Kasin Nanonotan Yo?

Naapresya yo ta’n binasa so agano niran paway na Say Panag-Bantayan? Sirin, imanoen no naebatan yo so onggendan a tepetepet:

• Akin a saray linmesan tepet ed Job kapitulo 38 et makanepegan nin konsideraen anggad natan?

Dakel ed saray makapakelkelaw a gawa ya angipaarapan na Dios na panangimano so agsigpot a natalosan na anggan saray modernon sientista. Lalaktipen na saraya no panon a say grabidad et napansiasiansia toy dalin ed tetelekan to, no anton talaga so liwawa, no akin ya anggapoy anggaan na pandurumaan na saray nieben kristal, no panon a napapawala iray uran, tan no panon a say enerhiya et nalalanor ed saray bagyo.​—4/15, pahina 4-11.

• Antoran ehemplo ed Biblia so makatulong ed sikatayo pian natalonaan iray negatibon liknaan?

Walaray panaon a nidunget si Asap, Baruc, tan Noemi ed pakadismayaan odino arum niran negatibon liknaan, tan say Makasulatan a rekord na impakatalona ra ed ontan iran situasyon so makatulong ed sikatayo.​—4/15, pahina 22-4.

• Antoray pigaran praktikal a paraan pian natulongan iray Kristianon balo?

Saray kakaaro so mapangasi tan direktan mangiyopresi na pananulong. Saray kapamilyaan odino arum ni so nayarin walad kipapasen ya ontulong ed pinansyal odino materyal, no wala so peteg a pankaukolan. Saray kaparan Kristiano so makatulong met diad pagmaliw a maong a kaaro, a mangitatarya na espiritual a suporta tan ligliwa.​—5/1, pahina 5-7.

• Akin ya importante so pangasawa odino piasawa ‘lambengat unong ed Katawan,’ a singa isisimbawa na 1 Corinto 7:39?

Say pangasawa odino piasawa ed saray agmananisia so mabetbet a makaapektan maong. Sakey ni, say panumbok ed sayan madibinon simbawa et pangipanengneng na katooran ed si Jehova a Dios. Sano ontumbok itayo ed Salitay Dios, ag-itayo kondenaen na kapusoan tayo. (1 Juan 3:21, 22)​—5/15, pahina 20-1.

• Lapud si Jehova imay makaperdona ed saray kasalanan tayo, akin ya ipatua na saray Kristiano so grabe iran kasalanan ed saray mamatatken ed kongregasyon?

On, say panamerdona nen Jehova ed saray graben kasalanan so nakakaukolan ya anapen na sakey a Kristiano. (2 Samuel 12:13) Balet unong a si Natan et angitarya na tulong ed si David, saray matakken ed espiritual a mamasiken diad kongregasyon so makatulong ed saray magbabawin managkasalanan. Say iyasingger ed saray mamatatken so mitunosan ed panangiwanwan a nidatak ed Santiago 5:14, 15.​—6/1, pahina 31.

• Anto so walan ebidensya a nepeg tayon asikasoen iray ulila tan balo ed kairapan da?

Ipapanengneng na rekord ed awaran a say ontan a panangasikaso so pakapatnagan na tuan panagdayew ed limog na saray Hebreo nensaman tan ed saray inmunan Kristiano. (Exodo 22:22, 23; Galacia 2:9, 10; Santiago 1:27) Inlaktip nen apostol Pablo ed Kasulatan iray malinew a bilin parad saray Kristiano ya asikasoen daray talagan mankaukolan a babalo. (1 Timoteo 5:3-16)​—6/15, pahina 9-11.

• Anto so tombok ed maliket, makabaliksan a bilay?

Nepeg a bayuboan tan pansiansiaen tayo so suston relasyon ed si Jehova, say mangatatawen ya Ama tayo. Say panagaral na Biblia so importantin tulong pian nagawaan tayo itan.​—7/1, pahina 4-5.

• Kasin balang too et walaan na ag-ompatey ya espiritu a makaliktar ed ipapatey?

Anggaman manisia so arum a totoo a say espiritu​—aliwan say kamarerwa​—so imortal, agsusuportaan na Biblia iyan ideya. Ipapanengneng na satan a sano ompatey so too, sikatoy ompawil ed dabok tan andi la ed kiwawala. Balet say Dios so walaan na pakayarin mangipawil ed bilay to, kanian antokaman ya ilalo ed bilay diad arapen, diad panamegley na kioli, so akadependi ed Dios. (Eclesiastes 12:7)​—7/15, pahina 3-6.

• Iner so kawalaan nen Daniel sanen asubok iray taloran Hebreo ed patar na Dura?

Anggapo so ibabaga na Biblia. Nayarin ag-obligado lan omparisi diman si Daniel lapud rangko to, odino ompan sikatoy nibaki ed sakey ya opisyal ya asainmin. Balet makapanmatalek itayo ya agto inkompromiso so katooran to’d si Jehova.​—8/1, pahina 31.