Kasin Walaan Ka na Imortal ya Espiritu?

“AMIN a sulat ya impuyan na Dios sikato met so maabig a pakaaralan, pakasumalan, pakasimbawaan, tan pakapanontonan a sikato so wala ed katunongan,” so insulat nen apostol Pablo. (2 Timoteo 3:16) On, say Biblia so libro na katuaan a nanlapu ed tuan Dios, si Jehova.​—Salmo 83:18.

Lapud si Jehova so Manamalsa na amin iran bengatla, pati totoo, amta ton maong no anto so nagawa ed sikatayo no ompatey itayo. (Hebreos 3:4; Apocalipsis 4:11) Tan diad apuyanan a Salita to, say Biblia, inter to so matua tan makapnek iran ebat ed tepetepet nipaakar ed bilay kayari ipatey.

Anto so Espiritu?

Diad Biblia, saray salitan nipatalos ya “espiritu” so manunan mankabaliksay “panlinawa.” Balet ipapanengneng na saya so mas ni nen say basta panlinawa. Alimbawa, oniay inkuan nen managsulat na Biblia a si Santiago: “Say laman ya andian na espiritu et inatey.” (Santiago 2:26 NW) Kanian, say espiritu et bengatlan mamapabilay ed laman.

Sayan mamapabilay a puersa so agnayarin basta labat la panlinawa, odino dagem, ya onloloob ed saray bala. Akin ya andi? Lapud ta no tinmunda la so panlinawa, mansiansia ni so bilay ed saray selula na laman ed pigaran bekta​—“diad loob na pigaran minuto,” unong ed The World Book Encyclopedia. Lapud saya, nayarin ontalona iray sagpot a pan-resuscitate. Balet sano tinmunda la so agnanengneng a puersa na bilay ed saray selula na laman, anggapo so nagawaan na saray sagpot a pamapawil ni ed bilay. Anggan panon lay pangisibok na dagem, agnapabilay so anggan sakey a selula. Sirin, say espiritu et say agnanengneng a puersa na bilay​—say kidyam na bilay a mamapasiansia ed saray selula tan ed too a mabilay. Sayan puersa na bilay so susustunien na panlinawa.​—Job 34:14, 15.

Kasin wala labat ed saray totoo itan ya espiritu? Ontulong ed sikatayo so Biblia pian nadampot so suston konklusyon ed sayan pamaakaran. Binidbir nen makabat ya Arin Solomon a saray totoo tan ayayep so “walaan ira ya amin na sakey a panlinawa,” tan intepet to: “Siopa so mikabat ed espiritu na too, no mamaatagey, tan say espiritu na ayep, no mamaleksab ed dalin?”  (Eclesiastes 3:19-21) Kanian saray ayayep ontan met ed totoo so nasasaglawi a walaay espiritu? Panon ya ontan?

Say espiritu, odino puersa na bilay, so niyaliling ed koryenti ya onkukurang ed sakey a makina odino kagawaan. Nanduruma so pakausaran na agnanengneng ya elektrisidad, depende ed klase na kagawaan a papaandaren to. Alimbawa, say de-koryentin kalan so ginawa pian makapapetang, say computer et pian manproseso na impormasyon, tan say telebisyon et pian mamawala na saray retrato tan tanol. Ingen, say koryenti so agbalot magmaliw a singa ed samay kagawaan a papaandaren to. Satan so mansiansia a puersa. Mipadpara, say puersa na bilay so agbalot magmaliw a singa saray pinalsan papabilayen to. Satan so andian na personalidad tan andian na abilidad a manisip. Saray totoo tan ayayep so “walaan na sakey ya espiritu.” (Eclesiastes 3:19) Sirin, sano ompatey so sakey a too, agmansiansia so espiritu to ed sananey a pasen bilang espiritun palsa.

Anto sirin so kipapasen na inatey? Tan anto so nagawa ed espiritu sano ompatey so too?

“Dia ed Dabok Ompawil Ka”

Sanen ginagala na inmunan too, si Adan, so tinmunganga ed ganggan na Dios, inkuan To ed sikato: “Dia ed linget na lupam so panganan mo na tagano ya angga ed ipawil mo ed dalin; ta sikato so angalaan ed sika: lapud sika et dabok ka, dia ed dabok ompawil ka.” (Genesis 3:19) Iner so kawalaan nen Adan antis a sikato so pinalsa nen Jehova manlapud dabok? Sikato so anggapo ni ed saman! Sikato so agni linmesa. Kanian sanen inkuan nen Jehova a Dios a si Adan so ‘ompawil ed dalin,’ say labay Ton ibaga et si Adan so ompatey tan ompawil ed dabok. Ag-ombasil si Adan ed espiritun ayaman. Diad ipapatey si Adan so ompawil ed andiay-kiwawala. Say dusa to et patey​—inkaandian na bilay​—aliwan iyalis ed sananey a pasen.​—Roma 6:23.

Komusta met iray arum ya inaatey la? Say kipapasen na inaatey so nipabitar diad Eclesiastes 9:5, 10, ya oniay nabasa tayo: “Anggapo lay amta na inaatey . . . Anggapo lay gegemtan, anggapo lay panagplano, anggapo lay kakabatan odino inkatudio, diad lubok.” (Moffatt) Say patey, sirin, et kipapasen na andiay-kiwawala. Insulat na salmista a sano ompatey so sakey a too, “say panlinlinawa to ompaway, ompawil ed dalin to; dia ed satan lanlamang ya agew saray nonot to natawtaw ira.”​—Salmo 146:4.

Malinew ya anggapo la’d kiwawala so inatey. Anggapo lay amta ran balot. Agda ka nanengneng, agda ka narengel, odino agla ra makapitongtong ed sika. Agda ka natulongan tan agda ka met napasakitan. Peteg ya agmo nepeg a takotan iray inatey. Balet panon ya “ompaway” so espiritu diad bektan ipatey na sakey a too?

Say Espiritu ‘Ompawil ed Tuan Dios’

Ibabaga na Biblia a sano ompatey so sakey a too, “say espiritu ompawil ed [tuan] Dios ya angiter ed sikato.” (Eclesiastes 12:7) Kabaliksan  kasi na saya a walay espiritu a literal a manbaroy ed liwang pian onla ed kiwawala na Dios? Andin balot! Say paraan na impangusar na Biblia ed salitan “ompawil” so agmankakaukolan na aktual ya iyalis ed sananey nin pasen. Singa bilang, imbaga ed saray agmatoor ya Israelita: “Ompawil kayo ed siak, et siak ompawil ak naani ed sikayo, kuan nen Jehova na saray ejercito.” (Malaquias 3:7) Say ‘ipawil’ na Israel ed si Jehova et kabaliksan toy pangitalirak ed mauges ya awawey tan itunos lamet ed matunong a dalan na Dios. Tan say ‘ipawil’ nen Jehova ed Israel et kabaliksan toy pangipawil to lamet na abobon to ed totoo to. Diad parehon kipapasen say “ompawil” et lalanoren toy awawey, aliwan say literal ya iyalis manlapud sakey a pasen ya onla ed sananey a lugar.

Mipadpara, diad ipapatey et anggapoy nagawan aktual ya iyalis manlapud dalin a mamaarap ed mangatatawen ya ayaman sano “ompawil” so espiritu ed Dios. Diad bektan anggapo la so puersa na bilay ed sakey a too, say Dios labat so makapangipawil na satan ed sikato. Kanian say espiritu so “ompawil ed [tuan] Dios” diad pantalos ya antokaman ya ilalo na bilay ed arapen a parad satan a too so sigpot ya akadependi ed Dios.

Alimbawa, konsideraen so ibabaga na Kasulatan nipaakar ed impatey nen Jesu-Kristo. Oniay insalaysay nen managsulat na Ebanghelyo a si Lucas: “Si Jesus naningal ed baleg a boses, inkuan to. Ama, dia ed saray limam imatale’ko so espirituk; et nen abitla to’ya, inyawa’to so espiritu to.” (Lucas 23:46) Legan a say espiritu nen Jesus so nauuyos ed sikato, sikato so agliteral a mamapaarap la’d tawen. Si Jesus so ag-apaoli manlapud saray inaatey anggad kayari taloy agew, tan 40 agew ni so linmabas antis a sikato so tinmokotok ed tawen. (Gawa 1:3, 9) Balet, diad panaon na impatey to, inmatalek nen Jesus so espiritu to ed Ama to, a sigpot a nanmatalek ed pakayari nen Jehova a sikato so bilayen to.

On, sarag na Dios a bilayen so too. (Salmo 104:30) Agaylan engranden arapen so iyoopresi na saya!

Sakey a Seguradon Ilalo

Ibabaga na Biblia: “Onsabi oras, ya amin so saray wala ed saray lubok [“pakanodnonotan a lubok,” NW] narengel da so boses [nen Jesus], et ompaway ira.” (Juan 5:28, 29) On, insipan nen Jesu-Kristo ya amin na saramay walad pakanodnonotan nen Jehova so onoli, odino ombilay. Kabiangan ed saratan iramay angagamil na matunong a kurang bilang lingkor nen Jehova. Balet walaray minilyon a totoon inaatey ya agda nipanengneng no kasin ontulok ira ed matunong iran estandarte na Dios. Balanglan agda amta iray kakaukolanen nen Jehova odino kulang ira na malaglaem a panaon pian makapanguman. Onian nengneng na saray indibidual so wala met ed pakanodnonotan na Dios tan sikara so napaoli, lapud ibabaga na Biblia: “Wala naani kioli ed bilay na saray matunong tan agmatunong.”​—Gawa 24:15.

Natan, say dalin so napno na gula tan kolkol, karawalan tan panagpaagos na dala, polusyon tan sakit. No saray inatey so nabilay ed onian dalin, seguradon agmanbayag so liket lapud inkioli ra. Balet insipan na Manamalsa a magano to lan panganggaen so peles a sosyedad na mundo a walad panangontrol nen Satanas a Diablo. (Uliran 2:21, 22; Daniel 2:44; 1 Juan 5:19) Say matunong a sosyedad na totoo​—say ‘balon dalin’​—so magmaliw la’d satan a makapalikliket a katuaan.​—2 Pedro 3:13.

Diad satan a panaon “say manaayam agto naani ikuan, Mabeblay ak.” (Isaias 33:24) Anggan say ot-ot na ipapatey et naandi la, lapud “punasen [na Dios] so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.” (Apocalipsis 21:4) Agaylan iilaloan iya parad saray “wala ed pakanodnonotan a lubok”!

Sano ekalen la nen Jehova so kaugsan ed dalin, agto ipibali a deralen iray matunong ed saray mauges. (Salmo 37:10, 11; 145:20) Diad tua et “sakey a baleg ya ulop” na totoo “a nanlapu ed balang nasyon tan amin na saray kailalakan, tan binaleybaley, tan salita” so makaliktar ed ‘baleg a kairapan’ a maneral ed sayan peles  a mauges a mundo. (Apocalipsis 7:9-14) Kanian, sakey a baleg a karaklan so mangabrasa ed saray inaatey.

Kasin pampirawatan mon nanengneng lamet iray inad-arom ed bilay? Labay mo ta so manbilay na ando lan ando ed Paraiso diad dalin? Sirin et kaukolan a mangala ka na suston pikakabat nipaakar ed linawa tan saray gagala na Dios. (Juan 17:3) Linawa nen Jehova ya “amin a totoo nilaban ira komon, tan ondago ra ed pakapikabat ed katuaan.”​—1 Timoteo 2:3, 4.

[Litrato ed pahina 4]

“Sika et dabok ka, dia ed dabok ompawil ka”

[Litrato ed pahina 5]

Niyaliling so espiritu ed elektrisidad

[Litrato ed pahina 7]

Say kioli so mangitarok na magnayon a gayaga