Peteg Kasin Mapasensia Ka?

KASIN asalim lay asanokan a maong lapud makapuy a kondukta na sananey? Tampol ka ta ya onkiwas sumpad saray mauges ya impluensia a pirmin mangaapekta ed saray maapit a kalimog mo?

No maminsan et nakaukolan so masiglat tan mapekder a kiwas ta pian naamper so ikasmak na seryoson kasalanan. Alimbawa, sanen say nigalet a tuloy a gawan mauges so manitilol ed saray Israelita nen koma-15 a siglo K.K.P., say apo nen Aaron a si Phinehas so mapekder a kinmiwas ta pian napagit so mauges. Inabobonan nen Jehova a Dios so ginawa to, diad impangikuan: “Si Phinehas, . . . impaliis to so sano’ko ya inyarawi ed saray anak na Israel, a sikato maimon a singa panangimon ko ed nanleleetan da.”​—Numeros 25:1-11.

Kinmiwas a matukoy si Phinehas, balet say agmakatunongan a pansyodot tayo ed saray lingo na arum et agto itayo pagmaliwen bilang sakey a manangiyalibansa na inkatunong, noagta bilang toon mapayunget​—ya agto palalabasen iray ag-inkayadyari na arum. Anto so makatulong ed sikatayo pian napaliisan tayo iyan patit?

‘Si Jehova so Mamerdona ed Amin a Kasulitan Yo’

Si Jehova so “maimon (maseseg) a Dios; sakey a Dios ya agmangiyaabuloy ed pilalaslasan.” (Exodo 20:5, paimano’d leksab na New World Translation) Bilang Manamalsa, kanepegan ton kaukolanen ed sikatayoy nikabkabiig a debosyon. (Apocalipsis 4:11) Ingen, si Jehova so maan-anos no nipaakar ed saray kaleteyan na too. Lapud satan et oniay inkanta nen salmistan David: “Si Jehova so mapangasi tan magrasya, mabanayat a manpasnok tan daakan ed panangasi. Sikato agmialaan na salita lawas [“agnaynay a manaanap na kalilingoan,” NW] . . . Sikato agto ginawa ed sikatayo so unong na kanepegan na saray kasalanan tayo, nisay itumang to ed sikatayo so kanepegan na saray kasulitan tayo.” On, no sikatayo so magbabawi, say Dios so ‘mamerdona ed amin a kasulitan tayo.’​—Salmo 103:3, 8-10.

Lapud natatalosan toy makasalanan a kipapasen na totoo, si Jehova so “agnaynay a manaanap na kalilingoan” ed saray magbabawin managgaway-mauges. (Salmo 51:5; Roma 5:12) Diad tua et gagala to ya ekalen so kasalanan tan ag-inkayadyari. Anggad agsigpot nin naekal itan, imbes ya itarok komon na Dios so ‘unong ed kanepegan tayo,’ sikatoy mabulbulos a mameperdona base’d dondon bagat nen Jesu-Kristo. Anggapo ed sikatayo so makanepegan na kililiktar no si Jehova et agto itayo kinasian sano matukoy itan. (Salmo 130:3) Agaylay pisasalamat tayo ta say mangatatawen ya Ama tayo, a kanepegan ton kaukolanen ed sikatayoy nikabkabiig a debosyon et sakey a maan-anos a Dios!

Nakaukolan so Inkasimbang

Lapud maan-anos so pidedeneng na Soberanon Katawan na uniberso ed saray ag-ayadyarin totoo, agta nepeg ya ontan met so gawaen tayo? Say inkamaabuloy so naukeran bilang “say kiling ya anosan iray opinyon odino agamil na arum.” Ontan ta so kiling tayo bilang indibidual​—walaay inklinasyon ya anosan tan itepel so ibaga odino gawaen na arum ya agmet balbaleg a kasalanan balet ta parad sikatayo et satan so makapuy la?

Siempre, kaukolan tayon paliisan so pagmaliw ya alablabas lan mapasensiya. Singa bilang, makapasinagem so nansumpalan sanen pinaulyan na saray autoridad ed relihyon iray manag-abuson papari a tuloytuloy a manmomolestiya ed ugugaw a lalaki tan bibii. Oniay inkuan na sakey a reporter ed Ireland: “Diad pangipapasen ed ugugaw a singara nibanbanan akagawaan na kasalanan, iyaalis lambengat na saray autoridad ed simbaan so nankasalanan a pari [ed sananey a lugar].”

Kasin say pangiyalis ed ontan a too et pakanengnengan lay dugan panagpasensiya? Andin  balot! Singa itan ed pangiyabuloy na medikal ya ulop ed sakey ya iresponsablin surhyon ya ituloy toy man-opera, diad pangiyalis da’d sikato ed sananey ya ospital, anggano papateyen tan babaldadoen to laray pasienti to. Say agsuston katooran ed ka-propesyon so mamawala na ontan ya “inkamaabuloy.” Balet komusta iramay biktima ya inatey odino pirmin naapektoan lapud palpalaran odino kriminal ni ingen ya agagamil?

Wadtan met so kapeligroan na agtanton panagpasensia. Sanen wadiad dalin si Jesus, walaray Judion kabkabat bilang Zealot ya agsustoy impangiyaplika ra’d sakey ya alimbawa nensaman pian ikatunongay mismon alablabas ya aktibidades da. Oniay kuan na sakey ya iskolar: “Say alimbawa ra et si Phinehas . . . a lapud panag-apostata parad si Baal-peor et kinmiwas tekep na seseg parad si Yahweh . . . tan kinmiwas a tampol pian patundaen so iyaabebay moralidad.” Sakey ed alablabas a kiwas na pigaran Zealot et say “pilimog ed saray karaklan a walad Jerusalem kaleganan na piespiesta tan mipadpara iran okasyon tan panaksak ed saray kalaban da ya agmikabat a sikaray walaay punyal.”

Bilang Kristianos et agtayon balot aligen so ginawa na saray Zealot diad pamasakit ed pisikal ed saramay pakakaingongotan tayo. Balet kasin walay anggaan na pakakaingongot tayo diad arum a paraan ya atakien tayo la iramay agtayo aabobonan​—a singa diad ansakit a pansalita nipaakar ed sikara? No petepeteg a sikatayoy mapasensia, agtayo usaren so ontan a makapasakit a panagsalita.

Saray inmunan-siglon Fariseo so sakey nin mapayunget a grupo. Naynay dan kokondenaen iray arum tan agda palalabasen so ag-inkayadyari na too. Nileglemew na saray mankinon a Fariseo iray kabanyakan, a minelmelag ira bilang ‘katooan a naayew.’ (Juan 7:49) Walay maong a rason nen Jesus no akin a kinondena to iratan a mantunongtunongan a lalaki, a kuanto: “Kasi kayo la, ya eskribas tan Fariseos, a mansimpisimpitan! Ta manbayar kayo na kakaplo na verbabuena tan anis tan cumino, balet pinaulyan yo ya agsinumpal so saray ambelbelat a pamaakaray katunongan salanti, kaalasan, tan panangasi tan pananisia; balet saraya komon so nepeg yon gawaen, tan agyo paulyan iray arum ya aggawaen.”​—Mateo 23:23.

Diad impansalita na ontan, ag-ibabaliwala nen Jesus so kaimportantian na panumbok ed Mosaikon Ganggan. Impanengneng to labat no panon a say “ambelbelat,” odino importantin tuloy iran kabiangan na Ganggan et kaukolan so panangiyaplika ed satan tekep na inkamakatunongan tan panangasi. Agaylan miduma si Jesus tan saray babangatan to ed saramay mapayunget a Fariseo tan Zealot!

Agkokonsintien nen Jehova a Dios nisay si Jesus so kaugsan. Agmanbayag et nagaway “panamales ed saray agmikabat ed Dios, tan dia ed saray ag-ontulok ed ebanghelyo.” (2 Tesalonica 1:6-10) Balet lapud seseg nen Jesus parad inkatunong, agton balot asaew a nipatnag so anos, panangasi, tan maaron panangiyansakit na mangatatawen ya Ama to parad amin na saramay malabay a manggawa na maptek. (Isaias 42:1-3; Mateo 11:28-30; 12:18-21) Agaylan maabig ya alimbawa so impanengneng nen Jesus ed sikatayo!

Maanos a Mantetepelan so Sakey tan Sakey

Anggaman walaan itayoy pirmin seseg ed no anto so duga, iyaplika tayo so simbawa nen apostol Pablo: “Mantetepelan so sakey tan sakey, tan manpeperdonaan so balang sakey, no say siopaman a too wala so pangidaleman to ed siopaman; unong ed impamerdona na Katawan ed sikayo, ontan met so gawaen yo.” (Colosas 3:13; Mateo 6:14, 15) Kakaukolanen na inka-mapasensia so pangitepel ed saray kakulangan tan lingo na balang sakey tan sakey ed sayan agnaspot a mundo. Kaukolan a sikatayoy makatunongan nipaakar ed iilaloan tayo ed arum.​—Filipos 4:5.

Say pagmaliw a mapasensia et agto kabaliksan ya anggan panon et sikatayo lay mangokonsente ed gawan mauges odino manbulagbulagan itayo la ed saray pakakalingoan. Walaray aspekto ed kaisipan odino kondukta na sakey a kapananisian a singano agmitunosan ed saray estandarte nen Jehova. Anggaman say ikakasipa et aliwa nin tanton seryoso a pansengegan lay pangikaindan na Dios ed sikatayo, nayarin mangiter  itan na pasakbay a nakakaukolan so panguman. (Genesis 4:6, 7) Agaylan inka-maaro sano saramay walaan na espiritual a kualipikasyon et panggunaetan dan ipetek so mankakasalanan tekep na maulimek a liknaan! (Galacia 6:1) Balet pian matalona ed onian pambabanikelan et kapilitan so ikiwas tekep na panangiyansakit imbes a diad awawey a makritiko.

“Tekep na Maulimek a Liknaan tan Aralem a Respeto”

Komusta balet so pangagamil na anos ed saramay totoo a midumaan iray relihyoson panmoria ra ed sikatayo? Oniay nabasa ed nipaskil a “General Lesson” diad amin a National School a niletneg ed Ireland nen 1831: “Agginetma nen Jesu-Kristo ya ipilit so relihyon to ed totoo diad panamegley na marawal iran paraan. . . . Aliwan diad pikolkol ed kaparan totoo tan pangabuso ed sikara so paraan pian kombinsien ira a sikatayo so susto tan sikara so aliwa. Maseguron satan so mangombinse ed sikara ya anggapo ed sikatayo so awawey na sakey a Kristiano.”

Nambangat tan kinmiwas si Jesus ed paraan a manangguyor ed totoo ed Salitay Dios, tan ontan met so gawaen tayo. (Marcos 6:34; Lucas 4:22, 32; 1 Pedro 2:21) Bilang sakey ya ayadyarin too a walaan na nikaduman inter na Dios ya aralem a pakatalos, sarag ton basaen so kapusoan tayo. Sano kapilitan sirin et sarag nen Jesus ya iyabawag iray pirmin panangondena ed kakabusol nen Jehova. (Mateo 23:13-33) Aliwan ag-inkamapasensia ed biang to so panggawa’d satan.

Aliwa itayon singa si Jesus a walaay abilidad a nabasa so walad kapusoan na arum. Kanian, nepeg tayon tumboken so simbawa nen apostol Pedro: “Pasantosen yoy Kristo bilang Katawan ed kapusoan yo, a lawas akaparaan a mandepensa ed arap na balang sakey a mankaukolan ed sikayo na katunongan nisesengeg ed ilalon walad sikayo, balet gawaen itan tekep na maulimek a liknaan tan aralem a respeto.” (1 Pedro 3:15, NW) Bilang lingkor nen Jehova, kaukolan ya idepensa tayo no antoy sisiaen tayo lapud satan so pihon nibase’d Salitay Dios. Balet kaukolan tayon gawaen iya tekep na respeto ed arum tan ed saray masimoon a sisiaen da. Oniay insulat nen Pablo: “Say salita yo komon natekepan lawas na liga, alaokan na asin, pian nakabatan yo no panon so nepeg yo ya iyebat ed balang sakey.”​—Colosas 4:6.

Diad bantog a Sermon to ed Palandey, inkuan nen Jesus: “Amin a bengatla . . . a labay yo a gawaen na totoo ed sikayo, ontan so gawaen yo met ed sikara.” (Mateo 7:12) Kanian, tekep na anos sirin et mantetepelan itayo tan respetoen iramay pupulongan tayo na maong a balita. Diad pagmaliw ya asimbang ed seseg tayo parad inkatunong unong ed nibase’d Biblian panagpasensia, napaliket tayo si Jehova tan magmaliw itayon petepeteg a mapasensia.

[Litrato ed pahina 23]

Paliisay mapayunget ya awawey na saray Fariseo

[Litrato ed pahina 23]

Impatnag nen Jesus so mapasensian awawey na Ama to. Kasin ontan ka met?