Mas Matibay Nen say Puron Balitok

PANPIRPIRAWATAN so balitok lapud karakpan tan tibay to. Satan so pampilpilalekan nisesengeg ed kisyap to tan singa agbalot ompusyaw. Ontan lapud say balitok et naresistian toy danum, oksihena, asupre, tan amin lawarin elemento. Dakel ya artifact a gawa’d balitok so aromog ed saray linmereg a barko tan ed arum nin lugar, balet say kisyap na saratan so nansiansia anggaman ed inlabas lay nilasus a taon.

Makapainteres balet ta ibabaga na Biblia a walay bengatlan mas matibay tan “mas mabalor nen say balitok a naderal anggaman asali la ed apoy.” (1 Pedro 1:7, NW) Say balitok ya “asali,” odino agogolan la ed apoy tan arum niran proseso so makadampot ed inkapuro a 99.9 porsiento. Ingen, anggan say agogolan lan balitok et naderal, odino natunaw, sano natedteran na aqua regia (royal water), impanlaok a taloran kakapat na asidon hydrochloric tan sakey a kakapat na asidon nitric. Kanian, susto so Biblia unong ed siensia diad impangibagan say ‘balitok et naderal.’

Diad pidumaan, say tuan Kristianon pananisia so ‘kilabanan na kamarerwa.’ (Hebreos 10:39) Sarag na totoon pateyen so toon walaan na mabiskeg a pananisia, a singa ginawa ra la’d si Jesu-Kristo. Balet onia so insipan ed saray manamemben na puron pananisia: “Mansiansia ka angga ed patey, tan siak iter ko ed sika so balanget na bilay.” (Apocalipsis 2:10) Saramay inatey a nanmatoor so nodnonoten na Dios, tan paolien to ira. (Juan 5:28, 29) Agnagawaan itan panamegley na kantidad na balitok. Nisesengeg ed satan, say pananisia so petepeteg a mabalobalor nen say balitok. Balet, pian ontan so matalonggaring a kablian na pananisia, nepeg met a napaneknekan, odino nasubok itan. Diad tua et say ‘asubok a kalidad na pananisia’ so tinukoy nen Pedro a mabalobalor nen say balitok. Maliket iray Tastasi nen Jehova a mangiyaral ed sika na Biblia ta pian nabayuboan tan napansiansiam so mabiskeg a pananisia ed tuan Dios, si Jehova, tan ed Anak to, si Jesu-Kristo. Unong ed si Jesus et satan so ‘mankabaliksan na andi-anggaan a bilay.’​—Juan 17:3.