Saray Kiew a Mapaot

Mapatnag ya aliwan maong a pasen so tambib na kelas a pangiletnegan na abung, nagkalautla no satan so walad bandad tagey la na kapalandeyan. balet, anggaman ed mapatnag iran agpankaabigan, arum iran alpinon kiew so malet a nilamot diad saratan a lengat na bato, mapaot ed panaoy betel tan makapansusungdo ed kelang diad panaoy tiagew.

KASLAKAN et sarayan anawet a kiew so agmipara’d kaatagey na kaulibay dan kakiewan ed patar. Nayarin namponget tan apikpikewet iray sengeg na saratan tan makoririt ira. Arum ingen et singa natural a bonsai​—ya apikpikewet tan apalpaltongan lapud agmarakep a klima tan lapud makisir a dalin a tinuboan da.

Lapud susungdoan day sakey ed saray agmarakep a kaliberliber ed dalin, nayarin ipasen mon ag-ompaot iratan a kiew. Balet say kasunian so tua. Walaray mangibabagan say Methuselah, a bristlecone pine ya ombabaleg anggad 3,000 metro diad White Mountains ed California, so mantaon la na 4,700. Tutukoyen na The Guinness Book of Records 1997 iyan klase na kiew bilang say sankatakkenan a kiew a manbibilay diad planeta. Onia so insalaysay nen Edmund Schulman, ya inaral to so nipaakar ed sarayan abayag lan kiew: “Say bristlecone pine . . . so mapaot anggaman ed kairapan. Amin niran matakken lan [pine tree] ed White Mountains so binmaleg na ngalngalin 3,000 metro diad amaga tan mabaton kalawakan.” Adiskobre met nen Schulman a say sankatakkenan ya arum niran klase a pine so binmaleg ed parehon agmarakep iran kipapasen.

Anggaman kaukolan na saratan a talonaan so kairapan, sarayan mapaot a kiew so mangaanamot a tuloy ed duaran bentahan walad sikara. Say begtebegtew a pasen da, ya agmatanaman, so mamoprotekta ed saratan sumpad pool ed takel, a sakey ed saray sankabalgan a kapepeligroan na matakken a kakiewan. Tan saray lamot da so malet ya akakotkot ed lengat na bato a say yegyeg lambengat so makapangibual ed saratan.

Diad Biblia, saray matoor a lingkor na Dios so inkompara ed saray kiew. (Salmo 1:1-3; Jeremias 17:7, 8) Nayarin nidudunget met ira ed kairapan lapud saray walan sirkumstansya ra. Say panamasegsegang,  maletey a bunigas, odino inkaduka so nayarin manubok a maong ed pananisia ra, nagkalalo la sano mantultuloy iray subok ed loob na saray taon. Anggaman kuan, say Manamalsa ra, ya alay abig a nandesinyo ed saray kiew a makapaot ed kairapan, so mamapaseguro ed saray managdayew to a tulongan to ira. Oniay isisipan na Biblia ed saraman so mansiasiansian agnagiing: “Paleten, [tan] pabiskegen to kayo komon.”​—1 Pedro 5:9, 10.

Say ‘italindeg na sakey ed pasen to, pansiansian agnagiing, odino pantultuloy’ so nibase ed talos na Griegon verb a mabetbet ya impatalos ed Biblia bilang “sungdo.” Singa saray kiew ya alpino, say maabig ya inkilamot so tombok ed panagsungdo. Diad biang na saray Kristiano, kaukolan a sikaray malet a nilamut ed Jesu-Kristo ta pian makatalindeg iran mapekder. Insulat nen Pablo: “Unong na impangawat yo sirin ed Kristo Jesus a Katawan, ontan so panakar yo ed sikato, linmamut tan nipaalagey ed sikato, tan nipaletneg ed pananisia yo, a singa say inkibangat yo, ya ondaak ed pisasalamat.”​—Colosas 2:6, 7.

Atebek nen Pablo a nakaukolan so mabiskeg iran espiritual a lamot. Sikaton mismo so akipuligesgesan ed “sakey a sabit na laman,” tan sinungdoan to so ampait a panamasegsegang legan na ministeryo to. (2 Corinto 11:23-27; 12:7) Ingen aromogan to a lapud panamabiskeg na Dios ayarian toy nantultuloy. Inkuanto: “Nayarian ko a gawaen so ganagana ed saman so mamabiskeg ed siak.”​—Filipos 4:13.

Unong a nipabitar ed alimbawa nen Pablo, say matalonan pakapansungdo na Kristiano so agmandependi ed paborabli iran sirkumstansia. Singa saray kiew ya alpinon akatalona ed saray bagyo ed loob na saray siglo, makapansiansia itayon mapekder ed pananisia no sikatayo so nilamut ed Kristo tan manmatalek ed biskeg ya ipapagamor na Dios. Niarum ni, no mansungdo tayo anggad kasampotan, nailaloan a naeksperiensia tayon mismo so pakagawa na sananey a sipan na Dios: “Singa saray agew na kiew ontan ira naani so saray agew na saray baley ko.”​—Isaias 65:22; Mateo 24:13.