Panliketan so Pikakabat Nipaakar ed si Jehova
Panliketan so Pikakabat Nipaakar ed si Jehova
“Mapalar so saray ondengel ed salita na Dios, tan sikatoy unoren da!”—LUCAS 11:28.
1. Kapigan so inggapo nen Jehova a mitalosan ed saray totoo?
PAPABLIEN nen Jehova so totoo tan sikatoy interesadon maong ed pankaabigan da. Agpankelawan sirin a sikatoy mitatalosan ed sikara. Ginmapo iyan pitatalosan diad hardin na Eden. Unong ed Genesis 3:8, walay inkagawa sanen “ambetel ni agew,” si Adan tan Eva et ‘nadngel da so boses nen Jehova a Dios.’ Isusuheri na arum a satan so mangipapatnag a nayarin agew-agew a mitatalosan si Jehova ed si Adan ed saman a panaon. Antokaman so kipapasen, ipapabitar na Biblia a say Dios so angigana na panaon ya agto lambengat inter iray ganggan ed inmunan too noagta imbangat to met no anto so nakaukolan a naamtaan to pian nagawaan toray responsabilidad to.—Genesis 1:28-30.
2. Panon ya insian na inmunan sanasawa so inkasikara ed panangigiya nen Jehova, tan anto so resulta?
2 Si Adan tan Eva so inikdan nen Jehova na bilay, pakauley ed ayayep tan ed intiron dalin. Wala labat so sakey a nisebel—ag-ira mangakan manlapud kiew na pikakabat ed maong tan mauges. Lapud inimpluensiaan ira nen Satanas, tinmunganga si Adan tan Eva ed ganggan na Dios. (Genesis 2:16, 17; 3:1-6) Pinili ra so onkiwas a bukor, a denesidi ra ed inkasikara no anto so duga tan aliwa. Diad impanggawa ra’d satan, makulangkulang dan insian so inkasikara ed panangigiya na maaron Manamalsa ra. Makadesyang so nansumpalan da tan ed saray agni nianak ya ilalak da. Tinmakken si Adan tan Eva tan inatey ira ed saginonor ya andian lay ilalon nabilay lamet. Atawir na saray kapolian da so kasalanan tan say epekto na satan, say patey.—Roma 5:12.
3. Akin ya akitalosan si Jehova ed si Cain, tan panon so inkiwas nen Cain?
3 Anggaman ed rebelyon ed Eden, nantultuloy si Jehova ya akitalosan ed saray pinalsa ton totoo. Si Cain, say panguloan ya ilalak nen Adan tan Eva, so napepeligron nadaeg na kasalanan. Sikatoy pinasakbayan nen Jehova a sikatoy mamapaarap la’d desyang tan abilin a ‘manggawa na maong.’ Impulisay nen Cain iyan maaron simbawa tan pinatey to so agi to. (Genesis 4:3-8) Kanian impulisay na inmunan taloran totoo ed dalin so malinew a panangidirehi na samay angiter ed sikara na bilay, say Dios a mangiiter na bilin ed totoo to ta pian nagunggonaan ira. (Isaias 48:17) Agaylan makapaermen itan ed si Jehova!
Imparungtal nen Jehova so Inkasikato Diad Saray Totoo Nensaman
4. Nipaakar ed saray kapolian nen Adan, diad anto so panmamatalekan nen Jehova, tan makasengeg ed satan et anton mensahe na ilalo so inyabawag to?
4 Anggaman walaan si Jehova na amin a kanepegan a mamultot ed pitatalosan to ed saray totoo, agto itan ginawa. Sikato so matalek ya arum ed kapolian nen Adan so makabat ya ontalineng ed panangidirehi To. Alimbawa, sanen inyabawag to so panangukom ed si Adan tan Eva, impasakbay nen Jehova so isabi na sakey a “bini” a mitulot ed Uleg, a si Satanas a Diablo. Onsabi panaon, si Satanas so nakeret diad kamekmek na ulo to. (Genesis 3:15) Sayan propesiya so magayagan mensahe na ilalo parad saramay “ondengel ed salita na Dios, tan sikatoy unoren da.”—Lucas 11:28.
5, 6. Diad antoran dalan ya akitalosan si Jehova ed totoo to sakbay na inmunan siglo K.P., tan panon iran agunggonaan ed satan?
5 Impasabi nen Jehova so linawa to ed matoor iran patriarka nensaman, a singa si Noe, Abraham, Isaac, Jacob, tan Job. (Genesis 6:13; Exodo 33:1; Job 38:1-3) Diad saginonor, indatak to so intiron kodigo na saray ganggan parad nasyon na Israel panamegley nen Moises. Say Mosaikon Ganggan so angunggona ed sikara diad dakel a paraan. Diad pangunor ed satan, say Israel so nibiig manlapud amin a nasyones bilang nikaduman totoo na Dios. Pinaseguroan na Dios iray Israelita a no unoren da so Ganggan, bendisionan to ra ed materyal ontan met ed espiritual a paraan, a pagmaliwen to ira a panarian na saray saserdote, sakey a masanton nasyon. Angitarya ni ingen so Ganggan na saray totontonen ed panangan tan kalinisan ya angiyalibansa na maong a bunigas. Balet, impasakbay met nen Jehova so makapasinagem iran pansumpalan na inkatunganga.—Exodo 19:5, 6; Deuteronomio 28:1-68.
6 Sinmabi panaon, nitekep so arum niran apuyanan a libro diad kanon na Biblia. Nibinsabinsa ed saray maawaran a salaysay so impideneng nen Jehova ed saray nasyon tan totoo. Saray maanlong a libro so masansanting ya aneskribe ed saray kalidad to. Impasakbay na saray mapropetikon libro so arapen a kasumpalan na linawa nen Jehova. Saray matoor a totoo nensaman so maalwar a nanaral tan angiyaplika ed sarayan pinuyanan a sulsulat. Oniay insulat na sakey: “Say salitam sikato so sakey a silewan ya onkana ed saray salisalik, tan sakey a liwawa ya onkana ed basbas ko.” (Salmo 119:105) Parad saramay mabulos ya ontalineng, intarya nen Jehova so edukasyon tan pakaliwawaan.
Lalon Onsisinag so Liwawa
7. Anggaman nanggawa na saray milagro si Jesus, anto so manunan pakapikabat ed sikato, tan akin?
7 Kasabi na inmunan siglo, inyarum na saray relihyoson grupo na Judio diad Ganggan iray tradisyon na totoo. Aliwa so inkiyaplikaan na Ganggan, tan imbes a panlapuan na pakaliwawaan, nagmaliw itan a makapabelat lapu ed saratan a tradisyon. (Mateo 23:2-4) Balet, nen 29 K.P., pinmatnag si Jesus bilang Mesias. Say inkibakian to et aliwa lambengat ya iter toy bilay to nisesengeg ed sankatooan noagta pian ‘mantasi [met] ed katuaan.’ Anggaman sikatoy nanggawa na saray milagro, sikato so manunan kabkabat bilang “say Managbangat.” Say bangat to et singa liwawa ya onsisinag ed espiritual a kabilungetan ya amuragas ed kanonotan na totoo. Matukoy so inkuan a mismo nen Jesus: “Siak so silew na mundo.”—Juan 8:12; 11:28; 18:37.
8. Antoran apuyanan a libro so nisulat nen inmunan siglo K.P. tan panon iratan ya akagunggona ed saray inmuunan Kristiano?
8 Diad saginonor et niarum iray Ebanghelyo, say apatiran nisulat a salaysay nipaakar ed bilay nen Jesus, tan say libro na Gawa, ya awaran a nipaakar ed inkayat na Inkakristiano kayari na impatey nen Jesus. Wala met iray pinuyanan a sulat na saray babangatan nen Jesus, ontan met ed mapropetikon libro na Apocalipsis. Sarayan sulat, katekep so Hebreon Kasulatan, so angompleto ed kanon na Biblia. Diad tulong na sayan apuyanan a librarya, nayarian na saray Kristiano a ‘talosan a maong a pati saray lapag a sasantos no panon so kaawang tan karukey tan kaatagey tan kaaralem’ na katuaan. (Efeso 3:14-18) Sarag day nawalaan na “kanonotan nen Kristo.” (1 Corinto 2:16) Anggaman kuan, agmalinew a maong ed saratan ya inmuunan Kristiano so amin ya aspekto na saray gagala nen Jehova. Oniay insulat nen apostol Pablo ed saray kapananisiaan: “Natan onnengneng itayo ed sakey a salming ed mabilunget.” (1 Corinto 13:12) Napatnagan labat ed satan ya espiho so uhas balet ta aliwan amin a detalye. Onsabi ni labat so mas nagnap a pakatalos ed Salitay Dios.
9. Anto so linmiwawa legan na “saray kaunoran ya agew”?
9 Natan et manbibilay itayo la ed panaon a tatawagen a “saray kaunoran ya agew,” sakey a panaon a pakabidbiran na “maatap iran panaon a mairap a pidenengan.” (2 Timoteo 3:1, NW) Impasakbay nen propetan Daniel a legan na sayan panaon et ‘ondaak so tuan pikakabat.’ (Daniel 12:4) Kanian, si Jehova, say Baleg a Mitatalosan, so tinmulong ed saramay matuan-impanpuso a makatalos ed kabaliksan na Salita to. Natetebek natan na dakerakel a totoo a si Kristo Jesus so nitrono la ed agnanengneng a katawenan nen 1914. Amta da met a magano to lan panganggaen so amin a karelmengan tan say dalin tayo so magmaliw naani ya englobon paraiso. Sayan importantin aspekto na maong a balita na Panarian so nipupulong la natan ed intiron dalin.—Mateo 24:14.
10. Diad inlabas na saray siglo, panon so inkiwas na totoo ed simbawa nen Jehova?
10 On, diad intiron awaran et ipapasabi nen Jehova so linawa tan gagala to ed totoo diad dalin. Dedeskribien na rekord na Biblia so nipaakar ed dakel a dinmengel, angiyaplika ed maridios a kakabatan, tan abendisionan lapud satan. Sasaglawien met na satan so arum ya angipulisay ed maaron simbawa na Dios, a tinumbok da so makadesyang a kurang nen Adan tan Eva. Inyilustra nen Jesus iyan situasyon sanen sinaglawi to so duaran simbolikon dalan. Say sakey et ompugta ed kadederal. Lapud malapar tan maawang, tutumboken itan na dakerakel ya angipulisay ed Salitay Dios. Say sananey a dalan so ompugta ed andi-anggaan a bilay. Anggaman makisir, ondadalan ditan so pigara ya angawat ed Biblia bilang say Salita na Dios, tan nambilay ira ya unong ed satan.—Mateo 7:13, 14.
Pisalamatan so Walad Sikatayo
11. Say pikakabat tan panisia tayo ed Biblia so ebidensia na anto?
11 Kaiba kayo kasi ed saramay ondadalan ed satan a dalan ya ompugta ed bilay? No ontan, maseguron labay yoy mansiansia ditan. Panon yon nagawaan itan? Naynay a molimolien tan apresiaen iray agunggona yo lapud impakaaral ed saray katuaan na Biblia. Say mismon inkiwas yo ed maong a balita so ebidensia na panamendision ed sikayo na Dios. Impabitar itan nen Jesus sanen sikatoy nampikasi ed Ama to diad oniaran salita: “Misalamat ak ed sika, O Ama, Katawan na tawen tan dalin, ta inyamot mo so sarayan bengatla ed saray makabat tan makatalos, et sikaray impuyan mo’d saray ugugaw.” (Mateo 11:25) Atalosan na saray managsigay tan managsingil na buis so bangat nen Jesus, andi balet ed saray de-aral a papangulo na relihyon. Inkuan ni nen Jesus: “Anggapo so too a makadago ed siak, likud no say Ama ya angibaki ed siak sikato so yasingger to.” (Juan 6:44) No naaaralan yo la so Biblia tan papanisiaan tan tutumboken yo iray bangat a lugan na satan, ebidensia itan ya inyasingger kayo la nen Jehova. Rason itan pian manliket.
12. Diad antoran dalan a mangiiter na pakaliwawaan so Biblia?
12 Lugan na Salitay Dios so manangibulos iran katuaan tan mangiiter itan na pakaliwawaan. Saramay manbibilay unong ed pikakabat ed Biblia so nibubulos ed saray anito, palso iran bangat, tan inka-ignorante a manodomina ed bilay na minilyon. Alimbawa, say pikabat ed katuaan nipaakar ed kamarerwa so mangibubulos ed sikatayo manlapud antokaman a takot a napasakitan itayo na saray inaatey odino maniirap iray inaatey lan inadaro tayo ed bilay. (Ezequiel 18:4) Say pakaamta ed katuaan nipaakar ed saray marelmeng ya anghel so ontulong ed sikatayon makapaliis ed saray kapeligroan na espiritismo. Say bangat nipaakar ed kikioli so makaligliwa ed saramay inateyan na inadaro ed bilay. (Juan 11:25) Saray propesiya na Biblia so mangipaparungtal ed sikatayo no anto lan panaon so pambibilayan tayo tan mangiiter ed sikatayo na talek ed saray sipan na Dios ed arapen. Pabiskegen met na saratan so ilalo tayon manbilay ya andi-anggaan.
13. Panon a say italineng ed Salitay Dios so makagunggona ed pisikal a paraan?
13 Saray maridios a prinsipyo diad Biblia so mangibabangat ed sikatayon manbilay unong ed paraan a nagunggonaan itayo ed pisikal. Alimbawa, naaralan tayon paliisan iray agamil a manutak ed laman tayo, a singa say lingon panangusar na tabako tan arum a druga. Ag-itayo manbuabuanges. (2 Corinto 7:1) Say panumbok ed saray moral a ganggan na Dios so onkanan salimbeng manlapud makaalis iran sakit ed sekso. (1 Corinto 6:18) Diad pangunor ed simbawa na Dios a paliisan so aro ed kuarta, agnagirogiro so deen na kanonotan tayo, unong a nagagawa ed dakel a manggegemtan na kaykayamanan. (1 Timoteo ) Diad antoran dalan ya agunggonaan kayo ed pisikal a paraan lapud pangiyaaplika yo ed Salitay Dios ed bilay yo? 6:10
14. Anto so impluensia na masanton espiritu ed kabibilay tayo?
14 No manbilay itayo unong ed Salitay Dios, nagamoran tayo so masanton espiritu nen Jehova. Nabayuboan tayo so singa-Kriston personalidad, a pakabidbiran na makapasagyat iran kalidad a singa say panangasi tan panangabagey. (Efeso 4:24, 32) Say espiritu na Dios so mamawala met ed sikatayo na saray bunga na satan—aro, gayaga, deen, anos, panangasi, kaabigan, pananisia, kaumildian, tan dangka. (Galacia 5:22, 23) Sarayan kalidad so mangiyaalibansa na maliket tan makabaliksan a siglaotan ed arum, pati ed saray membro na pamilya. Nagamoran tayo so akindalem a biskeg ya ontulong ed sikatayon mangarap ed kairapan tekep na inkakpel. Kasin natetebek yo so magmaong ya epekto na impluensia na masanton espiritu ed bilay yo?
15. Diad pangitutunos tayo ed bilay tayo ed linawa na Dios, panon itayon nagunggonaan?
15 No itutunos tayo so kabibilay tayo ed linawa na Dios, napabiskeg tayo so siglaotan tayo ed si Jehova. Ombulaslas so kombiksion tayo a natatalosan tan aaroen to itayo. Naeeksperiensia tayo so pananulong to ed sikatayo legan na mairap iran panaon. (Salmo 18:18) Natebek tayo a talagan dedengelen toray pikakasi tayo. (Salmo 65:2) Panmamatalekan tayo so panangigiya to, a naseseguro tayon nagunggonaan itayo ed satan. Tan walaan itayo na alay abig ya ilalo a diad dugan panaon et itarok la na Dios iray matoor to ed inkayadyari tan pagamoran to ra na langkap ton andi-anggaan a bilay. (Roma 6:23) “Singger kayo ed Dios, et sikato so onsingger naani ed sikayo,” so insulat nen babangatan a Santiago. (Santiago 4:8) Kasin nalilikna yo ya oneelet so siglaotan yo ed si Jehova leleg ya onaapit kayo ed sikato?
Agnaparaan a Kayamanan
16. Antoran pananguman so ginawa na saray Kristiano nen inmunan-siglo?
16 Pinanonotan nen Pablo iray alanaan na espiritu a Kristiano nen inmunan-siglo ya arum ed sikara so datin managlawan, mikakalugoran, homoseksual, matakew, maagum a too, managbuanges, manag-ayew, tan managliput. (1 Corinto 6:9-11) Anguman ira lapud katuaan na Biblia; sikara so “alinisan.” Salien pan isipen no anto so kipapasen lay bilay yo no agyo naaralan so manangibulos iran katuaan ed Biblia. Maseguro a say katuaan et sakey ya agnaparaan a kayamanan. Agaylan liket tayo ta mitatalosan si Jehova ed sikatayo!
17. Panon a natatagano iray Tastasi nen Jehova ed espiritual a paraan diad saray miting na Kristiano?
17 Niarum ni, nodnonoten pa so panliliketan tayo diad limog na agagi tayon walaay nanduruman rasa! Itatarya na “matoor tan makabat ya aripen” so espiritual a tagano diad dugan panaon, a mangilaktip ed saray Biblia, magasin, tan arum niran publikasyon diad dakerakel a lenguahe. (Mateo 24:45-47) Diad saray miting ed kongregasyon legan na taon 2000, saray Tastasi nen Jehova ed dakel a daldalin so nanrepaso ed saray manunan pabitar na waloran manunan libro na Hebreon Kasulatan. Minorekdek da so nipaakar ed kabibilay na 40 ya indibidual ed Biblia ya asingbat ed Insight on the Scriptures. Kinonsidera ra so ngalngali kakapat ed libro a The Greatest Man Who Ever Lived tan ngalngali say intiron libro a Pay Attention to Daniel’s Prophecy! Walay 36 a segundaryon artikulo a kinonsidera ed magasin a Panag-bantayan bilang kaaruman ed 52 ya aaralen ya artikulo. Niarum ni, saray totoo nen Jehova so atagano ed 12 a paway na Say Ministeryo Tayo ed Panarian tan say sinimban paliwawa ed publiko a walaan na nanduruman tema ed Biblia. Agaylan kayamanan na espiritual a pikakabat so nitarya!
18. Diad antoran dalan a natutulongan itayo ed loob na Kristianon kongregasyon?
18 Diad intiron mundo, masulok a 91,000 a kongregasyon so ontutulong tan mamapaseseg panamegley na saray miting tan pililimog. Panggagayagaan tayo met so suporta na matakken ed espiritual iran kaparan Kristianos a mabulos ya ontulong ed sikatayo diad espiritual a paraan. (Efeso 4:11-13) On, nagugunggonaan itayon maong diad pangaawat ed pikakabat ed katuaan. Makapaliket so pakapikabat tan panlingkor ed si Jehova. Agaylan tua iray salita na salmistan nansulat: “Mainawa [“maliket,” NW] so totoo a say Dios da et si Jehova.”—Salmo 144:15.
Kasin Natandaan Yo?
• Diad siopa so akitalosan nen Jehova sakbay na panaon na saray Kristiano?
• Panon a sinminag so espiritual a liwawa nen inmunan siglo? diad moderno iran panaon?
• Antoran gunggona so nagamoran diad pambibilay unong ed pikakabat ed si Jehova?
• Akin a manliket itayo ed pikakabat tayo ed Dios?
[Tepetepet Parad Panagaral]
[Saray litrato ed pahina 8, 9]
Impasabi nen Jehova so linawa to ed si Moises, Noe, tan Abraham
[Litrato ed pahina 9]
Diad panaon tayo, isisindag nen Jehova so liwawa ed Salita to
[Saray litrato ed pahina 10]
Isipen pa so bendision a walad sikatayo diad limog na agagi tayon walaay nanduruman rasa!