Uusaren Da so Ngaran na Dios Diad Sentral Aprika

KARAKLAN a totoo diad Sentral Aprika so manisia ed Dios. Anggapoy panduaruwa ra a sikato so Amalsa ed amin a bengatla. (Apocalipsis 4:11) Balet, singa say dakel a totoo ed arum pasen, mabetbet ya ibabaliwala ra so personal a ngaran to​—a Jehova.

Saray totoo ed Sentral Aprika, ontan met ed arum niran parte na mundo, so manutukoy ed ngaran na Dios sano ibabaga ray, “Nagalang komoy ngaran mo” diad Pikakasi na Katawan. (Mateo 6:9, King James Version) Balet diad loob na abayag lan panaon et dagdaiset so mikabat ed satan a ngaran. Anggaman ontan, say maseseg a panagpulong na Tastasi nen Jehova so akapanguman ed awawey na saray totoo nipaakar ed panangusar na ngaran na Dios, diad inlabas na saray taon. Natan, say ngaran na Dios et malaknab lan akabatan tan aawaten ed dakel a lenguahe ed Aprika, singa say Zulu (uJehova), Yoruba (Jehofah), Xhosa (uYehova) tan Swahili (Yehova). Balet, maslak a patalos ed Biblia diad sarayan lenguahe so siansia nin agmanguusar ed ngaran na Dios.

Say sakey a maong a patalos a manguusar ed ngaran na Dios et say Biblia ed Zande, sakey a lenguahen uusaren diad saray parte na Central African Republic, Sudan, tan say Democratic Republic na Congo. Diad satan a parte na mundo, uusaren na totoo so ngaran na Dios, a say espeling na satan et Yekova diad dilin salita ra. Antokaman so inkipresenta na ngaran na Dios ed sakey a dialekto, importante ya usaren itan. Akin? Lapud “siopaman ya ontawag ed ngaran na Katawan [“Jehova,” NW], nilaban”​—Roma 10:13.

[Mapa/Litrato ed pahina 32]

(Parad aktual a format, nengnengen so publikasyon)

SUDAN

CENTRAL AFRICAN REPUBLIC

DEMOCRATIC REPUBLIC OF CONGO

[Credit Line]

The Complete Encyclopedia of Illustration/J. G. Heck