Propesiya nen Isaias​—Liwawa Parad Amin a Katooan I

Kapitulo Otso

Si Jehova a Dios so Walad Masanton Templo To

Isaias 6:1-13

1, 2. (a) Kapigan naawat nen propeta Isaias so pasingawey to nipaakar ed templo? (b) Akin ya abalang nen Uzias so abobon nen Jehova?

 “DIA ed taon ya impatey nen Uzias anengneng ko so Katawan a manyudyurong ed sakey a trono, ya atagey tan nitandoro; et say saloy na kawes to alaknaban to so templo.” (Isaias 6:1) Diad panamegley na sarayan salita na propeta, ginmapo so koma-6 a kapitulo na libro na Isaias. Satan so taon 778 K.K.P.

² Say uley nen Uzias ed loob na 52 a taon bilang ari na Juda, so diad kaslakan et walay masnag ya intalona. Lapud gagawaen to so “maptek ed saray mata nen Jehova,” sikatoy sinuportaan na Dios diad militar, panagpaalagey, tan agrikultura iran kimey to. Balet say intalona to so sengegan met na kaderalan to. Diad kaunoran, say puso to so nagmaliw a mapangta, “tan linmukso sumpa ed Jehova a Dios to; ta linmoob ed templo nen Jehova a nampasob na insenso.” Lapud sayan mapalakbat a kiwas tan lapud insanok to ed saray saserdote ya amaat ed sikato, inatey si Uzias ya akating. (2 Awaran 26:3-22) Ngalngalin diad sayan panaon ya inggapo nen Isaias so mapropetikon panaglingkor to.

3. (a) Kasin aktual ya anengneng nen Isaias si Jehova? Ipaliwawa. (b) Anton eksena so anengneng nen Isaias, tan diad anton rason?

³ Agnibaga ed sikatayo no iner so kawalaan nen Isaias sanen anengneng to so pasingawey. Balet malinew a say anengneng na saray mismon mata to et sakey a pasingawey, aliwan aktual ya impakanengneng ed Makapanyarin-amin, lapud “anggapo so too ya akanengneng ed Dios anggan kapigan.” (Juan 1:18; Exodo 33:20) Anggaman kuan, say pakanengneng ed Manamalsa, si Jehova, anggan diad pasingawey labat, so sakey a makapakelkelaw a nenengnengen. Say akayurong ed atagtagey a trono, a mangisisimbolo ed betang to bilang andi-anggaan ya Ari tan Ukom, et say Mananguley na Uniberso tan say Lapuan na amin a makanepegan a gobierno! Say saloy na andukey tan malakob a kawes to so linmaknab ed templo. Si Isaias so tinawag parad mapropetikon panaglingkor a mangitandoro ed soberanon pakayari tan inkahustisya nen Jehova. Bilang pamparaan, sikatoy naikdan na pasingawey nipaakar ed kasantosan na Dios.

4. (a) Akin a nepeg a simboliko iray pananeskribe ed si Jehova ya anengneng ed pasingawey tan nikurit ed Biblia? (b) Anto so naaralan nipaakar ed si Jehova manlapud pasingawey nen Isaias?

⁴ Agdeneskribe nen Isaias so indengan nen Jehova ed pasingawey to​—aliwan singa saray pasingawey ya insalaysay di Ezequiel, Daniel, tan Juan. Tan amin na saratan a salaysay so nanduruma ed no anto so anengneng ed tawen. (Ezequiel 1:26-28; Daniel 7:9, 10; Apocalipsis 4:2, 3) Bangbalet, nepeg a tandaan so nengneng tan gagala na sarayan pasingawey. Aliwa iratan a literal a deskripsion na kiwawala nen Jehova. Say pisikal a mata so  agmakanengneng ed espiritual iran bengatla, nisay natebek na limitadon nonot na too so mundo na espiritu. Kanian, saray pasingawey so mangipaparungtal ed impormasyon a kaukolan ya ipasabi diad paraan a natalosan na too. (Ikompara so Apocalipsis 1:1.) Diad pasingawey nen Isaias, say paneskribe ed nengneng na Dios so agla nakaukolan. Ipapakabat na pasingawey ed si Isaias a si Jehova so wala ed masanton templo to tan sikato so masanto tan saray panangukom to so dalisay.

Saray Serapin

5. (a) Sioparay serapin, tan anto so kabaliksan na satan a termino? (b) Akin a sasakbungan na saray serapin so kalupaan tan salisali ra?

⁵ Talinengen! Intuloy nen Isaias: “Ed tagey to akaalagey so saray serapin: balang sakey ed sikara walaan na anemira a payak; tan say duara panakbong to ed lupa to, tan say duara panakbong to ed saray sali to, tan say duara pantikyab to.” (Isaias 6:2) Diad Isaias kapitulo 6 so alenleneg a pasen ed Biblia a pakaromogan tayo ed impanalambit ed saray serapin. Mapatnag a saraya so anghelikon pinalsa a manlilingkor ed si Jehova a walaan na atagtagey a tuloy iran pribilehyo tan kagalangan, a nipasen ya akapaliber ed mangatatawen a trono nen Jehova. Aliwan singa say mapaatagey ya Arin Uzias, sikaray manlilingkor tekep na sigpot a kaabebaan tan kaumildian. Lapud wala ra ed kiwawala na mangatatawen a Soberano, sasakbungan da so kalupaan da na sakey a paris na saray payak da; tan bilang panangigalang ed masanton pasen, sasakbungan da ray sali ra na sakey lamet a paris. Lapud asingger ira ed Soberano na Uniberso, mas lalon pinaabeba na saray serapin so inkasikara, pian agnaala so dayew a para labat ed Dios. Say terminon “serapin” a mankabaliksan na “saray mangapuy-apoy” odino “saray manliob,” so mangisusuheri a sikaray mangisisindag na liwawa, ingen sasakbungan da so kalupaan da manlapud lalon masnag a liwawa tan gloria nen Jehova.

6. Anto so nipasenan na saray serapin no nipaakar ed si Jehova?

⁶ Uusaren na saray serapin so komatlon paris na saray payak da pian ontikyab tan, andi-duaruwan pian mansiansian mantiktikyab, odino ‘onalagey’ diad saray kawalaan da. (Ikompara so Deuteronomio 31:15.) No nipaakar ed nipasenan da, oniay inkomento nen Propesor Franz Delitzsch: “Peteg a saray serapin so aliwan walad tagey na ulo To ya akayurong ed trono, noagta mantiktikyab ira ed tagey na kawes To a linmaknab ed interon lugar.” (Commentary on the Old Testament) Saya so ompatnag a makatunongan. Sikaray ‘akaalagey ed tagey,’ ya aliwan atagtagey nen si Jehova, noagta bilang manseserbi ed sikato, matulok tan akaparaan a manlingkor.

7. (a) Anton kimey so susumpalen na saray serapin? (b) Akin a mamitlon idedeklara na saray serapin so kasantosan na Dios?

⁷ Talinengen natan iramay apribilehyoan a serapin! “Say sakey tan sakey nanakisan ira, tan inkuan da, Santo, santo, santo, si Jehova na saray ehersito: say amin a dalin napno na liket to.” (Isaias 6:3) Say kimey da et pian naseguro a say kasantosan nen Jehova so niyabawag tan say gloria to so bidbiren ed interon uniberso, a kabiangan met la ed satan so dalin. Say gloria to so nanengneng ed amin a pinalsa to tan magano lan natebek na amin a manaayam diad dalin. (Numeros 14:21; Salmo 19:1-3; Habacuc 2:14) Sayan mamitlon deklarasyon, a “santo, santo, santo,” so aliwan paneknek ed Trinidad. Imbes, satan so mamitlon panangidanet ed kasantosan na Dios. (Ikompara so Apocalipsis 4:8.) Si Jehova so masanto diad superlatibon paraan.

8. Anto so resulta na saray deklarasyon na saray serapin?

⁸ Anggaman agsinalambit so bilang na saray serapin, nayarin walaray grupo na serapin a walad asingger na trono. Diad sakey a marakep a kanta, uuliten na balang sakey so deklarasyon na kasantosan tan gloria na Dios. Anton resulta so naimano tayo? Ontalineng lamet legan ya itutuloy nen Isaias: “Saray panangiletnegan na saray sasabien kinmeyer ira ed boses na saman so manakis, tan say abung napno ed asewek.” (Isaias 6:4) Diad Biblia, say asewek odino lurem so mabetbet a mangitatarya na nanenengneng a paneknek na kiwawala na Dios. (Exodo 19:18; 40:34, 35; 1 Arari 8:10, 11; Apocalipsis 15:5-8) Satan so mangipapatnag ed gloria, a bilang too et agtayo nayarian ya asinggeran.

Agmanepeg, Balet Alinisan

9. (a) Anto so epekto na pasingawey ed si Isaias? (b) Anto so mapatnag a pandumaan nen Isaias tan si Arin Uzias?

⁹ Sayan pasingawey na trono nen Jehova so walaan na aralem ya epekto ed si Isaias. Oniay inkurit to: “Diad saman inkuan ko, Abagey ak la! Ta nabalang ak; lapu ed too ak a marutak so saray bibil, tan manaayam ak dia ed pegley na baley a marutak so saray bibil: ta saray matak anengneng da so Ari, si Jehova na saray ehersito.” (Isaias 6:5) Agaylan mabitar so pandumaan di Isaias tan si Arin Uzias! Sinamsam nen Uzias so posisyon na  nilanaan ya inkasaserdote tan andiay galang ton nilooban so Masanton silir na templo. Anggaman anengneng nen Uzias iray balitok a kandelero, say balitok ya altar na insenso, tan saray lamisaan na “tinapay na Kiwawala,” agto anengneng so lupa na panangabobon nen Jehova odino angawat na nikaduman kimey manlapud sikato. (1 Arari 7:48-50; paimano’d leksab na New World Translation) Diad biek a dapag, ag-imbaliwala nen propeta Isaias so inkasaserdote nisay mapalakbat ton nilooban so templo. Ingen, anengneng to so sakey a pasingawey nen Jehova diad masanton templo to tan sikatoy apagalangan ed kimey a direktan impabtang na Dios. Anggaman saray serapin so agmanasalin onnengneng ed nitronon Katawan na templo, si Isaias so naabuloyan, diad pasingawey, ya onnengneng ed “Ari, si Jehova na saray ehersito” a mismo!

10. Akin ya atalagnaw si Isaias sanen anengneng to so pasingawey?

¹⁰ Say pandumaan ed anengneng nen Isaias a kasantosan na Dios tan say dili ton inkamakasalanan so angipalikna ed sikaton marumsis a tuloy. Lapud takot, inkuanton sikatoy ompatey. (Exodo 33:20) Nadngel to iray serapin a mangidadayew ed Dios a walaan na malinis iran bibil, balet saray dilin bibil to so agmalinis tan nagkalalon arumsisan lapud inkarutak na saray bibil na totoo a kalimoglimog to tan saray panagsalita ra et narerengel to. Masanto si Jehova, tan nepeg ya ipatnag itan a kalidad na saray lingkor to. (1 Pedro 1:15, 16) Anggaman apili la si Isaias bilang pinagkasangiyan na Dios, sikatoy atalagnaw lapud impakatebek ed makasalanan a kipapasen to tan andian na malinis iran bibil a manepeg ed sakey a pinagkasangiyan na magloria tan masanton Ari. Anto kasi so reaksion diad tawen?

11. (a) Anto so ginawa na sakey ed saray serapin, tan anto so isisimbolo na sayan kiwas? (b) Panon a say pandalepdep ed imbaga na serapin ed si Isaias so ontulong ed sikatayo sano liknaen tayon agtayo manepeg bilang lingkor na Dios?

¹¹ Imbes a paekalen so abebbeban si Isaias manlapud arap na kiwawala nen Jehova, kinmiwas iray serapin pian sikatoy tulongan. Oniay kuan na rekord: “Diad saman tinmekyab so sakey a serapin ed siak, a walaan na ngalab ed lima to, a sikato so inala to ed saray sipit a nanlapu ed altar: Et diniwit to so sangik ed sikato, et inkuan to, Nia saya diniwit to so saray bibil mo: et say inkauges mo nakal, tan say kasalanan mo apaandi.” (Isaias 6:6, 7) Diad simbolikon pantalos, say apoy so walaan na pakayarin manlinis. Sanen nidelnet ed saray bibil nen Isaias so ngalab manlapud masanton apoy na altar, impaseguro na serapin ed si Isaias a saray kasalanan to so asakbongan la ed laknab a nakaukolan pian sikatoy makagamor na panangabobon tan sakey a kimey manlapud Dios. Agaylan panamaseguro itan ed sikatayo! Sikatayo met so makasalanan tan agmakana ya onasingger ed Dios. Balet sikatayo so dinondon panamegley na balor na dondon bagat nen Jesus tan makagamor itayo na panangabobon na Dios tan sikato so naasinggeran tayo ed pikakasi.​—2 Corinto 5:18, 21; 1 Juan 4:10

12. Anton altar so anengneng nen Isaias, tan anto so epekto na apoy?

¹² Say impanalambit “ed altar” so mangipapanonot lamet ed sikatayo a saya et sakey a pasingawey. (Ikompara so Apocalipsis 8:3; 9:13.) Walay duaran altar diad templo ed Jerusalem. Antis a mismo na kurtina na Sankasantosan et say melag ya altar na insenso, tan diad arap na lolooban ed santuaryo et walay baleg ya altar a panagbagatan, a say apoy so lawas pansiansiaen a mandarlang. (Levitico 6:12, 13; 16:12, 13) Balet sarayan mangaraldalin ya altar so mangiyaanino, mangirerepresenta ed matalonggaring iran bengatla. (Hebreos 8:5; 9:23; 10:5-10) Apoy a nanlapud tawen so angupot ed bagat a popoolan diad altar sanen say templo so inaguraan nen Arin Solomon. (2 Awaran 7:1-3) Tan natan et apoy a manlapud peteg tan mangatatawen ya altar ya angekal ed karumsisan na saray bibil nen Isaias.

13. Anton tepet so pinalesa nen Jehova, tan siopa so ipipila to sanen inkuanton “sikatayo”?

¹³ Talinengen tayo si Isaias. “Nadngel ko so boses na Katawan, ya inkuan to, Siopa so ibakik, tan siopa so onla a nipaakar ed sikatayo? Diad saman inkuan ko, Wadia ak; ibaki moak.” (Isaias 6:8) Say tepet a pinalesa nen Jehova so malinlinew a nigana pian onkiwas si Isaias, lapud anggapoy arum a propetan too a pinmatnag ed pasingawey. Satan so andi-duaruwan imbitasyon parad si Isaias pian magmaliw a mensahero nen Jehova. Balet akin ya intepet nen Jehova a, “Siopa so onla a nipaakar ed sikatayo?” Diad impanalat ed singular personal pronoun ya ‘ak’ ed plural pronoun a “sikatayo,” ipipila natan nen Jehova so sananey nin persona. Siopa? Agta saya imay bogbogtong ya Anak to, a nagmaliw ed saginonor a too a Jesu-Kristo? Peteg a saya met imay Anak ya angikuanan na Dios, “Manggawa itayo na too a kaulibay na inalageyan tayo.” (Genesis 1:26; Uliran 8:30, 31) On, walad dikingan nen Jehova diad mangatatawen iran ayaman so bogbogtong ya Anak to.​—Juan 1:14.

14. Panon so inkiwas nen Isaias ed imbitasyon nen Jehova, tan anton ehemplo so intarya to parad sikatayo?

¹⁴ Si Isaias so mabulbulos a kinmiwas! Antokaman so mensahe, sikatoy tampol ya inmebat: “Wadia ak; ibaki moak.” Agto tinepet no anto so nailaloan to diad pangawat ed kimey. Say mabulos ya espiritu to so maabig ya ehemplo parad amin na saray lingkor na Dios natan, a walaan na kimey a manpulong na “maong a balita na panarian ed sankamundoan.” (Mateo 24:14, NW) Singa si Isaias, matoor iran mansiasiansia ed saray asainmin da tan susumpalen da so “pantasi ed amin a nasyones,” anggaman malaknab so ag-ikikiwas. Sikaray onaabanti tekep na talek, a singa si Isaias, ya amta ran say ganggan ed sikara so manlalapud sankatageyan ya autoridad.

[Tepetepet Parad Panagaral]

(Ituloy ed ontumbok a paway.)