Tepetepet Manlapud Saray Managbasa

Iner so kawalaan nen Daniel sanen asubok iray taloran Hebreo diad arap na abalbaleg ya imahen ya impaalagey nen Nabucodonosor ed patar na Dura?

Ag-ibabaga na Biblia, kanian anggapo natan so makayarin mamaneknek no iner so kawalaan nen Daniel legan na saman a subok.

Walaray angikuan a say opisyal a rangko nen Daniel odino say naawat to ran nikaduman pribilehyo manlapud si Nabucodonosor so atagtagey nen si Sidrac, Mesac, tan Abdenago kanian si Daniel so agla obligadon omparisi ed patar na Dura. Tua ya ipapatnag na Daniel 2:49 a walay panaon a say posisyon to et atagtagey nen saray taloran kaiba to. Balet agtayo napaneknekan a saya so rason pian nalibre la ed pidagup to’d sikara diad arap na imahen.

Diad panasalin isalaysay so inkaandi’d man nen Daniel, inkuan na arum ya ompan sikatoy nibaki ed sakey ya opisyal ya asainmin odino ompan sikatoy nansakit tan sirin et agto nayarian so makakar. Balet, ag-ibabaga itan na Biblia. Antokaman so kipapasen, say ginawa nen Daniel so agnayarin pangibasiyan na kritisismo. Tano bilang ontan, maseguron inanamot itan komon na maimon iran opisyal na Babilonia a pangakusaan da ed sikato. (Daniel 3:8) Sakbay tan kayari na sayan inkagawa, pinaneknekan nen Daniel a sikatoy manamemben-katooran, matoor ed Dios antokaman a subok so nipaarap ed sikato. (Daniel 1:8; 5:17; 6:4, 10, 11) Kanian anggaman ag-ibabaga na Biblia no akin a si Daniel et andi’d man ed patar na Dura, makapanmatalek itayo a sikato so mapekder ed katooran to’d si Jehova a Dios.​—Ezequiel 14:14; Hebreos 11:33.