Sertipiko na Inkatalonggaring

SATAN so ipapagamor na Association of Congolese and African Journalists for the Development (AJOCAD) na Demokratikon Republika na Congo pian “tumangan iray indibidual odino sosyal ya organisasyon a kabkabat lapud tulong da’d inyaligwas dia [ed Congo].”

Nen Nobyembre 17, 2000, say Sertipiko na Inkatalonggaring so nipresenta ed saray Tastasi nen Jehova lapud “tulong da’d inyaligwas na saray indibidual a taga-Congo [diad panamegley] na edukasyon tan ed bangat a lugan na saray publikasyon da.”

Diad impankomento nipaakar ed satan ya award, oniay kuan na peryodiko na Kinshasa a Le Phare: “Ngalngalin anggapoy naromog a taga-Congo ya agni akapambasa na saray magasin a Watchtower tan Awake! odino arum niran publikasyon ya impalapag na saray Tastasi nen Jehova. Sarayan magasin [so manisingbat ed] amin ya aspekto na bilay.” Impabitar met na artikulo ya ipapanengneng na saray publikasyon “no panon so panalona ed saray problema natan” tan mangituturo ed “peteg a kabaliksan na saray peles a nagagawa.” Say kada paway na Awake! so “mansiasiansia a neutral ed politika tan agto itatandoro so sakey a rasa ed sananey.” Niarum ni, papabiskegen na saray publikasyon so “kompiyansa ed sipan na Manamalsa nipaakar ed mareen tan maligen a mundo a ngalngali la manalat ed say kaplesan a marelmeng, marawal a sistema na bengabengatla.”

Singa ed imbaga la na AJOCAD, saray publikasyon na Tastasi nen Jehova so napapaneknekan a makagunggona ed baleg a kabiangay populasyon na Congo. Lapud nipapalapag ed nilasus a lenguahe, say makapasagyat na ilalo a mensahe na saratan so makagunggona met ed sika.

Ipangasin imanoen so walad leksab pian naamtaan no panon kan nawalaan a mismo na saratan.