Kasin Onabot ed Sikayo so Bendisyon nen Jehova?
Kasin Onabot ed Sikayo so Bendisyon nen Jehova?
“Amin na sarayan bendisyon so onsabi tan onabot ed sika no mantultuloy kan ontalineng ed boses nen Jehova a Dios mo.”—DEUTERONOMIO 28:2, NW.
1. Anto so pakadeterminaan no kasin makagamor iray Israelita na saray bendisyon odino aye-ayew?
SANEN mansampot la so 40-taon a panteteyengteyeng da ed kalawakan, nankampamento iray Israelita diad Patar na Moab. Banbantagen da la so Insipan a Dalin. Insulat ed saman nen Moises so libro na Deuteronomio, a mangilalaktip ed nantutumbokan a bendisyon tan ayew. No ‘mantultuloy ya ontalineng so totoo na Israel ed boses nen Jehova’ diad pangunor ed sikato, saray bendisyon so “onabot” ed sikara. Pinabpabli ira nen Jehova bilang “nikadkaduman kayarian” to tan kaliktan ton ipatnag so pakapanyari to nisesengeg ed sikara. Balet no ag-ira mantultuloy ya ontalineng ed sikato, maseguron onsabi ed sikara so aye-ayew.—Deuteronomio 8:10-14; 26:18; 28:2, 15.
2. Anto so kabaliksan na saray Hebreon verb a nipatalos a ‘mantultuloy ya ontalineng’ tan “onabot” diad Deuteronomio 28:2?
2 Say Hebreon verb a nipatalos a ‘mantultuloy ya ontalineng’ diad Deuteronomio 28:2 so mankabaliksan na tuloytuloy ya ikiwas. Say totoo nen Jehova so kaukolan ya aglambengat sagpaminsan ya ontalineng ed sikato; sikara so nepeg ya ontalineng ed sikato diad amin a panaon. Onsabi labat ed sikara iray bendisyon no ontan so gawaen da. Say Hebreon verb a nipatalos ya “onabot” so apekderan bilang uusaren a termino diad panag-anop a mabetbet a mankabaliksan na “usilan” odino “aboten.”
3. Panon tayon naalig si Josue, tan akin a makanakana itan?
3 Say Israelitan lider a si Josue so tinmalineng ed si Jehova kanian agamoran toray bendisyon. Oniay kuan nen Josue: “Manpili kayo ed sayan agew no siopa so panlingkoran yo . . . Nipaakar ed siak tan say abung ko, manlingkor kami ed Jehova.” Diad impakadngel da ed satan, oniay inyebat na totoo: “Arawi pa komon a manlapu ed sikami ya ikaindan mi si Jehova, pian manlingkor kami ed saray arum a dirios.” (Josue 24:15, 16) Lapud maabig ya awawey nen Josue, sikato so kaiba ed pigpigaran kailalakan to ya apribilihyoan a makaloob ed Insipan a Dalin. Natan et ngalngali tayo la onloob ed mas matalonggaring nen say Insipan a Dalin—diad paraison dalin a mas daakan iray bendisyon nen say diad panaon nen Josue ya akatarya parad amin ya aabobonan na Dios. Kasin onabot ed sikayo iratan a bendisyon? On, no mantultuloy yon talinengen si Jehova. Pian ombiskeg so determinasyon yon manggawa ed satan, konsideraen so awaran na nasyon na kadaanan ya Israel ontan met ed makaibangat iran alimbawa na indibidual.—Roma 15:4.
Bendisyon Odino Ayew?
4. Bilang ebat ed pikakasi nen Solomon, anto so impalabo na Dios ed sikato, tan anto so liknaan tayo nipaakar ed saratan a bendisyon?
4 Legan na intero lawarin uley nen Arin Solomon, akaawat iray Israelita na nikadkaduma iran bendisyon manlapud si Jehova. Nanggayagaan da so kaligenan tan maong iran bengatla diad daakan a paraan. (1 Arari 4:25) Bantog so nipaakar ed kayamanan nen Solomon, anggaman agto kinmerew ed Dios na materyal iran kayamanan. Imbes, sanen kalangweran ni tan andiay eksperiensya, say impikasi to et say pakawalaan na matulok a puso—kerew ya inter nen Jehova diad impamalabo ed sikato na kakabatan tan pakatalos. Saya so akatulong ed si Solomon a manhusga ed totoo diad dugan paraan, a natetebek to so maong tan mauges. Anggaman sikatoy inikdan met na Dios na kayamanan tan gloria, bilang kalangweran et pinablin tuloy nen Solomon so matalonggaring a balor na saray espiritual a kayamanan. (1 Arari 3:9-13) Balanglan daakan itayo ed materyal a paraan odino andi, agaylay pisasalamat tayo no panggayagaan tayo so panamendisyon nen Jehova tan mayamyaman itayo ed espiritual!
5. Anto so agawa sanen agnantultuloy a tinmalineng so Israel tan Juda ed si Jehova?
5 Agnipatnag na saray Israelita so panamabli ed panamendisyon nen Jehova. Lapud ag-ira nantultuloy a tinmalineng ed sikato, inmabot ed sikara so nipasakbay ya aye-ayew. Saya so nanresulta ed impangonkesta na saray kakabusol da tan inkaderal na saray manaayam ed Israel tan Juda. (Deuteronomio 28:36; 2 Arari 17:22, 23; 2 Awaran 36:17-20) Kasin aderya so totoo na Dios ed satan ya impanirap da, a saray bendisyon na Dios so inmabot labat ed saraman so nantultuloy a tinmalineng ed si Jehova? Saray Judion nakdaan a pinmawil ed binalegan dan dalin nen 537 K.K.P. so awalaan na pankanawnawan mangipatnag no kasin walaan ira na “puso na kakabatan” tan atebek da ed saman so pankaukolan a mantultuloy ya ontalineng ed Dios.—Salmo 90:12.
6. (a) Akin ya imbaki nen Jehova si Aggeo tan si Zacarias pian manpropesiya ed totoo to? (b) Anton prinsipyo so inyilustra na mensahe na Dios panamegley nen Aggeo?
6 Saray akapawil a Judio so angipaalagey na sakey ya altar tan ginapoan dan apigeren so templo diad Jerusalem. Balet sanen linmesa so mabiskeg ya isusumpa, tinmayer so seseg da tan tinmunda so panagpaalagey. (Esdras 3:1-3, 10; 4:1-4, 23, 24) Inyuna da met la iray personal a pakainawaan da. Kanian imbaki na Dios iray propetan si Aggeo tan si Zacarias pian bilayen lamet so seseg na totoo to parad tuan panagdayew. Oniay inkuan nen Jehova panamegley nen Aggeo: “Sikato ta so panaon a nipaakar ed sikayo lanlamang pian manayam kayo ed saray abobedaan ya abung yo ra, leleg a saya ya abung [a panagdayewan] sikato so mankibalatar? . . . Isipen yo so [“iteen yoy kapusoan yo ed,” NW] saray dalan yo. Sikayo nantanem kayo na dakel et daiset so niloob yo; mangan kayo, balet agkayo napesel; . . . et saman so makagamor na up-upa gamoran to so up-upa pian sikato so ‘yan to ed supot a botbot.” (Aggeo 1:4-6) Say pangisakripisyo ed espiritual iran interes pian nagegemtan so materyal iran bentaha so agmanresulta ed panamendisyon nen Jehova.—Lucas 12:15-21.
7. Akin ya imbaga nen Jehova ed saray Judio ya: “Iteen yo so kapusoan yo ed saray dalan yo”?
7 Lapud nigalet la ra ed inagew-agew iran kapagaan, alingwanan la na saray Judio a nagamoran da iray bendisyon na Dios diad nengneng na uran tan mabungan tiempo daput no mantultuloy ira ya ontulok ed Dios, anggaman ed isusumpa. (Aggeo 1:9-11) Agaylan matukoy sirin so panamaseseg ya: “Iteen yoy kapusoan yo ed saray dalan yo”! (Aggeo 1:7, NW) Singa onia so imbaga nen Jehova ed sikara: ‘Isipen yo! Nengneng yo so siglaotan na maapan kimey diad saray uma tan say impankibalatar na abung kon panagdayewan.’ Saray impuyan a salita na saray propeta nen Jehova so anenyeg a siansia ed kapusoan na saray dumerengel da, lapud intuloy na totoo so kimey da ed templo, a sinumpal da itan nen 515 K.K.P.
8. Anto so insimbawa nen Jehova ed saray Judio nen panaon nen Malaquias, tan akin?
8 Saginonor, diad panaon nen propeta Malaquias, ginmapo lamet a tinmayer iray Judio diad espiritual a paraan, ya angiyapay nira ingen na agmakapaliket a bagbagat ed Dios. (Malaquias 1:6-8) Kanian sikara so sinimbawa nen Jehova a mangiyakar ira na amin a kakaplo ed kamalir, pian wala so tagano ed abung to tan sikatoy salien da noag to naani lukasan ed sikara iray pinto na tawen, et ikalbo to naani ed sikara so sakey a bendisyon. (Malaquias 3:10) Agaylan makulangkulang iray Judio ta say pansasagpotan da et saray mismon bengatlan ipagamor na Dios ed sikara a daakan no mantultuloy labat iran ontalineng ed boses to!—2 Awaran 31:10.
9. Usisaen tayo so kabibilay na sioparan taloran indibidual a nikurit ed Biblia?
9 Nilikud ed impangipresenta ed awaran na nasyon na Israel, inkurit na Biblia so nipaakar ed kabibilay na dakel ya indibidual ya akagamor na saray madibinon bendisyon odino aye-ayew, depende no nantultuloy iran tinmalineng ed si Jehova odino andi. Imanoen tayo no anto so naaralan tayo manlapud talora ed sikara—si Boaz, Nabal, tan Ana. Nipaakar ed saya, nayarin labay yon basaen so libro na Rut ontan met ed 1 Samuel 1:1–2:21 tan 1 Samuel 25:2-42.
Si Boaz so Tinmalineng ed Dios
10. Anto so pamparaan di Boaz tan Nabal?
10 Anggaman agmankapanaonan si Boaz tan Nabal, wala so pigaran bengatla a pampadparaan da. Singa bilang, sarayan lalaki so nanayam ed dalin na Juda. Mayaman irayan makandalin, tan pareho iran walaan na nikaduman pankanawnawa pian ipatnag so maaron-panangasi ed siopaman a mankaukolan. Balet saratan labat so pamparaan da.
11. Panon ya impatnag nen Boaz a sikatoy nantultuloy a tinmalineng ed si Jehova?
11 Nambilay si Boaz ed panaon na saray uko-ukom na Israel. Intrato to so arum tekep na respeto, tan saray managani to so walaan na baleg a respeto ed sikato. (Rut 2:4) Bilang katutulok ed Ganggan, sineguro nen Boaz a walay natilak a totodtoren diad uma to parad saray maniirap tan pobri. (Levitico 19:9, 10) Anto so ginawa nen Boaz sanen naamtaan to so kipapasen nen Rut tan si Noemi tan naimatonan to so inkakuli nen Rut a manlegpet ed akulaw lan katulangan to? Nikadkaduman konsiderasyon so impanengneng to ed si Rut tan ingganggan to ed totoo to a sikatoy pantodtoren da ed uma to. Diad saray salita tan maaron ginawa to, imparungtal nen Boaz a sikato so maespiritual a too ya ontatalineng ed si Jehova. Kanian agamoran to so pabor tan bendisyon na Dios.—Levitico 19:18; Rut 2:5-16.
12, 13. (a) Panon ya impanengneng nen Boaz so aralem a respeto parad ganggan nen Jehova nipaakar ed panaliw-lamet? (b) Antoran bendisyon na Dios so sinmabi ed si Boaz?
12 Say sankatalonggaringan ya ebidensya a nantultuloy si Boaz a tinmalineng ed si Jehova et say mabulbulos ya inkiwas to unong ed ganggan na Dios a panaliw-lamet. Ginawa nen Boaz so amin a nayarian to pian nipaseguro a say tawir na kanayon ton si Elimelec, say inatey lan masiken nen Noemi, so mansiansia ed pamilya nen Elimelec. Panamegley na ‘pangasawa bilang bayaw,’ say abalo so miasawa ed sankaasinggeran a kanayon na inatey lan masiken to ta pian say nailalak da so pangipudiran na tawir. (Deuteronomio 25:5-10, NW; Levitico 25:47-49) Impresenta nen Rut so inkasikato a miasawa bilang kasandi nen Noemi, ya agla onanak. Sanen agtinmulong ed si Noemi so maapit a kanayon nen Elimelec, si Rut so inala nen Boaz bilang asawa to. Say ilalak dan si Obed so impasen ya ilalak nen Noemi tan nagmaliw a legal a tomatawir nen Elimelec.—Rut 2:19, 20; 4:1, 6, 9, 13-16.
13 Inmabot ed si Boaz so daakan a bendisyon lapud mabulbulos ya intulok to ed ganggan na Dios. Panamegley na ilalak dan si Obed, sikato tan si Rut so abendisyonan na pribilehyo a magmaliw ya inmuunan ateng nen Jesu-Kristo. (Rut 2:12; 4:13, 21, 22; Mateo 1:1, 5, 6) Manlapud mabulbulos iran gawa nen Boaz, naaralan tayo ya onsabi iray bendisyon ed saramay mangipanengneng na aro ed arum tan onkikiwas a mitunosan ed saray kakaukolanen na Dios.
Agtinmalineng si Nabal
14. Anton klase na too si Nabal?
14 Midumaan ed si Boaz, agtinmalineng si Nabal ed si Jehova. Sinumlang to so ganggan na Dios a: “Nepeg mo ya aroen so kaparam a too unong ed sikan dili.” (Levitico 19:18) Si Nabal et aliwan maespiritual a too; sikato so “maramsak tan mauges ed saray gawa to.” Anggan saray aripen ton lalaki so manmoria ed sikato bilang “mauges a too.” Matukotukoy, say ngaran to a Nabal et mankabaliksan na ‘bagel,’ odino “makulangkulang.” (1 Samuel 25:3, 17, 25) Kanian panon so ikiwas nen Nabal sano walay pankanawnawa ton kasian so sakey a mankaukolan—si David, say nilanaan nen Jehova?—1 Samuel 16:13.
15. Panon so impantrato nen Nabal ed si David, tan panon a midumaan si Abigail ed masiken to nipaakar ed satan?
15 Sanen nankampamento si David tan saray bataan to diad panagpastolan ed saray pulok nen Nabal, sikara so kinmana a proteksion manlapud saray onlulubak ya ulop, ya ag-ira kinmerew na kasalat. “Sikara nensaman so bakor ed sikami a nampadpara ed labi tan agew,” so kuan na saray managpastol nen Nabal. Balet sanen kinmerew na daiset a tagano iray ibabaki nen David, “sikara so minudmora” nen Nabal tan pinaalis toran pauy-paoy. (1 Samuel 25:2-16) Si Abigail, ya asawa nen Nabal, so angalan tampol na tagano parad si David. Lapud sinmulag la’d sanok, tigwayen lawari nen David si Nabal tan saray bataan to. Lapud kinmiwas a tampol si Abigail, aliktar so bilay na dakel tan si David so ag-akapankasalanan lapud dala. Balet pirmi so agum tan inkaruksa nen Nabal. Kayari na manga samploran agew, “si Jehova kinabil toy Nabal, dia ed ontan a sikatoy inatey.”—1 Samuel 25:18-38.
16. Panon tayon naalig si Boaz tan ipulisay iray daladalan nen Nabal?
16 Agayla so pandumaan nen Boaz tan si Nabal! Bangta nepeg tayon ipulisay so maruksa tan masiblet a dalan nen Nabal, aligen tayo so inkamapangasi tan inkamabunlok nen Boaz. (Hebreos 13:16) Nagawaan tayo itan diad pangiyaplika ed simbawa nen apostol Pablo: “Unong a wala so kiambegya manggawa itayo na maabig ed saray amin, nagkalalo ed saray kaamong na pananisia.” (Galacia 6:10) Natan, say “arum a karnero” nen Jesus, saray Kristiano a walaan na mangaraldalin ya ilalo, so apribilihyoan a manggawa na maabig ed saray alanaan nen Jehova, say nakdaan na 144,000, a makagamor na imortalidad ed tawen. (Juan 10:16; 1 Corinto 15:50-53; Apocalipsis 14:1, 4) Saratan a maaron gawa so momoriaen nen Jesus bilang ginawan mismo ed sikato, tan say panggawa ed sarayan maong a bengatla so manresulta ed mayaman a bendisyon nen Jehova.—Mateo 25:34-40; 1 Juan 3:18.
Saray Subok tan Bendisyon ed si Ana
17. Antoran subok so inkidungetan nen Ana, tan anton awawey so impatnag to?
17 Inmabot met so bendisyon nen Jehova ed maridios a bii a si Ana. Sikato so nanayam ed mapalandey a rehyon na Efraim kaiba so masiken ton Levita a si Elcana. Unong ed inyabuloy tan indirehi na Ganggan, sikato so walaan na sakey nin asawa—si Penina. Si Ana so nansiansian lepes, sakey a kababaingan parad Israelitan bii, bangta si Penina so walaan na pigaran ananak. (1 Samuel 1:1-3; 1 Awaran 6:16, 33, 34) Balet, imbes a ligliwaen to si Ana, si Penina so kinmiwas diad agmaaron paraan ya angonigon ed si Ana anggad sikatoy nannangis tan agla makapangan. Alodloor ni, “tinaon” itan a nagagawa, diad kada iyakar na pamilya diad abung nen Jehova ed Silo. (1 Samuel 1:4-8) Marukduksa si Penina, tan agaylan subok itan ed si Ana! Ingen, agbalot tinetel nen Ana si Jehova; nisay nampatilak ed abung sanen linmay masiken to ed Silo. Diad saginonor sirin, mayaman a bendisyon so maseguron sinmabi ed sikato.
18. Anton ehemplo so impatnag nen Ana?
18 Impanengneng nen Ana so maabig ya ehemplo ed totoo nen Jehova natan, nagkalalo la ed saramay naopendi lapud ansakit ya impansalita na arum. Diad ontan iran kipapasen, say isian et aliwan solusyon. (Uliran 18:1) Ag-inabuloyan nen Ana iray subok ed sikato a mamatayer ed pilalek ton onla ed pangibabangatan na Salitay Dios tan ed pantitiponan na totoo parad panagdayew. Sikato sirin so nansiansian mabiskeg ed espiritual. Say kinaaralem na espiritualidad to so nipatnag ed alay abig a pikakasi to a nikurit ed 1 Samuel 2:1-10. *
19. Panon tayon nipatnag so panamabli tayo ed saray espiritual a bengatla?
19 Bilang kaplesan iran lingkor nen Jehova, agtayo mandadayew diad sakey a tabernakulo. Anggaman kuan, nipatnag tayo so panamabli tayo ed espiritual iran bengatla, a singa ginawa met nen Ana. Singa bilang, nipanengneng tayo so pirmin panamabli tayo ed espiritual iran kayamanan diad regular a kiwawala tayo ed saray Kristianon miting, asamblea, tan kombension. Usaren tayo irayan pankanawnawa pian manpapasesegan ed balang sakey diad tuan panagdayew ed si Jehova, ya angiter ed sikatayo na “pribilehyo na andi-takot a panangisaklang na sagradon serbisyo ed sikato diad katooran tan inkatunong.”—Lucas 1:74, 75, NW; Hebreos 10:24, 25.
20, 21. Panon ya atumangan si Ana lapud maridios a debosyon to?
20 Naimano nen Jehova so maridios a debosyon nen Ana tan sikatoy mayamyaman a tinumangan To. Diad sakey ed saray tinaon a pambabaroy na pamilya ra diad Silo, masimoon a nampikasi ed Dios so mannangnangis ya Ana tan oniay insipan to: “O Jehova na saray ehersito, no tua a nengnengen mo so kaermenan na aripen mo a bii, tan nonoten moak, tan agmo lingwanan so aripen mo a bii, noag ingen mangiter ka ed aripen mo a bii na sakey ya anak a laki, sirin sikato so iter ko ed Jehova ed saray amin ya agew na bilay to.” (1 Samuel 1:9-11) Dinengel nen Jehova so ey-ey nen Ana tan sikatoy pinalaboan to na sakey ya anak a laki, ya inngaran ton Samuel. Sanen sikatoy apakso, sikatoy inawit to ed Silo ta pian makapanserbi diad tabernakulo.—1 Samuel 1:20, 24-28.
21 Impatnag nen Ana so aro ed Dios tan tinoor to so sipan to nipaakar ed si Samuel. Tan isipen pa so mayaman a bendisyon a nanggayagaan da nen Elcana lapud nanserbi so pinabpabli ran anak diad tabernakulo nen Jehova! Dakel a Kristianon atateng so walaan na miparan gayaga tan bendisyon lapud say ananak dan lalaki tan bibii so manseserbi bilang sigpot-panaon a payunir a ministros, membro na pamilyan Bethel, odino diad arum a paraan a mamapagalang ed si Jehova.
Mantultuloy a Talinengen si Jehova!
22, 23. (a) Anto so naseguro tayo no mantultuloy itayon ontalineng ed boses nen Jehova? (b) Anto so konsideraen ed ontumbok ya artikulo?
22 Anto so nipaseguro ed sikatayo sano mantultuloy tayon talinengen si Jehova? Sikatayo so magmaliw a mayaman ed espiritual sano ipatnag tayo so interon-kamarerwan panangaro ed Dios tan sumpalen tayo so dedikasyon tayo ed sikato. Anggaman say panggegemtan ed ontan a kurang so mankabaliksan a nepeg tayon sungdoan iray pirmin subok, say bendisyon nen Jehova so maseguron onsabi ed sikatayo, mabetbet et diad babaleg a paraan nen say naisip tayo.—Salmo 37:4; Hebreos 6:10.
23 Dakel a bendisyon so nipagamor ed totoo na Dios diad arapen. Lapud matulok ya itatalineng ed si Jehova, makaliktar so “baleg ya ulop” ed “baleg a kairapan” tan naeksperiensya ra so gayaga ed bilay diad balon mundo na Dios. (Apocalipsis 7:9-14; 2 Pedro 3:13) Sigpot a peneken nen Jehova ed satan a panaon so matunong a pilalek na amin a totoo to. (Salmo 145:16) Anggaman ontan, unong ya ipabitar na ontumbok ya artikulo, anggan natan et napapalaboan la na ‘maong iran langkap tan ayadyarin regalo manlapud tagey’ iramay mantutultuloy ya ontatalineng ed boses nen Jehova.—Santiago 1:17.
[Paimano ed leksab]
^ par. 18 Saray balikas nen Ana so walaan na piparaan ed saramay imbalikas na birhen a si Maria, a sinalita to kayari ton naamtaan a sikato so magmaliw ya ina na Mesias.—Lucas 1:46-55.
Kasin Natandaan Yo?
• Anto so nibangat ed sikatayo na awaran na Israel nipaakar ed saray bendisyon na Dios?
• Panon a mandumaan si Boaz tan Nabal?
• Panon tayon naalig si Ana?
• Akin a nepeg itayon mantultuloy ya ontalineng ed boses nen Jehova?
[Tepetepet Parad Panagaral]
[Litrato ed pahina 10]
Impikasi nen Arin Solomon so pakawalaan na matulok a puso, tan sikato so pinalaboan nen Jehova na kakabatan
[Litrato ed pahina 12]
Si Boaz so marespeto tan mapangasin nantrato ed arum
[Litrato ed pahina 15]
Si Ana so mayamyaman ya abendisyonan lapud impanmatalek to ed si Jehova