No Panon Kan Makapanggawa na Maong Iran Desisyon

SAY bulos a pakapandesisyon so sakey a langkap a manlalapud Dios. No anggapo itan, magmaliw itayon singa robot, ya agtayo nakontrol iray kiwas tayo. Balet lapud walaan itayo na ontan sikatayoy nipapaarap ed saray angat. Lapud bulos itayon makapandesisyon, sikatayo so kaukolan a manggawa na saray desisyon legan na pambibilay tayo.

Siempre, dakel iray desisyon ya ordinaryo lambengat. Walaray arum a makaapekta ed interon arapen tayo, a singa say karera a pilien odino no kasin mangasawa odino miasawa. Insan wadtan met niray mangapekta ed arum a totoo. Arum ed saray desisyon na atateng et baleg so epekto to’d ananak da. Sakey ni et kaukolan a mikuentaan itayo ed Dios lapud dakel a desisyon a gagawaen tayo.​—Roma 14:12.

Pankaukolan na Tulong

Agmarakep so rekord na totoo no nipaakar ed panagdesisyon. Sakey ed sankaunaan iran desisyon na too a nikurit so makadesyang. Denesidi nen Eva a kanen so prutas a mabitabitar ya insebel na Dios. Say desisyon to, a nibase’d masiblet a pilalek, so angipaarap ed impinonong ed sikato na masiken to ya ontunganga ed Dios, tan say nansumpalan et baleg ya irap parad katooan. Diad dakel a kipapasen, siansia nin ibabase na totoo iray desisyon da a nagkalalo diad saray masiblet a pilalek da imbes a diad saray maptek a prinsipyo. (Genesis 3:6-19; Jeremias17:9) Tan sano nipaarap itayo ed ambelat iran dedesisyonan, mabetbet a sankanonot tayo iray limitasyon tayo.

Agpankelawan sirin a sano saray dedesisyonan et importante, dakel so patutulongan ed saray lapuan ya atagtagey nen say totoo. Inkurit na Biblia so sakey ya inkagawa sanen kaukolan a mandesisyon si Nabucodonosor legan a walad bakalan. Anggaman sikatoy sakey ya ari, alikna to so pankaukolan a “gawaen to so pamarles,” say itupleg ed saray espiritu. Kanian, oniay kuan na rekord: “Pinagpag to so saray pana a pinawilpawil, akibalita ed terafin, ninmengneng ed altey.” (Ezequiel 21:21) Mipadpara met natan, dakel so ontutupleg ed saray managparles tan astrologo, tan patutulongan ed saray espiritu diad arum a paraan. Balet sarayan lapuan na impormasyon so manangibalang tan makapalikdo.​—Levitico 19:31.

Wala so Sakey a sigpot a napanmatalkan tan diad interon awaran et natutulongan to la iray totoo a manggawa na makabat iran desisyon. Satan a sakey et anggapoy arum, si Jehova a Dios. Alimbawa, nensaman et inter na Dios ed nasyon to, say Israel, so Urim tan say Tummim​—nayarin sagrado iratan a pampapalaranan sano nipaarap so nasyon ed saray situasyon a walaay baleg a kaimportantian. Diad panamegley na Urim tan Tummim, direktan inebatan nen Jehova iray tepet tan tinulongan iray mamasiken na Israel pian naseguro ran saray desisyon da so mitunosan ed linawa to.​—Exodo 28:30; Levitico 8:8; Numeros 27:21.

Konsideraen pay sakey nin alimbawa. Sanen niganggan si Gideon a mangidaulo ed saray armada na Israel sumpad Midian, sikatoy kaukolan a mandesisyon no kasin awaten to itan ya atagtagey a pribilehyo. Lapud kaliktan nen Gideon a napaseguroan ed pananuporta nen Jehova, sikatoy kinmerew na mamilagron tanda. Impikasi to a say bago a sanlabi ton igaton ed pataktak et kaukolan a nabasay linaew balet ta say dalin ed liber na satan so mansiansian amaga. Diad tinmumbok a  labi, kinerew ton say bago et kaukolan a mansiansian amaga balet ta say dalin ed liber na satan so nalenak na linaew. Mapangasin ginawa nen Jehova iray pakapatnagan a kinerew nen Gideon. Bilang resulta, susto so desisyon nen Gideon tan, diad tulong na Dios et sigpot ton atalo iray kabusol na Israel.​—Uko-ukom 6:33-40; 7:21, 22.

Komusta Balet Natan?

Natan et siansian mangiyoopresi si Jehova na tulong ed saray lingkor to sano sikaray nipapaarap ed saray importantin dedesisyonan. Panon? Kasin aligen tayo si Gideon ya onkerew met na ‘saray panalsalian a bago,’ bilang tanda a manlapud si Jehova pian nipanengneng ed sikatayoy dugan desisyon? Nanumamengan na sakey a sanasawa no kasin sikaray nepeg ya onalis pian manlingkor ed lugar a babaleg so pankaukolan parad manangipulong na Panarian. Pian natulongan iran mandesisyon, inyuksoy day sakey a panalsalian. Ilalako ray abung da diad sakey a presyo. No say abung et nalako ed partikular a petsa diad presyon inggetar da odino atagtagey ni, ipasen da itan a pakapatnagan a labay na Dios ya onalis ira. No agnalako so abung, ipasen dan aglabay na Dios a sikaray onalis.

Ag-alako so abung. Kasin pamatnagan la itan ya aglabay nen Jehova a manlingkor iyan sanasawa ed lugar a babaleg so pankaukolan? Siempre, inka-mapalakbat so direktan pangibaga no antoy detalyadon gagawaen odino aggagawaen nen Jehova parad sikatayo. Agtayo nibaga a si Jehova natan so agbalot mibabali pian ipatnag so linawa to ed saray lingkor to. (Isaias 59:1) Balet, andian itayo na kanepegan ya ilaloan so ontan a pibali ed saray angkabaleg a dedesisyonan tayo, ya ipalima tayo la ed Dios so dedesisyonan tayo. On, anggan si Gideon et kaukolan a manggawa na saray desisyon diad maslak a kabiangay bilay to ya anggapo iray mamilagron tanda a manlapud si Jehova!

Anggaman ontan, ibabaga na Biblia a wala so madibinon panangigiya. Ipapasakbay na satan so nipaakar ed panaon tayo: “Saray layag mo makadngel ira naani na sakey a salita ed beneg mo, a kuan to, Saya so dalan, ondalan kayo ed sikato; sano onarap kayo ed nikawanan, tan sano onarap kayo ed nikawigi.” (Isaias 30:21) Sano nipapaarap itayo ed saray importantin dedesisyonan, matukotukoy lambengat so panseguro a saray desisyon tayo et mitunosan ed linawa na Dios tan pakapatnagay matalonggaring a kakabatan to. Panon? Diad itupleg ed Salita to tan abuloyan itan ya onkanan ‘silewan ed sali tayo, tan liwawa ed basbas tayo.’ (Salmo 119:105; Uliran 2:1-6) Pian nagawaan iya, kaukolan tayon iyugali so pangala na suston pikakabat a manlalapud Biblia. (Colosas 1:9, 10) Tan sano nidunget itayo ed sakey a dedesisyonan, kaukolan a maalwar itayon mansukimat ed amin iran prinsipyo ed Biblia a nisisiglaot ed satan a pamaakaran. Say ontan a panagsukimat so ontulong ed sikatayo a ‘maneguro ed saray nagkalalon importantin bengatla.’​—Filipos 1:9, 10, NW.

Kaukolan a mitongtong itayo met ed si Jehova diad pikakasi, a matalek a talinengen to itayo. Agaylan makaligliwa ya isalaysay ed maaron Dios tayo so desisyon a kaukolan tayon gawaen tan saray pampilian ya ikokonsidera tayo! Insan, makapanmatalek itayo lan paigiya ed sikato diad panggawa na suston desisyon. Mabetbet, ya ipanonot na masanton espiritu ed sikatayo iray mitukoyan a prinsipyo ed Biblia, odino ontulong itan ed sikatayo pian nagkalalon natalosan so sakey a kasulatan a nisisiglaot ed situasyon tayo.​—Santiago 1:5, 6.

Itatarok met nen Jehova iray matakken ed loob na kongregasyon a napangibagaan tayo ed saray  desisyon tayo. (Efeso 4:11, 12) Balet, diad itupleg ed arum et nepeg ya agtayo aaligen iramay onasingger ed nanduruman totoo anggad naromog dan siansia imay mansalita unong ed labay dan dengelen. Insan da ed satan tumboken so simbawa to. Nepeg met a tandaan tayo so manamasakbay ya alimbawa nen Rehoboam. Sanen sikatoy nipaarap ed sakey a seryoson dedesisyonan, sikatoy akaawat na ekselentin simbawa na saray mamasiken a nanlingkor ed ama to. Balet, imbes a tumboken toy simbawa ra, sikatoy tinmupleg ed saray kalangweran a lalakin kabansag ton binmaleg. Diad impanumbok to ed simbawa ra, sikatoy akapanggawa na makapkapuy a desisyon a nansumpal ed inkabalang na baleg a kabiangay panarian to.​—1 Arari 12:1-17.

Sano onkekerew na simbawa, kerewen itan ed saramay eksperiensyado la ed bilay tan walaan na malaknab a pikakabat ed Kasulatan tan aralem a respeto ed maptek iran prinsipyo. (Uliran 1:5; 11:14; 13:20) Sano posibli, mangigana na panaon pian dalepdepen iray prinsipyon nasasaglawi tan ed amin ya impormasyon ya asukimat mo. Sano natalosan mo laray bengatla unong ed liwawa na Salita nen Jehova, maseguron say suston desisyon so lalon nipabitar.​—Filipos 4:6, 7.

Saray Desisyon a Gagawaen Tayo

Walara so mainomay a desisyonan. Sanen ingganggan ya itunda ra so panagpulong, amta na saray apostol a kaukolan dan itultuloy so manpulong nipaakar ed si Jesus, tan impaamta ran tampol ed Sanhedrin so desisyon da a tuloken so Dios imbes a say too. (Gawa 5:28, 29) Walaray desisyon a mankaukolan na nagkalalon panisip lapud anggapo so direktan ibabaga na Biblia nipaakar ed satan a pamaakaran. Siansia, saray prinsipyo na Biblia so kaslakan a mangipalinew ed sankaabigan a desisyon a gawaen. Alimbawa, anggaman dakel ed saray panligliwaan natan so agnaromog ed panaon nen Jesus, walaray mabitar a balikas ed Biblia no antoray makapaliket tan agmakapaliket ed si Jehova. Kanian siopaman a Kristianon nigagalet ed panligliwaan a mangiyaalibansa na karawalan, imoralidad, odino rebelyon so akapanggawa na makapuy a desisyon.​—Salmo 97:10; Juan 3:19-21; Galacia 5:19-23; Efeso 5:3-5.

No maminsan et walaray desisyon a parehon duga. Say panlingkor ed lugar a babaleg so pankaukolan so alay abig a pribilehyo tan makapangitonton ed baleg iran panamendisyon. Balet no adesisyonan na sakey a too ya agto ituloy itan lapud sakey a rason, sikatoy siansian makapanggawa na maabig a kimey diad mismon kongregasyon to. No maminsan et nayarin nipaarap itayo ed dedesisyonan a mangiter ed sikatayo na pankanawnawa a nidemostra so kinaaralem na debosyon tayo ed si Jehova odino no antoy sankaimportantian ed bilay tayo. Kanian aabuloyan nen Jehova ya usaren tayo so bulos a linawa tayo pian nipatnag no anton talagay walad kapusoan tayo.

Mabetbet a naaapektoan so arum ed saray desisyon tayo. Alimbawa, nanggayagaan na saray Kristiano nen inmunan-siglo so inkibulos da ed dakel a panameget na Ganggan. Singa bilang, kabaliksan na satan a nayarian da lan awaten odino andi so taganon agmalinis ed silong na Ganggan. Siansia, sikaray pinaseseg ya ikonsidera iray konsiensia na arum sano mandesisyon, no kasin agamilen da iyan kawayangan odino andi. Saray salita nen Pablo nipaakar ed sayan pamaakaran so onaplika met ed dakel a gagawaen tayon desisyon: “Agkayo mangiiter  na sengeg na katiroran.” (1 Corinto 10:32) Say pilalek ya agmangigapol ed arum so makatulong ed pandetermina ed dakel a desisyon a gawaen tayo. Tutal, say panangaro ed kaparan too so komaduan sankabalegan a ganggan.​—Mateo 22:36, 39.

Say Resulta na Saray Desisyon Tayo

Saray desisyon a ginawa unong ed maong a konsiensia tan nibase’d saray prinsipyo na Biblia so lawas walaan na marakep a pansumpalan diad saginonor. Siempre, diad antikey a panaon et mankakaukolan iratan na personal a panagsakripisyo. Sanen imbaga na saray apostol ed Sanhedrin so desisyon dan mantultuloy a manpulong nipaakar ed si Jesus, sikaray pinepekpek da sakbay a sikaray imbulos. (Gawa 5:40) Sanen say taloran Hebreo​—di Sidrac, Misac, tan Abdenago​—et denesidi ra ya ag-ondakmomo ed binalitokan ya imahen nen Nabucodonosor, niiyan ed kaatapan so bilay da. Sikaray akaparaan ya onarap ed posibilidad a napapatey lapud desisyon da. Balet amta ra a sikaray walaan na panangabobon tan panamendisyon na Dios.​—Daniel 3:16-19.

No nipaarap itayo ed kairapan lapud maalwar ya impandesisyon, aliwan rason itan pian ibagan aliwa so desisyon. Say “panaon tan agnailaloan a nagawa” so mangapektan maong ed resulta na anggan saray desisyon a walaan na alay abig a getma. (Eclesiastes 9:11, NW) Niarum ni, no maminsan et iyaabuloy nen Jehova so kairapan pian nasubok so inkapeteg na panagmatalek tayo. Si Jacob so kaukolan a mipuligesgesan a sanlabi ed sakey ya anghel sakbay a naawat toy bendisyon. (Genesis 32:24-26) Sikatayo met so kaukolan a mipuligesgesan ed kairapan, anggano dugay gagawaen tayo. Siansia, sano saray desisyon tayo et mitunosan ed linawa na Dios, makapanmatalek itayo a tulongan to itayon makapansungdo tan diad kaunoran et bendisyonan to itayo met.​—2 Corinto 4:7.

Kanian, sano manggagawa na importantin desisyon, agka manmamatalek ed dilin kakabatan mo. Sukimaten iray onaplikan prinsipyo na Biblia. Itongtong ed si Jehova itan a pamaakaran. No posibli, ontupleg ed saray matakken a kaparan Kristiano. Insan manpakpel. Agamilen mo so inter-Dios a bulos a panagdesisyon diad responsablin paraan. Manggawa na maabig a desisyon tan idemostra ed si Jehova a say pusom et maptek ed imaton to.

[Litrato ed pahina 29]

Ontupleg ed Salitay Dios sakbay a manggawa na saray importantin desisyon

[Saray litrato ed pahina 29, 30]

Itongtong ed si Jehova iray desisyon a gawaen mo

[Litrato ed pahina 31]

Nayarin singbaten moray importantin desisyon mo ed saray matakken a Kristiano