Ipatnag Yo so Ibubulaslas Yo

“Seetan mo so sarayan bengatla, sikara labat so arapen mo; pian say ibubunam nipatnag komon ed saray ganagana.”​—1 TIMOTEO 4:15.

1. Panon yon nibaga a say bunga et aluto la tan nayari lan kanen?

 IRETRATO yo pa ed kanonotan yo so paborito yon prutas​—tsiko, kaimito, mangga, odino arum ni. Kasin nibiig yo no aluto la itan tan nayari lan kanen? Maseguron ontan. Nibiig yo ed angob, kolor, tan ukis na satan a masamsamit itan a kanen. Manlikliket kayo no akusaban yo la itan. Makmakbol! Masamsamit! Panggayagaan tan panlikliketan yo itan a maong.

2. Panon a napatnagan so inkatakken, tan anto so epekto na satan ed personal iran pisisiglaotan tayo?

² Sayan simpli balet ta makapaliket ya eksperiensya so mipadpara ed arum niran aspekto na bilay. Singa bilang, mipara ed inkaluto la na prutas, say espiritual ya inkatakken na sakey a too so napatnagan met ed nanduruman dalan. Nibiig tayo so inkatakken na sakey a too sano ipatnag to so pakatebek, aralem a pakatalos, kakabatan, tan arum nira. (Job 32:7-9) Maseguron panliketan tayo so milimog tan mikimey ed totoo a mangipapatnag na ontan a kalidades ed saray awawey tan kakikiwas da.​—Uliran 13:20.

3. Anto so impatnag na deskripsion nen Jesus ed saray totoo nen panaon to nipaakar inkatakken?

³ Diad biek a dapag, say sakey a too so nayarin matakken la ed pisikal, balet say paraan na panagsalita tan kakikiwas to so nayarin mangipatnag a sikato so ugaw-ugaw ni ed emosyon tan espiritualidad. Alimbawa, diad impanaglawi to ed anawet-tenten a kailalakan ed panaon to, oniay kuan nen Jesu-Kristo: “Si Juan linma dia ya agto mangan tan agmet uninum, et kuan da, Sikatoy walaan na sakey a demonyo. Say Anak na too linma dia a mangan tan oninum, et kuan da, Nia, so sakey a toon masiba tan mainom na alak.” Anggan saraman a totoo so matakken la ed pisikal, inkuan nen Jesus a kinmiwas ira a singa “ugugaw”​—aliwa iran matakken.  Kanian, oniay inyarum to: “Say kakabatan napatnagan la ed saray gawa to.”​—Mateo 11:16-19.

4. Diad antoran paraan a napatnagan so ibubulaslas tan inkatakken?

⁴ Manlapud saray salita nen Jesus, natebek tayo no kasin say too et walaan na tuan kakabatan​—sakey a nikadkaduman pakapangibiigan na inkatakken​—a napatnagan ed saray gagawaen to tan saray epekto na satan. Mitunosan ed satan, imanoen so simbawa nen apostol Pablo ed si Timoteo. Kayari ton indalatdat iray bengatla a nepeg a gegemtanen nen Timoteo, inkuan nen Pablo: “Seetan mo so sarayan bengatla, sikara labat so arapen mo; pian say ibubunam nipatnag komon ed saray ganagana.” (1 Timoteo 4:15) On, say ibubulaslas na sakey a Kristiano ed inkatakken so “nipatnag,” odino malinew a natebek. Say inkatakken bilang Kristiano, a singa onsisinag a liwawa, so aliwan akaamot odino agnanengneng a kalidad. (Mateo 5:14-16) Konsideraen tayo sirin so duaran manunan paraan a nayarin nipatnag so ibubulaslas tan inkatakken: (1) onaaligwas ed pikakabat, pakatalos, tan kakabatan; (2) mangipapatnag na bunga na espiritu.

Inkasaksakey ed Pananisia tan Pikakabat

5. Panon a naukeran so inkatakken?

⁵ Say inkatakken so deneskribe na maslak a diksionaryo bilang say kipapasen a sigpot lan binmaleg, pagmaliw lan susto ed kabaleg, tan akasabi la ed kapantokan a kipapasen odino suston inkatakken. Singa ed asalambit la, say prutas so matakken la, odino aluto la, sano nagnap la so natural a sikulo na ibabaleg to tan say itsura, kolor, angob, tan taway na satan et susto la’d inkatakken odino inkaluto. Kanian say inkatakken so misimbangan ed inka-ekselente, inkakompleto, inkanaspot ni ingen.​— Isaias 18:5; Mateo 5:45-48; Santiago 1:4.

6, 7. (a) Anto so mangipapanengneng ya interesadon maong si Jehova ya ombulaslas so amin a mandadayew ed sikato diad espiritual ya inkatakken? (b) Anto so maapit a pisiglaotanan na espiritual ya inkatakken?

⁶ Interesadon tuloy si Jehova a Dios ed ibulaslas na amin a mandadayew ed sikato diad espiritual ya inkatakken. Nisesengeg ed satan a gagala, sikato so nanggawa na alay abig iran probisyon ed loob na Kristianon kongregasyon. Oniay insulat nen apostol Pablo ed saray Kristiano diad Efeso: “Saray arum inyan tora ya apostoles; tan saray arum, propetas; tan saray arum, manangipulong na maabig a pakabat; tan saray arum, pastor tan manangibangat, ya onkana a pakayadyarian na saray sasantos, a nipaakar ed gawa na panaglingkor, angga ed kipaalagey na laman nen Kristo. Angga ed sikatayo ya amin so makarateng ed pankakasakey na pananisia, tan say [suston] pikakabat ed Anak na Dios, dia ed too ya andi-pankulangan to, dia ed sukat na kinaatagey na inkapno nen Kristo. Pian ag-itayo la manugaw-ugawan, a nipalpalig itayo dia tan diman tan nitektekkiab ed antokaman a dagem na bangat, unong ed saray kasiliban na totoo, dia ed kasaolan da, unong ed panamalingo na kalingo.”​—Efeso 4:11-14.

⁷ Diad sarayan bersikulo, impaliwawa nen Pablo ya arum ed saray rason no akin ya intarya na Dios iratan a daakan ya espiritual a probisyon ed kongregasyon et amin so kaukolan ya ‘ondateng ed inkasaksakey na pananisia tan ed suston pikakabat,’ magmaliw ya “andi-pankulangan,” tan nawalaan na ‘sukat na kinaatagey nen Kristo.’ Diad ontan lambengat ya agtayo nipalir a singa espiritual ya ugaw-ugaw diad saray palson  ideya tan bangabangat. Kanian natebek tayo so maapit a siglaotan na ibubulaslas ed inkatakken bilang Kristiano tan pakarateng ed ‘inkasaksakey na pananisia, tan ed suston pikakabat ed Anak na Dios.’ Walaray punto ed simbawa nen Pablo a nepeg tayon talinengen.

8. Anto so kakaukolanen pian nagegemtan so ‘inkasaksakey’ ed pananisia tan ed suston pikakabat?

⁸ Unona, lapud say ‘inkasaksakey’ et nepeg a namantini, say matakken a Kristiano so nepeg a mikasakey tan sigpot a mitunosan ed saray kapananisiaan no nasasaglawi so pananisia tan pikakabat. Agto iyaalibansa odino ipipilit so personal iran opinyon to odino manem-em na personal iran ideya no nipaakar ed pakatalos ed Biblia. Imbes, sikato so walaan na sigpot a kompiyansa ed katuaan unong ya ipaparungtal nen Jehova a Dios panamegley na Anak to, si Jesu-Kristo, tan say “matoor tan makabat ya aripen.” Diad regular ya igamor na espiritual a tagano a nitatarya ed “dugan panaon”​—panamegley na saray Kristianon publikasyon, miting, asamblea, tan kombension​—makaseguro itayo a napansiansia tayo so ‘inkasaksakey’ ed saray kaparan Kristiano diad pananisia tan pikakabat.​—Mateo 24:45, NW.

9. Ipaliwawa so kabaliksan na balikas a ‘say pananisia’ unong ya inusar nen Pablo ed sulat to ed saray taga-Efeso.

⁹ Komadua, say balikas a ‘say pananisia’ so manutukoy, aliwan ed kombiksion na kada indibidual a Kristiano, noagta ed ami-amin a papanisiaan tayo, say “kaawang tan karukey tan kaatagey tan kaaralem” na satan. (Efeso 3:18; 4:5; Colosas 1:23; 2:7) Diad tua, panon a makapikasakey so sakey a Kristiano ed saray kapanisiaan no say papanisiaan odino aawaten to lambengat et sakey a kabiangan na ‘say pananisia’? Kabaliksan na saya ya agtayo lambengat pankontentoan so pakaamta ed manuna iran bangat na Biblia odino ed pakawalaan na agmalinew odino daiset a pikakabat ed katuaan. Imbes, kaukolan ya interesado tayon manganamot ed amin a probisyon nen Jehova panamegley na organisasyon to pian nasuri tayon maong so Salita to. Anggad posibli et nepeg tayon panggunaetan a gamoran so susto tan sigpot a pakatalos ed linawa tan gagala na Dios. Laktipen na saya so pangigana na panaon ed pambasa tan panaral ed Biblia tan ed saray publikasyon na Biblia, pampikasi ed Dios parad tulong tan panangigiya to, regular ya iyatendi ed saray Kristianon miting, tan sigpot a pibibiang ed kimey a panangipulong na Panarian tan panaggaway-babangatan.​—Uliran 2:1-5.

10. Anto so kabaliksan na saray salitan “angga ed sikatayo ya amin so makarateng,” unong a nausar ed Efeso 4:13?

¹⁰ Komatlo, inggapo nen Pablo so panangideskribe ed nankatlon kalat panamegley na saray salitan “angga ed sikatayo ya amin so makarateng.” Nipaakar ed balikas a “sikatayo ya amin,” inter na sakey a reperensya nipaakar ed Biblia so kabaliksan na satan bilang “aliwan amin, sansakey, nambiigan, noagta manuulop ya amin.” Diad arum a salita, balang sakey ed sikatayo so nepeg a mansagpot ed makatunongan a paraan pian nagegemtan so kalat diad itakken bilang Kristiano kaiba so interon impanaagi. Oniay inkuan na The Interpreter’s Bible: “Say inkagnap na pakadampot ed espiritual et agnagawaan na sakey a too a bukor to labat, no panon a say sakey a kabiangan na laman et agsigpot ya ombaleg no agmantultuloy ya ombaleg a mabunigas so interon laman.” Pinanonotan nen Pablo iray Kristianon taga-Efeso a “pati saray lapag a sasantos” a sikara so nepeg a manbanikel a makarandan ed nagnap a laknab na pananisia.​—Efeso 3:18a.

11. (a) Anto so agkabaliksan na ibulaslas ed espiritual? (b) Anto so nakaukolan tayon gawaen ta pian ombulaslas itayo?

¹¹ Malinew ed saray salita nen Pablo a say ibubulaslas ed espiritual so agmankabaliksan a panoen tayo labat so kanonotan tayo na pikakabat tan pirmin inkadunong. Say matakken a Kristiano so agmanpapasirayew ed arum lapud inkautek to. Imbes, ibabaga na Biblia: “Say basbas na matunong sikato so singa liwawa na kabuasan, ya onsinag ya onsinag angga ed nagnap ya agew.” (Uliran 4:18) On, “say basbas,” aliwan say indibidual, so “onsinag ya onsinag.” No mantultuloy itayon mansagpot pian mibansag ed lawas onliliwawan pakatalos ed Salitay Dios ya ipapagamor nen Jehova ed totoo to, sikatayo so ombulaslas ed espiritual. Diad sayan kipapasen,  say pibansag et iyaabanti, tan satan so bengatlan nagawaan tayon amin.​—Salmo 97:11; 119:105.

Ipatnag so“Bunga na Espiritu”

12. Akin a say pangipatnag ed bunga na espiritu so importante ed panggugunaet tayon ombulaslas ed espiritual?

¹² Anggaman importante a narapat tayo so ‘inkasaksakey ed pananisia tan ed suston pikakabat,’ importante met ya ipatnag tayo so bunga na espiritu na Dios ed amin ya aspekto na bilay tayo. Akin? Unong a naimano tayo la, say inkatakken so aliwan akindalem odino akaamot, noagta satan so napatnagan ed mainomay iran natebek a walewaleng a makagunggona tan makapabiskeg ed arum. Siempre, say panggugunaet tayon ombulaslas ed espiritual et aliwa lambengat a pambanikel ya imanoen so abayuboan odino aliwan sipor ya ugali. Imbes, diad ibubulaslas tayo ed espiritual, say panumbok tayo ed panangiwanwan na espiritu na Dios, niwala so makapakelaw a kapasimbalo ed saray awawey tan kiwas tayo. “Manakar kayo ya unong ed espiritu, tan agyo uunoren so saray kaalakan na laman,” so kuan nen apostol Pablo.​—Galacia 5:16.

13. Anton pananguman so malinew a pakapatnagan na ibubulaslas?

¹³ Intuloy ya indalatdat nen Pablo ‘iray gawa na laman,’ a dakerakel tan ‘mapatpatnag.’ Sakbay a natalosan na sakey a too so kaimportantian na saray kakaukolanen na Dios, say bilay to so nitunos ed saray kaslakan a dalan na mundo tan nayarin napno itan na saray bengatlan sinalambit nen Pablo: “pikakalugoran, karutakan, kaalakan na laman. Pididios ed saray talintao, panag-anito, pambubusolan, pankokolkol, imon, sanok, pansesepakan, inkaapag-apag, saray pamikpikewet ed pananisia. Saray sibletan, pampapateyan, panagbuanges panduroypo, tan saray miulibay ed saraya.” (Galacia 5:19-21) Balet lapud iyaaligwas na too ed espiritual, kalkalna ton nadaeg iratan ya agkalkaliktan a “gawa na laman” tan palugaran to so “bunga na espiritu.” Sayan akinpaway tan nanengneng a pananguman so malinew a pakapatnagan a say too so ombubulaslas la ed inkatakken bilang Kristiano.​—Galacia 5:22.

14. Ipaliwawa so duaran balikas a “saray gawa na laman” tan say “bunga na espiritu.”

¹⁴ Nepeg tayon imanoen so duaran balikas a “saray gawa na laman” tan say “bunga na espiritu.” “Saray gawa” et resulta na gagawaen na sakey, say nansumpalan na kakikiwas na sakey. Diad arum a salita, saray indatak nen Pablo bilang saray gawa na laman et saray resulta na balanglan ginagalan panagdesisyon na sakey odino lapud impluensya na makabos a laman na too. (Roma 1:24, 28; 7:21-25) Diad biek a dapag, say balikas a “bunga na espiritu” et kabaliksan ton saray kalidad a nidalatdat et aliwa iran resulta na saray sagpot a tatawagen a panamaaligwas ed ugali odino panagparakep ed personalidad,  noagta say resulta na ikukurang na espiritu na Dios ed sakey a too. No panon a say sakey a kiew et manbunga sano naasikason maong itan, say too so mangipatnag met ed bunga na espiritu sano mabulos ya onagus so masanton espiritu ed bilay to.​—Salmo 1:1-3.

15. Akin ya importante so pangiter tayo na imano ed amin ya aspekto na “bunga na espiritu”?

¹⁵ Say sananey nin punto a konsideraen et say impangusar nen Pablo ed salitan “bunga” pian saglawien so amin a makaparoyroyo iran kalidad a sinalambit to. Say espiritu so agmamapawala na nankakapigan bunga pian pilien tayo no dinan so labay tayo. Amin a kalidades ya indalatdat nen Pablo​—aro, gayaga, deen, anos, panangasi, kamaongan, pananisia, tayadno, tan dangka​—so importantin amin, tan amin na saratan et gawaen dan posibli so balon Kristianon personalidad. (Efeso 4:24; Colosas 3:10) Kanian, anggaman naimano tayo a pigara ed saratan a kalidad so nagkalalon mapatnag ed bilay tayo nisesengeg ed mismon personalidad tan saray inklinasyon tayo, importante ya ikdan tayo na imano so amin ya aspekto a sinalambit nen Pablo. Diad panggawa ed satan, nayarian tayon sigpot a nipatnag so singa-Kriston personalidad ed bilay tayo.​—1 Pedro 2:12, 21.

16. Anto so gagala tayo diad panggegemtan ed inkatakken bilang Kristiano, tan panon itan a nadampot?

¹⁶ Say importantin leksion a naaralan tayo ed siningbat nen Pablo et diad panggegemtan ed inkatakken bilang Kristiano, say gagala tayo et aliwan say pakagamor na pirmin pikakabat tan dunong nisay bayuboan so apino laran walna na personalidad. Satan et say pakagamor na mabulos ya iyagus na espiritu na Dios ed bilay tayo. Dia ed laknab na ikiwas na panag-isip tan kakikiwas tayo ed panangiwanwan na espiritu na Dios, ontan met a laknab so pagmaliw tayon matakken ed espiritual. Panon tayon nadampot itan a gagala? Nepeg ya ilukas tayo so puso tan kanonotan tayo ed panangimpluensya na espiritu na Dios. Saglawien na saya so maparanay ya iyatendi tan pibiang ed saray Kristianon miting. Nepeg met a regular tayon aralen tan dalepdepen so Salitay Dios, ya abuloyan iray prinsipyo na satan a mangiwanwan ed pidedeneng tayo ed arum tan ed saray panagpili tan panagdesisyon tayo. Maseguro sirin a mabitar a napatnagan so ibubulaslas tayo.

Ombulaslas Diad Kigloriaan na Dios

17. Panon a misiglaotan so ibubulaslas diad panangigloria ed mangatatawen ya Ama tayo?

¹⁷ Diad kaunoran, say pangipatnag tayo ed ibubulaslas tayo so mangitarok na gloria tan dayew, aliwan ed sikatayo, noagta diad mangatatawen ya Ama tayo, si Jehova, a pagmamaliwen ton posibli so pakadampot tayo ed espiritual ya inkatakken. Diad samay labi sakbay a napapatey si Jesus, oniay kuan to ed saray babangatan to: “Dia ed saya so kigloriaan nen Amak, say pambunga yo na dakel tan dia ed ontan sikayo so babangatan ko.” (Juan 15:8) Diad panamegley na bunga na espiritu tan bunga na ministeryo ra nipaakar ed Panarian, saray babangatan so akapangigloria ed si Jehova.​—Gawa 11:4, 18; 13:48.

18. (a) Anton magayagan panagani so nagagawa la natan? (b) Anton angat so ipaparungtal na sayan panagani?

¹⁸ Natan, say panamendisyon nen Jehova so walad totoo to legan a mibibiang ira ed espiritual a panagani diad interon globo. Diad loob na pigaran taon la, manga 300,000 a balo ni ed tinaon so angidedika na inkasikara ed si Jehova tan angisimbolo na dedikasyon da ed bautismo ed danum. Satan so makapaliket ed sikatayo tan maseguron mamaliket met ed si Jehova.  (Uliran 27:11) Balet, ta pian mantultuloy iyan panlapuan na gayaga tan dayew ed si Jehova, amin na saratan a balo ni so nakaukolan a mantultuloy a ‘manakar ed [si Kristo], linmamut tan nipaalagey ed sikato, tan niletneg ed pananisia.’ (Colosas 2:6, 7) Saya so mangiparungtal na nankaduan angat ed totoo na Dios. Diad sakey a dapag, no kapkapanbautismo yo ni, kasin awaten yo so angat na pangisekar yo ed inkasikayo pian ‘say ibubulaslas yo so nipatnag ed amin a totoo’? Diad biek a dapag, no abayag kayo la ed katuaan, kasin awaten yo so angat na panakbat ed responsabilidad a mangasikaso ed espiritual a pankaabigan na saray balo ni? Dinanman so kipapasen, mapatnag a nakaukolan so pantultuloy ed itatakken.​—Filipos 3:16; Hebreos 6:1.

19. Antoran pribilehyo tan bendisyon so nagamoran yo no ipatnag yo so ibubulaslas yo?

¹⁹ Alay abig iran bendisyon so manatalaran ed amin a mansasagpot a mangipatnag ed ibubulaslas da. Nodnonoten iray makapaseseg a salita nen Pablo kayari ton pinaseseg si Timoteo ya ombulaslas: “Imatonan mo so kaabigan na laman mo tan say ibabangat mo. Mansiansia ka ed sarayan bengatla; ta no gawaen mo so saraya, nilaban mo so inkasika tan saray ondengel met ed sika.” (1 Timoteo 4:16) Diad maseet a pangipatnag yo ed ibubulaslas yo, makapibiang kayo met ed pribilehyo a mangigloria ed ngaran na Dios tan manggayaga ed saray panamendisyon to.

Kasin Nanonotan Yo?

• Diad antoran dalan a nipatnag so espiritual ya inkatakken?

• Anton klase na pikakabat tan pakatalos so mangipatnag na inkatakken?

• Panon a say pangipatnag ed “bunga na espiritu” so pakabidbiran na espiritual ya ibubulaslas?

• Anton angat so kaukolan tayon awaten legan tayon itutultuloy so ontundas ed inkatakken?

[Tepetepet Parad Panagaral]

[Litrato ed pahina 13]

Say impakaluto, odino inkatakken, so natebek a maong

[Litrato ed pahina 15]

Ombulaslas itayo ed espiritual no mansiansia itayo ed niparungtal a katuaan

[Litrato ed pahina 17]

Makatulong ed sikatayo so pikakasi pian nipatnag so “bunga na espiritu”