“Peteg Kasin Kokondenaen na Dios so Totoo a Poolan Ira ed Impierno?”

“Manaaral kayo ta na teolohiya?”

Sayan tepet so anurprisa ed si Joel tan si Carl. Sayan duaran kalangweran a lalaki​—a boluntaryon manlilingkor ed hedkuarter na Tastasi nen Jehova diad Brooklyn, New York​—so manbubukay na liblibro ed asingger a bookstore. Legan a susurien nen Joel iray concordance na Biblia, inistorya ed sikato nen Carl so maabig ya impakapanpulong to. Lapud nadngel na sakey a lakin manalalagey ed abay da so walan paniistoryaan da, tampol ya inasinggeran to ra.

Balet, say laki so walaay nagkalalon personal a paninteresan nen say no kasin say duaran lalaki so manaaral na teolohiya. Oniay insalaysay to: “Sakey ak a Judio, tan ibabaga na arum a Kristianon kakaarok a siak so poolan ed impierno lapud impulisay na saray Judio si Jesus. Saya so pirmin mangogonigon ed siak. Say ontan a panagdusa na maaron Dios et singa aliwan makatunongan. Peteg kasin kokondenaen na Dios so totoo a poolan ira ed impierno?”

Inkuan nen Joel tan si Carl ed sayan masimoon a laki a sikaray maseseg ya estudyante na Biblia. Impalinew da ed sikato manlapud Kasulatan a saray inaatey et anggapoy lay amta ra tan singa labat la ira naugip ed patey a manaalagar na kioli ed bilay. Kanian, ag-ira managmak na pirmin panamairap odino makapaot-ot ya impiernon-apoy. (Salmo 146:3, 4; Eclesiastes 9:5, 10; Daniel 12:13; Juan 11:11-14, 23-26) Kayari na 45-minutos a tongtongan da, inter na laki so address to ed si Joel tan si Carl tan kinmerew ni na dakel ya impormasyon nipaakar ed nantongtongan da.

No say impierno et pasen na mangapuy-apoy a pairapan, kasin kerewen na siopaman a sikatoy iyakar diman? Ingen, say patriarkan Job, a manpirawat a nibulos ed paniirap to, et oniay kinerew to: “O komon ta iyamot moak ed Sheol [“impierno,” Douay Version], pian niyagel moak a maamoamot, angga ed say sanok mo onlabas.” (Job 14:13) Malinew ya agpanisiaan nen Job a say impierno et sakey a pasen na panirapan. Imbes, et labay toy paiyagel diman. Say patey so sakey a kipapasen na andiay- kiwawala, tan say impierno ed Biblia et say kaslakan a lubok na katooan.

No labay mo ni so kaaruman ya impormasyon nipaakar ed no antoy nagagawa ed sikatayo sano inatey itayo tan no anto so walan ilalo kayari ipatey, maliket mi kan imbitaan ed onggendan ya opresi mi.