Tinaon a Miting Oktubre 6, 2001
Tinaon a Miting Oktubre 6, 2001
SAY TINAON A MITING na saray membro na Watch Tower Bible and Tract Society of Pennsylvania so nagawa no Oktubre 6, 2001, diad Assembly Hall na Tastasi nen Jehova, diad 2932 Kennedy Boulevard, Jersey City, New Jersey. Say primeron miting na saray membro labat so nagawa ed 9:15 n.k., a tumbokan na inkalapagan a tinaon a miting diad 10:00 n.k.
Kaukolan ya ipaamta la natan na saray membro na korporasyon ed Opisina na Sekretaryo so nipaakar ed antokaman ya impansalat na address da diad apalabas a taon ta pian onsabi ed sikara leleg na Hulyo iray regular a sulat na abiso tan saray dokumenton-kasandi (proxy).
Saray dokumenton-kasandi, ya ipawit ed saray membro katekep so abiso na tinaon a miting, so kaukolan ya ipawil ta pian makasabi ed Opisina na Sekretaryo na Sosyedad ya ag-onlampas ed Agosto 1. Kaukolan a kompletoen tan ipawil a tampol na kada membro so dokumenton-kasandi a nipawil ed sikato, a mangidalatdat no kasin sikatoy makapimiting odino andi. Say impormasyon a nilugan ed dokumenton-kasandi so kaukolan a piho nipaakar ed sayan punto, lapud pangibasian itan diad panetermina no siopa so personal a makaonla.
Iilaloan a say interon sesyon, pati say pormal a business meeting tan saray report, so nasumpal ed 1:00 n.n. odino tampol kayari to. Anggapo so sesyon ed ngarem. Lapud limitado so espasyo, makaloob labat iramay walaay ticket. Anggapo iray uksoyan a gawaen pian ikonekta so tinaon a miting ed saray telepono diad arum ya auditoryum.