Propesiya nen Isaias​—Liwawa Parad Amin a Katooan I

Kapitulo Sais

Walaan na Panangasi si Jehova a Dios ed Sakey a Nakdaan

Isaias 4:2-6

1, 2. Anto so ipapasakbay nen propeta Isaias nipaakar ed Juda tan Jerusalem?

 SAKEY a manasibengbeng a bagyo so dinmapo ed sakey a matoon rehyon. Say maksil a dagem, biewbiew ya uran, tan say agus na pirmin delap so anesyang na maawang a lugar, nanggeray ed kaabungan, aneral ed tanetanem, tan anigway na saray bilay. Balet ag-abayag tinmunda la so bagyo, tan kasumpal to et dinmeen so kaliberliber. Parad saramay akaliktar, saman so panaon na panangipawil tan panagpaalagey lamet.

² Mipara itan ed ipapasakbay nen propetan Isaias nipaakar ed Juda tan Jerusalem. Saray lurem na bagyo na panangukom na Dios so makapataktakot a manasingger​—tan tekep na maabig a rason! Ambelat so kasalanan na nasyon. Namparan saray manuley tan say totoo so amano ed dalin na ag-inkahustisya tan panamatey. Panamegley nen Isaias, inwalwal nen Jehova so kasalanan na Juda tan amasakbay ya ipaakseb To so panangukom ed satan a bangar a nasyon. (Isaias 3:25) Say dalin na Juda so sigpot a mankibalatar bilang resulta na sayan bagyo. Satan a nagawa so peteg ya amaermen ed si Isaias.

3. Anton maong a balita so lugan na apuyanan a mensahe ed Isaias 4:2-6?

³ Balet walay maong a balita! Say bagyo na matunong a panangukom nen Jehova so onlabas, tan makaliktar so sakey a nakdaan. On, say panangukom nen Jehova ed Juda so atekepan na panangasi! Say pinuyanan a mensahe nen Isaias a nikurit ed Isaias 4:2-6 so onnenengneng ed sayan abenditon panaon. Satan so singa say agew ya ompepelnak ed benegan na saray lurem; say eksena so manguman manlapud saray nenengnengen tan tanol na panangukom​—a singa deneskribe ed Isaias 2:6–4:1​—a magmaliw a marakdakep ya apasimbalon dalin tan totoo.

4. Akin a nepeg tayon singbaten so propesiya nen Isaias nipaakar ed kipawil na sakey a nakdaan?

⁴ Say propesiya nen Isaias nipaakar ed kipawil na sakey a nakdaan tan say niwalan kaligenan da so walaan met na kasumpalan ed panaon tayo​—“say kaunoran a kabiangan na saray agew.” (Isaias 2:2-4, NW) Singbaten tayo pa iyan nipanpanaon a mensahe, lapud aglabat itan walaan na mapropetikon kabaliksan noagta ibabangat to itayo met nipaakar ed panangasi nen Jehova tan no panon tayon nagamoran itan bilang indibidual.

‘Say Pasisimiten nen Jehova’

5, 6. (a) Panon so impaneskribe nen Isaias ed maligen a panaon kayari ilabas na bagyo? (b) Anto so kabaliksan na terminon “simit,” tan anto so ipapatnag na saya nipaakar ed bansa na Juda?

⁵ Say paraan na panagsalita nen Isaias so nagmaliw a maligsa legan ton maniilalo ed mas maligen a panaon kayari na bagyo. Oniay insulat to: “Dia ed satan ya agew say simit [“pasisimiten,” paimano’d leksab na New World Translation] nen Jehova sikato naani malimgas tan magayaga, tan say bunga na dalin sikato naani mabmaabig tan marakep a nipaakar ed saray alegyas ed Israel.”​—Isaias 4:2.

⁶ Sasalambiten dia nen Isaias so nipaakar ed kipawil. Say Hebreon noun a nipatalos a “simit” so manutukoy ed ‘bengatlan onsisimit, sakey a sii, sakey a sanga.’ Satan so misiglaotan ed ibubulaslas, idaraak, tan panamendisyon a manlalapud si Jehova. Kanian inlitrato nen Isaias so nengneng na ilalo​—say manasingger lan pankibalatar so agmansiansia ed ando lan ando. Tekep na panamendisyon nen Jehova, say datin maaligwas a bansa na Juda so mamawala lamet na daakan a bunga. *​—Levitico 26:3-5.

7. Diad anton dalan a say pasisimiten nen Jehova et ‘magmaliw a parakep tan kagalangan’?

⁷ Angusar si Isaias na malinlinew iran termino pian deskribien so kalaknab na panamasimbalo a nagawa ed arapen. Say pasisimiten nen Jehova “sikato naani malimgas tan magayaga [“parakep tan kagalangan,” NW].” Say salitan “parakep” so mangipapanonot ed karakpan na Insipan a Dalin sanen inter nen Jehova itan ed Israel pigaran siglo ed asasakbay. Satan so marakdakep kanian impasen itan a “parakep [“mablin bato,” New American Bible] na amin a dalin.” (Ezequiel 20:6, NW) Saray salita nen  Isaias so mangipapaseguro sirin ed totoo a nipawil so bansa na Juda ed datin kagalangan tan karakpan to. Peteg a satan so magmaliw a koronan mablin bato ed dalin.

8. Siopa so wadman pian panggayagaan so nipawil a karakpan na bansa, tan panon so impaneskribe nen Isaias ed liknaan da?

⁸ Balet, siopa so wadman pian panggayagaan so nipawil a karakpan na bansa? “Saray alegyas ed Israel,” so insulat nen Isaias. On, walaray arum a makaliktar ed makapabaing a kadederal ya akadkauna lan impasakbay. (Isaias 3:25, 26) Sakey a nakdaan na saray akaliktar so ompawil ed Juda tan mibiang ed panangipawil ed satan. Para ed sarayan akapawil​—“saray akaliktar”​—say daakan a bunga na nipawil a dalin da so magmaliw a “mabmaabig tan marakep.” (Isaias 4:2, paimano’d leksab na New World Translation) Say kababaingan lapud impankibalatar so mangiter na dalan parad apasimbalon klase na gayaga.

9. (a) Bilang kasumpalan na saray salita nen Isaias, anto so agawa nen 537 K.K.P.? (b) Akin a nibaga a kaiba ed “saray akaliktar” iray arum a nianak legan na inkadakep? (Nengnengen so paimano’d leksab.)

⁹ Bilang kasumpalan na saray salita nen Isaias, sinmabi so bagyo na panangukom nen 607 K.K.P. sanen dineral na saray taga-Babilonia so Jerusalem tan atawtaw so dakel ya Israelita. Walaray akaliktar tan inawit a dinakep ed Babilonia, balet no aliwan lapud panangasi na Dios, anggapon balot komon iray akaliktar. (Nehemias 9:31) Diad saginonor, say Juda so sigpot a nankibalatar. (2 Awaran 36:17-21) Kayari na satan, nen 537 K.K.P., inabuloyan na Dios a mapangasi ‘iray akaliktar’ ya ompawil ed Juda pian ipawil so tuan panagdayew. * (Esdras 1:1-4; 2:1) Say impapuson panagbabawi na sarayan adakep ya akapawil so marakdakep a nibalikas ed Salmo 137, a nayarin nisulat legan na inkakautibo odino ag-abayag kayari na satan. Kasabi’d Juda sikara so nambaka tan nantanem. Molimolien pa no anto so nayarin alikna ra sanen anengneng dan bebendisyonan na Dios iray sagpot da, a pabubunaen to so dalin a singa say mabungan ‘tanamanan na Eden’!​—Ezequiel 36:34-36.

10, 11. (a) Diad anton dalan ya akautibo iray Estudyante na Biblia diad “Babilonia a Baleg” ed asasakbay na koma-20 a siglo. (b) Panon a benendisyonan nen Jehova iray nakdaan na espiritual ya Israelita?

¹⁰ Ontan met a panangipawil so nagagawa la ed panaon tayo. Diad asasakbay na koma-20 a siglo, saray Estudyante na Biblia, bilang tawag ed saray Tastasi nen Jehova ed saman, so akautibo ed espiritual a paraan diad “Babilonia a Baleg,” say sankamundoan ya empiryo na palson relihyon. (Apocalipsis 17:5) Anggaman impulisay da la so dakel a bangabangat na palson relihyon, saray Estudyante na Biblia so siansia nin mangaagamil na pigaran Binababilonian ideya tan agagamil. Bilang resulta na isusumpa ya insugsog na klero, arum ed sikara so literal a nipriso. Say espiritual a bansa ra​—say relihyoso, odino espiritual a kipapasen da​—so nankibalatar.

¹¹ Balet nen primabera na 1919, kinasian nen Jehova irayan nakdaan na espiritual ya Israelita. (Galacia 6:16) Naimano to so panagbabawi ra tan say pilalek dan manlingkor ed sikato ed katuaan, kanian imbulos tora manlapud literal ya inkipriso tan, lalon importante, manlapud espiritual ya inkakautibo. Sarayan “akaliktar” so nipawil ed inter-Dios a kipapasen da ed espiritual, a daakan ton pabubunaen. Sayan espiritual a kipapasen so angiparungtal na makaroyroyo tan marakep a nengneng, ya akaayat ed minilyon ya arum nin matakot ed Dios a totoo a miulop ed nakdaan diad tuan panagdayew.

12. Panon ya iyaalangon na saray salita nen Isaias so panangasi nen Jehova ed totoo to?

¹² Iyaalangon dia na saray salita nen Isaias so panangasi na Dios ed totoo to. Anggaman saray Israelita bilang sakey a nasyon so sinmumpa ed si Jehova, kinasian to iray nagbabawin nakdaan. Naligliwa itayo ed pakaamta ya anggan saramay seryoson nankasalanan so makapawil ed si Jehova tekep na ilalo. Saray nagbabawi so agnepeg a makaliknan agla ra kasian nen Jehova, lapud agto ipulisay so magbabawin puso. (Salmo 51:17) Ipapaseguro ed sikatayo na Biblia: “Si Jehova mapangasi tan magrasya, mabanayat a manpasnok tan daakan ed panangasi. Unong a say sake’ya ama abageyen to so saray anak to, ontan met nen Jehova abageyen to so saray ontakot ed sikato.” (Salmo 103:8, 13) Maseguron say ontan a mapangasin Dios so makanepegan na amin a dayew tayo!

Sakey a Nakdaan so Nagmaliw a Masanto ed si Jehova

13. Unong a nikurit ed Isaias 4:3, panon a deneskribe nen Isaias so nakdaan a kasian nen Jehova?

¹³ Nipaamta la’d sikatayo so nakdaan a kasian nen Jehova, balet natan et mas detalyadon dedeskribien ira nen Isaias. Oniay insulat to: “Nagawa, a say natilak ed Sion, tan say nakeraan ed Jerusalem, sikato naani natawag a santo, anggan balang sakey ni a nisulat ed saray mabilay [“parad bilay,” NW] dia ed Jerusalem.”​—Isaias 4:3.

14. Sioparay “natilak” tan “nakeraan,” tan akin a kasian ira nen Jehova?

¹⁴ Sioparay “natilak” tan “nakeraan”? Sikara imay akaliktar ya abitla ed inmunan bersikulo​—saray Judion nibantak a naabuloyan ya ompawil ed Juda. Natan et ipapanengneng nen Isaias no akin a kasian ira nen Jehova​—sikara so ‘magmaliw a masanto ed sikato.’ Say inkasanto so mankabaliksan na “inkalinis odino inkadalisay na relihyon; inkasagrado.” Say pagmaliw a masanto et lalanoren toy pagmaliw a malinis, odino dalisay, diad panagsalita  tan kakikiwas, pian makakapet ed estandarte nen Jehova ed no anto so susto tan manepeg. On, kasian nen Jehova iramay ‘masanto ed sikato,’ tan abuloyan to ran ompawil ed “masanto a syudad,” say Jerusalem.​—Nehemias 11:1.

15. (a) Say balikas a ‘nisulat parad bilay dia ed Jerusalem’ so mangipapanonot ed sikatayo na anton kustombre na saray Judio? (b) Anton seryoson pasakbay so ipapabitar na saray salita nen Isaias?

¹⁵ Kasin mansiansia iyan matoor a nakdaan diman? Sikaray ‘nisulat parad bilay dia ed Jerusalem,’ so insipan nen Isaias. Saya so mangipapanonot ed sikatayo ed kustombre na saray Judio a mangisisimpen na saray rehistro na saray pamilya tan tribu na Israel. (Nehemias 7:5) Say kirehistro et kabaliksan to a mabilay so sakey, lapud ta no say sakey a too so ompatey, say ngaran to so ekalen. Diad arum iran kabiangan na Biblia, nabasa tayo so piguratibon rehistroan, odino libro, a nankarga na kangaranan na saramay tumangan nen Jehova na bilay. Balet ta walaay kondisyon so inkisulat na kangaranan ed sayan libro, lapud sarag nen Jehova a “buralen” so kangaranan. (Exodo 32:32, 33; Salmo 69:28) Sirin, ipapatnag na saray salita nen Isaias so seryoson pasakbay​—saray akapawil so nayarin mantultuloy a manbilay diad nipawil a dalin da daput no sikaray mansiansia a masanto ed imaton na Dios.

16. (a) Anto so kakaukolanen nen Jehova ed saramay inabuloyan to ya ompawil ed Juda nen 537 K.K.P.? (b) Akin a nayarin nibagan makabkabaliksan so panangasi nen Jehova ed alanaan a nakdaan tan say “arum a karnero”?

¹⁶ Nen 537 K.K.P., say nakdaan a pinmawil ed Jerusalem so nanggawa ed satan tekep na malinis a motibo​—pian ipawil so tuan panagdayew. Anggapoy siopaman a naalisan na paganon relihyoson agagamil odino marutak a kondukta, a mapuersan impasakbay la nen Isaias, so walaan na kanepegan ya ompawil. (Isaias 1:15-17) Saraman labat so momoriaen nen Jehova a masanto so makapawil ed Juda. (Isaias 35:8) Mipadpara, manlapud inkibulos da ed espiritual ya inkakautibo nen 1919, say alanaan a nakdaan, a kaiba natan na minilyon ya “arum a karnero”​—saramay walaan na ilalo ya andi-anggaan a bilay diad dalin​—so nansagpot pian magmaliw a masanto ed imaton na Dios. (Juan 10:16) Inwaklit da iray Binababilonian bangat tan agagamil. Panggugunaetan na balang indibidual so mansiansia ed saray atagey ya estandarte na Dios ed moral. (1 Pedro 1:14-16) Makabkabaliksan so panangasi nen Jehova ed sikara.

17. Siopan kangaranan so isulat nen Jehova ed “libro na bilay” to, tan anto so nepeg a determinado tayon gawaen?

¹⁷ Tandaan ya inimano nen Jehova iramay masanto a walad Israel tan ‘insulat to so kangaranan da parad bilay.’ Ontan met natan, naiimano nen Jehova iray gunaet tayon magmaliw a malinis ed nonot tan laman legan tayon ‘ipapatnag so saray laman tayo a mabilay a bagat, masantos, makapaliket ed Dios.’ (Roma 12:1) Tan amin na saray manumbok ed ontan a kabibilay so inrekord na Dios ed “libro na bilay” to​—say piguratibon rekord a nankarga na kangaranan na saramay makaawat na andi-anggaan a bilay, balanglan diad tawen odino diad dalin. (Filipos 4:3; Malaquias 3:16) Kanian, gawaen tayo so anggaay nayarian tayo a mansiansian masanto ed imaton na Dios, diad ontan et napansiansia tayoy kangaranan tayo ed satan a mablin “libro.”​—Apocalipsis 3:5.

Sakey a Sipan na Maaron Panangasikaso

18, 19. Unong ed Isaias 4:4, 5, anton panaglinis so ipaakseb nen Jehova, tan panon iyan nasumpal?

¹⁸ Sinmublay ya impanengneng nen Isaias no panon a saray manaayam ed nipawil a bansa so magmaliw a masanto tan no antoran bendisyon so manatalaran ed sikara. Oniay inkuanto: “Sano say Katawan inurasan to so dutak na saray anak a bibii na Sion, tan ginogolan to so dala na Jerusalem a manlapu ed pegley to, lapu ed panamegley na espiritu na inkatunong, tan lapu ed panamegley na espiritu na panamool. Et si Jehova palsaen to ed tapew na amin a panag-ayaman ed palandey na Sion, tan ed tapew na saray tipon to, so lurem tan asewek ed agew, tan say liwawa na mandarlang ya apoy ed labi; ta dia ed tapew na amin a gayaga ombuskag so sakbong.”​—Isaias 4:4, 5.

¹⁹ Antis na satan et binaat nen Isaias iray “anak a bibii na Sion,” a say inkabulok da ed moral so niyamot ed loob na saray mapangtan adorno ra. Inwalwal to met so inkalapagan ya impankasalanan na totoo ed dala, a pinaseseg toran linisan so inkasikara. (Isaias 1:15, 16; 3:16-23) Balet dia, pirawrawat to so panaon sano ‘naurasan la’ na Dios a mismo so “dutak,” odino inkarutak ed moral, tan ‘nalinisan iray mantsa na dala.’ (Isaias 4:4, New International Version) Panon a nipaakseb iyan panaglinis? Diad panamegley na “espiritu na inkatunong” tan diad panamegley na “espiritu na panamool.” Say onsasabin kadederal na Jerusalem tan say kibantak ed Babilonia so magmaliw a basig na panangukom tan mandarlang a sanok na Dios ed marutak a nasyon. Say nakdaan a makaliktar ed sarayan kalamidad tan makapawil ed bansa ra so apaulimek tan agogolan. Satan so rason no akin a nagmaliw iran masanto ed si Jehova tan angawat na panangasi.​—Ikompara so Malaquias 3:2, 3.

20. (a) Panonot ed anto iray balikas a “lurem,” “asewek,” tan “mandarlang ya apoy”? (b) Akin a saray alinisan a nibantak so agkaukolan ya ontakot?

²⁰ Insipan nen Jehova panamegley nen Isaias a maaron asikasoen to iyan alinisan a nakdaan. Saray balikas a “lurem,” “asewek,” tan say “mandarlang ya apoy” so panonot ed no panon ya inasikaso nen Jehova iray Israelita kayari na intaynan da ed Ehipto. Sinalimbengan ira na ‘lusek ya apoy tan lurem’ manlapud saray manguusil ya Ehipsio; satan met so angiwanwan ed sikara diad kalawakan.  (Exodo 13:21, 22; 14:19, 20, 24) Sanen impatnag nen Jehova so inkasikato diad Palandey Sinai, say palandey so ‘asigpot ed asewek.’ (Exodo 19:18) Saray alinisan a nibantak, sirin, so agla kaukolan ya ontakot. Si Jehova so Mananalimbeng da. Sikatoy wala ed sikara balanglan manlilimog ira ed mismon kaabungan da odino mantitipon ed masanto iran kombension.

21, 22. (a) Anton maslak a gagala so pangipapaalagey ed sakey a kobongkobong odino alolong? (b) Anton ilalo so nitarya ed say alinisan a nakdaan?

²¹ Sinumpal nen Isaias so deskripsion to ed pananalimbeng na Dios diad impangiyapasakey ed inagew-agew a kabibilay. Oniay insulat to: “Wala naani kobongkobong a nipaakar a sirum ed agew dia ed petang, tan nipaakar ed apireng tan nipaakar a sakbong ed bagyo tan uran.” (Isaias 4:6) Say kobongkobong, odino alolong, so maslak ya ipapaalagey diad sakey ya ubasan odino diad uma pian mangitarya na kakaukolanen a tuloy a sirum manlapud ampetang ya agew na tiagew tan manlapud betel tan saray bagyo sano mamauran.​—Ikompara so Jonas 4:5.

²² Sano nipapaarap ed makaatong a petang na panamasegsegang tan saray bagyo na isusumpa, si Jehova so nailaloan na alinisan a nakdaan bilang say Lapuan na proteksion, kaligenan, tan salimbeng da. (Salmo 91:1, 2; 121:5) Kanian sakey a marakep ya ilalo so nitarya ed sikara: No italirak da so marutak a sisisiaen tan agagamil na Babilonia, manpasakop ed panaglinis na panangukom nen Jehova, tan manggunaet a mansiansian masanto, sikara so mansiansian maligen, a singano wala ra ed “kobongkobong” na pananalimbeng na Dios.

23. Akin a benendisyonan nen Jehova so alanaan a nakdaan tan saray kaulop da?

²³ Imanoen ya unona nin nagawa so panaglinis, insan saray bendisyon. Saya so apaneknekan a tua ed panaon tayo. Nen 1919 say alanaan a nakdaan so mauyamon nampasakop pian nagogolan, tan “inurasan” nen Jehova so karutakan da. Manlapud saman, inabuloyan met na “baleg ya ulop” na arum a karnero so inkasikara a linisan nen Jehova. (Apocalipsis 7:9) Kayarin alinisan, say nakdaan tan saray kakaiba ra so abendisyonan​—sinalimbengan tan inasikaso ira nen Jehova. Agto mamilagron aamperen so petang na panamasegsegang odino saray bagyo na isusumpa a manedetdet ed sikara. Balet peteg a sasalimbengan tora, a singa mangipapaalagey ed uloan da na ‘kobongkobong a siruman tan sakbong ed bagyo.’ Panon?

24. Panon a mapatnag a benendisyonan nen Jehova so totoo to bilang sakey ya organisasyon?

²⁴ Konsideraen pa iya: Arum ed saray sankamakapanyarian a gobierno ed awaran so anebel ed panagpulong a kimey na saray Tastasi nen Jehova odino sikaray sinali ran simuten. Ingen ta nansiansian mapekder iray Tastasi tan nantultuloy iran nampulong! Akin ya ag-apatunda na saray makapanyarin nasyon so kimey na sayan melmelag tan singano agmakayarin grupo na totoo? Lapud inyan nen Jehova iray malinis a lingkor to ed sakey a “kobongkobong” na salimbengan ya agnaderal na anggan siopan too!

25. Antoy kabaliksan parad sikatayo bilang indibidual a si Jehova so Mananalimbeng tayo?

²⁵ Komusta itayo bilang indibidual? Anggaman si Jehova so Mananalimbeng tayo, agto labay ya ibaga ya andian tayo lay problema ed bilay ed sayan sistema na bengabengatla. Dakel iray matoor a Kristiano a nidunget ed pirmin kairapan, a singa say inkapobri, natural iran kalamidad, bakal, sakit, tan ipapatey. Sano nipapaarap ed ontan iran gonigon, agtayon balot lilingwanan a say Dios so ontulong ed sikatayo. Sasalimbengan to itayo ed espiritual a paraan, ya itatarya to so pankaukolan tayo​—anggan “say sankatageyan ya inkabaleg na pakayari”​—pian matoor a nasungdoan iray subok. (2 Corinto 4:7) Maligen itayo lapud kiwawala to kanian agtayo kaukolan so ontakot. Amta tayo, a no gagawaen tayo so anggaay nayarian tayo a mansiansian masanto ed imaton to, anggapo so ‘makapangisian ed sikatayo manlapud aro na Dios.’​—Roma 8:38, 39.

[Saray paimano ed leksab]

[Tepetepet Parad Panagaral]