Talonaan Iray Babeng ed Iyaaligwas Mo!

ISIPEN pan akakambyo la so kotsim, tan onaandar met la so makina, balet ta ag-onabanti. Kasin walay problema ed makina? Anggapo, walay binmangen a baleg a bato diad arap na sakey ed saray dalig. Kaukolan ya ekalen itan ta pian onabanti so kotse.

Diad mipadparan dalan, arum ed iyaaralan na saray Tastasi nen Jehova na Biblia so walaan na saray babeng a nayarin mamokpok ed iyaligwas da’d espiritual. Alimbawa, impasakbay nen Jesus a saray bengatlan singa “say kapagaan ed mundo, tan say panamalingo na saray kayamanan” so nayarin “leneren da so salita” na katuaan tan amperen day ibulaslas.​—Mateo 13:22.

Parad arum, napupugeran so iyaligwas da lapud kasiporan la iran ugali odino kakapuyan. Sakey a lakin taga-Hapon a manngaran na Yutaka et labalabay toy mensahe na Biblia, ingen ta grabe so problema to nipaakar ed panagsugal. Aminpigan sinali to lan itunda iyan mauges a bisyo balet ta sikatoy sinmaew. Lapud inkigalet to ed satan et aperdi so baleg a kantidad na kuarta to, naandi so taloran abung to, say respeto na pamilya to, tan say mismon dignidad to. Kasin nayarian ton ekalen iyan pakakagapolan tan magmaliw a sakey a Kristiano?

Odino isipen pa so biin manngaran na Keiko. Lapud tulong na Biblia et niwaklit toray bisyon singa say panagtalintao,  imoralidad, tan panagpalar. Balet, oniay inaksobi nen Keiko: “Say sankabalegan a babeng ed siak et say panagsigarilyo. Aminpigan sinalik a tundaan itan balet ta agko nayarian.”

Nayarin walaan ka met na singa agla natalonaan a babeng a mangaamper ed iyaaligwas mo. Antokaman itan, napaseguroan ka a diad tulong na Dios et satan so nayarin talonaan.

Nonoten so simbawa nen Jesus ed saray babangatan to kayarin agda atambal so aselepan na demonyo a dumurolot a laki. Sanen tinmalona si Jesus ed agda agawaan, imbaga to ed saray babangatan to: “No wala komoy pananisia yo a singa say sakey a bukel na mustasa, kuan yo naani ed sayan palandey, Onalis ka a manlapu dia ya angga ed saman a pasen; et sikatoy onalis; tan anggapo naani agnayari ed sikayo.” (Mateo 17:14-20; Marcos 9:17-29) On, say probleman ompatnag a singa palandey ed sikatayo so melmelanting tan anggapoy kuenta ed makapanyari ed amin a Manamalsa tayo.​—Genesis 18:14; Marcos 10:27.

Amtaen Iray Mangaamper ed Iyaaligwas

Sakbay mon natalonaan iray babeng ed sika, nepeg mon amtaen ni no anto iratan. Panon mon nagawaan itan? No maminsan et sakey a membro na kongregasyon, singa say matatken odino say mangiyaaral na Biblia ed sika, so mangipaimano na sakey a bengatla ed sika. Imbes a panimbelan itan a maaron simbawa to, kaukolan a mapaabeban ‘dengelen mo so panangibangat, tan onkabat ka.’ (Uliran 8:33) No maminsan et naamtaan moray kakapuyan mo diad panagaral mo’d Biblia. On, say salita na Dios so “mabilay tan mabiskeg.” (Hebreos 4:12) Say panagbasa ed Biblia tan saray nibase’d Biblian palapagan so makapangiparungtal ed sankaaraleman iran kanonotan, liknaan, tan motibom. Ontutulong met itan ed sika pian surien moy inkasika unong ed atagey iran estandarte nen Jehova. Satan so mangipaparungtal tan mangipapaamta ed saray bengatlan nayarin mangamper ed iyaligwas mo ed espiritual.​—Santiago 1:23-25.

Alimbawa, no bilang ta nailuam lay sakey ya estudyante na Biblia a mannonot na saray imoral a pantasya. Nayarin agto nanenengneng so kapeligroan na satan, ya ikatunongan ton agto aktual a manggagawa na bengatlan makapuy. Legay panaaral to, nabasa toray salita na Santiago 1:14, 15: “[Balang] sinansakey a too natukso, no natangguyor tan naayat na kaibegan na laman to a dili. Et no say kabiangan na laman so nanlukon la iyanak to so kasalanan, et no asabi to lay inkagnap to, say kasalanan iyanak to so patey.” Natan et namoria ton say pantultuloy ed ontan a kurang so makaderal ed iyaaligwas to! Panon ton naekal iyan mangaamper?​—Marcos 7:21-23.

Pakatalona ed Saray Babeng

Nayarin diad tulong na sakey a matatken a Kristiano, say iyaaralan so nayarin manggawa na kaaruman a pansukimat ed Salita na Dios, diad pangusar to’d Watch Tower Publications Index. * Alimbawa, say paulon “Thoughts,” so mangipaimano ed manbabasa ed pigaran nipalapag iran artikulo nipaakar ed panalona ed saray makapuy a pantasya. Ipapabitar na sarayan artikulo iray makatulong a teksto ed Biblia, a singa say Filipos 4:8 a mangibabagan: “Ganagana ‘ray bengatlan matua, ganagana ‘ray bengatlan gagalangen, ganagana ‘ray bengatlan matunong, ganagana ‘ray bengatlan malinew, ganagana ‘ray bengatlan nababalita a maong: no wala so antokaman a kasimpitan, no wala so antokaman a daydayewen, morekdek yo so sarayan bengatla.” On, saray imoral a kanonotan so nepeg a salatan na malinis tan makapabiskeg iran kanonotan!

Legan na pansusukimat to, agpanduaruwaan a naromog na estudyante niray arum a prinsipyo ed Biblia ya ontulong ed sikato pian agla onloor so problema to. Alimbawa, ipapasakbay na Uliran 6:27 tan Mateo 5:28 so agpangipasepsep ed kanonotan na materyal a makapasagyat ed sekso. “Yarawim so matamatak ed pannengneng na andi-kakanaan,” so impikasi na salmista. (Salmo 119:37) Siempre, say basta pambasa labat ed sarayan teksto ed Biblia so agmagenap. Ta oniay inkuan na makabat a too: “Say puso na maptek aralen to so onebat [“mandalepdep,” NW].” (Uliran 15:28) No aglambengat morekdeken no antoy igaganggan na Dios noagta no akin met ya igaganggan to itan, lalon onaralem so pakatalos na iyaaralan ed kakabatan tan inkamakatunongan na saray dalan nen Jehova.

 Kaunoran, samay manbabanikel a manalona ed sayan samben ed iyaaligwas to so kaukolan a lawas patulongan ed si Jehova. Tutal, amtan maong na Dios so inkagawa tayo, a sikatayo so ag-ayadyari tan gawa ed dabok. (Salmo 103:14) Say tuloy-tuloy a pampikasi ed Dios pian patulongan, tekep na magunaet iran sagpot a paliisan iray imoral a pan-pantasya, so diad kaunoran et mamawalay makapalikliket a resulta​—sakey a malinis, agnagogonigon a konsiensia.​—Hebreos 9:14.

Ag-onsusuko

Antokaman so probleman pipupuligesgesan mo, bidbiren a no maminsan et nagawam lamet itan. Sano nagawa itan, natural labat a naliknam a sika so sinmaew odino nadismaya. Anggaman ontan, tandaan iray salita na Galacia 6:9: “Ag-itayo sirin komon nakesawan a manggawa na maabig: pian dia ed panaon to manani itayo, noag itayo pinmakil.” Saray debosyonadon lingkor na Dios a singa si David tan Pedro so akasagmak na pigaran makapabaing ya insaew. Balet ag-ira tinmunda. Sikaray mapaabeban angawat ed simbawa, nanggawa ed nakakaukolan iran pananguman, tan nantultuloy dan pinaneknekan so inkasikara bilang matalonggaring a lingkor na Dios. (Uliran 24:16) Anggaman walaray impakaluksoan nen David, sikato so tinawag nen Jehova a “laki a maunor ed pusok, a sikato so manggawa naani na amin a kaliktan ko.” (Gawa 13:22) Atalonaan met nen Pedro iray impakaluksoan to tan nagmaliw a lusek diad loob na Kristianon kongregasyon.

Panggagayagaan na dakel natan so mipadparan itatalona ed saray babeng. Si Yutaka, ya abitla ed akadkauna, so angawat ed opresin panangiyaral na Biblia. Insalaysay to: “Say pananuporta tan panamendisyon nen Jehova ed kada kundang a ginawak so akatulong ed impakatalonak ed problemak a panagsugal. Pirmi so liket ko’d impaka-eksperiensya ed kapetegan na saray salita nen Jesus​—a lapud pananisia et anggan ‘saray palandey’ so nayarin niyalis.” Asabi panaon, si Yutaka so nagmaliw a ministeryal a lingkor diad loob na kongregasyon.

Komusta balet si Keiko, a naadik ed tabako? Insuheri na agin biin mangiyaaral ed sikato a basaen toy nanduruman artikulo ed Awake! nipaakar ed kigagalet ed tabako. Inyan ni ingen nen Keiko iray salita na 2 Corinto 7:1 ed loob na kotse to bilang inagew-agew a panonot ed pansiansian malinis ed imaton nen Jehova. Siansia, agto nayarian so ontunda. Nanonotan ni nen Keiko: “Adisdismaya ak. Kanian tinepetan koy inkasiak no anton talagay labay ko​—kasin labay kon panlingkoran si Jehova odino si Satanas?” Sanen pinili to a si Jehova so panlingkoran to, sikatoy masimoon a nampikasi parad tulong. “Diad inkasurprisak,” nanonotan to ni, “ayarian kon intunda so panagsigarilyok ya agak nanirap a maong. Say ermen ko labat et agak kinmiwas ya asasakbay.”

Nayarin natalonaan mo met iray babeng ed iyaaligwas mo. Diad lalon pangitutunos mo ed saray kanonotan, pilalek, salita, tan kiwas mo unong ed saray estandarte na Biblia, lalon nagamoran mo so liknaan na dilin-respeto tan kompiyansa. Saray agagim ed espiritual, pati saray kapamilyaan mo, so naligliwa tan napaseseg sano milimog ira ed sika. Sankaimportantian ed amin, napaaralem moy relasyon mo ed si Jehova a Dios. Insipan to ya ‘ekalen to so kigapolan ed dalan na baley to’ diad kibulos da ed panangontrol nen Satanas. (Isaias 57:14) Tan napaseguroan ka a no panggunaetan mon ekalen tan talonaan iray babeng ed iyaaligwas mo ed espiritual, mayamyaman a bendisyonan ka nen Jehova.

[Paimano ed leksab]

[Litrato ed pahina 28]

Insipan nen Jesus a lapud pananisia et saray singa-palandey a babeng so natalonaan

[Litrato ed pahina 30]

Say pambasa ed Biblia so mamabiskeg ed saray sagpot tayo pian talonaan iray kaleteyan ed espiritual