Say Diablo​—Mas Ni Nen Say Basta Anito

“Diad interon Balon Sipan et naimano so pirmin panlalaban na saray puersa na Dios tan kamaongan diad sakey a dapag, tan diad sananey a dapag et saray puersa na kaugsan ya igagaulo nen Satanas. Aliwa iyan ideya na sakey odino duaran managsulat ed Biblia, noagta punton napampaknaan itan. . . . Malinew sirin so paneknek na Balon Sipan. Si Satanas so sakey a petepeteg a mauges, a lawas onsusumpa ed Dios tan ed totoo na Dios.”​—“The New Bible Dictionary.”

AKIN balet ya ipupulisay na dakel a mankuan a Kristiano​—tan mangibabagan manisia ed Biblia​—so ideyan wala so sakey a tudtua a Diablo? Lapud, diad tua et agda aawaten so Biblia bilang Salitay Dios. (Jeremias 8:9) Ibabaga ran saray managsulat na Biblia so angadapta ed saray pilosopiya na saray nasyon a walad kaliberliber da tan agda suston nipasabi so katuaan a manlalapud Dios. Alimbawa, oniay insulat na Katolikon teologo a si Hans Küng: “Saray mitolohikon ideya nipaakar ed si Satanas pati say karaklan na saray demonyo . . . so linmoob ed mitolohiya  na Babilonia angga ed kadaanan a Judaismo insan dia ed Balon Sipan.”​—On Being a Christian.

Balet say Biblia so aliwan basta salita na totoo; peteg a satan so impuyan a Salita na Dios. Kanian makabat no seryosoen tayo so ibabaga na satan nipaakar ed Diablo.​—2 Timoteo 3:14-17; 2 Pedro 1:20, 21.

Antoy Panmoria nen Jesus?

Panisiaan nen Jesus a say Diablo so tudtua. Si Jesus so agtinukso na mauges a walad akindalem to. Sikatoy inataki na sakey a tudtuan persona a diad saginonor et tinawag ton “prinsipe na mundo.” (Juan 14:30; Mateo 4:1-11) Panisiaan to met a sinuportaan na arum ya espiritun pinalsa si Satanas ed saray marelmeng a pakana to. Pinaabig to so totoon “sinelepay demonyo.” (Mateo 12:22-28) Anggan say ateistikon publikasyon ya A Rationalist Encyclopædia so mangipapaimano’d kabaliksan na saya sanen inkuan na satan: “Lawas pakakagapolan na saray teologo no panon a say Jesus na saray Ebanghelyo so angawat ed sisiaen nipaakar ed saray demonyo.” Sanen sinaglawi nen Jesus so nipaakar ed Diablo tan saray demonyo to, sikatoy agbasta manguulit ed saray aniton kinmayat a nanlapud mitolohiya na Babilonia. Kabat to a walan talaga iratan.

Dakel so naaral tayo nipaakar ed Diablo sano imanoen tayoray imbalikas nen Jesus ed saray relihyoson managbangat ed panaon to: “Sikayo kien kayo na ama yo a diablo, et saray kalikaliktan nen ama yo sikato so labay yo a gawaen. Sikato so akapatey nanlapu ed gapo, tan agtinmalindeg ed katuaan, ta anggapo ed sikato so katuaan. Bangno mansalita na tila, mansalita nipaakar ed kayarian to, ta sikato matila, tan ama na tila.”​—Juan 8:44.

Unong ed saya, say Diablo (a say deskriptibon ngaran to ed Griego et mankabaliksay “managpauges”) so “matila tan ama na tila.” Sikatoy primeron pinalsa a nantila nipaakar ed Dios, tan satan so ginawa to dia ni’d hardin na Eden. Imbaga nen Jehova a say inmunan atateng tayo so “ompatey” no mangan ira manlapud kiew a pakaamtaan na maong tan mauges. Panamegley na sangi uleg, inkuan nen Satanas ya aliwan tua iratan a salita. (Genesis 2:17; 3:4) Matukotukoy, sikatoy tatawagen a “say daan ya uleg, a manngaran na Diablo tan Satanas.”​—Apocalipsis 12:9.

Say Diablo so nantila nipaakar ed kiew a pakaamtaan na maong tan mauges. Insuppiat to ya agmakatunongan so impangisebel ed pangan manlapud satan a kiew; panangabuso itan ed pakayari. Inkuan to a ‘magmaliw a singa Dios’ si Adan tan Eva diad pandesisyon no anto so maong tan mauges parad inkasikara. Impasagilig nen Satanas a bilang walaan na bulos a linawa et nepeg a sikaray nawalaan na nagnap a dilin-panagdesisyon. (Genesis 3:1-5) Sayan impangataki ed  inkaptek a paraan na pananguley na Dios so amalesa na saray importantin isyu. Kanian inyabuloy nen Jehova so panaon pian naresolbi irayan isyu. Kabaliksan na saya a si Satanas so naabuloyan a manbilay ni ed antikey a panaon. Say limitadon panaon to so mapmaples la natan a nauupot. (Apocalipsis 12:12) Bangbalet, itutultuloy ton iyaarawi so katooan manlapud Dios panamegley na tilatila tan panamalikdo, diad panguusar na totoon singa saray eskriba tan Fariseo ed panaon nen Jesus pian nikayat iray bangat to.​—Mateo 23:13, 15.

Inkuan met nen Jesus a say Diablo so ‘manamatey nanlapu ed gapo’ tan ‘sikato so agtinmalindeg ed katuaan.’ Agkabaliksan na saya a pinalsa nen Jehova so Diablo bilang ‘manamatey.’ Sikato so agpinalsa bilang sakey a kulimaw ya inkargado diad pasen na apoy tan panamairapan ed siopaman a sinmumpa ed Dios. Say “impierno” a niparungtal ed Biblia so aliwan ayaman nen Satanas. Satan so kaslakan a lubok na katooan.​—Gawa 2:25-27; Apocalipsis 20:13, 14.

Say Diablo so datin wala “ed katuaan.” Sikatoy datin kabiangan na mangatatawen a pamilya nen Jehova bilang ayadyarin espiritun anak na Dios. Balet sikato so “agtinmalindeg ed katuaan.” Mas pinili to iray dilin dalan to tan saray dilin prinsipyo to a nibase’d tilatila. ‘Sikato so nanlapu ed gapo,’ aliwan sanen sikatoy pinalsa bilang anghelikon anak na Dios, noagta sanen sikatoy sigagagalan nanrebelde ed si Jehova tan nantila ed si Adan tan si Eva. Say Diablo et kapara na saramay totoon nanrebelde ed si Jehova diad panaon nen Moises. Oniay nabasa tayo nipaakar ed sikara: “Mauges so ginawa ra ed sikato, sikara agto’ra anak, sikato so akabalawan da [“kien da so kabalawan,” NW].” (Deuteronomio 32:5) Ontan met so nibaga ed si Satanas. Sikatoy nagmaliw a ‘manamatey’ sanen sikatoy nanrebelde tan nagmaliw a pakatetelan ed impatey nen Adan tan Eva tan, diad tua pati amin met a pamilya na too.​—Roma 5:12.

Saray Matungangan Anghel

Akinonong so arum ya anghel ed impanrebeldi nen Satanas. (Lucas 11:14, 15) Sarayan anghel et “pinaulyan da so nigetar a panaayaman da” tan sikaray nankinon-too pian panliketan so seksual a pirerelasyonan ed “bibii ya anak na saray totoo” ed panaon nen Noe. (Judas 6; Genesis 6:1-4; 1 Pedro 3:19, 20) Say “kakatlo na saray bitewen ed tawen,” odino say melag a grupo na saray espiritun pinalsa, so angala ed ontan a kurang.​—Apocalipsis 12:4.

Say masimbolikon tuloy a libro na Apocalipsis so mangililitrato ed Diablo bilang “sakey a baleg a dragon ya ambalanga.” (Apocalipsis 12:3) Akin? Aliwan lapud sikatoy literal a walaan na makapataktakot ya itsura, aliwliwan indengan. Diad tua et agtayo amta no anton klase na indengan so walad saray espiritun pinalsa, balet nipaakar ed satan et maseguron anggapoy piduma nen Satanas ed arum ya espiritun pinalsan anghel. Anggaman ontan, say “sakey a baleg a dragon ya ambalanga” so matukoy a deskripsion ed narnarasan, makapataktakot, mabiskeg, tan makaderal ya awawey nen Satanas.

Si Satanas tan saray demonyo so apegetan lan tuloy natan. Agda la nayarian so mankinon-too a singa datin agawaan da. Kayarin tuloy na inkiletneg na Panarian na Dios diad pananguley nen Kristo nen 1914, sikaray nibasileng diad kaliberliber na dalin.​—Apocalipsis 12:7-9.

Mairap a Kalaban so Diablo

Anggaman ontan et siansian mairap a kalaban so Diablo. Sikatoy ‘wala ed kaliberliber a singa omoang a leon a mananap na buagen to.’ (1 Pedro 5:8) Sikatoy aliwan aburagas a prinsipyo na inkauges a wala ed saray ag-ayadyarin laman tayo. Tua, a sikatayo so naynay a milalaban ed dilin makasalanan iran tendensia tayo. (Roma 7:18-20) Balet say peteg a panirapan et say “onsumpa  ed saray manuley ed mundo na sayan kabilungetan, sumpa ed saray mauges ya espiritu ed pasen a mangatatawen.”​—Efeso 6:12.

Kaunongan kalaknab so impluensya na Diablo? ‘Say sankamundoan mandukdukol ed mauges a sakey,’ so inkuan nen apostol Juan. (1 Juan 5:19) Siempre, agtayo labay so paaripen ed Diablo odino abuloyan so inaaniton takot ed sikato a maneral ed sikatayo. Balet, sikakabat itayon manalwar a naynay ed pansasagpot to ya ibalang itayo ed katuaan tan buyaken so katooran tayo ed Dios.​—Job 2:3-5; 2 Corinto 4:3, 4.

Aglawas uusaren na Diablo so maruksan paraan pian atakien iraman so malabay a manggawa ed linaway Dios. No maminsan et ipapatnag toy inkasikato a singa “sakey ya anghel na liwawa.” Pinasakbayan nen apostol Pablo iray Kristiano ed sayan kapeligroan sanen insulat to: “Antakot ak, ompan lamang no, singa say uleg a tinilaan to si Eva ed kasiliban to, saray kanonotan yo naderal ira manlapu ed kalinewan tan kasimpitan a mamapaarap ed Kristo.”​—2 Corinto. 11:3, 14.

Kaukolan tayo sirin so ‘mandangka, manbantay, tan sikato so sumpaen tayo na mabiskeg a pananisia.’ (1 Pedro 5:8, 9; 2 Corinto 2:11) Paliisan a sikatayoy mainomay a napalikdo nen Satanas diad panupapet ed antokaman a nisisiglaot ed okultismo. (Deuteronomio 18:10-12) Manseet a manaral na Salitay Dios, tan tandaan a si Jesu-Kristo et aminpigan anukoy ed Salitay Dios sanen sikatoy tinukso na Diablo. (Mateo 4:4, 7, 10) Manpikasi parad espiritu na Dios. Saray bunga na satan so makatulong ed sikayo pian napaliisan iray gawa na laman, ya epektibon tuloy ya uusaren nen Satanas. (Galacia 5:16-24) Manpikasi met a masimoon ed si Jehova no bilang sika so dedesdesen na Diablo tan saray demonyo to.​—Filipos 4:6, 7.

Agmo nepeg a takotan so Diablo. Ipapaseguro nen Jehova so peteg a salimbeng sumpad antokaman a nagawaan nen Satanas. (Salmo 91:1-4; Uliran 18:10; Santiago 4:7, 8) Oniay inkuan nen apostol Pablo: “Ombiskeg kayo komon ed Katawan, tan dia ed biskeg na pakayari to.” Diad ontan et “nayarian yo so ontalindeg ya onsumpa ed saray pangalot na Diablo.”​—Efeso 6:10, 11.

[Litrato ed pahina 5]

Kabat nen Jesus a say Diablo et sakey a peteg a persona

[Litrato ed pahina 6]

‘Say sankamundoan mandukdukol ed mauges a sakey’

[Credit Line]

NASA photo

[Saray litrato ed pahina 7]

Sumpaen yo so Diablo diad panaral na Salita na Dios tan pampikasi a maparanay