Agbalot Onsusuko ed Panggawa na Maabig
Agbalot Onsusuko ed Panggawa na Maabig
“Ag-itayo sirin komon nakesawan a manggawa na maabig: pian dia ed panaon to manani itayo, noag itayo pinmakil.”—GALACIA 6:9.
1, 2. (a) Akin a nakaukolan so panagsungdo pian makapanlingkor ed Dios? (b) Panon ya impatnag nen Abraham so panagsungdo, tan anto so akatulong ed sikaton makapansungdo?
BILANG Tastasi nen Jehova, panliliketan tayo so panggawa ed linawa na Dios. Naromog tayo met so pakarepreskoan ed pangawit ed ‘pako’ na inka-babangatan. (Mateo 11:29) Anggaman kuan, say panlingkor ed si Jehova kaiba si Kristo so aliwan naynay a mainomay. Impabitar itan nen apostol Pablo sanen pinaseseg toray kapara ton Kristiano: “Wala so pakapankaukolan yo ed anos, pian, dia ed kayari na panggawa yo na linaway Dios, awaten yo so sipan.” (Hebreos 10:36) Nakaukolan so panagsungdo lapud makapaangat so panlingkor ed Dios.
2 Say bilay nen Abraham so maseguron mamaneknek ed satan a katuaan. Sikatoy aminpigapigan nidunget ed mairap iran dedesisyonan tan makapagonigon iran kipapasen. Gapoan lambengat so impangiganggan ed sikato ya ontaynan ed mainawan bilay diad Ur. Agnambayag et sikatoy nidunget ed eras, isusumpa na saray kakaabay, say inka-samsam lawari na asawa to, kolkolan na arum a kakanayon to, tan say inkaruksa na bakal. Onsabi niray babaleg a pakasalsalian. Balet agbalot sinmuko si Abraham ed panaggaway maabig. Makatantanda itan sano nodnonoten yon anggapo ni ed sikato so kompleton Salita na Dios, a singa walad sikatayo natan. Anggaman kuan, maseguron kabisado to so inmunan propesiya, ya oniay inyabawag na Dios: “Mangiyan ak na gulaan ed sika tan say bii, tan gulaan ed saray ilalak mo tan ilalak to; sikato sugaten to so ulom, et sika sugaten mo so mukor to.” (Genesis 3:15) Bilang say panlapuan na Bini, natural lambengat a si Abraham so magmaliw a puntirya na pambusol nen Satanas. Maseguron atulongan si Abraham a magayagan mansungdo ed saray subok ed sikato lapud impakatebek ed sayan katuaan.
3. (a) Akin a nepeg ya ilaloan na totoo nen Jehova iray kairapan? (b) Anto so ipapaseseg ed sikatayo na Galacia 6:9?
3 Nepeg met ya ilaloan na saray totoo nen Jehova natan iray kairapan. (1 Pedro 1:6, 7) Tutal, papasakbayan itayo na Apocalipsis 12:17 a ‘mibabakal’ si Satanas ed saray alanaan a nakdaan. Lapud maapit a piuulop da ed saray alanaan, say “arum a karnero” so puntirya met na sanok nen Satanas. (Juan 10:16) Nilikud ed isusumpa ya aarapen na saray Kristiano ed publikon ministeryo ra, nasasagmak da met iray makapasubok a pakadesdesan ed personal a kabibilay da. Binilin itayo nen Pablo: “Ag-itayo sirin komon nakesawan a manggawa na maabig: pian dia ed panaon to manani itayo, noag itayo pinmakil.” (Galacia 6:9) On, anggaman getma nen Satanas a buyaken so pananisia tayo, nepeg itayon ontalindeg a sumpad sikato, a malet ed pananisia. (1 Pedro 5:8, 9) Anto so resulta na panmamatoor tayo? Oniay ipapaliwawa na Santiago 1:2, 3: “Agagik ira, ibilang yo ya amin a liket no napelag kayo ed nambabangil a katuksoan; amtaen yo a say panalsali ed pananisia yo gawaen to so anos.”
Parungtalan ya Iyaataki
4. Panon so impangusar nen Satanas ed parungtalan a panangataki pian salien ton buyaken so integridad na totooy Dios?
4 Say bilay nen Abraham so maseguron mangiyiilustra ed “nambabangil a subok” a nayarin kidungetan na sakey a Kristiano natan. Alimbawa, nakaukolan toy onkiwas ed inlusob na saray linmubak a nanlapud Shinar. (Genesis 14:11-16) Agmakapakelaw, siansia nin uusaren nen Satanas iray parungtalan a panangataki ed nengneng na panamasegsegang. Nanlapu la’d impanampot na Guera Mundial II, sinebelan na gobierno so Makristiano tan makaibangat a kimey na saray Tastasi nen Jehova diad pigaran daldalin. Isasalaysay ed sikatayo na 2001 Yearbook of Jehovah’s Witnesses so nipaakar ed karawalan a nakaukolan a sungdoan na saray Kristiano ed Angola diad lima na kakabusol. Diad panagmatalek da ed si Jehova, saray agagi tayo ed saratan a daldalin so mapekder ya agsinmuko! Onkikiwas ira, aliwan diad panamegley na karawalan odino panagrebeldi, noagta diad maalwar ya impantultuloy da ed panagpulong a kimey.—Mateo 24:14.
5. Panon a nabiktima na panamasegsegang diad eskuelaan iray Kristianon tobonbalo?
5 Balet, say panamasegsegang et aliwan mangilalanor a naynay ed karawalan. Diad saginonor et abendisyonan si Abraham na duaran ilalak—si Ismael tan si Isaac. Ibabaga ed sikatayo na Genesis 21:8-12, unong ed New World Translation, a “susutilen” nen Ismael si Isaac. Dia ed sulat to ed saray taga-Galacia, impatnag nen Pablo a saya so mas seryoso nen say pigalaw-galaw labat, lapud dedeskribien to si Ismael a mamapasegsegang ed si Isaac! (Galacia 4:29) Kanian say panagbalaw na saray kaeskuela tan maabuson panagsalita ra so suston natawag a panamasegsegang. Nanonotan ni na malangwer a Kristianon manngaran na Ryan so irap ya asagmak to ed saray kaklase to: “Say 15 minuton pambiahe mi ed bus a paarap tan manlapud eskuelaan et singa dakerakel ya oras lapud siak so pansasalitaan da na maabuso iran bengatla. Sininit da ak na saray clip na papel a pinapetang ed lighter.” Say rason ed sayan maruksan panagmataltrato? “Say teokratikon inkipasal ko so angiduma ed siak manlapud arum a kalangweran diad eskuelaan.” Anggaman kuan, matoor ya akapansungdo si Ryan lapud suporta na atateng to. Sikayoran kalangweran, kasin pakakadismayaan yo so panagkantiaw na saray kalimog yo? Bueno, ag-onsusuko! Diad matoor a pansungdo yo, naeksperiensya yo so kasumpalan na saray salita nen Jesus: “Mapalar kayo sano balawen da kayoy totoo, tan pasegsegangen da kayo, tan salitaen day amin a nengneng na mauges a sumpa’d sikayo, nisengeg ed siak, a mantila ra.”—Mateo 5:11.
Inagew-agew Iran Kapagaan
6. Antoran bengatla so nayarin maneral ed saray relasyon ed limog na saray Kristiano natan?
6 Maslak ed saray pakasalsalian a kidudungetan tayo natan so mangilalanor ed kaslakan iran kapagaan ed inagew-agew. Si Abraham a mismo so nakaukolan a manalona ed saray pakadetdetan a linmesa ed baetan na saray managpastol to tan saray managpastol nen kaanakan ton Lot. (Genesis 13:5-7) Diad mipadparan paraan natan, saray pandurumaan na personalidad tan saray andi-kakanaan ya imonan so maneral ed saray relasyon tan mansesga ni ingen ed kareenan na kongregasyon. “No iner so kawalaan na im-imon tan panangibiig, diman so kawalaan na gulo tan amin a marumsis a gawa.” (Santiago 3:16) Agaylan importante ya ag-itayo onsuko, ya ag-aabuloyan so kinon a maneral ed deen, a singa ginawa nen Abraham, tan anapen so pankaabigan na arum!—1 Corinto 13:5; Santiago 3:17.
7. (a) Anto so nepeg a gawaen na sakey no sikato so asakitan na kapara ton Kristiano? (b) Panon ya impanengneng nen Abraham so maabig ya ehemplo diad pamasiansia na maong a relasyon ed arum?
7 Say pagmaliw a mareen so nayarin sakey ya angat no iisipen tayon agmakatunongan so impantrato ed sikatayo na sakey a kapananisiaan. Oniay ibabaga na Uliran 12:18: “Wala so mansalita a botaktak a singa saray kisaksak na kampilan; balet say dila na makabat sikato so kasil.” Say palpalaran a panagsalita, anggano agginagalan nibalikas et pansengegan na pirmin sakit na liknaan. Mas ansakit ni ingen no iisipen tayon apauges odino abiktima itayo na mauges a panagtalabutob. (Salmo 6:6, 7) Balet ag-onsuko so sakey a Kristiano lapud asakitan iray liknaan! No ontan so kipapasen yo, onkiwas lan unona pian ipetek iray pamaakaran diad maong a pitongtong ed akaopendi. (Mateo 5:23, 24; Efeso 4:26) Akaparaan a mamerdona ed satan a too. (Colosas 3:13) No ag-itayo manem-em na sakit na linawa, napaabig tayo so mismon liknaan tayo tan say relasyon tayo ed agi tayo. Agbalot nanem-em si Abraham na sakit na linawa a nayarin liknaen to komon ed si Lot. Agayla, kinmiwas a tampol si Abraham ya angisalba ed si Lot tan say pamilya to!—Genesis 14:12-16.
Nanlapud Dili Iran Pakasalsalian
8. (a) Panon a nayarin ‘naduyok na saray Kristiano so inkasikara na dakel ya ot-ot’? (b) Akin ya awalaan si Abraham na asimbang a panmoria ed materyal iran bengatla?
8 Tua, arum a pakasalsalian et nanlapud dili. Alimbawa, oniay ingganggan nen Jesus ed saray patumbok to: “Agkayo mantipon a nipaakar ed sikayo na kaykayamanan ed tapew na dalin, a sikaray deralen na saray bokbok tan lati, tan sikaray kotkoten tan takewen dia na saray matakew.” (Mateo 6:19) Ingen ta arum ya agagi so ‘anuyok ed inkasikaran dili na dakel ya ot-ot’ diad impangiyuna ra ed materyal a bengatla nen say intereses na Panarian. (1 Timoteo 6:9, 10, NW) Mabulbulos si Abraham ya angisakripisyo ed materyal iran pakainawaan ta pian napaliket to so Dios. “Lapu ed pananisia nanayam a singa sankaili ed dalin ya insipan, a singa dia ed dalin ya agto kien, a manaayam ed saray tolda, pati si Isaac tan si Jacob, a mitawir ed saman met a dilin sipan: Ta aalagden to so baley a wala so semento to [“syudad a walaan na petepeteg a pundasyon,” NW], a say manamaalagey tan managgawa say Dios.” (Hebreos 11:9, 10) Say pananisia nen Abraham ed arapen a “syudad,” odino gobierno na Dios, so akatulong ed sikato ya agmanmatalek ed kaykayamanan. Agta makabat itayo no ontan met so gawaen tayo?
9, 10. (a) Panon a say pilalek ya ombantog et mamawala na pakasalsalian? (b) Panon so nayarin panugali na sakey ya agin laki bilang “kamelagan”?
9 Konsideraen so sananey nin aspekto. Oniay mapuersan panangidirehi na Biblia: “No say sakey a too manis-isip a wala so daiset a kakanaan to, anta andi gapon mogmo, say inkasikaton dili tilaan to.” (Galacia 6:3) Niarum ni, sikatayo so napapaseseg ya “anggapon balot komon so gawaen yo a lapud kasusumpa o pampasirayew, noag dia ed kaabebaan na kalakal.” (Filipos 2:3) Arum so mangipapaarap ed inkasikara diad saray pakasalsalian lapud agda pangiyaaplika ed sayan simbawa. Lapud nadadagdag ed pilalek ya ombantog imbes ed pilalek a manggaway “maong a gawa,” sikara so nadismaya tan naingongotan sano agda nagamoran iray pribilehyo ed kongregasyon.—1 Timoteo 3:1.
10 Angipanengneng si Abraham na maabig ya ehemplo ya ‘agto ninonot so inkasikaton dili ya atagtagey nen say kanepegan a nonoten.’ (Roma 12:3) Sanen nabet toy Melquisedec, agkinmiwas si Abraham a singano atagtagey lapud apaboran a kipapasen to ed Dios. Diad pisunian, binidbir to so mas atagey a posisyon nen Melquisedec bilang saserdote diad impangiter toy kakaplo. (Hebreos 7:4-7) Saray Kristiano natan so nepeg met a mabulos a manugali bilang “kamelagan” tan agpapaderleng. (Lucas 9:48) No saramay mangidadaulo ed kongregasyon et ompatnag ya agni mangiiter ed sikayo na arum a pribilehyo, matuan usisaen so inkasikayon dili pian naseguro no wala niray papaaligwasen yo ed personalidad yo odino ed paraan na panangasikaso yo ed saray bengatla. Imbes a panimbelan iray pribilehyon anggapo ed sikayo, sigpot ya anamoten so pribilehyon walad sikayo—say pribilehyon ontulong ed arum a makapikabat ed si Jehova. On, ‘manpaabeba kayo . . . ed silong na makapanyarin lima na Dios, pian itandoro to kayo ed kanepegan a panaon.’—1 Pedro 5:6.
Say Pananisia ed Saray Bengatlan Agnanengneng
11, 12. (a) Akin a naandi na arum ed kongregasyon so panmoria ran walay inkaganatan? (b) Panon ya impanengneng nen Abraham so maabig ya ehemplo diad impangiyapasakey to ed bilay to diad pananisia ed saray sipan na Dios?
11 Say sananey nin pakasalsalian so nayarin mangilanor ed singa mabayag ni so anggaan na sayan marelmeng a sistema na bengabengatla. Unong ed 2 Pedro 3:12, saray Kristiano so ‘manaalagar tan manpipilalek ed isabi agew na Dios.’ Anggaman kuan, dakel so manaalagar ed satan ya “agew” ed loob la na dakel a taon, say arum et loob la na dakel a dekada. Bilang resulta, arum so nayarin nadismaya tan naandi la so panmoria ra a walay inkaganatan.
12 Maminsan lamet, konsideraen so ehemplo nen Abraham. Inyapasakey to so interon bilay to diad pananisia ed saray sipan na Dios, anggaman anggapo so pankanawnawa a saratan so nasumpal ya amin ed panaon na pambibilay to. Tua, sikatoy abayag a nambilay kanian naimatonan toy imbaleg na ilalak ton si Isaac. Balet onlabas ni so pigaran siglo sakbay a nikompara iray ilalak nen Abraham ed “saray bitewen ed katawenan” odino “buer a wala ed gilig na dayat.” (Genesis 22:17) Balet, agnaingongotan odino adismaya si Abraham. Kanian oniay inkuan nen apostol Pablo nipaakar ed si Abraham tan arum niran patriarka: “Unong ed pananisia inatey iraya ya agda ni inawat so saray sipan, ingen sikara so anengneng da tan sikara so imbano ra nanlapu ed arawi, tan impatua ra a sikara so sankaili tan manaakar [“temporaryon manaayam,” NW] ed tapew na dalin.”—Hebreos 11:13.
13. (a) Panon a saray Kristiano natan et singa “temporaryon manaayam”? (b) Akin a panganggaen nen Jehova iyan sistema na bengabengatla?
13 No ayarian nen Abraham ya iyapasakey so bilay to ed saray sipan ya ‘agto ni naawat,’ mas lalo ni ed sikatayo natan, lapud asingsingger la so kasumpalan na sarayan bengatla! Singa si Abraham, nepeg tayon moriaen so inkasikatayo bilang “temporaryon manaayam” ed sistema nen Satanas, ya ag-itayo papaigalet ed estilo na kabibilay a napnoy dilin-kaalakan. Natural labat a labay tayon nagawa lay “anggaan na ganaganay bengatla,” aliwa labat lan asingger la. (1 Pedro 4:7) Nayarin manasagmak itayo na graben sakit ed pisikal. Odino sikatayo so nayarin nadedetdetan na kairapay-bilay. Balet, nepeg tayon nodnonoten ya itarok nen Jehova so anggaan aliwa labat ya ipaliis to itayo manlapud makapasinagem iran kipapasen noagta pian pasantosen so mismon ngaran to. (Ezequiel 36:23; Mateo 6:9, 10) Onsabi so anggaan, aliwan diad panaon a kombeniente ed sikatayo, noagta diad panaon a sankaabigan a mitunosan ed saray gagala nen Jehova.
14. Panon a nagunggonaan iray Kristiano natan ed inkaanos na Dios?
14 Nodnonoten met a “say Katawan agto bayagen so sipan to, a singa say arum igaton da a mabayag; noag ingen masungdo ed sikayo, agto labay a wala so siopaman a natawtaw noag ingen amin komon nagegemtan da so panagsibkel.” (2 Pedro 3:9) Imanoen a say Dios so “masungdo ed sikayo” —a membro na Kristianon kongregasyon. Mapatnag, arum ed sikatayo so mankaukolan ni na panaon a manggawa na saray pananguman tan panangiyarunsa ta pian magmaliw itayon ‘andian na matik tan karumsisan ed imaton to.’ (2 Pedro 3:14) Agtayo kasi nepeg a pisalsalamatan sirin ta impatnag na Dios so ontan ya inkaanos?
Pakaromog na Liket Anggaman ed Saray Babeng
15. Panon ya apansiansia nen Jesus so gayaga to anggaman ed saray pakasalsalian, tan panon a nagugunggonaan iray Kristiano natan diad pangalig ed sikato?
15 Say bilay nen Abraham so mangibangat na dakel a leksion ed saray Kristiano natan. Aliwa lambengat a pananisia so impatnag to noagta inkaanos, inkamasilib, pakpel, tan agmasiblet ya aro. Inyuna to ed bilay to so panagdayew ed si Jehova. Balet, nepeg a nodnonoten a say sankatalonggaringan ya ehemplo ya aligen tayo et say impanengneng nen Jesu-Kristo. Sikato so nidunget met ed dakerakel a pakasalsalian tan pakasubokan, balet diad amin na saratan, agbalot naandi so gayaga to. Akin? Lapud inyapasakey to so kanonotan to ed ilalo ed arapen. (Hebreos 12:2, 3) Onia so impikasi nen Pablo: “Natan say Dios na anos tan ligliwa ‘yabuloy to komon ed sakey tan sakey ed sikayo so apasakey a kalakal unong ed Kristo Jesus.” (Roma 15:5) Tekep na dugan awawey na kanonotan, naromog tayo so liket anggaman ed saray babeng ya itatarya nen Satanas.
16. Anto so nagawaan tayo sano singa ambelbelat laray problema tayo?
16 Sano singa la ambelbelat iray problema tayo, nodnonoten yon aaroen kayo met nen Jehova, unong na impangaro to ed si Abraham. Labay to kayon ontalona. (Filipos 1:6) Sigpot a manmatalek ed si Jehova, a matalek ya “agto kayo paulyan a natukso na onlabas ed nayarian yo; noag ingen pati tukso, manggawa met na dalan a paliisan, ta pian nayarian yo ya itepel.” (1 Corinto 10:13) Bayuboan so ugali ya inagew-agew a pambasa ed Salitay Dios. (Salmo 1:2) Manpeleng ed pikakasi, a patulongan kayo ed si Jehova pian makapansungdo. (Filipos 4:6) Sikato so ‘mangiter na masanton espiritu ed saray onkerew ed sikato.’ (Lucas 11:13) Anamoten iray probisyon ya intarya nen Jehova a manustuni ed sikatayo diad espiritual a paraan, a singa say nibase ed Biblian publikasyon. Ontan met, anamoten so suporta na impanaagi. (1 Pedro 2:17) Matoor ya atendian iray Kristianon miting, lapud ditan so pakagamoran yo na panamaseseg a nakaukolan yo ta pian makapansungdo. (Hebreos 10:24, 25) Manliket ed kombiksion a say panagsungdo yo so mangitonton ed naabobonan a kipapasen diad imaton na Dios tan say panmamatoor yo so mamapaliket ed puso to!—Uliran 27:11; Roma 5:3-5.
17. Akin ya ag-onsusuko iray Kristiano ed pakadismayaan?
17 Si Abraham so inaro na Dios bilang “kaaro” to. (Santiago 2:23) Anggaman ontan, say bilay nen Abraham so walaan na nantutumbokan a makapagonigon a pakasalsalian tan kairapan. Nailaloan sirin na saray Kristiano ya ontan met so nasagmak da legan na sarayan mauges a “kaunoran ya agew.” Diad tua, papasakbayan itayo na Biblia a “saray totoo a mauges tan saray managsaol onuges lara’n onuges.” (2 Timoteo 3:1, 13) Imbes a nadismaya, moriaen a saray pakadesdesan a kidudungetan tayo so pakapatnagan ya asingger lay anggaan na marelmeng a sistema nen Satanas. Balet papanonotan itayo nen Jesus a “say misungdo ya angga ed kasampotan, sikato lanlamang so nilaban naani.” (Mateo 24:13) Kanian ‘ag-onsusuko ed panggaway maabig!’ Aligen si Abraham, tan magmaliw a kaiba na saramay “lapu ed pananisia tan anos [et] tawiren da so saray sipasipan.”—Hebreos 6:12.
Kasin Naimano Yo?
• Akin a nepeg ya ilaloan na totoo nen Jehova natan iray subsubok tan irap?
• Diad antoran dalan a nayarin usaren nen Satanas iray parungtalan a panangataki?
• Panon a nasolbar iray personal a balingaan ed limog na saray Kristiano?
• Panon a mamawala na saray pakasalsalian so kinon tan egotismo?
• Diad anton dalan ya impanengneng nen Abraham so maabig ya ehemplo diad panag-alagar ed kasumpalan na saray sipan na Dios?
[Tepetepet Parad Panagaral]
[Litrato ed pahina 26]
Sasagmaken na dakel a Kristianon tobonbalo so panamasegsegang, a kakantiawan ira na saray kalimog da
[Litrato ed pahina 29]
Diad panaon nen Abraham say kasumpalan na saray sipan na Dios so ‘agni naawat,’ ingen inyapasakey to iratan ed bilay to