Manseet ed Panaganin Kimey!
Manseet ed Panaganin Kimey!
“Saray mantanem ed lualua manani ra naani ed gayaga.”—SALMO 126:5.
1. Akin ya ‘ipikasi ed Katawan na aanien a mangibaki na saray manani’ natan?
KAYARI na komatlon impanbaroy nen Jesu-Kristo pian manpulong ed Galilea, oniay kuanto ed saray babangatan to: “Dakel a tua so aanien, daiset ira balet so manani.” (Mateo 9:37) Mipadpara so kipapasen ed Judea. (Lucas 10:2) Lapud ontan so kipapasen ngalngali 2,000 a taon la so linmabas, anto met so kipapasen natan? Bueno, legan na apalabas a serbisyon taon, masulok a 6,000,000 a Tastasi nen Jehova so nanseet ed piguratibon panaganin kimey diad limog na 6,000,000,000 a totoo ed mundo, a dakel ed saratan so ‘maermen tan abuybuyak, a singa saray karnero ya anggapoy pastol da.’ Kanian say bilin nen Jesus a “pikasi yo sirin ed Katawan na aanien, pian mangibaki na saray manani ed aanien to,” so makatunongan ni natan a singa met ed pigaran siglo lay linmabas.—Mateo 9:36, 38.
2. Anto so mangipapaimano ed sikatayo diad saray totoo?
2 Inebatan nen Jehova a Dios, say Katawan na aanien, so kerew a mangibaki ni na dakel a komikimey. Tan agaylan liket so pibiang ed sayan ididirehi na Dios a panaganin kimey! Anggaman daiset itayo no ikompara ed saray nasyones, naiimano itayo na mundo lapud maseseg a pibibiang tayo ed panangipulong na Panarian tan panaggaway-babangatan a kimey. Diad dakel a daldalin et mabetbet itayon nasalambit ed media. Say tanol na doorbell ed sakey a drama na telebisyon so nayarin mangipabitar ed komento a walad puerta iray Tastasi nen Jehova. On, kabkabat so Makristianon kimey tayo bilang saray piguratibon umaani diad koma-21 siglo.
3. (a) Panon tayon naamtaan a naimano nen inmunan-siglo so kimey a panangipulong ed Panarian? (b) Akin a nibaga tayon saray anghel so manusuporta ed ministeryo tayo?
3 Say mundo so akaimano met ed saray kimey a panangiyabawag ed Panarian nen inmunan-siglo tan apasegsegang iray manangiyabawag na maong a balita. Kanian, oniay insulat nen apostol Pablo: “Isipen ko, a say Dios impasen to kami ya apostoles ya unor ed amin a singara dinusa a pateyen: ta agawa kami [saray apostol] ya iimatonan dia ed mundo, tan dia ed saray angheles, tan dia ed saray totoo.” (1 Corinto 4:9) Mipadpara, naiimano met na mundo so inkaseet tayo bilang manangiyabawag na Panarian anggaman ed panamasegsegang tan satan so importante ed saray anghel. Oniay kuan na Apocalipsis 14:6: “Tan anengneng [nen apostol Juan] so sananey ya anghel a mantektekkiab dia ed pegley na tawen, a wala ed sikato so andi-angga a maabig a balita pian sikato so ipulong to ed saray manaayam dia ed dalin, tan diad balang nasyon tan poli tan salita tan baley.” On, susuportaan itayo na anghel diad ministeryo tayo—diad panaganin kimey tayo!—Hebreos 1:13, 14.
“Puntirya na Panggula”
4, 5. (a) Anto so impasakbay nen Jesus ed saray babangatan to? (b) Akin a say kaplesan iran lingkor na Dios et “puntirya na panggula”?
4 Sanen nibaki iray patumbok nen Jesus bilang umaani, tinalineng da so bilin to a magmaliw a ‘masilib a singa saray uleg, ingen ta mauyamo a singa saray malapati.’ Inyarum nen Jesus: “Manlikas kayo ed saray totoo; ta isaklang da kayo naani ed saray konsilyo, tan leweten da kayo naani ed saray sinagogas da. On, tan niakar kayo naani ed arap na saray makauley tan arari nisengeg ed siak, pian pamintuan ed sikara tan ed saray Gentiles. . . . Tan gulaen [“puntirya na panggula,” NW] da kayo naani na saray amin a katooan nisengeg ed ngaran ko: et bangsay mansungdo ya angga ed kasampotan, sikato lanlamang naani so nilaban.”—Mateo 10:16-22.
5 Sikatayoray “puntirya na panggula” natan lapud “say interon mundo so mandukdukol ed pakayari na marelmeng a sakey,” si Satanas a Diablo, a sikato so manunan kabusol na Dios tan say totoo To. (1 Juan 5:19, NW) Naiimano na saray kabusol tayo so espiritual ya aligwas tayo balet agda bidbiren a manlalapu itan ed si Jehova. Nanenengneng na saray onsusumpa so maliga, makakaimis a kalupaan tayo diad maliket a pibibiang tayo ed panaganin kimey. Pankelkelawan day pankakasakey tayo! Diad tua, nayarin napilitan iran mamidbir ed satan sano onla ra ed sananey a bansa tan naimano ra a parehon tuloy so kimey na saray Tastasi nen Jehova ed mismon bansa ra. Siempre, amta tayo a diad dugan panaon, nakabatan na kakabusol tayo a si Jehova so mananulong tan lapuan na pankakasakey tayo.—Ezequiel 38:10-12, 23.
6. Anto so nipapaseguro ed sikatayo legan tayon mibibiang ed panaganin kimey, balet anton tepet so onlesa?
6 Say Katawan na aanien so angiter ed Anak to, si Jesu-Kristo, na “amin a pakauley . . . ed tawen tan dia ed dalin.” (Mateo 28:18) Diad ontan et uusaren nen Jehova si Jesus a mangidirehi ed panaganin kimey panamegley na saray mangatatawen ya anghel tan say alanaan a “matoor tan makabat ya aripen” dia ed dalin. (Mateo 24:45-47; Apocalipsis 14:6, 7) Balet panon tayon natalonaan so isusumpa na kakabusol tan napansiansia so gayaga tayo legan a manseseet itayo ed panaganin kimey?
7. Anton awawey so panggunaetan tayon pansiansiaen sano nasusumpa odino napapasegsegang itayo?
7 Sano nipaarap itayo ed isusumpa odino pirmi ni ingen a panamasegsegang, onkerew tayoy tulong ed Dios ta pian napansiansia tayo so awawey a singa si Pablo. Insulat to: “Anta naayew kami, bendisyonan mi; anta usilan kami, itepel mi; anta aderal so galang mi, mikasi kami.” (1 Corinto 4:12, 13) Sayan awawey, ya atekepan na mataktikan ministeryo ed publiko, so makapanguman no maminsan ed awawey na saray onsusumpa.
8. Anton panamaseguro so nagamoran yo manlapud saray salita nen Jesus a nikurit ed Mateo 10:28?
8 Say seseg tayo bilang umaani so agmet naamper na pananesga na patey. Makpel itayon mangiyabawag ed mensahe na Panarian diad mapalaway a paraan no posibli. Tan napabiskeg itayo ed walan panamaseguro na saray salita nen Jesus: “Agyo takotan so saray mamatey na laman, ya agda met nayarian a pateyen so kamarerwa: takotan yo ingen so samay makayarin mamatey na laman tan say kamarerwa ed impierno.” (Mateo 10:28) Amta tayon say mangatatawen ya Ama tayo so Manangiter na bilay. Tutumangan to iramay manmamantini ed katooran da ed sikato tan manseseet ed panaganin kimey.
Manangisalbay-bilay a Mensahe
9. Panon so inkiwas na arum ed saray salita nen Ezequiel, tan panon ya ontan met so nagagawa natan?
9 Sanen makpel ya inyabawag nen propeta Ezequiel iray mensahe nen Jehova ed ‘rebelyoso iran nasyon’—saray panarian na Israel tan Juda—maliket a tinmalineng so arum ya indibidual ed walan imbaga to. (Ezequiel 2:3) “Nia,” so kuan nen Jehova, “sika et sikara so singa sakey a marakep a kansion na sakey a wala so makapaliket a boses to, tan manogtog a maong ed sakey a kagawaan.” (Ezequiel 33:32) Anggaman kaliktan daray salita nen Ezequiel, ag-ira kinmiwas unong ed saratan. Anto so nagagawa natan? Sanen makpel ya inyabawag na saray alanaan a nakdaan tan saray kakaiba ra so mensahe nen Jehova, arum so malabay ya ondengel ed saray bendisyon na Panarian, balet ag-ira maapresyan kinmiwas, agnagmaliw a babangatan, tan ag-akibiang ed panaganin kimey.
10, 11. Diad primeron kapaldua na koma-20 a siglo, anto so ginawa pian niyabawag so manangisalbay-bilay a mensahe, tan tekep na antoran resulta?
10 Diad biek a dapag, dakel so paborablin kinmiwas ed panaganin kimey tan akibiang ed panangiyabawag na saray mensahe na Dios. Singa bilang, legan na nantutumbokan a Makristiano iran kombension manlapud 1922 anggad 1928, malinew a niwakawak iray mensahe nipaakar ed panangukom ed marelmeng a sistema na bengabengatla nen Satanas. Impasabi na saray istasyon na radio irayan panangondena a nipresenta ed saratan ya asamblea. Kayari na satan, saray totoo na Dios so angibunog na minilyon a niimprintan kopya na saratan.
11 Diad kaunoran iran dekada na 1930, nigapo so sananey nin kimey ed panagpulong—say “information marches.” Diad primero, mangisulong iray totoo nen Jehova na saray plakard a mangiyaanunsio ed saray paliwawa ed publiko. Kayari na satan et itarok daray plakard a walaan na diparan a singa “Say Relihyon et Sakey a Patit tan Sakey a Panamalikdo” tan “Lingkoran so Dios tan si Kristo ya Ari.” Sanen namparada ira diad saray karsada, asagyat so imano na saray ondadalan. ‘Baleg so agawaan na saya diad inkibantog tan impakapanpakpel na Tastasi nen Jehova,’ so inkomento na sakey ya agin laki a regular ya akibiang ed sayan kimey diad saray okupadon karsada diad London, Inglatera.
12. Niarum ni ed saray mensahe na panangukom na Dios, anto so imparungtal tayo ed ministeryo tayo, tan siopara natan so nankakasakey ed panangipulong na maong a balita?
12 Legan na pangiyaabawag tayo ed saray mensahe a nipaakar ed panangukom na Dios, ipapabitar tayo met iray positibon aspekto na mensahe na Panarian. Say makpel a panagtasi tayo ed imaton na mundo so ontutulong pian naromog tayoray makanepegan. (Mateo 10:11) Maslak ed unor laran kabiangan na alanaan a klase so kinmiwas ed makning a tawag na panagani nen dekaday 1920 tan 1930. Insan, diad sakey a kombension nen 1935 et niparungtal so alay abig iran balita nipaakar ed abenditon arapen parad “baleg ya ulop” na “arum a karnero” diad paraison dalin. (Apocalipsis 7:9; Juan 10:16) Tinalineng daray mensahe a nipaakar ed panangukom na Dios tan akikasakey ira ed saray alanaan diad panangipulong ed manangisalbay-bilay a maong a balita.
13, 14. (a) Anton ligliwa so nagamoran tayo manlapud Salmo 126:5, 6? (b) No mantultuloy itayon mantanem tan mansalog, anto so nagawa?
13 Makaligliwan tuloy ed saray umaani na Dios, tan nagkalalo la ed saramay manasagmak na panamasegsegang, iray salita na Salmo 126:5, 6: “Saray mantanem ed lualua manani ra naani ed gayaga, Say onla tan mannangis a sankatarok to so mabli a bukel, ya itatanem, andi-duaruwa ya onsempet lamet naani a magaygayaga, a sankatarok to so pinungopungo to.” Saray salita na salmista nipaakar ed panagtanem tan panagani so mangiyilustra ed panangasikaso tan panamendisyon nen Jehova ed saray nakdaan a nibulos manlapud impakakautibo ed Babilonia nensaman. Malikeliket ira nen nibulos ira, balet nannangis ira sanen nantanem ira na bukel ed mankibalatar a dalin ya ag-ataneman legan na 70-taon ya inkibantak da. Anggaman kuan, saramay nantultuloy ed panagtanem tan panagpaalagey a kimey so nanggayaga ed bunga tan inkapnek ya agamoran da ed sagpot da.
14 Nayarin makanangis itayo sano nasusubok itayo odino maniirap iray kapananisiaan tayo makasengeg ed inkatunong. (1 Pedro 3:14) Diad panaganin kimey tayo, nayarin nairapan tayo ed primero lapud singano anggapoy aligwas na saray sagpot tayo ed ministeryo. Balet no mantultuloy itayon mantanem tan mansalog, say Dios so mamabaleg ed saray bengatla, a mabetbet ya agtayo iilaloan. (1 Corinto 3:6) Saya so nipabitar a maong ed saray resulta na impangibunog tayo ed saray Biblia tan Makasulatan iran publikasyon.
15. Mangiter na alimbawa na inkamausar na saray publikasyon na Kristiano diad panaganin kimey.
15 Konsideraen pa so alimbawa na sakey a lakin manngaran na Jim. Sanen inatey so ina to, aromog nen Jim so sakey ed saray libro nen nanay to a Life—How Did It Get Here? By Evolution or by Creation? * Binasa to itan tekep na interes. Diad impakapitongtong to ed sakey a Tasi ya inmasingger ed sikato diad karsada, inmabobon si Jim ed pamawil ed sikato, tan nansumpal itan ed panangiyaral na Biblia. Maples so inyaligwas nen Jim ed espiritual, indedika to so inkasikato ed si Jehova, tan abautismoan. Innabang to ed arum a membro na pamilya to so nipaakar ed naaralan to. Bilang resulta, say atsi tan kuya to so nagmaliw a Tastasi nen Jehova, tan nanggayagaan nen Jim ed saginonor so pribilehyo na panaglingkor bilang sigpot-panaon a boluntaryo ed Bethel diad London.
Apasegsegang Ingen ta Maliket
16. (a) Akin a naeeksperiensia so itatalona ed panaganin kimey? (b) Anton pasakbay so inter nen Jesus nipaakar ed epekto na maong a balita, balet anto so awawey tayo sano asinggeran tayoy totoo?
16 Akin ya ontanlay intalona ed panaganin kimey? Lapud saray alanaan a Kristiano tan saray kakaiba ra so tinmalineng ed saray bilin nen Jesus: “No anto so ibagak ed sikayo ed kabilungetan, salitaen yo ed maliwawa; tan no anto so narengel yo ed esaes, ibelyaw yo ed toktok day kaabungan.” (Mateo 10:27) Balet, nailaloan tayoray kairapan, lapud impasakbay nen Jesus: “Say agi yawa’to naani agi to ed ipapatey, tan say ama yawa’to so anak to. Tan saray anak onsumpa ra ed saray kaatengan da, tan sikara so papatey da naani.” Inkuan ni nen Jesus: “Agyo isipen a linma ak dian mangiter na kareenan, noag ingen sakey a kampilan.” (Mateo 10:21, 34) Agginetma nen Jesus a buyaken iray pamilya. Balet no maminsan et say maong a balita so walaan na ontan ya epekto. Tua met itan natan ed saray lingkor na Dios. Sano bisitaen tayoray pamilya, agtayo getma ya iparungtal so sengegan na inkaapag-apag. Pilalek tayo a say maong a balita so abrasaen na amin. Kanian, panggugunaetan tayon katongtongen so amin a membro na pamilya diad mapangasi, masimpatiyan paraan pian magmaliw a makapasagyat so mensahe tayo ed saramay “suston nikiling parad andi-anggaan a bilay.”—Gawa 13:48, NW.
17. Panon a nibiig iramay mangitatandoro ed inkasoberano na Dios, tan anto so sakey ya alimbawa ed saya?
17 Say mensahe na Panarian so mangibiig ed saramay mangitatandoro ed inkasoberano na Dios. Singa bilang, konsideraen paray kaparan managdayew a tinmalindeg a miduma lapud ‘inter da ed Cesar so betang nen Cesar, ingen ta dia ed Dios so saray bengatla a betang na Dios’ diad saray panaon na National Socialism ed Alemanya. (Lucas 20:25) Misunian ed saray pangulo na relihyon tan saray mankuan a Kristiano a membro na saray iglesia na Kakristianoan, tinmalindeg a malet iray lingkor nen Jehova, ya agda sinumlang iray prinsipyo na Biblia. (Isaias 2:4; Mateo 4:10; Juan 17:16) Oniay inkuan nen Propesor Christine King, ya autor na libron The Nazi State and the New Religions: “Dia lambengat ed saray Tastasi, ya agtinmalona so gobierno [na Nazi], ta anggano pinatey da so nilibo, nantultuloy so kimey da tan nen Mayo 1945 et wala nin siansia so grupo na Tastasi nen Jehova, balet ta say National Socialism et naandi la.”
18. Anton awawey so ipapatnag na totoo nen Jehova anggaman ed panamasegsegang?
18 Peteg a makatantanda so awawey ya ipapatnag na totoo nen Jehova sano nidunget ira ed panamasegsegang. Anggaman nayarin nasagyat iray sekular a pakauley ed pananisia tayo, pankelkelawan da so agtayo paniimbel odino pambusol. Singa bilang, saray akaliktar ed Holocaust so mabetbet a mangibalikas na liket tan inkakontento ra no nodnonoten daray naeksperiensia ra. Amta ra a si Jehova so angiter ed sikara na “say sankatageyan ya inkabaleg na pakayari.” (2 Corinto 4:7) Saray alanaan ed limog tayo so walaan na panamaseguro a ‘saray ngaran da et nisulat ed tawen.’ (Lucas 10:20) Say panagsungdo ra so mamapawala na ilalo ya agmansumpal ed inkadismaya, tan ontan met so kombiksion na saray matoor ya umaani a walaan na mangaraldalin ya ilalo.—Roma 5:4, 5.
Manseet ed Panaganin Kimey
19. Antoran epektibon metodo so uusaren diad Makristianon ministeryo?
19 Talaranan tayo no panon nin kabayag so pangiyabuloy nen Jehova diad pibibiang tayo ed sayan piguratibon panaganin kimey. Kaleganan ni, nepeg tayon nodnonoten a saray umaani so walaan na espesipikon metodo ed panggagawa ra’d kimey da. Mipadpara, makapanseguro itayo a say panmamatoor tayo ed panangusar ed asali la tan asubok laran paraan ed panagpulong so napaneknekan ya epektibo. Inkuan nen Pablo ed saray kapara ton Kristiano: “Pikasik ed sikayo . . . sikayo komon so manangalig ed siak.” (1 Corinto 4:16) Sanen pinegdat nen Pablo iray mamatatken ed Efeso diad Mileto, pinanonotan to ira ya agto inkibot so pangibangat ed sikara “a lapag, tan dia ed saray kaabungan.” (Gawa 20:20, 21) Naaralan na kaiba nen Pablo a si Timoteo iray metodo na apostol tan sarag to sirin ya iparungtal ed saray taga-Corinto so nipaakar ed saraya. (1 Corinto 4:17) Benendisyonan na Dios iray paraan nen Pablo ed panagbangat, no panon a bendisyonan to met so panseseet tayo ed mapublikon panangipulong ed maong a balita diad kabkaabungan, diad saray panagpawil, diad saray panangiyaral na Biblia, tan inerman a pakaromogan ed totoo.—Gawa 17:17.
20. Panon ya impasakbay nen Jesus a peles so daakan ya espiritual a panagani, tan panon iyan apaneknekan a tua nen imbebeneg iran taon?
20 Kayari ton pinulongan so sakey a Samaritana diad asingger na Sychar nen 30 K.P., sinaglawi nen Jesus so nipaakar ed espiritual a panagani. Oniay kuan to ed saray babangatan to: “Itangwa yoray mata yo, tan nengneng yo so kaumaan, ya amputi la ran maparaan ed panagani. Say manani mangawat na upa, tan mangilusbo na bunga ya onkana ed bilay a maando; pian say mantanem tan say manani makapanggayaga ra.” (Juan 4:34-36) Nayarin atebek la nen Jesus so epekto na impakapitongtong to ed Samaritana, ta dakel so anisia ed si Jesus makasengeg ed impantasi na satan a bii. (Juan 4:39) Nen imbebeneg a taon, naandi ed nanduruman bansa iray panameget ed saray Tastasi nen Jehova odino sikara so legal a binidbir, ya angilukas ed balo iran lawak a pan-anian. Say resulta et peles so daakan ya espiritual a panagani. Dia tua, saray mayaman a bendisyon so naeeksperiensya la legan a maliket itayon mibibiang ed espiritual a panagani diad interon mundo.
21. Akin a walaan itayo na rason a manseet bilang maliket ya umaani?
21 Sano akaparaan lan anien iray tanem, nepeg ya onkiwas iray umaani tekep na inkaganatan. Agda nepeg ya ipalpaleen so pankimey. Natan, nakaukolan a makuli itayon mankimey tan tekep na inkaganatan lapud manbibilay itayo ed “panaon na anggaan.” (Daniel 12:4, NW) On, makakaabet itayo na saray subok, balet ta wala so malaklaknab a panagani na saray lingkor nen Jehova nen say kapiganman. Saya la sirin so panaon na panliket. (Isaias 9:3) Kanian bilang maliket ya umaani, manseet tayo ed panaganin kimey!
[Paimano ed leksab]
^ par. 15 Impalapag tan imbunog na saray Tastasi nen Jehova.
Panon Yon Ebatan?
• Panon ya inebatan na Katawan na panagani so kerew parad dakel nin komikimey?
• Anggaman ‘puntirya itayo na panggula,’ anton awawey so pansiansiaen tayo?
• Akin a malikeliket itayo anggaman napapasegsegang itayo?
• Akin a nepeg itayon manseet ed panaganin kimey tekep na inkaganatan?
[Tepetepet Parad Panagaral]
[Saray litrato ed pahina 16, 17]
Susuportaan na anghel iramay mibibiang ed espiritual a panagani
[Litrato ed pahina 18]
Nipaimano ed karaklan so mensahe na Panarian panamegley na “information marches”
[Litrato ed pahina 18]
Mantanem tan mansalog itayo, balet say Dios so mamabaleg ed satan