Report na Saray Manangiyabawag na Panarian

Pinunas na Dios Iray Lua To

SARAY totoo ya itutunos day kabibilay da unong ed saray ganggan tan prinsipyo nen Jehova so daakan a nabendisyonan. Anggaman aglawas mainomay so panggawa na nakakaukolan iran pananguman, wala iray tulong tan panamaseseg. (Salmo 84:11) Iyiilustra iya na onggendan ya eksperiensya manlapud Abalaten-bukig ya Asia.

Legan a manbabakasyon so sakey a Tasi a nanlapud Pransya, sikato so akitongtong ed makankien na sakey a lakoan a manngaran na Kim * nipaakar ed gagala nen Jehova parad dalin. Sikato met so angitilak ed si Kim na kopya na libron Makapambilay Kayo na Ando lan Ando ed Paraiso diad Dalin. Legan a bubukayen nen Kim so libro, apasikmatan to iray salitan, “punasen to so amin a lua ed kamataan da.” (Apocalipsis 21:4) “Sayan bersikulo so talagan anenyeg ed siak,” so nanonotan ni nen Kim. “Diad pakakanengneng da’d siak a malikeliket ed interon sanagew diad puestok, siopa so makaamta a sano wala ak la’d abung ed labi et mannangnangis ak ed dukolan?” Oniay inkuan to diad impangipaamta to’d sengeg na paneermenan to: “Miaamong ak ed sakey a laki ed loob la na 18 a taon tan maermen ak a tuloy lapud agtoak labay a pakasalan. Labay ko lan pultoten iyan paraan na kabibilay, balet lapud ta abayag ak lan miaamong ed sikato et agko natepelan.”

Ag-abayag, impaiyaralan si Kim na Biblia ed sakey ed saray Tastasi nen Jehova a manngaran na Linh. “Magunaet ak a mangiyaplika ed bangat na Biblia,” inkuan nen Kim. “Alimbawa, tinundaan ko lay panagdayew ed inmuunan atateng ko, anggaman angitonton iya ed isusumpa na pamilyak. Sakey ni, sinalik a gawaen a legal so panaamong mi, balet aglabay na ibak a gawaen itan. Kaleganan na sayan mairap a panaon, nantultuloy imay Tasi a taga-Pransya ya angipawit ed siak na saray publikasyon na Biblia, tan makapaseseg a tuloy si Linh ed siak. Say inkaanos tan maaron suporta na sarayan agagin bibii so tinmulong ed siak pian makapansungdo ya anggad atebek ko so peteg ya awawey na ibak. Adiskobrek a wala manayay 5 ‘asawa’ tan 25 ananak to! Amapakpel iya ed siak pian sikato so taynan ko.

“Agmainomay so pangisalat ed baleg tan komportablin ayaman ed melag ya apartment. Nilikud ni, siak so dedesdesen na datin ibak a miamong lamet ed sikato, papagyawen toak ni ingen a siboan na asido no agak onabuloy. Diad tulong nen Jehova, agawaan ko no anto so duga.” Nantultuloy ya inmaligwas si Kim tan sikatoy abautismoan a siansia nen Abril 1998. Niarum ni, say atsi to tan yugtan ton bii tan say tin-edyer ya anak ton laki so paiyaaralan la na Biblia ed saray Tastasi nen Jehova.

“Dati et iisipen kon say bilay ko so lawas lan andiay-ilalo,” so inkuan nen Kim. “Balet natan, maliket ak, tan agak la onnanangis no labi. Pinunas la nen Jehova iray lua ed saray matak.”

[Paimano ed leksab]