Lobo Kami Nensaman​—Karnero Kami La Natan!

Sanen ugugaw kami ni nen Sakina, sankaabay so abung mi. Si Sakina et baleg tan maregkel, balet ta melag ak tan mayapis. Naynay kamin mansebeg, tan sakey ya agew et nambalsakan kami. Manlapu la’d saman ya agew, agkami lan balot nantongtong nisay angibano ed balang sakey. Diad saginonor, pareho kamin inmalis tan agmi la amtay kawalaan na balang sakey.

Nen 1994, siak so impaiyaralan na Biblia ed saray Tastasi nen Jehova, tan kalkalnan anguman so personalidad ko. Kayari apat taon sanen inmatendi kami ed espisyal ya agew ya asamblea diad Bujumbura, Burundi, abigla ak sanen nabet koy Sakina. Maliket ak ta sikatoy wadman, balet ta nambanoan kami labat. Diad kaagwan, mankelkelaw ak sanen sikatoy anengneng kon kaiba ed saramay manpabautismo! Sikato so anguma-uman met la. Sikato so agla makolkol a naynay kon pisebegan. Agaylan abig so pakaimaton ed impangiparungtal to ed dedikasyon to ed Dios diad impanpabautismo to ed danum!

Sanen sikatoy inmakseb manlapud danum, nilakap kon tampol tan oniay inyesaes ko ed sikato: “Nanonotan mo ni no panon ta’n nanlaban nensaman?” “Siempre,” inkuanto, “Nanonotan ko ni, balet nensaman iman. Apasimbalo ak la natan.”

Malikeliket kamin dua lapud aromog mi so katuaan na Biblia a pankakasakeyen to tan uumanen to so singa-lobo iran personalidad a nagmaliw a karnero a kayarian na Baleg a Managpastol, si Jehova a Dios. On, saray bilay so uumanen na katuaan na Biblia.