Propesiya nen Isaias​—Liwawa Parad Amin a Katooan I

Katuloyan na Kapitulo Siete

Abagey la so Agmatoor ya Ubasan!

Say Bayar na Inkaagum

17. Anton mauges a kondukta so kinondena nen Isaias ed ununan abagey?

¹⁷ Diad bersikulo 8, si Isaias so agla mangaaon ed saray salita nen Jehova. Bilang pangokondena ed pigara ed saray “balang ya ubas” ya apawala ed Juda, personal ton inyabawag so inmuna ed anemiran abagey: “Abagey la so saray manangisuldong na abung tan abung, saray mangigaton na uma ed uma, angga ed anggapo so pasen, tan nagawa kayo a manayam a bukbukor dia ed pegley na dalin. Dia ed saray layag ko, kuan nen Jehova na saray ehersito, ed katuaan dakel so saray abung a kibalatar, baleg man tan maong, ya anggapo so manayam. Ta samplora ya akre na ubasan mangiter na sakey a bat, tan sakey a homer a bini mangiter lambengat na sakey efa.”​—Isaias 5:8-10.

18, 19. Panon ya imbaliwala na saray kapanaonan nen Isaias iray ganggan nen Jehova nipaakar ed kayarian, tan anto so magmaliw a resulta na satan parad sikara?

¹⁸ Diad Israel nensaman, amin a dalin so peteg a kien nen Jehova. Balang pamilya so walaan na inter-Dios a tawir, a nayarian dan ipaabang odino iprenda balet agbalot nilako “ed ando lan ando.” (Levitico 25:23, NW) Sayan ganggan so angamper ed saray panangabuso, a singa say pangayarian na sakey a too odino grupo ed saray lote tan abung. Satan met so analimbeng ed saray pamilya pian agnidetdet a nagkalalo ed inkaduka. Balet, saray arum diad Juda so maagum ya anumlang ed saray ganggan na Dios nipaakar ed kayarian. Insulat nen Miqueas: “Managum ira na saray uma, tan samsamen da ra; tan saray abung, et ekalen da ra; et aposan da so too tan say abung to, say too tan say tawir to ni.” (Miqueas 2:2) Balet impasakbay na Uliran 20:21: “Say tawir narandan a maganggano ed gapo: balet say sampot to agnaani mapalar.”

¹⁹ Insipan nen Jehova ya ekalen to ed sarayan maagum iray agamoran da diad panagsaol. Saray abung a sinamel da et “anggapo so manayam” naani. Saray dalin ya inaguman da so manbunga na samet labat nen say nayarian na satan. Ag-asalambit no panon tan kapigan eksakton nasumpal iyan ayew. Anggan panon et nayarin ontukoy itan ed saray kipapasen ya itarok na arapen a kibantak diad Babilonia.​—Isaias 27:10.

20. Panon a napaliisan na saray Kristiano natan so pangalig ed maagum ya awawey ya impatnag na arum diad Israel?

²⁰ Nakaukolan a gulaen na saray Kristiano natan so alablabas ya inkaagum a singa impatnag na arum iran Israelita nensaman. (Uliran 27:20) No saray materyal a bengatla so ikdan na sobsobran importansia, mainomay so isuko ed andiay-prinsipyo iran paraan pian manpayaman. Say sakey so mainomay a napatitan ed makapainap iran transaksion ed negosyo odino agrealistiko iran pakanan iyaman-a-tampol. “Say maganat ya onyaman aliwa naani ya agnadusa.” (Uliran 28:20) Agaylan makana sirin so pankontento ed no anto so wala ed sikatayo!​—1 Timoteo 6:8.

Say Patit na Kuestionablin Panligliwaan

21. Antoran kasalanan so kinondena ed komaduan abagey ya imbalikas nen Isaias?

²¹ Insan sinmublay so komaduan abagey ya imbalikas nen Isaias: “Abagey la so saray ombangon a masaksakbay ed kabuasan, pian ontumbok ira ed mabayani ya iinumen; a manpainawa ra a nataraw ed labi, angga ed say alak parlangen tora! Et say arpa tan say viola, say pandereta tan say tolali, tan alak, wala ra ed saray panliket da; balet agda imatleken so gawa nen Jehova, agda met umamengen so panagkimey na saray lima to.”​—Isaias 5:11, 12.

22. Anton kakulangan na dangka so apatnagan ed Israel, tan anto so magmaliw a resulta para ed nasyon?

²² Si Jehova so “maliket a Dios” tan agto ikikibot ed saray lingkor to so makatunongan a panligliwaan. (1 Timoteo 1:11, NW) Bangbalet, pinalakbatan na sarayan manaanap na liket so amin iran limitasyon! Inkuan na Biblia a “saray nabuek, nabuek ira ed labi.” (1 Tesalonica 5:7) Balet saray buanges unong ed sayan propesiya so mangigapo ed panbuek da diad kapelnak na agew tan mantultuloy so paninuman da angga ed labi! Onkikiwas ira a singano anggapo so Dios, a singa ag-ira mikuentaan ed sikato lapud saray kiwas da. Impasakbay nen Isaias so mauddiem ya arapen na saratan. “Say baley ko onla ra ed inkadakep lapu ed kakulangan na pikakabat; et saray angkabli ra a totoo naerasan ira, tan saray karaklan da naekatan ira ed paga.” (Isaias 5:13) Lapud agda labay so onkiwas unong ed tuan pikakabat, say totoon akisipanan ed Dios​—say atagey tan  say abeba​—so onleksab ed Sheol.​—Basaen so Isaias 5:14-17.

23, 24. Anton panangontrol tan inkasimbang so kakaukolanen ya ipatnag na saray Kristiano?

²³ Saray “panagbuanges” odino “garambasal iran panliliket,” so sakey met a problema diad limog na arum a Kristiano nen inmunan siglo. (Galacia 5:21; Byington; 2 Pedro 2:13) Kanian agpankelawan ya arum iran dedikadon Kristiano natan so angipatnag na makapuy a pakatebek no nipaakar ed sosyal iran panlilimog. Say agnakontrol a panangusar na de-alkohol iran iinumen so nanggawa’d saray arum a maingal tan maneyag-eyag. (Uliran 20:1) Wala ni ingen iramay kinmiwas ya imoral sanen walad impluensya na sobran alkohol, tan saray arum a pantitipon so aabuloyan a mansanlabi lawari, a mangaapekta ed saray Kristianon aktibidad diad ontumbok ya agew.

²⁴ Balet, saray balansin Kristiano so mamapawala na saray maridios a bunga tan mangaagamil na panangontrol tan inkasimbang diad panagpili ra na panligliwaan. Tatalinengen da so simbawa nen Pablo a naromog ed Roma 13:13: “Manakar itayo a masimpit a singa dia ed agew; aliwa a dia ed kasibaan tan panagbuanges.”

Gulaen so Kasalanan tan Aroen so Katuaan

25, 26. Anton mauges a kanonotan na saray Israelita so inwalwal nen Isaias ed komatlo tan komapat ya abagey ya imbalikas to?

²⁵ Dengelen natan so komatlo tan komapat ya abagey ya imbalikas nen Isaias: “Abagey la so saray manguyor na inkauges ed saray lubir na inkatila, tan kasalanan a singa guyoran na galosa; a kuan da, Masiglat komon, ganatan to komon so gawa to, pian sikato so nanengneng tayo; et say simbawa na Santo na Israel onasingger komon tan onsabi, pian sikato so naamtaan tayo! Abagey la so saray manawag na mauges ed maong, tan maong ed mauges; ya iyan da so kabilungetan a panagkaliwawa, tan say liwawa a panagkabilunget; ya iyan da so ampait a panagkamasamit, tan say masamit a panagkaampait!”​—Isaias 5:18-20.

²⁶ Agaylan malinew a panangilitrato ed saray mangaagamil na kasalanan! Sikaray akakabit ed kasalanan a singa saray insentan ayep a mangiguguyor ed saray kariton. Sarayan managkasalanan so ag-ontatakot ed antokaman ya onsabin agew na panangukom. Sikaray manmudmoran mangikuan: “Ganatan [na Dios] komon so gawa to!” Imbes a manpasakop ira ed Ganggan na Dios, pipikeweten da iray bengatla, ya ikuan dan ‘mauges so maong tan maong so mauges.’​—Ikompara so Jeremias 6:15; 2 Pedro 3:3-7.

27. Panon a napaliisan na saray Kristiano natan so awawey a singa ed saramay Israelita?

²⁷ Nepeg a paliisan na saray Kristiano natan so ontan ya awawey antokaman iray kipapasen. Alimbawa, agda sinayakup so panmoria na mundo a say pilalawanan tan homoseksualidad so naabobonan. (Efeso 4:18, 19) Tua, say sakey a Kristiano so nayarin ‘makapanggawa na lingon kundang’ a nayarin mangitonton ed seryoson pakapankasalanan. (Galacia 6:1, NW) Akaparaan iray matatken ed kongregasyon pian tulongan iramay akapankasalanan tan mankaukolan na tulong. (Santiago 5:14, 15) Diad tulong na saray pikakasi tan nibase’d-Biblia a konseho, say espiritual ya iyaabig so posibli. No andi, wadtan so peligron pagmaliw ya “aripen na kasalanan.” (Juan 8:34) Imbes a mudmoraen so Dios tan nalibangan so onsasabin agew na panangukom, panggugunaetan na saray Kristiano so mansiansian ‘ag-amatikan tan arumsisan’ ed arap nen Jehova.​—2 Pedro 3:14; Galacia 6:7, 8.

28. Antoran kasalanan so kokondenaen na unor iran abagey ya imbalikas nen Isaias, tan panon a napaliisan na saray Kristiano natan so ontan iran kasalanan?

²⁸ Matukotukoy, inyarum nen Isaias irayan unor ya abagey: “Abagey la so saray makabat ed saray dili a mata ra, tan saray mabinta ed dili a pakanengneng da! Abagey la so saray makapanyari ya oninum na alak, tan saray totoo a mabiskeg a manlaok na mabayani ya inumen; a patunongen da so marelmeng nipaakar ed panuksok, tan ekalen da so inkatunong na matunong a manlapu ed sikato!” (Isaias 5:21-23) Ompatnag a sarayan salita so nipaarap ed saramay manlilingkor bilang ukom ed bansa. Papaliisan na saray mamatatken ed kongregasyon natan so ompatnag a “makabat ed saray mismon mata ra.” Mapaabeban aawaten da iray simbawa manlapud kapara ran mamatatken tan maapit ya ontutumbok ed saray instruksion na organisasyon. (Uliran 1:5; 1 Corinto 14:33) Sikaray asimbang ed panangusar da na de-alkohol iran iinumen, ag-iran balot oniinum antis dan gawaen iray responsabilidad da ed kongregasyon. (Oseas 4:11) Papaliisan met na saray mamatatken so anggan say singa pangipanengneng na paboritismo. (Santiago 2:9) Agaylan pidumaan ed klero na Kakristianoan! Sasakbungan na dakel ed saraya iray maimpluensya tan mayaman iran managkasalanan diad utel da, a direktan midumaan ed saray pasakbay nen apostol Pablo diad Roma 1:18, 26, 27; 1 Corinto 6:9, 10; tan Efeso 5:3-5.

29. Anton makadesyang a pansumpalan so manatalaran ed Israelitan ubasan nen Jehova?

²⁹ Sinampotan nen Isaias iyan mapropetikon mensahe diad impaneskribe ed makadesyang a pansumpalan na saramay ‘angiwaklit ed tunong nen Jehova’ tan agnambunga na matunong a bunga. (Isaias 5:24, 25; Oseas 9:16; Malaquias 4:1) Oniay inyabawag to: “Mangipaalagey naani [si Jehova] na tanda na saray nasyon [“sakey a baleg a nasyon,” NW] a manlapu ed arawi, tan  ngisiwan to ra a manlapu ed sampot na dalin; et nia, ondago ra naani a tampol a magangganat.”​—Isaias 5:26; Deuteronomio 28:49; Jeremias 5:15.

30. Siopa so manugyop na “sakey a baleg a nasyon” sumpad totoo nen Jehova, tan tekep na anton pansumpalan?

³⁰ Nensaman a panaon say poste ed nipukdol a lugar so nayarin onkana bilang “tanda,” odino sentron pantutugyopan, na totoo odino saray armada. (Ikompara so Isaias 18:3; Jeremias 51:27.) Natan et tugyopen nen Jehova a mismo iyan ag-angaranan a “baleg a nasyon” pian ipaakseb so panangukom to. * ‘Ngisiwan to itan,’ salanti, pian naimano na satan so matungangan totoo to bilang bengatlan makanepegan na pangonkesta. Sinmublay a deneskribe na propeta so maples tan makapataktakot ya ilusob na sarayan singa-leon a manangonkesta a ‘manekmel ed samsam,’ salanti, say nasyon na Dios, “tan sikato so itaynan da ya agnaano” diad inkakautibo. (Basaen so Isaias 5:27-30a.) Tan agaylan makapasinagem a nansumpalan parad dalin na totoo nen Jehova! “Say sakey onnengneng ed dalin, nia, so kabilungetan tan kaermenan; et say liwawa ombilunget ed saray lurem to.”​—Isaias 5:30b.

31. Panon a napaliisan na saray tuan Kristiano so panirap ed dusan impaakseb ed Israelitan ubasan nen Jehova?

³¹ On, say ubasan a maaron intanem na Dios so apaneknekan a naklangan​—makanepegan labat na kadederal. Agaylan mabiskeg a leksion so tarok na saray salita nen Isaias parad amin a mandadayew ed si Jehova natan! Komon ta pampelengan da so manbunga na anggapoy arum noag say matunong a bunga, diad kirayewan nen Jehova tan dilin kililiktar da!

[Paimano ed leksab]

[Tepetepet Parad Panagaral]