Makapayaman ed Sikatayo so Bendisyon nen Jehova
Makapayaman ed Sikatayo so Bendisyon nen Jehova
“Say bendisyon nen Jehova makapayaman; tan agmangarum na ermen.”—ULIRAN 10:22.
1, 2. Akin ya agmisiglaotan so liket ed materyal a kayamanan?
SARAY materyalistikon gegemtan so mangokontrol ed kabibilay na minilyon natan. Balet kasin say materyal a bengabengatla so mamapaliket ed sikara? “Anggapoy nanonotan kon panaon a nanermen a maong so totoo ed kipapasen da ed bilay,” so kuan na The Australian Women’s Weekly. Inyarum to: “Kasunian itan. Nibaga ed sikami ya ekselente so kipapasen na Australia no nipaakar ed ekonomya, a say bilay so maabig a tuloy. . . . Anggaman ontan, say inka-negatibo so kasmak ed interon nasyon. Nalilikna na saray lalaki tan bibii a walay kulang ed bilay da balet agda nibaga no anto itan.” Agaylan tua so Kasulatan diad impangipabitar ya agnagamoran so liket nisay bilay ed saray bengatlan walad sikatayo!—Eclesiastes 5:10; Lucas 12:15.
2 Ibabangat na Biblia a say sankabalegan a liket et manlapud bendisyon na Dios. Nipaakar ed saya, inkuan na Uliran 10:22: “Say bendisyon nen Jehova makapayaman; tan agmangarum na ermen.” Say ermen so mabetbet a resulta na maagum a panagtipon na materyal a kayamanan. Matukotukoy ya impasakbay nen apostol Pablo: “Saray manpirawat ya onyaman napelag ira ed sakey a katuksoan tan say kalot tan dia ed saray dakel ya agum a maksay tan makaderal a kaalakan, a mangipalereg ed saray totoo ed kagegeba tan kababalang. Ta say aro ed pilak sikato so sakey a lamot na saray amin a nengneng na mauges; sikato a sanen inaguman na saray arum, abalbalang ira ed pananisia, tan atalos ira na dakel a kaermenan.”—1 Timoteo 6:9, 10.
3. Akin a naeeksperiensya na saray lingkor na Dios iray subsubok?
3 Diad biek a dapag, saray bendisyon ya ag-atekepan na ermen so onsabi ed amin ya ‘ontalineng ed boses nen Jehova a Dios.’ (Deuteronomio 28:2) Balet, arum so nayarin ontepet, ‘No anggapoy ermen ya akatekep ed bendisyon nen Jehova, akin a maniirap so dakel a lingkor na Dios?’ Ipaparungtal na Biblia a saray subok ed sikatayo so aabuloyan na Dios balet say peteg a panlalapuan et si Satanas, ed marelmeng a sistema to, tan ed dilin ag-ayadyarin inkatoo tayo. (Genesis 6:5; Deuteronomio 32:4, 5; Juan 15:19; Santiago 1:14, 15) Si Jehova so lapuan na “amin a maong a palangkap tan amin ya ayadyarin palangkap.” (Santiago 1:17) Kanian saray bendisyon to so agbalot pansengegan na ermen. Konsideraen tayo sirin so arum ed saray ayadyarin palangkap na Dios.
Say Salita na Dios—Mabmablin Langkap
4. Anton bendisyon tan ankablin langkap so panggagayagaan na totoo nen Jehova legan na sayan “panaon na anggaan”?
4 Nipaakar ed “panaon na anggaan,” oniay indalatdat na propesiya nen Daniel: “Say tuan pikakabat so ondaak.” Anggaman ontan, saya so pinalinew na saray salitan: “Anggapo ed saray marelmeng so makatalos naani; balet saray makabat makatalos ira naani.” (Daniel 12:4, 10, NW) Isipen pa itan! Say Salita na Dios—nagkalautla say propesiya—so nibalikas ed ontan a madibinon kakabatan kanian agnatalosan na marelmeng so peteg a kabaliksan na satan, ingen ta natatalosan itan na totoo nen Jehova. “Misalamat ak ed sika, O Ama, Katawan na tawen tan dalin,” so impikasi na Anak na Dios, “ta inyamot mo so sarayan bengatla ed saray makabat tan makatalos, et sikara so impasingawey mo ed saray ugugaw.” (Lucas 10:21) Agaylan bendisyon so pakawalaan na mabmablin langkap a nisulat a Salitay Dios, say Biblia, tan say pagmaliw a kabiangan na saramay pinagamoran nen Jehova na aralem a pakatalos ed espiritual!—1 Corinto 1:21, 27, 28; 2:14, 15.
5. Anto so kakabatan, tan panon tayon nagamoran itan?
5 Anggapo so aralem a pakatalos tayo ed espiritual no agtayo agamoran so “kakabatan a wala a manlapu ed tagey.” (Santiago 3:17) Say kakabatan et say abilidad a mangiyaplika ed pikakabat tan pakatalos pian solbaren iray problema, paliisan iray kaatapan, pandampot ed saray kalat, odino pangitarya na makabat iran simbawa. Panon tayon nagamoran so maridios a kakabatan? Oniay ibabaga na Uliran 2:6: “Si Jehova mangiter na kakabatan; ompaway ed sangi to so pikakabat tan pakatalos.” On, sikatayo so palaboan nen Jehova na kakabatan sano mantultuloy tayon ipikasi itan, no panon ya inter to met ed si Arin Solomon so “makabat tan makatalos a puso.” (1 Arari 3:11, 12; Santiago 1:5-8) Pian nagamoran so kakabatan, nepeg tayon mantultuloy ya ontalineng ed si Jehova diad regular a panaral tan pangiyaplika ed Salita to.
6. Akin a makabat so pangiyaplika ed saray ganggan tan prinsipyo na Dios diad kabibilay tayo?
6 Saray manunan alimbawa na maridios a kakabatan so naromog ed saray ganggan tan prinsipyo na Biblia. Saya so mangunggona ed sikatayo diad amin a paraan—pisikal, mental, emosyonal, tan espiritual. Matukoy so inkanta nen salmista: “Say katunongan nen Jehova nagnap, tan pampataolien to so kamarerwa: say panamatua nen Jehova matua, gawaen to a makalakal so andi amta. Saray panontonan nen Jehova maptek ira, pagayagaen da so puso: say ganggan nen Jehova malinlinew, liwawaan to so saray mata. Say takot ed Jehova maralus, mansiansia lawas, saray bilibilin nen Jehova tua ra, tan matunong ira ya amin. Sikara so nagkalalo a pampirawatan nen say balitok, on, nen say dakel a polido a balitok.”—Salmo 19:7-10; 119:72.
7. Antoray pansumpalan na pangipulisay ed matunong iran estandarte na Dios?
7 Diad biek a dapag, saramay mangipulisay ed matunong iran estandarte na Dios so agmakaromog ed liket tan kawayangan ya aanapen da. Agmanbayag, naamtaan da ya aliwan say Dios so namudmora, lapud anien na sakey a too so intanem to. (Galacia 6:7) Minilyon ya angipulisay ed saray prinsipyo na Biblia so manaani na saray makapasinagem a kasumpalan a singa say agkaliktan a panlukon, makapadimlan sakisakit, odino makapakapuy iran adiksion. No ag-ira magbabawin manguman ed kurang na bilay da, say basbas da so seguradon mansumpal ed ipapatey tan nayarin diad panderal na Dios.—Mateo 7:13, 14.
8. Akin a maliket iray manangaro ed Salitay Dios?
8 Balet, onsabi ed saramay mangaaro ed Salitay Dios tan mangiyaaplika ed satan so mayaman iran bendisyon natan tan diad arapen. Sikaray walaan na rason pian manliknan bulos lapud ganggan na Dios, peteg a maliket, tan mantatalaran a maong ed panaon na kibulos da manlapud kasalanan tan makapatey iran epekto na satan. (Roma 8:20, 21; Santiago 1:25) Segurado iyan ilalo lapud akadependi itan ed sankamaaroan a langkap na Dios ed katooan—say dondon bagat na bogbogtong ya Anak to, si Jesu-Kristo. (Mateo 20:28; Juan 3:16; Roma 6:23) Say ontan a matalonggaring a langkap so mamekder ed kinaaralem na aro na Dios ed sankatooan tan mangigarantiya ed agmangangga iran bendisyon ed amin a mantultuloy ya ontalineng ed si Jehova.—Roma 8:32.
Misalsalamat Itayo Lapud Langkap a Masanton Espiritu
9, 10. Panon itayon nagunggonaan ed langkap nen Jehova a masanton espiritu? Mangiter na alimbawa.
9 Say sananey nin maaron langkap na Dios a pisalamatan tayo et say masanton espiritu to. Diad samay agew na Pentecostes 33 K.P., pinaseseg nen apostol Pedro so karaklan a wadman ed Jerusalem: “Magbabawi kayo, tan manbinyag so sinansakey ed sikayo ed ngaran nen Jesu-Kristo, pian pakapaandian na kasalanan yo: et awaten yo naani langkap na espiritu santo.” (Gawa 2:38) Natan, si Jehova so mangiiter na masanton espiritu ed saray dedikadon lingkor to ya onkekerew ed satan tan malabay a manggaway linawa to. (Lucas 11:9-13) Diad kadaanan iran panaon, sayan sankabiskegan a puersa ed uniberso—say masanton espiritu, odino aktibon puersa na Dios—so amabiskeg ed lalaki tan bibii na pananisia, laktip laray inmuunan Kristiano. (Zacarias 4:6; Gawa 4:31) Ontan met so gawaen na satan ed sikatayo, anggano nipaarap itayo ed mairap iran babeng odino angat bilang totoo nen Jehova.—Joel 2:28, 29.
10 Konsideraen pa so alimbawa nen Laurel, ya a-polio tan nambilay panamegley na makina a panlilinawaan to ed loob na 37 a taon. * Anggaman ed pirmin makapasubok iran sirkumstansya, sikato so maseseg a nanlingkor ed Dios anggad impatey to. Diad loob na dakel a taon, sinmabi ed si Laurel so mayaman a panamendisyon nen Jehova. Singa bilang, atulongan to so 17 a totoo ya awalaan na suston pikakabat ed katuaan na Biblia, anggaman akakonekta ed sikato so makinan panlilinawaan to ed loob na 24 oras a sanagew! Ipapanonot na kipapasen to iray salita nen apostol Pablo: “Sano siak so makapuy, dia ed satan mabiskeg ak.” (2 Corinto 12:10) On, antokaman ya itatalona a nayarin nagamoran tayo diad panangipulong ed maong a balita so nanlapu, aliwan diad dilin abilidad tan pakayari tayo, noagta diad tulong na Dios panamegley na masanton espiritu, ya iiter to ed saramay mantutultuloy ya ontalineng ed boses to.—Isaias 40:29-31.
11. Antoran kalidad so papawalaen na espiritu na Dios ed saramay mangisulong ed “balon personalidad”?
11 No matulok itayon ontalineng ed Dios, say espiritu to so mamawala ed sikatayo na saray kalidad ya aro, gayaga, deen, anos, panangasi, kamaongan, pananisia, kaumildian, tan dangka. (Galacia 5:22, 23) Sayan “bunga na espiritu” so kabiangan ed “balon personalidad” ya isulong na saray Kristiano pian salatan so antokaman iran maagum, singa-ayep a walna a datin ipapatnag da. (Efeso 4:20-24, NW; Isaias 11:6-9) Say sankaimportantian ed sayan bunga et say aro, “say ayadyarin bedber na pankakasakey.”—Colosas 3:14, NW.
Kristianon Aro—Langkap a Pabpablien
12. Panon ya impatnag di Tabita tan arum niran inmunan-siglon Kristianos so aro?
12 Say Kristianon aro so sananey nin abenditon langkap a nanlapud si Jehova—sakey a manepeg a pabpablien tayo. Satan so igigiya na prinsipyo, balet daakan itan na panangaro a mas mamapaapit ni ingen ed saray mananisia ed balang sakey nen say walan relasyon ed pankanayon. (Juan 15:12, 13; 1 Pedro 1:22) Alimbawa, konsideraen si Tabita, a maabig a Kristianon bii nen inmunan-siglo. “Sayan bii napno na saray maong a gawa tan payabol a ginagawa to,” nagkalalo la ed biang na saray balo ed kongregasyon. (Gawa 9:36) Sarayan bibii so nayarin walaan na kakanayon, balet nilabay nen Tabita a gawaen so anggaay nayarian to pian ontulong tan mamaseseg ed sikara. (1 Juan 3:18) Agaylan abig ya alimbawa so impatnag nen Tabita! Say inaagin aro so amakiwas ed si Prisca tan Aquila pian ‘iyan da so beklew dan dili’ nisesengeg ed si Pablo. Say aro so amakiwas met ed si Epafras, Lucas, Onesiforo, tan arum nira pian ontulong ed apostol legan a sikato so nipangaw ed Roma. (Roma 16:3, 4; 2 Timoteo 1:16; 4:11; Filemon 23, 24) On, say ontan iran Kristianos so ‘walaan na aro ed balang sakey,’ sakey ya abenditon langkap a nanlapud Dios a mangipapabidbir ed sikara bilang tuan babangatan nen Jesus.—Juan 13:34, 35.
13. Panon tayon nipanengneng a papablien tayon maong so Kristianon impanaagi tayo?
13 Kasin papablien yo so aro a nipapatnag diad loob na Kristianon kongregasyon? Kasin misasalamat kayo lapud espiritual ya impanaagi tayo, ya onnanatnat ed sankamundoan? Saraya met so makapaliket tan makapayaman a langkap manlapud tagey. Panon tayon nipanengneng a papablien tayo iratan? Diad pangisaklang na sagradon serbisyo ed Dios, diad pibiang ed saray Kristianon miting, tan diad pangipatnag na aro tan arum niran bunga na espiritu na Dios.—Filipos 1:9; Hebreos 10:24, 25.
“Langkap a Totoo”
14. Anto so kakaukolanen ed sakey a Kristiano no sikatoy manlingkor bilang matatken odino ministeryal a lingkor?
14 Saray Kristianon lalaki a manpipilalek a manlingkor ed kapara ran managdayew bilang mamatatken odino ministeryal a lingkor so walaan na maabig a kalat. (1 Timoteo 3:1, 8) Pian onkualipika ed saratan a pribilehyo, say sakey ya agin laki so nepeg a magmaliw a maespiritual a too, mikabisado ed Kasulatan tan maseseg ed lawak na ministeryo. (Gawa 18:24; 1 Timoteo 4:15; 2 Timoteo 4:5) Nepeg ton ipatnag so kapaabebaan, inkaumildi, tan anos, lapud saray bendisyon na Dios so agnipagamor ed saray mapalakbat, mapaatagey, tan maambisyon a totoo. (Uliran 11:2; Hebreos 6:15; 3 Juan 9, 10) No walaan lay asawa, sikato so kaukolan a magmaliw a maaron ulo na pamilya a makasarag a mangasikason maong ed sankaabungan to. (1 Timoteo 3:4, 5, 12) Lapud papablien toray espiritual a kayamanan, nagamoran na satan a too so bendisyon nen Jehova.—Mateo 6:19-21.
15, 16. Siopa so napapaneknekan a “langkap a totoo”? Mangiter na saray alimbawa.
15 Sano isekar na saramay manlilingkor bilang mamatatken ed kongregasyon so inkasikara bilang ebanghelisador, managpastol, tan managbangat, mangiiter ira ed sikatayo na makatunongan a rason pian pabpablien iratan a “langkap a totoo.” (Efeso 4:8, 11, NW) Nayarin agnaynay a nibalikas na saramay nagugunggonaan ed maaron serbisyo ra so apresasyon da, balet naiimano nen Jehova so amin a gagawaen na matoor a mamatatken. Agto nalingwanan so aro ya ipapatnag da lapud ngaran to diad panutulong da ed totoo to.—1 Timoteo 5:17; Hebreos 6:10.
16 Konsideraen pa so kipapasen na sakey a makulin matatken a binmisita ed sakey a Kristianon agin bii ya operaan da la ed utek. “Sikato so maomaong, matulong, mangiyaansakit,” so insulat na sakey a kaaro na pamilya ra. “Sikatoy kinmerew na permiso a manpikasi ed si Jehova a kaiba kami. Diad pampipikasi to, say ama [ya aliwan Tasi nen Jehova] so mansibsibek, tan matalareter so lua na amin a walad loob na kuarto ed ospital. Agaylan makapatenyeg so pikakasi na saman a matatken, tan agaylan aro nen Jehova a sikatoy imbaki To ed dugarugan panaon!” Inkuan na sananey nin Tasi a pasienti nipaakar ed sakey a matatken a pinmasyar ed sikato: “Sanen inmasingger ira ed akarukolan ko diad intensive care unit, amtak ya antokaman so nagawa ed siak ed saman, nasungdoan ko itan. Binmiskeg ak tan awalaan ak na mareen a kanonotan.” Nasaliw kasi na siopaman so ontan a maaron panangiyansakit? Andin balot! Langkap itan na Dios, a naromog panamegley na Kristianon kongregasyon.—Isaias 32:1, 2.
Say Langkap a Lawak na Ministeryo
17, 18. (a) Anton langkap na serbisyo so intarya nen Jehova parad amin a totoo to? (b) Anton tulong so intarya na Dios ta pian nasumpal tayo so ministeryo tayo?
17 Anggapo lay babaleg a kagalangan a niiter ed siopaman a too nen say kagalangan a naromog ed panaglingkor ed si Jehova, say Sankatageyan. (Isaias 43:10; 2 Corinto 4:7; 1 Pedro 2:9) Anggaman kuan, say pribilehyo a pibiang ed mapublikon ministeryo so lukas ed amin—kalangweran tan matakken, laki tan bii—a walaan na puron pilalek a manlingkor ed Dios. Kasin ikakana yo iyan mablin langkap? Arum so masuyat a manpulong lapud liknaen da ya agda sarag, balet tandaan a si Jehova so mangiiter na masanton espiritu ed saramay manlilingkor ed sikato, tan ontulong itan antokaman so agtayo nasarag.—Jeremias 1:6-8; 20:11.
18 Inmatalek nen Jehova so kimey a panangipulong na Panarian ed saray mapaabeban lingkor to, aliwan diad saray indibidual a mapaatagey tan manmamatalek ed mismon abilidad da. (1 Corinto 1:20, 26-29) Saray mapaabeba, masimpit a totoo so mamibidbir ed limitasyon da tan manmamatalek ed tulong na Dios legan iran mibibiang ed lawak na ministeryo. Aapresyaen da met so espiritual a tulong ya itatarya na “managpaga a napanmatalkan.”—Lucas 12:42-44; Uliran 22:4.
Say Maliket a Bilay na Pamilya—Maabig a Langkap
19. Antoran sengegan so mangitonton ed itatalona diad panamabaleg ed ananak?
19 Say panamaley tan maliket a bilay na pamilya so langkap a nanlapud Dios. (Rut 1:9; Efeso 3:14, 15) Saray ananak met so ankablin ‘tawir manlapud si Jehova,’ a panliliketan na saray atateng a matalonan mangipupurek na saray maridios a kalidad ed sikara. (Salmo 127:3) No sakey kayon ateng, mantultuloy a talinengen so boses nen Jehova diad pangipasal ed saray ankelag niran ananak yo unong ed Salita to. Saramay manggagawa ed satan so maseguron makagamor na tulong tan mayaman a bendisyon nen Jehova.—Uliran 3:5, 6; 22:6; Efeso 6:1-4.
20. Anto so nayarin makatulong ed atateng a kinmasipa so ananak da manlapud tuan panagdayew?
20 Anggaman ed maalwar iran sagpot na maridios ya atateng, nayarin walaray ananak da ya onkasipa ed tuan panagdayew sano sikaray ontakken. (Genesis 26:34, 35) Saya so makapaermen a maong ed atateng. (Uliran 17:21, 25) Imbes a naandian lay ilalo, nayarin makatulong ed sikara so pannodnonot ed ilustrasyon nen Jesus nipaakar ed managdarak ya anak. Anggaman tinmaynan ed abung so anak a laki tan nanggegemtan na matungangan kurang, sikato so pinmawil ed saginonor diad abung na ama to, a maliket tan maaron angawat ed sikato. (Lucas 15:11-32) Antokaman so nagawa, saray matoor a Kristianon atateng so napaseguroan ed pakatalos, maaron panangiyansakit, tan ag-onsaew a suporta nen Jehova.—Salmo 145:14.
21. Siopa so nepeg tayon talinengen, tan akin?
21 Determinado komon so balang sakey ed sikatayo no anto so talagan importante ed bilay tayo. Kasin panggugunaetan tayon gegemtanen so dakel a materyal, a nayarin mangitarok na ermen ed sikatayo tan ed pamilya tayo? Odino kasin gegemtanen tayo so ‘maong a palangkap tan amin ya ayadyarin palangkap’ a nanlapu ed “Ama na saray liwawa”? (Santiago 1:17) Kaliktan nen Satanas, say “ama na tila,” a pansagpotan tayo so materyal a kayamanan tan agtayo nagamoran so liket tan bilay. (Juan 8:44; Lucas 12:15) Balet, si Jehova so mangiyaansakit a maong ed sikatayo tan kaliktan to so sankaabigan parad sikatayo. (Isaias 48:17, 18) Kanian, mantultuloy tayo sirin a talinengen so maaron mangatatawen ya Ama tayo tan lawas “manliga” ed sikato. (Salmo 37:4) No gegemtanen tayo so ontan a kurso, say mabmabli iran langkap tan daakan a bendisyon nen Jehova so makapayaman ed sikatayo—tan andian itan na antokaman ya ermen.
[Paimano ed leksab]
^ par. 10 Nengnengen so Awake!, Enero 22, 1993, pahina 18-21.
Kasin Natandaan Yo?
• Iner so pakaromogan na sankabalegan a liket?
• Anto so pigara ed saray langkap ya iiter nen Jehova ed totoo to?
• Akin a langkap so lawak a ministeryo?
• Anto so nagawaan na saray atateng pian nagamoran so bendisyon na Dios legan a papabalegen daray ananak da?
[Tepetepet Parad Panagaral]
[Litrato ed pahina 16]
Kasin ipapatnag yo so panamabli ed langkap na Dios a nisulat a Salita to?
[Litrato ed pahina 17]
Anggaman ed mairap a tuloy iran sirkumstansya, maseseg a nanlingkor si Laurel Nisbet ed Dios
[Saray litrato ed pahina 18]
Singa si Tabita, saray kaplesan a Kristiano so kabkabat lapud saray gawa na panangaro ra
[Litrato ed pahina 19]
Saray Kristianon mamatatken so walaan na maaron panangiyansakit ed saray kapananisiaan da