Peteg Kasin Napankasakey na Antokaman so Totoo?

ANTOKAMAN iray sisiaen yo, nayarin onabobon kayo a seguradon walaray manangaro ed katuaan diad amin lawarin relihyon. Naromog iray totoo a mamapablin maong ed bengatlan tua tan mabulos a mananap ed satan diad saray Hindu, Katoliko, Judio, tan arum nira. Balet, ompapatnag a say relihyon so mamubuyak ed katooan. Uusaren ni ingen na arum so relihyon parad mauges iran getma. Posibli kasin nasabi a mankakasakey so masimoon a totoo na amin a relihyon a manangaro ed kaptekan tan tua? Kasin napankakasakey ira parad saksakey a gagala?

Agaylan makapagonigon so pakaimaton a say relihyon so ompapalalon pansesengegan na inkaapag-apag! Konsideraen pa so arum ed sarayan kolkolan. Diad Sri Lanka et manlalaban iray Hindu tan Budista. Saray Protestanti, Katoliko, tan Judio so amaagus na dala diad nanduruman impanlalaban. Diad Bosnia, Chechnya, Indonesia, tan Kosovo et manlalaban iray mankuan a Kristiano tan Muslim. Tan nen Marso 2000, nisiglaot so relihyon ed duaran agew a panlalaban a sengegay impatey na 300 a taga-Nigeria. On, say relihyoson pambubusolan so amarngat ed inkaruksa na sarayan panlalaban.

Mabetbet a nadidismaya iray masimoon a totoo lapud nagagawan kaugsan diad ngaran na relihyon. Singa bilang, dakel a mimimisa so nabibigla lapud panangonsinti na arum ya iglesia ed saray klerigo a seksual a mangaabuso ed ugugaw. Nababaingan a tuloy so arum a mananisia lapud saray inkaapag-apag ed loob na dakel a sektan mankuan a Kristiano diad saray isyun singa say homoseksualidad tan aborsion. Malinew ya agnapankakasakey na relihyon so katooan. Ingen, walaray matuan manangaro ed katuaan diad dakel a relihyon a singa ipapabitar na saray onggendan ya eksperiensya.

Nampirawatan da so Katuaan

Si Fidelia so sakey a masimoon tan debosyonadon managdayew ed Katolikon Iglesia na San Francisco diad La Paz, Bolivia. Sikatoy dinmakmomo ed imahen nen Maria tan angiturok na saray ankablin kandila ed arap na krus. Kada simba et sikatoy nandodonasyon na dakdakel a tagano ed pari pian ibunog ed saray mairap-bilay. Balet, limara ed ananak nen Fidelia so inatey antis a sikaray nabinyagan. Sanen imbaga na pari ed sikato ya amin da so maniirap ed kabilungetan na Limbo, nanumameng si Fidelia, ‘No maaro tan mapangasi so Dios, panon a magmaliw ya ontan?’

Si Tara, sakey a doktora, so pinabaleg bilang sakey a Hindu diad Kathmandu, Nepal. Lapud panutumbok ed nilasus taon laran kustombre na inmunan atateng to, sikatoy nandadayew ed dirios to diad saray templo na Hindu tan walaray talintao met ed abung to. Balet awetwet si Tara ed saray tepet a singa saraya: Akin a pirmi so paniirap? Akin ya ompapatey so totoo? Agto aromog so makapenek iran ebat ed relihyon to.

Diad biek a dapag, si Panya so binmaleg bilang sakey a Budista diad sakey ya abung ed gilig na kanal diad Bangkok, Thailand. Nibangat ed sikato a say paniirap et resulta na saray  ginawgawa ed apalabas a bilay tan nagamoran so kibulos ed satan no iwaklit na sakey so amin a pilalek to. Singa arum met a masimoon iran Budista, sikatoy binangatan a manrespeton maong ed kakabatan na saray monghe ya akakawes na duyaw a pinalbangon ya oonla ed abung parad abuloy. Sikatoy angagamil na panagdalepdep tan nankokolekta na saray imahen na Buddha diad panisian saratan so makapangiyagel. Kayarin alanor ed sakey a graben aksidente a sengegay inkaparalisado to manlapud balambang a paleksab, linma si Panya ed saray monasteryo na Budista, a masimoon ton iilaloan so mamilagron iyabig to. Sikatoy ag-inmabig odino aliwawaan ed espiritual. Imbes, sikatoy nigalet ed espiritismo tan ginmapon angagamil ed satan.

Si Virgil so nianak diad Estados Unidos tan nen kolehyo la et akimembro ed saray Black Muslim. Sikatoy maseseg a nambubunog na literatura ra, a sisiaen na satan a saray amputin totoo so Diablo. Ontan so iisipen da lapud saray amputi so responsable ed pirmin inkaruksa ed saray andeket. Anggaman sikatoy masimoon ed sisisiaen to, si Virgil so guguloen na oniaran tepet: Panon a magmaliw a mauges so amin ya amputi? Tan akin a maslak ed panagkalar et manasaglawi ed kuarta?

Anggaman binmaleg si Charo ed Abalaten Amerika a ditan et kaslakan so Katoliko, sikato so sakey a masimoon a Protestanti. Sikatoy maliket bilang agkabiangan ed panagtalintao ya akapaliber ed sikato. Nanggayagaan nen Charo so inyakar-akar to ed kapilya kada Simba parad makasagyat-emosyon a serbisyo, a diman et onkekelyaw na “Hallelujah!” insan akibiang ed relihyoson panagkansion tan panagsayaw. Masimoon a panisiaan nen Charo a sikatoy nilaban la tan nianak lamet. Sikatoy angiiter ed kapilya na kakaplo ed naaalmoan to, tan sanen kinmerew na donasyon so paborito ton ebanghelisador ed TV, sikatoy pinawitan to na kuarta a para ed ugugaw diad Aprika. Balet, sanen tinepetan toy pastor to no akin a say Dios na aro et papairapen toray kamarerwa ed impierno, amoria nen Charo ya anggapoy makabaliksan ya ebat na saman a pastor. Asukayan to met ed saginonor ya agnanausar iray donasyon to pian tulongan so ugugaw diad Aprika.

Anggaman nanlalapu ed nanduruman abenegan, sarayan limaran indibidual so walaay pamparehoan. Inaro ra so katuaan tan masimoon dan inanap iray matuan ebat ed saray tepet da. Balet peteg kasin makapankakasakey ira ed tuan panagdayew? Ebatan na ontumbok ya artikulo itan a tepet.

[Litrato ed pahina 4]

Posibli kasi a makapankakasakey so totoo ed nanduruman abenegan?

[Picture Credit Line ed pahina 3]

G.P.O., Jerusalem