Misalsalamat tan Manliket

SAY reaksion lapud pisalsalamat so makanakanan eksperiensya na too,” inkuan na Calgary Herald, a peryodiko na Canada. Inaon na say Herald so pigaran mantaon na siamira, a maneeskuela’d elementarya, a sikaray impansulat na maestro ra nipaakar ed amin a bengatlan pisalsalamatan da. Inkuan na sakey a tobonbalo a pisalsalamatan to so pamilya to ‘lapud sikatoy tinalima ra.’ Misalsalamat met so sakey ya ugaw a bii ed pamilya to, a nankuan: “Siak so pinansiansia ran maligen, mabunigas, inasikaso ra ak, inaro da ak, pinakan da ak, tan agak mabilay no agnisesengeg ed atateng ko.”

Say pagmaliw ya andiay-pisasalamat so mangitonton ed tuloytuloy ya ag-inkapnek. Unong ed pilosopo tan teologon si J. I. Packer, “sikatayoy pinalsa pian manbilay ya akadependi ed Dios tan mandedependian ed balang sakey.” Ipapanonot na saya ed sikatayo so makabat a simbawa na Biblia pigaran siglo lay apalabas, a nankuan: “Sikayo komon so misalsalamat.” (Colosas 3:15) Saray balikas na pisasalamat tan impanpuso ya otang a linawa ed arum so ontulong pian nabayuboan iray relasyon a walaay panangiyansakit.

Niarum ni, diad pangapresya tan pamabli ed balang sakey, nipanengneng tayo met so pisasalamat ed si Jehova, tan saya so naiimano to. Ikuan na Biblia: “Saray mata nen Jehova ombatik dia tan diman ed amin a dalin, pian ompatnag a mabiskeg ya ontulong ed saray ayadyari puso ra a dapit ed sikato.” (2 Awaran 16:9) Papaseguroan itayo na Dios a nodnonoten tan papablien to so aron ipapanengneng na totoo parad ngaran to. (Hebreos 6:10) On, walaan itayoy maong a rason pian ipanengneng tayon mismo so otang a linawa lapud sayan maridios a kalidad, sano nipapatnag ya inagew-agew et mamapaliket ed si Jehova tan nagkalalon mamaliket met ed sikatayo. Unong itan ed inkuan na Uliran 15:13: “Say magayaga a puso paligsaen to so lupa.”