Sakey a Libro ya Agpaniinteresan na Maslak a Kalangweran

“PANOY pakaamtak no kasin peteg a Salita na Dios so Biblia? Agak interesado ed satan a libro,” so inkuan na sakey a kalangweran a bii a manngaray Beate.

Diad Alemanya, a panaayaman nen Beate et ontan met so liknaan na maslak a kalangweran; kanian, agda ipapasen ya importante so panagbasa ed Biblia. Imparungtal na agano nin impansurbi diman, a kulang a 1 porsiento na saray kalangweran so sankabetbetan a manbabasa ed Biblia, 2 porsiento so mabetbet, 19 porsiento so mataltalag, tan ngalngalin 80 porsiento so agbalot manbabasa. Maseguron saratan ya estatistika so mipadpara ed arum nin daldalin, a nayarin ontan met diad panaayaman mo. Malinew, say Biblia et sakey a libro ya agpaniinteresan na maslak a kalangweran.

Sirin, agpankelawan a diad inkalapagan et dagdaiset so amta na malalangwer nin henerasyon nipaakar ed Biblia! Diad asasakbay na taon 2000, inreport na peryodikon Lausitzer Rundschau so nipaakar ed surbi ya angiparungtal no kaunongan karakel a totoo so mikabisado ed Samploran Ganggan tan inkana da iratan bilang manangigiya ed bilay. Nipaakar ed saray manedad na masulok lan 60, et 67 porsiento so makaamta ed saray ganggan tan sikaray igigiya na saratan; parad totoon mantaon na kulang a 30, et wala labat lay 28 porsiento. On, parad dakel a kalangweran, say Salita na Dios so agkabisado a libro.

Arum so Walaan na Duman Panmoria

Diad biek a dapag, wala so minilyon a kalangweran diad interon mundo ya akadiskobre ed Salita na Dios a makanakanan tuloy. Singa bilang, si Alexander a mantaon na 19 et manbabasa na Biblia a kinabuasan sakbay ya onla’d trabaho. Inkuanto: “Parad siak, saya so sankaabigan a paraan a pangigapo’d sanagew.” Si Sandra et niyugali to la so pambasa ed sakey a porsyon na Biblia ed kada labi. “Kabiangan la itan na inagew-agew a rotinak,” so insalaysay to. Tan si Julia a mantaon na 13, et nipasal to la so pambasa na ag-onkulang ed sakey a kapitulo na Biblia antis ya onugip ed labi. “Peteg a panggagayagaan ko itan, tan labay kon itultuloy itan a niyugalik anggad arapen.”

Dinan so susto tan makabat a panmoria? Peteg kasin makanan basaen so Biblia? Kasin satan so makanakana tan importante parad malalangwer nin henerasyon? Antoy padesir mo?