnek?

⁵ Ingganggan nen Jesus iray patumbok to a manggawa na Kristiano iran babangatan tan ibangat ira nipaakar ed si Jehova tan ed saray kakaukolanen to. (Mateo 28:19, 20) Si Jehova tan Jesus so mabulos a tinmulong ed totoo a makaaral ed dalan na katuaan. Kanian legan ya isesekar tayoy inkasikatayo ed panaggaway babangatan a kimey, panliketan tayo so pakaamtan aaligen tayo so alimbawa nen Jehova tan si Jesus, a singa ginawa na inmuunan Kristianos. (1 Corinto 11:1) Sano mitunos itayo sirin ed Makapanyarin-amin a Dios tan ed inadaro ton Anak, say bilay tayo so nawalaan na peteg a kabaliksan. Agaylan makapaliket so pagmaliw a kabiangan ed saray “kakimeyan” na Dios! (1 Corinto 3:9) Tan agta makapalikliket ya anggan saray anghel so walaan na betang ed sayan kimey na panangipulong ed maong a balita?​—Apocalipsis 14:6, 7.

6. Diad pibibiang tayo ed espiritual a panangiter, siopa so magmaliw a kakaaro tayo?

⁶ Diad tua, no mibibiang itayo ed sayan kimey na espiritual a panangiter, agtayo lambengat magmaliw a kakimeyan na Dios​—sikato so magmaliw a magnayon a kaaro tayo. Lapud pananisia nen Abraham, sikato so atawag a kaaro nen Jehova. (Santiago 2:23) Legan tayon pambabanikelan a gawaen so linawa na Dios, nayarian tayo met so magmaliw a kakaaro na Dios. No gawaen tayo itan, magmaliw itayo met a kakaaro nen Jesus. Inkuanto ed saray babangatan to: “Tinawag takayo a kakaaro, ta amin a bengabengatla a nadngel ko ed Amak impaamtak ed sikayo.” (Juan 15:15) Panliliketan na dakel so pagmaliw a kakaaro na maimpluensian totoo odino atagey iran opisyales, balet ta nayarin nipasen itayo bilang kakaaro na duaran sankatalonggaringan a persona ed intiron uniberso!

7. (a) Panon ya akapawala na peteg a kaaro so sakey a bii? (b) Wala met kasi so ontan ya eksperiensia yo?

⁷ Niarum ni, no tutulongan tayo so totoo a mikabat ed Dios, magmaliw met iran kakaaro tayo, a pakaliknaan tayo na nikaduman liket. Si Joan, a manaayam ed Estados Unidos, so ginmapon angiyaral na Biblia ed sakey a biin manngaran na Thelma. Anggaman sinmumpa so pamilya nen Thelma ed panaaral to, sikatoy nantultuloy tan abautismoan kayari na sakey taon. Oniay insulat nen Joan: “Ag-anampot ed satan so impanulop mi; imbes, nagmaliw itan a pikakaaro a binmayag na ngalngali 35 lan taon natan. Naynay kamin ompaway ed ministeryo tan manulop ed kombension. Diad saginonor, inmalis ak ed balon ayaman ko a 800 a kilometro ed kaarawi. Balet ta nantultuloy si Thelma ya angipawit ed siak na maaro tan makapaligsay-puso iran sulat, ya ibabaga to ed siak a sikatoy manliket no nanonotan toak tan pisasalamatan toak ed impagmaliw kon kaaro tan ehemplo tan angibangat ed sikato na katuaan na Biblia. Say pakawalaan na ontan a maapit tan maaron kaaro so alay abig a tumang ed sagpot kon tinmulong ed sikaton makapikabat ed si Jehova.”

8. Anton positibon awawey so ontulong ed sikatayo diad ministeryo?

⁸ Say ilalon pakaromog na sakey a malabay a manaral na katuaan so ontulong ed sikatayon makapansungdo anggano dakel so nanaabet tayon totoo ya agtanto interesado odino ag-interesado ed Salita nen Jehova. Satan ya agpananginenen so mangipaarap na angat ed pananisia tan panagsungdo tayo. Ingen, makatulong ed sikatayo so positibon awawey. Oniay kuan nen Fausto, a taga-Guatemala: “Sano pupulongan ko so arum, nononoten ko ya alay abig no say toon katongtong ko et magmaliw ya espiritual ya agi. Ikakatunongan kon anggan sakey ed saray nakatongtong ko et nayarin sayakupen to ed saginonor so katuaan na Salitay Dios. Satan a kanonotan so ontutulong ed siak a mantultuloy tan talagan panggagayagaan ko itan.”

Pantipon na Kaykayamanan ed Tawen

9. Anto so imbaga nen Jesus nipaakar ed kaykayamanan ed tawen, tan anto so naaralan tayo ed satan?

⁹ Mairap so panggawa na babangatan, balanglan ananak tayo odino arum niran totoo. Nayarin mankaukolan itan na panaon, anos, tan panagpeleng. Balet, tandaan a dakel so mabulos a manseet pian makatipon na dakerakel iran materyal a kayamanan, bengabengatlan agmangitatarok ed sikara na liket tan ag-itan mansiansia. Imbaga nen Jesus ed saray onderengel ed sikato a magmaong  so pankimey ed espiritual iran bengatla. Inkuanto: “Agkayo mantipon a nipaakar ed sikayo na kaykayamanan ed tapew na dalin, a sikaray deralen na saray bokbok tan lati, tan sikaray kotkoten tan takewen dia na saray matakew. Noag say mantipon kayo a nipaakar ed sikayo na kaykayamanan ed tawen, a diman agderalen na saray bokbok tan lati, tan diman agkotkoten tan agtakewen na saray matakew.” (Mateo 6:19, 20) Diad pangegemtan ed saray espiritual a kalat​—a mangilaktip ed pibiang ed importantin kimey a panaggaway babangatan​—nawalaan itayo na inkapnek ed pakaamtan gagawaen tayo so linawa na Dios tan tumangan to itayo naani. Insulat nen apostol Pablo: “Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to.”​—Hebreos 6:10.

10. (a) Akin a walaan si Jesus na espiritual a kaykayamanan? (b) Panon so impangisekar nen Jesus ed inkasikaton dili, tan anto so baleg a gunggona na satan ed arum?

¹⁰ No manseet itayon manggaway babangatan, mantitipon itayo na “kaykayamanan ed tawen,” a mitunosan ed inkuan nen Jesus. Satan so mangitarok ed sikatayo na liket ed panangiter. No mabulos itayon mangiter, onaligwas itayo. Si Jesus a mismo so matoor a nanlingkor ed si Jehova ed loob na binilyon a taon. Isipen pa so kaykayamanan ya atipon to ed tawen! Anggaman kuan, ag-inanap nen Jesus so mismon pankaabigan to. Insulat nen apostol Pablo: “[Si Jesus] so angiter na inkasikaton dili lapud saray kasalanan tayo, pian iliktar to itayo ed sayan peles a mundo a mauges, unong ed linawa na Dios tan Ama tayo.” (Galacia 1:4) Aliwa lambengat a mabulos si Jesus ya angisekar ed inkasikato diad ministeryo to noagta inter to met so mismon bilay to bilang dondon ta pian nawalaan na pankanawnawa so arum a mantipon met na kaykayamanan ed tawen.

11. Akin a magmaong iray espiritual a regalo nen say materyal iran bengatla?

¹¹ Diad pangibangat ed totoo nipaakar ed Dios, natulongan tayoran makatebek no panon ira met a makapantipon na saray agnaderal ya espiritual a kayamanan. Anto nin babaleg a langkap so nainabang yo? No mangiter kayo na mablin relo, kotse, odino abung ni ingen ed sakey a kaaro, sikato so maseguron misalsalamat tan manliket, tan nalikna yo so liket ed panangiter. Balet anto la so kipapasen na satan a regalo kayari na 20 a taon? Diad 200 a taon? Diad 2,000 a taon? Diad biek a dapag, no isekar yoy inkasikayo ya ontulong ed sakey a too pian makapanlingkor ed si Jehova, sikato so nagunggonaan ed satan a langkap ed ando lan ando.

Anapen Iramay Mankaliktan ed Katuaan

12. Panon so pambubunek na karaklan pian natulongan da so arum diad espiritual a paraan?

¹² Pian makapibiang ed liket ed espiritual a panangiter, akarateng laray totoo nen Jehova ed saray sampot na dalin. Tinaynan na nilibo so ayaman tan pamilya ra pian manmisionaryo ra ed daldalin a nakaukolan niran manaral na lenguahe tan kultura. Arum so inmalis ed arum a lugar na bansa ra a walaan na babaleg a pankaukolan ed saray manangiyabawag na Panarian. Nanaral ni so arum na agda lenguahe, pian nilukas daray balon pankanawnawan makapampulong ed mismon lugar da ed saray totoon nanlapud arum a pasen. Alimbawa, kayari dan apabaleg so duaran ananak da a manlilingkor la natan ed sankamundoan a hedkuarter na Tastasi nen Jehova, sakey a sanasawa ed New Jersey, E.U.A. so ginmapon nampayunir tan nanaral na Intsik. Diad loob na masulok a taloy taon, akapangikondukta ira na panagaral na Biblia ed 74 a totoon mansasalitay Intsik a maneeskuela ed asingger ya unibersidad. Kasin napalaknab yo ni so ministeryo yo ed arum  a paraan ta pian lalon panliketan yo so panaggaway-babangatan a kimey?

13. Anto so nayarin gawaen yo no labay yon mas mabunga so ministeryo yo?

¹³ Nayarin pampipilalekan yo so makapangikondukta na panagaral na Biblia balet ta agyo ni agawaan itan. Diad arum a daldalin et mairap so mananap na saray interesado. Nayarin saray totoon nakakatongtong yo et ag-interesado ed Biblia. No ontan, nayarin salambiten yon naynay so pilalek yo ed pikakasi, a sikakabat kayon interesadon maong si Jehova tan si Jesu-Kristo ed sayan kimey tan iwanwan da kayo a makalmo ed kinmarneron too. Onkerew na saray suhestion ed saray kakongregasyon yo ya eksperiensiadon tuloy odino mas mabunga so ministeryo ra. Anamoten so panangipasal tan saray suhestion a niiiter ed saray Kristianon miting. Gamoran so gunggona ed konseho na saray managbiahen manangasikaso tan saray kaasawaan da. Nagkalalo ed amin, agbalot onsusuko. Oniay insulat na makabat a too: “Dia ed kabuasan itanem mo so binim, tan dia ed labi agmo ipiko so limam; ta agmo amta no anto so onaligwas.” (Eclesiastes 11:6) Kaleganan ni, tandaan iray matoor a totoo a singa si Noe tan Jeremias. Anggaman dagdaiset so kinmiwas a positibo ed pampupulong da, matalona so ministeryo ra. Sankaimportantian, si Jehova so apaliket ed satan.

Gawa Yoy Anggaay Nayarian Yo

14. Panon so panmoria nen Jehova ed saramay tinmakken la ed serbisyo ed sikato?

¹⁴ Nayarin ag-iyabuloy na saray sirkumstansia yo so pankimey a malaem diad ministeryo. Alimbawa, nayarin limitado la so nagawaan yo ed serbisyo ed si Jehova lapud inkatakken. Siansia, tandaan so insulat na makabat a too: “Say ubanan ya ulo sikato so balanget na gayaga; naromog ed dalan na inkatunong.” (Uliran 16:31) Parad si Jehova, say bilay a nausar ed panlingkor ed sikato so makapalikliket. Niarum ni, inkuan na Kasulatan: “Angga ni ed inkamasiken siak [Jehova] iman, tan angga ni ed panuban awiten ta kayo: ginawak la, tan awiten ko naani; on, awiten ko naani, tan yawak.” (Isaias 46:4) Isisipan na maaron mangatatawen ya Ama tayo a sustunien tan tulongan toray matoor ed sikato.

15. Kasin panisiaan yo a natalosan nen Jehova iray kipapasen yo? Akin?

¹⁵ Nayarin manaanos kayo ed sakit, isusumpa na agmananisian asawa, ambelat iran responsabilidad ed pamilya, odino arum niran mairap a problema. Amta nen Jehova iray limitasyon tan kipapasen tayo, tan aaroen to itayo lapud masimoon iran sagpot tayo a manlingkor ed sikato. Tua itan anggano say nagagawaan tayo et daiset no ikompara ed arum. (Galacia 6:4) Amta nen Jehova ya ag-itayo ayadyari, tan sikato so realistiko ed iilaloan to ed sikatayo. (Salmo 147:11) No gawaen tayoy anggaay nayarian tayo, napaseguroan itayo a mabmabli tayo ed imaton na Dios tan agto nalingwanan iray gawa na pananisia tayo.​—Lucas 21:1-4.

16. Diad anton dalan a makapibiang so interon kongregasyon ed panaggaway-babangatan?

 ¹⁶ Nodnonoten met a say panaggaway-babangatan a kimey et sagpot na amin. Anggapo so indibidual a makapanggaway babangatan a bukor, no panon ya agnayarin pabunaen na sankatedter ya uran so sakey a tanaman. Tua, nayarin naromog na sakey a Tasi so interesadon too insan iyaralan to na Biblia. Balet sano miaral la itan ed Kingdom Hall, say intiron kongregasyon so ontulong ed sikato a makapangibiig ed katuaan. Say ligsa na impanaagi so pakapatnagan na impluensia na espiritu na Dios. (1 Corinto 14:24, 25) Saray anak tan tin-edyer so mangiiter na makapasagyat iran komento, a naimatonan na balo ni a miduma iray kalangweran tayo ed saray tobonbalo ed mundo. Saray mansasakit, makapuy la, tan maedad la ed kongregasyon so mangibabangat ed saray balo ni no anto so lalanoren na panagsungdo. Antokaman so edad odino limitasyon tayo, amin tayo so walaan na importantin betang ed pananulong ed saray balo ni pian onaralem so aro ra ed katuaan na Biblia tan onaligwas ira anggad manpabautismo ira. Singa agtanton importante so kada oras ya usaren tayo ed ministeryo, kada panagpawil, kada pitongtong ed sakey ya interesado ed Kingdom Hall, balet kabiangan itan na abalbaleg a kimey a gagawaen nen Jehova.

17, 18. (a) Nilikud ed panaggaway-babangatan a kimey tayo, panon so pakapibiang tayo ed liket ed panangiter? (b) Diad pibiang tayo ed liket ed panangiter, siopa so aaligen tayo?

¹⁷ Siempre, nilikud ed pibibiang ed importantin panaggaway-babangatan a kimey, sikatayo bilang Kristiano so mibibiang met ed liket ed panangiter diad arum a paraan. Nayarian tayoy mangigana na materyal iran pundo pian nasuportaan so puron panagdayew tan natulongan iramay mankaukolan. (Lucas 16:9; 1 Corinto 16:1, 2) Anapen iray pankanawnawa ya ipatnag so panagparawes ed arum. (Roma 12:13) Napambanikelan tayo so ‘manggawa na maabig ed saray amin, nagkalalo ed saray kaamong na pananisia.’ (Galacia 6:10) Tan diad simpli ingen ta importante iran paraan, nayarian tayoy mangiter ed arum​—na sulat, tawag ed telepono, regalo, praktikal a tulong, salita na panamaseseg.

¹⁸ Diad panangiter, nipatnag tayo ya aaligen tayo so mangatatawen ya Ama tayo. Nipanengneng tayo met so inaagin aro tayo, a pakabidbiran ed saray tuan Kristiano. (Juan 13:35) No nodnonoten tayo irayan bengatla, makapibiang itayo diad liket ed panangiter.

Kasin Nisalaysay Yo?

• Panon ya impanengneng nen Jehova tan si Jesus so ehemplo ed panangiter diad espiritual a paraan?

• Panon itayon makapawalay magnayon iran kakaaro?

• Antoran kundang so nayarin gawaen tayo ta pian mas matalona so ministeryo tayo?

• Panon a makapibiang so interon kongregasyon diad liket ed panangiter?

[Tepetepet Parad Panagaral]

[Saray litrato ed pahina 13]

Sano onkiwas iray ananak ed panangipasal, nalikna na atateng so pirmin liket tan inkapnek

[Litrato ed pahina 15]

Diad panaggaway babangatan, makapawala tayoy peteg a kakaaro

[Litrato ed pahina 16]

Sikatayo so antabayan nen Jehova no ontakken itayo

[Saray litrato ed pahina 17]

Naromog tayo so liket ed panangiter diad simpli ingen ta importantin paraan