Magmaliw a Maliket ya Umaani!

“Dakel a tua so aanien, daiset ira balet so manani. Pikasi yo sirin ed Katawan na aanien, pian mangibaki na saray manani ed aanien to.”​—MATEO 9:37, 38.

1. Anto so makatulong ed sikatayo pian makapantultuloy itayon manggaway linawa na Dios?

 SANO nanonotan tayo so agew na inkabautismoan tayo bilang sakey ed saray lingkor nen Jehova, balanglan nen imbebeneg iran taon odino abayag la, singano agawa labat itan nen karuman. Say panangidayew ed si Jehova so nagmaliw a sankamanunaan ed nidedikan bilay tayo. Diad pangaanamot tayo ed pankanawnawan panaon pian natulongan so arum a makadngel tan posiblin mangawat ed mensahe na Panarian, say magayagan serbisyo ed si Jehova so manunan papagaan tayo. (Efeso 5:15, 16) Diad sayan panaon, maples ya onlabas so panaon sano okupado itayo, a ‘daakan so kimey tayo ed Katawan.’ (1 Corinto 15:58) Anggano makaabet tayoray problema, say gayaga tayo ed panaggaway linawa nen Jehova so mamabiskeg ed sikatayo.​—Nehemias 8:10.

2. Anto so ontulong ed pakawalaan tayo na liket diad piguratibon panaganin kimey?

² Bilang Kristianos, mibibiang itayo ed piguratibon panaganin kimey. Inyaliling nen Jesu-Kristo ed sakey a panagani so panagtipon ed saray indibidual a parad andi-anggaan a bilay. (Juan 4:35-38) Lapud mibibiang itayo ed satan a panaganin kimey, makapaseseg no usisaen tayo so gayaga na saray inmuunan Kristianon umaani. Repasoen tayo so taloran sengegan a makatulong ed pakawalaan tayo na liket ed panaganin kimey natan. Saraya et (1) say mensahe na ilalo tayo, (2) say maabig a resulta na panag-anap tayo, tan (3) say mareen ya awawey tayo bilang umaani.

Nibaki Bilang Umaani

3. Diad anton pamaakaran ya alikna na saray inmuunan patumbok nen Jesus so liket?

³ Agaylay inkauman na kabibilay na saray inmuunan umaani​—nagkalautla ed 11 a matoor ya apostoles nen Jesus​—nen agew na 33 K.P. sanen tinmatdang ira ed palandey na Galilea pian abeten so apaolin Kristo! (Mateo 28:16) “Masulok a limanlasus ya agagi” so nayarin wadman ed saman ya inkagawa. (1 Corinto 15:6) Aminpigan nipanonot ed sikara so ganggan ya inter ed sikara nen Jesus. Inkuanto ed sikara: “Onla kayo . . . tan manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo. Ya ibangat yo ran mangunor na amin a bengabengatla ya ingganggan ko ed sikayo.” (Mateo 28:19, 20) Anggaman ed pirmin panamasegsegang, alikna ra so pirmin liket ed panaganin kimey diad pakakaimaton da ed kileletneg na saray kongregasyon na papatumbok nen Kristo diad nanduruman pasen. Sinmabi panaon, say ‘ebanghelyo so nipulong ed amin a pinalsa ed leksab na tawen.’​—Colosas 1:23; Gawa 1:8; 16:5.

4. Diad antoran kipapasen a nibaki iray babangatan nen Kristo?

⁴ Diad kasaksakbayan na ministeryo to ed Galilea, tinawag nen Jesus so 12 ya apostol to tan imbaki tora ta pian oniay iyabawag da: “Say panarian  na tawen asingger la.” (Mateo 10:1-7) Sikaton mismo et “niliberliber to ray amin a syudad tan balbaley [na Galilea], a nambabangat ed saray sinagogas da, tan impupulong toy ebanghelyo na panarian, tan nantatambal na amin a nengneng na sakit tan amin a nengneng na beblay.” Inabagey nen Jesus iray dakerakel a totoo “lapud maermen tan abuybuyak ira, a singa saray karnero ya anggapoy pastol da.” (Mateo 9:35, 36) Lapud atenyeg a maong so liknaan to, oniay kuan to ed saray babangatan to: “Dakel a tua so aanien, daiset ira balet so manani. Pikasi yo sirin ed Katawan na aanien [si Jehova a Dios], pian mangibaki na saray manani ed aanien to.” (Mateo 9:37, 38) Say padesir nen Jesus a nakaukolan niray umaani so mipadpara ed padesir to ed Judea sanen anem bulan labat so natitilak ed mangaraldalin a ministeryo to. (Lucas 10:2) Diad saratan ya inkagawa, imbaki toray papatumbok to bilang umaani.​—Mateo 10:5; Lucas 10:3.

Say Mensahe na Ilalo Tayo

5. Anton klase na mensahe so iyaabawag tayo?

⁵ Bilang modernon lingkor nen Jehova, maliket itayon onkiwas ed pankaukolan na saray umaani. Sakey a panlalapuan na pirmin liket tayo et say pangipasabi tayo ed mensahe na ilalo ed saray nabebelatan tan nagogonigon. Singa saray babangatan nen Jesus nen inmunan-siglo, agaylan pribilehyo so pangiyabawag tayo ed maong a balita​—sakey a peteg a mensahe na ilalo​—ed saramay ‘maermen tan abuybuyak, a singa saray karnero ya anggapoy pastol da’!

6. Anton kimey so akibiangan na saray apostol nen inmunan siglo?

⁶ Diad kapegleyan na inmunan siglo, si apostol Pablo so okupadon angipulong na maong a balita. Tan say panaganin kimey to so maseguron epektibo, lapud sanen sinulat toray Kristiano ed Corinto nen ngalngali 55 K.P., inkuanto: “Ipakabat ko ed sikayo, agagi, so ebanghelyo ya impulong ko ed sikayo, a sikato met so inawat yo, dia ed sikato met so kawalaan yo.” (1 Corinto 15:1) Saray apostol tan arum niran inmuunan Kristiano so makulin umaani. Anggaman ag-ibabaga na Biblia ed sikatayo no pigaran apostoles so mabilay ni diad samay makatantanda iran agawa a nansumpal ed inkaderal na Jerusalem nen 70 K.P., amta tayo a siansia nin nampulong si apostol Juan manga 25 a taon ed saginonor.​—Apocalipsis 1:9.

7, 8. Anton mensahe na ilalo so iyaabawag na saray lingkor nen Jehova tekep na lalon inkaganatan nen say kapiganman?

⁷ Insan sinmabi iray siglo a nandomina so klero na Kakristianoan, say apostatan “too na kasalanan.” (2 Tesalonica 2:3) Balet, diad pansamposampot na koma-19 a siglo, saramay nanggunaet a mangitunos ed kabibilay da ed orihinal ya Inkakristiano so angawat ed mensahe na ilalo, ya inyabawag da so Panarian. Diad tua, manlapu la’d inmunan paway (Hulyo 1879), say titulo na sayan dyurnal so angilaktip ed saray salitan “Herald of Christ’s Presence,” “Herald of Christ’s Kingdom,” odino “Mangiyaabawag ed Panarian nen Jehova.”

⁸ Niletneg so mangatatawen a Panarian na Dios sanen niiter itan ed si Jesu-Kristo nen 1914, tan iyaabawag tayo natan so mensahe na ilalo tekep na lalon inkaganatan nen say saman. Akin? Lapud kabiangan ed saray bendisyon na uley na Panarian so manasingger lan anggaan na peles a marelmeng a sistema. (Daniel 2:44) Wala ni kasi magmaong a mensahe nen say satan? Tan wala ni kasi so pakaliknaan tayoy babaleg a liket nen say pibiang tayo ed panangiyabawag ed Panarian sakbay ya ombetag so “baleg a kairapan”?​—Mateo 24:21; Marcos 13:10.

Maabig a Resulta na Panag-anap

9. Anto so imbilin nen Jesus ed saray babangatan to, tan panon a kinmiwas so totoo ed mensahe na Panarian?

⁹ Say sananey nin sengegan na pakawalaan tayoy liket bilang umaani et say maabig a resulta na panag-anap tayo ed saramay magmaliw a babangatan, a miulop ed sikatayo diad panaganin kimey. Nen 31-32 K.P., oniay imbilin nen Jesus ed saray babangatan to: “Anggan dinan a syudad ono baley a looban yo, anapen yod’man no siopa so makana.” (Mateo 10:11) Aliwan amin ya indibidual et makanepegan, unong a napatnagan itan ed kiwas da ed mensahe na Panarian. Anggaman kuan, saray babangatan nen Jesus so maseseg ya angipulong ed maong a balita inerman so kawalaan na totoo.

10. Panon a nansesegan nen Pablo so impananap to ed saray makanepegan?

 ¹⁰ Kayari na impatey tan inkioli nen Jesus, nantultuloy so panag-anap ed saray makanepegan tekep na biskeg. Akikatunongan si Pablo ed saray Judio diad sinagoga ra tan ed saray totoon wadman ed tindaan na Atenas. Sanen sikatoy nampulong ed Areopago ed satan a syudad na Griego, “saray arum a totoo nen akitipon ira ed sikato, anisia ra; ed sikara sakey met si Dionisio ya Areopago, tan sakey a bii a manngaray Damaris, tan arum ni ya ibiba ra.” Inerman so laen nen Pablo, sikato met so napanuliranan ed panagpulong diad “lapag, tan dia ed saray kaabungan.”​—Gawa 17:17, 34; 20:20.

11. Antoran metodo so inusar nen imbebeneg iran taon pian nagawaan so ministeryo?

¹¹ Kaleganan na unor laran dekada na koma-19 a siglo, saray alanaan a Kristiano so makpel ya akibiang ed panag-anap ed saray makanepegan. Diad artikulo ya apauloan na “Anointed to Preach,” oniay kuan na Zion’s Watch Tower na Hulyo/Agosto 1881: “Say panangipulong ed maong a balita . . . so nipapasabi ‘ed saray mauyamo’​—a mabulos tan makayarin ondengel, ta pian natipon ed limog da so laman nen Kristo, saray kaiban tomatawir.” Mabetbet a katongtongen na saray umaani na Dios iray totoon akimisa tan inikdan da ira na saray tract a mankargay Makasulatan iran mensahe ya adesinyon managyat ed paborablin kiwas na saray makanepegan. Kayari na maalwar ya impangikonsidera ed inkaepektibo na sayan metodo ed panagpulong, pinaseseg na Watch Tower na Mayo 15, 1903, iray umaani a mangibunog na saray tract “ed kabkaabungan, kada kabuasan na Simba.”

12. Panon tayon apaaligwas so inkaepektibo na panagpulong a kimey tayo? Iyilustra.

¹² Nen imbeneg iran taon, apalaknab tayo so ministeryo tayo diad pitotongtong ed totoo a walad saray nanduruman pasen nilikud ni ed mismon ayaman da. Saya so apaneknekan ya epektibon tuloy ed saray daldalin ya anggapo ed kaabungan iray totoo lapud kipapasen da ed panagbilay tan ed gegemtan dan manrelaks diad saray panaon a kaslakan ya idadalaw tayo. Sanen naimano na sakey a Tasi ed Inglatera tan say kaiba to iray bisitan naynay ya ombubuat panamegley na bus kayari na impansanagew da ed gilig na baybay, nampakpel ira ya onlugan ed saray bus tan angiparungtal ed saray kopya na The Watchtower tan Awake! ed saray pasahero. Diad loob na sakey bulan, akapangibunog iray 229 a kopya. Oniay report da: “Agkami antakot a manpulong diad gilig na baybay, diad saray pasen na negosyo, odino antokaman ya onlesan angat ed sikami lapud amta mi a si Jehova so naynay a mangaantabay ed sikami.” Akapangiletneg ira na rota na magasin, akapangigapo ira na panangiyaral na Biblia, tan sikaran dua so nan-auxiliary payunir.”

13. Antoran panangiyarunsa ed ministeryo tayo so gagawaen la natan ed arum a paspasen?

¹³ Legan a mantutultuloy ni so panag-anap ed saray makanepegan, say maalwar a pangonsidera ed ministeryo tayo so nayarin nakaukolan ed arum a paspasen. Anggaman akaugalian la na dakel a Tastasi so manpulong ed kabkaabungan diad saray Simba na kabuasan, diad pigaran lugar et aliwan epektibo so ipasyar da ed kaabungan na totoo lapud manpapainawa iray manaayam. Diad  impanguman da ed eskedyul da, nansesegan na dakel a Tastasi so mananap diad ngarem, a nayarin kayari na saray Makristianon miting. Tan sayan panag-anap so talagan apaneknekan a mabunga. Nen imbeneg a taon say bilang na saray manangiproklama na Panarian ed sankamundoan so tinmagey na 2.3 a porsiento. Saya so mangigagalang ed Katawan na panagani tan mangitatarok na gayaga ed kapusoan tayo.

Mantinien so Kareenan ed Panaganin Kimey

14. Anton awawey so ipatnag tayo no ipaparungtal tayo so mensahe tayo, tan akin?

¹⁴ Say sananey nin rason na panliket tayo et misiglaotan ed mareen ya awawey ya ipapatnag tayo ed panaganin kimey. “Sano onloob kayo ed abung,” kuan nen Jesus, “sikato so igalang yo. Et no say abung makana, onla’d sikatoy kareenan yo.” (Mateo 10:12, 13) Say panangibano ed Hebreo tan say misimbangan a termino ed Biblikon Griego so parehon mankabaliksan na ‘Maabig komon so niwala’d sikayo.’ Sayan awawey so mangiwanwan ed iyaasingger tayo ed totoo sano ipulong tayo so maong a balita. Say iilaloan tayo et paborabli so ikiwas da ed mensahe na Panarian. Parad saramay onkiwas a paborabli, wala so ilalo a makapipulangan ira ed Dios no pagbabawian da ray kasalanan da, manpataoli ira, tan gawaen day linawa to. Bilang resulta, say pikakareenan ed Dios so mangitonton ed andi-anggaan a bilay.​—Juan 17:3; Gawa 3:19; 13:38, 48; 2 Corinto 5:18-20.

15. Panon tayon mantinien so mareen ya awawey sano makaabet itayo na agpaborablin reaksion ed panagpulong a kimey tayo?

¹⁵ Panon tayon mantinien so kareenan tayo sano aliwan paborabli so naabet tayon reaksion? Oniay ingganggan nen Jesus: “No [say onabung] agmakana, ompawil ed sikayo so kareenan yo.” (Mateo 10:13) Say salaysay nen Lucas nipaakar ed inkibaki na 70 a babangatan so mangilaktip ed balikas nen Jesus: “No wadman so sakey ya anak [“kaaro,” NW] na kareenan, say deen yo manayam ed sikato; ingen no anggapo, sikato so ompawil ed sikayo lamet.” (Lucas 10:6) Sano iyasingger tayo ed totoo so maong a balita, gawaen tayo itan tekep na maabig tan mareen ya awawey. Say negatibon ebat, reklamo, odino makaopendin kakaebat na onabung so mangiyabuloy ed sakey a kipapasen ya ‘ompawil ed sikatayo’ so mareen a mensahe tayo. Balet anggapo ed saratan so manamsam ed deen tayo, say bunga na masanton espiritu nen Jehova.​—Galacia 5:22, 23.

Say Maabig a Kalat Parad Saray Umaani

16, 17. (a) Anto so kalat tayo sano manpawil itayo? (b) Panon tayon tulongan iramay walaan na tepetepet ed Biblia?

¹⁶ Bilang umaani, panliliketan tayo so pakapibiang  ed panagtipon ed totoo parad andi-anggaan a bilay. Tan agaylan liket so naeksperiensia tayo sano say toon pinulongan tayo et onkiwas a paborabli, malabay nin makaaral, tan peteg a magmaliw a ‘kaaro na kareenan’! Nayarin dakel iray tepet to nipaakar ed Biblia tan saratan so agtayo naebatan ya amin diad primeron indalaw tayo. Lapud agmatukoy so pambayag ed primeron indalaw, anto so nayarin gawaen? Nawalaan itayo na kalat a singa samay nirekomenda nen manga 60 taon lay apalabas.

¹⁷ “Amin a Tastasi nen Jehova so nepeg a preparadon mangikondukta na modelon panangiyaral ed Biblia.” Pinmatnag itan a balikas ed komatlo ed saray serye na kibangatan iran bokletan Model Study a nipalapag nen 1937 anggad 1941. Oniay intuloy na satan: “Amin a manangipalapag [na Panarian] so nepeg a manseet ya ontulong ed amin a posiblin paraan diad saray totoon walaay abig-linawa, tan interesado ed mensahe na Panarian. Saray back-call [panagpawil] so nepeg a gawaen ed saratan a totoo, ya ebatan so nanduruman tepet da . . . , insan igapo so modelon panangiyaral . . . tamtampol no posibli.” On, say kalat tayo ed saray panagpawil et say pangigapo na panangiyaral na Biblia tan regular a pangikondukta ed satan. * Say makaaron awawey tan maaron panagpaga parad saray interesadon totoo so mamakiwas ed sikatayon manparaan a maong tan epektibon makapangikondukta na panangiyaral.

18. Panon tayon natulongan iray balobalo ni pian magmaliw a babangatan nen Jesu-Kristo?

¹⁸ Diad tulong na libron Pikakabat a Mangitonton ed Andi-anggaan a Bilay tan saray brosyur a singa say Anto so Kakaukolanen na Dios ed Sikatayo?, nayarian tayoy mangikondukta na epektibo iran panangiyaral na Biblia tan makapibiang itayo ed pananulong ed saray balo nin interesado a magmaliw a babangatan. Diad panggugunaet tayon aligen so Baleg a Managbangat, si Jesu-Kristo, naaralan met na saratan ya iyaaralan na Biblia so mareen, maliket a walna tayo, say inkasimoon, tan respeto tayo ed saray estandarte tan pananontonan nen Jehova. Sano tulongan tayo iray balobalo ni diad pangebat ed saray tepet da, isekar tayo met so pangibangat ed sikara no panon dan ebatan iramay mantepet ed sikara. (2 Timoteo 2:1, 2; 1 Pedro 2:21) Bilang piguratibon umaani, seguradon panliketan tayo a walay promedyon 4,766,631 a panangiyaral na Biblia ed sankamundoan a nikondukta nen imbeneg a serbisyon taon. Lalon makapalikliket no kabiangan itayon mismo ed saramay umaani ya akibiang ed kimey a panangiyaral na Biblia.

Mantultuloy a Manliket ed Panagani

19. Akin a walaray maabig a rason na panliket diad panagani kaleganan tan kayarin tuloy na ministeryo nen Jesus?

¹⁹ Walaray maabig a rason na panliket ed panagani kaleganan tan kayarin tuloy na ministeryo nen Jesus. Dakel nensaman so paborablin kinmiwas ed maong a balita. Nagkalautlan makapalikliket nen Pentecostes 33 K.P., lapud ta walay 3,000 ed saman ya angabrasa ed panangidirehi nen Pedro, angawat ed masanton espiritu nen Jehova, tan nagmaliw a kabiangan na nasyon na Dios, salanti say espiritual ya Israel. On, nantultuloy a dinmakel so bilang da, tan pinmalalo so liket da sanen say “Katawan [a Jehova] inyarum to ed sikara ya inagew-agew so saray nilaban.”​—Gawa 2:37-41, 46, 47; Galacia 6:16; 1 Pedro 2:9.

20. Anto so mangitarok ed sikatayo na daakan a liket diad panaganin kimey tayo?

²⁰ Diad saman a panaon et apaneknekan a tua so propesiya nen Isaias: “Pinarakel mo [Jehova]  so nasyon, pinabaleg mo so liket da: manliket ira ed arap mo unong na liket ed panag-ani, singa saray totoo manliket ira sano apagen da so samsam.” (Isaias 9:3) Anggaman naiimatonan tayo natan so ‘matoon nasyon’ na saray alanaan a ngalngali la nakompleto, daakan so liket tayo diad pakakaimano ed idarakel na bilang na arum niran umaani a tinaon.​—Salmo 4:7; Zacarias 8:23; Juan 10:16.

21. Anto so singbaten tayo ed onggendan ya artikulo?

²¹ Maseguron walaan itayo la na maabig iran rason pian mantultuloy a manliket ed panaganin kimey. Say mensahe na ilalo tayo, say panag-anap tayo ed saray makanepegan, tan say mareen ya awawey tayo​—amin na sarayan sengegan so mangitarok na liket tayo bilang umaani. Ingen, negatibon tuloy so reaksion na dakel lapud gagawaen tayo. Asagmak itan nen apostol Juan. Sikato so nipangaw ed isla na Patmos “lapu ed salita na Dios tan say impantasi nen Jesu-Kristo.” (Apocalipsis 1:9) Panon tayo sirin a pansiansiaen so liket tayo sano nidunget itayo ed panamasegsegang tan isusumpa? Anto so makatulong ed sikatayo pian nasungdoan so anawet ya awawey na dakel a pupulongan tayo natan? Itarya na ontumbok ya artikulo so Makasulatan a tulong pian naebatan irayan tepet.

[Paimano ed leksab]

Panon Yon Ebatan?

• Anto so piguratibon panaganin kimey?

• Anton klase na mensahe so iyaabawag tayo?

• Akin a maabig so resulta na panag-anap tayo ed saray babangatan?

• Panon tayon namantini so kareenan diad panaganin kimey?

• Akin a mantultuloy itayon manliket ed panagani?

[Tepetepet Parad Panagaral]

[Saray litrato ed pahina 12, 13]

Say panagpulong nen inmuna tan koma-20 siglo

[Saray litrato ed pahina 13]

Singa si Pablo, panggugunaetan na saray kaplesan ya umaani so panabi ed totoo diad inerman a pasen

[Litrato ed pahina 13]

Iyabawag so maong a balita tekep na maabig ya awawey