Panon a Nabanlongan na Deen nen Kristo so Kapusoan Tayo?

“Banlongan komon na deen nen Kristo so kapusoan yo, ta sikayo so diad tua et atawag ed satan diad saksakey a laman.”​—COLOSAS 3:15, NW.

1, 2. Diad anton dalan a say “deen nen Kristo” so mamanlong ed puso na sakey a Kristiano?

 SAY panamanlong et agmaabig a salita parad karaklan, lapud ipapanonot na satan so nipaakar ed panamilit tan panag-anamot. Say panamaseseg nen Pablo ed saray kaparan Kristiano diad Colosas a, “Banlongan komon na deen nen Kristo so kapusoan yo,” so nayari sirin ya ipasen na arum bilang agmakatunongan. (Colosas 3:15) Agta makapandesisyon itayon bukor? Akin ya abuloyan tayo so antokaman a bengatla odino siopaman a mangontrol ed kapusoan tayo?

² Ag-ibabaga nen Pablo ed saray taga-Colosas ya isuko da la so bulos a panagdesisyon da. Say Griegon termino a nipatalos a “banlongan” diad Colosas 3:15 so misiglaotan ed salita a parad opisyal na pagalaw a mangiiter na premyo diad saray pagalaw ed saraman ya agew. Saray migalaw so walaan na laknab na kawayangan ed loob na saray totontonen na pagalaw, balet kayari na satan, say opisyal na pagalaw so mandesidi no siopa so anumbok ed saray totontonen tan analo ed pagalaw. Mipadpara, walaan itayo na kawayangan a manggaway dakel iran desisyon ed bilay, balet diad panggagawa tayo ed saratan, say deen nen Kristo so nepeg a magmaliw ya “opisyal na pagalaw”​—odino, unong ed impanguker ed satan na managpatalos a si Edgar J. Goodspeed, “say mananguley a prinsipyo” ed kapusoan tayo.

3. Anto so “deen nen Kristo”?

³ Anto so “deen nen Kristo”? Satan so inka-mapalna, say akindalem a kareenan, a nagamoran tayo sano magmaliw itayon babangatan nen Jesus tan naaralan tayo a papablien tan aabobonan itayo nen Jehova a Dios tan say Anak to. Sanen taynan la nen Jesus iray babangatan to, inkuanto’d sikara: “Say kareenan ko iter ko ed sikayo. . . . Agnagonigon so puso yo, agmet sitatakot.” (Juan 14:27) Diad loob na ngalngali 2,000 a taon, satan a kareenan so nanggayagaan na saray matoor ya alanaan a membro na laman nen Kristo, tan natan et panggagayagaan met itan na saray kakaiba ra, say “arum a karnero.” (Juan 10:16) Satan a kareenan so nepeg a magmaliw a manamanlong ya impluensya ed kapusoan tayo. Sano nidudunget itayo ed pirmin subok, makatulong itan ed sikatayo pian ag-itayo natalonaan na takot odino pirmin nagonigon. Nengnengen tayo no panon a tua iya sano nidunget itayo ed ag-inkahustisya, sano gogonigonen itayo na kapagaan, tan sano liknaen tayo ya ag-itayo makana.

Sano Nidunget Itayo ed Ag-Inkahustisya

4. (a) Panon a naeksperiensya nen Jesus so ag-inkahustisya? (b) Panon a kinmiwas iray Kristiano sanen abiktima ira na ag-inkahustisya?

⁴ Oniay naimano nen Arin Solomon: ‘Say too walaan na pakayari ed sananey pian kaugsan to.’ (Eclesiastes 8:9) Amta nen Jesus so katuaan na saratan a salita. Legan a walad tawen, anengneng to la so pirmin ag-inkahustisya a ginawa na totoo ed balang sakey ed sikara. Diad dalin, asagmak ton mismo so sankagrabian ya ag-inkahustisya sanen sikato, bilang andiay-kasalanan a too, so naakusaan na panag-ayew tan sikatoy impapatey bilang kriminal. (Mateo 26:63-66; Marcos 15:27) Natan, siansian kasmak so ag-inkahustisya, tan pirmin nanirap iray tuan Kristiano, a nagmaliw  iran “puntirya na pambusol na amin a nasyones.” (Mateo 24:9, NW) Balet, anggaman ed makapataktakot iran eksperiensya diad panagpateyan iran kampo na Nazi tan diad Soviet Gulag, anggaman abiktima ira ed karamsakan na pangkat, saray palson panamakasalanan, tan panagpauges, nansiansia iran mapekder lapud deen nen Kristo. Inalig da si Jesus, ya oniay nabasa tayo nipaakar ed sikato: “Sanen ayew-ayewen da agto binmales ya angayew; sanen apagpairap agnaningongot; noag ingen inmatalek to so laman to ed manangiter na tunong.”​—1 Pedro 2:23.

5. Sano makadngel itayo na ompatnag ya ag-inkahustisya ed kongregasyon, anto so nepeg tayon nonoten ya unona?

⁵ Diad lokal a kipapasen, nayarin panisiaan tayo a walay agmakatunongan ya intrato ed loob na Kristianon kongregasyon. Diad ontan a kipapasen, nayarin liknaen tayo so alikna nen Pablo, a kuanto: “Siopa so nagapol, tan agak ondalang?” (2 Corinto 11:29) Anto so nayarin gawaen tayo? Nepeg tayon tepetan so inkasikatayon dili, ‘Talaga kasin ag-inkahustisya itan?’ Mabetbet, agtayo amta so amin a detalye. Nayarin pirmi so reaksion tayo kayarin arengelan ed sakey a mankuan a makaamta ed saray agawa. Tekep na maabig a rason, oniay ibabaga na Biblia: “Say karaklan manisia ed balang salita.” (Uliran 14:15) Kanian nakaukolan a magmaliw itayon maalwar.

6. Panon so ikiwas tayo ed impasen ya ag-inkahustisya ed loob na kongregasyon?

⁶ Balet, no bilang ta sikatayon mismo so abiktima na impasen ya ag-inkahustisya. Panon so ikiwas na sakey a too a walaan na deen nen Kristo ed puso to? Nayarin natebek tayo so pankaukolan na pitongtong ed indibidual a liknaen tayon akaopendi ed sikatayo. Kayari na satan, imbes ya itongtong so agawa ed sananey ya ondengel, akin ya ag-ipalima ed si Jehova so kipapasen diad pikakasi tan manmatalek ed sikato pian naseguro ya agawa so inkahustisya? (Salmo 9:10; Uliran 3:5) Nayarin maabig no kayarin agawaan itan et mankontento itayo lan solbaren so pamaakaran diad puso tayo tan “mandeen” tayo la. (Salmo 4:4) Diad maslak a kipapasen, onaplika so simbawa nen Pablo: “Mantetepelan so sakey tan sakey, tan manpeperdonaan so balang sakey, no say siopaman a too wala so pangidalman to ed siopaman; unong ed impamerdona na Katawan ed sikayo, ontan met so gawaen yo.”​—Colosas 3:13.

7. Anto so lawas nodnonoten tayo diad pidedeneng tayo ed saray agagi tayo?

⁷ Balet, antokaman so gawaen tayo, kaukolan tayon nodnonoten ya anggaman agtayo nakontrol so agawa, nakontrol tayo so reaksion tayo. No onkiwas itayo ed agmakatunongan a paraan diad sakey ya impasen ya ag-inkahustisya, satan so nayarin walaay mas mauges ya epekto ed kareenan tayo nen say ag-inkahustisya a mismo. (Uliran 18:14) Nayari ni ingen a nagapol itayo tan agtayo la milimog ed kongregasyon anggad liknaen tayon agamoran la so inkahustisya. Insulat na salmista ya “anggapo a balot so sengegay kigapolan” na saramay mangaaro ed saray ganggan nen Jehova. (Salmo 119:165) Say tua et amin so makakaeksperiensia na ag-inkahustisya ed panapanaon. Agbalot aabuloyan iratan a makapuy ya eksperiensya a mangamper ed panlilingkor yo ed si Jehova. Imbes, abuloyan so deen nen Kristo a mamanlong ed puso yo.

Sano Nagogonigon Itayo ed Kapagaan

8. Anto so pigaran bengatla a pansengegan na kapagaan, tan anto so epekto na kapagaan?

⁸ Say kapagaan so talagan kabiangan na bilay  ed sarayan “kaunoran ya agew.” (2 Timoteo 3:1) Tua, kuan nen Jesus: “Agkayo mapaga ed bilay yo, no antoy kanen yo; tan anggan nipaakar ed laman yo, no anto so kawesen yo.” (Lucas 12:22) Balet aliwan amin a kapagaan et makasengeg ed materyal iran bengatla. Si Lot so “apaermen a tuloy” lapud inkauges na Sodoma. (2 Pedro 2:7) Si Pablo so agonigon ed “kapagaan na amin a kongregasyon.” (2 Corinto 11:28, NW) Ontan met so inkagonigon nen Jesus diad samay labi antis na impatey to a “say linge’to singa angkakabaleg a tedter na dala a sinmaklayat angga ed dalin.” (Lucas 22:44) Mabitar, aliwan amin a kapagaan et resulta na maletey a pananisia. Balet, antokaman so sengegan na satan, naandi so kareenan tayo sano grabe la tan abaybayag lay pakakagonigon tayo. Say kapagaan so analona ed arum, ya alikna ra ya agda la nagawaan iray responsabilidad a nalalanor ed panaglingkor ed si Jehova. Oniay ibabaga na Biblia: “Say kabelatan ed puso na too mamatuek ed sikato.” (Uliran 12:25) Anto sirin so gawaen tayo sano sikatayo so nanaapektaan a maong ed kapagaan?

9. Anto so pigaran praktikal a kundang a nayarin mamakepa na kapagaan, balet antoran sengegan na kapagaan so agnayarin paandien?

⁹ Diad arum a kipapasen, nayarian tayo so manggawa na praktikal iran kundang. No say pampapatambal tayo et sengegan na kapagaan tayo, makabat no ikdan itan na imano, anggaman saratan so personal a desisyon. * (Mateo 9:12) No nabebelatan itayo ed dakel iran responsabilidad, nayarin ipabtang tayo ed arum so pigara ed saratan. (Exodo 18:13-23) Komusta balet iramay walaan na ambelat a responsabilidad ya agnayarin ipabtang, a singa saray atateng. Komusta so sakey a Kristianon walaan na onsusumpan kapareha? Komusta so pamilya a pirmin maniirap ed pinansyal odino manaayam ed lugar a walay pambabakal? Mabitar, agtayo napaandi so amin a sengegan na kapagaan ed sayan sistema na bengabengatla. Anggaman ontan, napansiansia tayo so deen nen Kristo diad kapusoan tayo. Panon?

10. Anton duaran paraan a naromog na sakey a Kristiano so pakainawaan manlapud kapagaan?

¹⁰ Say sakey a paraan et say pananap na pakaligliwaan  diad Salitay Dios. Oniay insulat nen Arin David: “Dia ed kinaraklan na saray kanonotan ko ed loob ko saray ligliwam pinaliket da so kamarerwak.” (Salmo 94:19) ‘Saray ligliwa’ nen Jehova so naromog ed Biblia. Say regular ya itupleg ed apuyanan a Libro so ontulong ed sikatayo pian mansiansia so deen nen Kristo ed kapusoan tayo. Oniay ibabaga na Biblia: “Paawit mo ed Jehova so awit mo, et sikato bembenan to ka: agton balot paulyan so matunong a natentenyeg.” (Salmo 55:22) Ontan met, oniay insulat nen Pablo: “Agkayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios, a talonaan ton amin a pakatalos, bantayan to so kapusoan yo tan saray nonot yo ed Kristo Jesus.” (Filipos 4:6, 7) Say masimoon tan regular a panagpikasi so ontulong ed sikatayo pian mansiansia so kareenan tayo.

11. (a) Panon a si Jesus et maabig ya ehemplo nipaakar ed pikakasi? (b) Panon tayon moriaen so pikakasi?

¹¹ Si Jesus so ekselentin ehemplo ed sayan pamaakaran. Diad sakey ya inkagawa, sikato so masimoon ya akisalita ed mangatatawen ya Ama to ed loob na dakel ya oras. (Mateo 14:23; Lucas 6:12) Say pikakasi so akatulong ed sikato pian nasungdoan iray graben subok. Diad samay labi sakbay na impatey to, lalon linmoor so pakakagonigon to. Say ginawa to? Sikato so nampikasi a “masimsimoon.” (Lucas 22:44, NW) On, say ayadyarin Anak na Dios so mapikasi. Mas lalo sirin a bayuboan na saray ag-ayadyarin patumbok to so naynay a panagpikasi! Imbangat nen Jesus iray babangatan to a ‘lawas iran manpikasi, tan ag-ira komon napunaw.’ (Lucas 18:1) Say pikakasi so peteg tan makanan pitatalosan ed samay Sakey a mikabat a maong ed sikatayo nen say sikatayon dili. (Salmo 103:14) Ta pian napansiansia tayo so deen nen Kristo ed kapusoan tayo, ‘mikasi tayo ya andi tunda.’​—1 Tesalonica 5:17.

Panaeg ed Saray Limitasyon Tayo

12. Diad antoran rason a nayarin liknaen na arum ya anggapo lay kakanaan na panlilingkor da?

¹² Papablien nen Jehova so balang sakey ed saray lingkor to. (Aggeo 2:7, NW, paimano’d-leksab) Anggaman kuan, mairap itan ya awaten na dakel. Arum so nadidismaya lapud itatakken, ondarakel ya obligasyon ed pamilya, odino onkakapuy lan bunigas. Nayarin liknaen na arum a pakaskasi ra lapud makapasinagem ya eksperiensya nen kaugawan da. Nayarin nagogonigon ni so arum lapud apalabas iran kasalanan, a panduaruwaan da ya agla ran balot naperdona nen Jehova. (Salmo 51:3) Anto so gawaen nipaakar ed saratan a liknaan?

13. Anto so walan Makasulatan a ligliwa parad saramay manliknan agmakanepegan?

¹³ Say kareenan nen Kristo so mangipaseguro ed sikatayo nipaakar ed aro nen Jehova. Napansiansia tayo itan a kareenan ed kapusoan tayo diad pandalepdep ed katuaan ya agbalot imbaga nen Jesus a nasukat so kablian tayo diad pangikompara ed gagawaen tayo ed gagawaen na arum. (Mateo 25:14, 15; Marcos 12:41-44) Say indanedanet to et say katooran. Oniay inkuan to ed saray babangatan to: “Say misungdo ya angga ed kasampotan, sikato lanlamang so nilaban naani.” (Mateo 24:13) Si Jesus a mismo so ‘minudmora’ na totoo, ingen agto nanduaruwaan so panangaro ed sikato nen Ama to. (Isaias 53:3; Juan 10:17) Tan imbaga to ed saray babangatan to a pinabli met ira. (Juan 14:21) Pian nidanet itan, onia so inkuan nen Jesus: “Agta nalako so duaran anuyaw ed sakey a kuarta? Et agnapelag naani sakey ed sikara ed dalin no agyabuloy nen Ama yo. Et anggan saray buek na ulo yo abilang ira ya amin. Agkayo antakot sirin; ta mamabli kayo nen saray amayamay ya anuyaw.” (Mateo 10:29-31) Agaylan maligsan panamaseguro na panangaro nen Jehova!

14. Anton panamaseguro so walad sikatayo a papablien nen Jehova so balang sakey ed sikatayo?

¹⁴ Inkuan met nen Jesus: “Anggapo so too a makadago ed siak, likud no say Ama ya angibaki ed siak sikato so yasingger to.” (Juan 6:44) Lapud si Jehova so angiyasingger ed sikatayo pian ontumbok ed si Jesus, labay To itayon nilaban. Imbaga nen Jesus ed saray babangatan to: “Agkaliktan nen Ama yo a wala ed tawen, a sakey ed sarayan ankekelag ya ugugaw et natawtaw.” (Mateo 18:14) Kanian no manlilingkor kayo tekep na interon puso, nitandoro kayo ed saray maabig a gawa yo. (Galacia 6:4) No nagogonigon kayo ed apalabas iran impakalingoan yo, napaseguroan  kayo a saray petepeteg a magbabawi so perdonaen nen Jehova ‘ed daakan a paraan.’ (Isaias 43:25; 55:7) No wala so antokaman a rason a pakakadismayaan yo, nodnonoten a “si Jehova asingger ed saray wala ed kipapasen na sakey a nabtagan na puso; tan ilaban to so totoo a wala ed sakey a kamarerwa a masakit ed panagbabawi.”​—Salmo 34:18.

15. (a) Panon a sasalien nen Satanas a paandien so kareenan tayo? (b) Anton kompiyansa ed si Jehova so niwala ed sikatayo?

¹⁵ Pampirpirawatan nen Satanas a paandien so kareenan yo. Sikato so makasengeg ed atawir a kasalanan a pibabarangkaan tayon amin. (Roma 7:21-24) Maseguron labay to kayon manisip ya agla makapaliket ed Dios so serbisyo yo lapud agyo inkayadyari. Agyon balot aabuloyan so Diablo a manismaya ed sikayo! Magmaliw a sikakabat ed saray paraan to, tan determinado kayo komon a mansungdo lapud satan a pikakabat. (2 Corinto 2:11; Efeso 6:11-13) Nodnonoten, “babaleg so Dios nen say puso tayo, tan kaba’to so amin a bengatla.” (1 Juan 3:20) Aglambengat nenengnengen nen Jehova iray pakakaluksoan tayo. Iimanoen to met iray motibo tan getma tayo. Naligliwa sirin ed saray salita na salmista: “Si Jehova agto ibantak so baley to, nisay ikaindan to so tawir to.”​—Salmo 94:14.

Nankakasakey ed Deen nen Kristo

16. Diad anton paraan ya agtayo bukbukor legan tayon pambabanikelan so mansungdo?

¹⁶ Insulat nen Pablo a nepeg tayon abuloyan so deen nen Kristo a mamanlong ed kapusoan tayo lapud sikatayo so ‘atawag a saksakey a laman.’ Saray alanaan a Kristiano a sinulat nen Pablo so tinawag bilang kabiangan na laman nen Kristo, bilang saray nakekeraan ni ed saray alanaan natan. Saray kaiba ran “arum a karnero” so akikasakey ed sikara bilang “saksakey a pulok” diad silong na “saksakey a pastol,” si Jesu-Kristo. (Juan 10:16) Nankakasakey, say sankamundoan a “pulok” na minilyon so mangiyaabuloy ed deen nen Kristo a mamanlong ed kapusoan da. Say pakaamtan agtayo bukbukor et makatulong ed sikatayo a makapansungdo. Oniay insulat nen Pedro: “Sumpaen yo [si Satanas] na mabiskeg a pananisia yo, amta yo a peteg ta saratan a kairapan a nagawa met ira ed utel na agagi yo a wala ed mundo.”​—1 Pedro 5:9.

17. Anto so nagunggona tayo no abuloyan tayo so deen nen Kristo a mamanlong ed kapusoan tayo?

¹⁷ Mantultuloy tayo sirin ya amin a bayuboan so kareenan, a makanan bunga na masanton espiritu na Dios. (Galacia 5:22, 23) Saramay naromog nen Jehova ya andi-matik, andi-tilol, tan walad kareenan so nabendisyonan ed saginonor na andi-anggaan a bilay diad paraison dalin, a ditan so panayaman na inkatunong. (2 Pedro 3:13, 14) Walaan itayo na nanduruman rason ya abuloyan so kareenan nen Kristo a mamanlong ed kapusoan tayo.

[Paimano ed leksab]

Kasin Nanonotan Yo?

• Anto so deen nen Kristo?

• Panon a say deen nen Kristo so mamanlong ed kapusoan tayo sano nidunget itayo ed ag-inkahustisya?

• Panon a makatulong ed sikatayo so deen nen Kristo pian natalonaan so kapagaan?

• Panon itayon naligliwa na deen nen Kristo sano liknaen tayon ag-itayo makana?

[Tepetepet Parad Panagaral]

[Litrato ed pahina 15]

Diad arap na saray mangaakusa ed sikato, inmatalek nen Jesus so inkasikato ed si Jehova

[Litrato ed pahina 16]

Singa malet a lakap na maaron ama, say pananambayo nen Jehova so mamakepa ed kapagaan tayo

[Litrato ed pahina 18]

Importantin maong ed Dios so panagsungdo