Manmatalek ed si Jehova Diad Arap na Kairapan
Propesiya nen Isaias—Liwawa Parad Amin a Katooan I
Kapitulo Nuebe
Manmatalek ed si Jehova Diad Arap na Kairapan
1. Akin a nagunggonaan iray Kristiano natan diad pansukimat ed Isaias kapitulo 7 tan 8?
SAY Isaias Kapitulo 7 tan 8 so mangipaparungtal na duaran nandumaan a reaksion. Si Isaias tan Ahaz so parehon kabiangan na nasyon a dedikado ed si Jehova; pareho iran walaay asainmin ya inter na Dios, say sakey et bilang propeta, tan say sananey et bilang ari na Juda; tan pareho iran nipaarap ed sesga—say ilusob ed Juda na saray mabiskeg a puersa na kabusol. Bangbalet, inarap nen Isaias so sesga tekep na talek ed si Jehova, bangta si Ahaz so pinmayakot. Akin a nandumaan iray reaksion? Lapud saray Kristiano natan so niliktob met na saray onsusumpan puersa, maabig no sukimaten da irayan duaran kapitulo na Isaias pian naamtaan da iray leksion a lugan na saraya.
Nipaarap ed Sakey a Desisyon
2, 3. Anton segek so inter nen Isaias diad saray manangilukas a salita to?
2 Singa say sakey a pintor ya ipipinta to nin unona so intiramintin kabiangan na balon litrato, ginapoan nen Isaias so salaysay to diad pigaran malaknab a balikas a mananda ed gapoan tan kasampotan na saray ebento ya isalaysay to la: “Agawa dia ed saray agew nen Ahaz ya anak a laki nen Jotam, ya anak a laki nen Uzias, ari ed Juda, a si Rezin ari ed Sirya, tan si Peca ya anak a laki nen Remalias, ari ed Israel, tinmatdang ira ed Jerusalem a mibakal sumpa ed sikato, balet agda ayarian so tinmalona a sumpa ed sikato.”—Isaias 7:1.
3 Diad saman et koma-walon siglo K.K.P. Sinalatan nen Ahaz so ama to, si Jotam, bilang ari ed Juda. Si Rezin, say ari na Sirya, tan si Peca, say ari na mamaamianen a panarian na Israel, so linmusob ed Juda, tan saray armada ra so masebeg ya inmataki. Diad kaunoran et liktoben da so Jerusalem a mismo. Balet, ag-ontalona so panliktob. (2 Arari 16:5, 6; 2 Awaran 28:5-8) Akin? Satan so naamtaan tayo ed saginonor.
4. Akin a tinmalaw si Ahaz tan saray totoo to?
4 Diad kagapo na bakal, “nibaga ed abung nen David ya inkuan, Say Sirya akikasakey ed Efraim. Et say puso to pinmarok, tan say puso na baley to, singa saray kiekiew ed takel a nagalaw na dagem.” (Isaias 7:2) On, ataktakot si Ahaz tan say totoo to ed impakaamtan nanmuyong iray Siryano tan Israelita tan diad saman a bekta et saray armada ra so mankakampamento ed dalin na Efraim (Israel). Say kaarawi ra et duara odino taloran agew labat a panagmartsa manlapud Jerusalem!
5. Diad anton dalan a mipara so totoo na Dios natan ed si Isaias?
5 Inkuan nen Jehova ed si Isaias: “Ompaway ka natan a mangabet ed Ahaz, sika, tan si Sear-jasub ya anak mo a laki ed sampot na salolog na katageyan a tanke, dia ed lansangan na uma na batanero.” (Isaias 7:3) Isipen pa labat! Diad panaon a say ari komon so mananap ed propeta nen Jehova tan onkerew na panangiwanwan, say propeta ni so kinaukolan ya onla tan mananap ed ari! Anggaman ontan, si Isaias so mabulos a tinmulok ed si Jehova. Mipadpara, saray totoo na Dios natan so akaparaan ya ompaway pian anapen so totoon natatakot lapud saray desdes na sayan mundo. (Mateo 24:6, 14) Agaylan makapaliket ta kada taon et nilasus nilibo so onkikiwas ed idadalaw na sarayan manangipulong na maong a balita tan oneegna ed saray mananalimbeng a lima nen Jehova!
6. (a) Anton makapaseseg a mensahe so impakabat na propeta ed si Arin Ahaz? (b) Anton kipapasen so nagagawa natan?
6 Nalmo nen Isaias si Ahaz diad paway na saray bakor na Jerusalem, a no iner, lapud pampaparaan ed tatalaranan a pangubkob et iinspeksyonen na ari so suplay a danum na syudad. Imbaga nen Isaias so mensahe nen Jehova ed sikato: “Manlikas ka, tan mankalna ka; agka antakot, nisay pusom agmet napunaw, nisengeg ed saraya a duara a nguro na ngapos [“manasewek a kiew,” NW], nipaakar ed masebeg a sanok nen Rezin tan Sirya, tan say anak a laki nen Remalias.” (Isaias 7:4) Diad inmuna, sanen dineral na saray mangaataki so Juda, say sanok da et singa kapetang na apoy. Natan et singa ra labat ‘duara a nguro na manasewek a kiew.’ Agla nakaukolan a takotan nen Ahaz so Ari na Sirya a si Rezin odino say Ari na Israelita a si Peca, say anak nen Remalias. Mipadpara met itan natan. Diad loob na saray siglo, nidudunget iray tuan Kristiano ed mangapuy-apoy a panamasegsegang na saray lider na Kakristianoan. Balet natan, mipara so Kakristianoan ed sakey a kiew a magano lan napongpong. Magano la so panampot to.
7. Akin a mangiter na ilalo so ngaran nen Isaias tan say ilalak to?
7 Diad panaon nen Ahaz, aliwa labat a say mensahe nen Isaias noag pati say kabaliksan na ngaran to tan say ilalak to so mangiiter na ilalo ed saramay manmamatalek ed si Jehova. Tua, say Juda so walad kapeligroan, balet say ngaran ya Isaias, a kabaliksan toy “Panangilaban nen Jehova,” so mangipapatnag a mangitarya si Jehova na kililiktar. Papaitarok nen Jehova ed si Isaias so anak ton si Sear-jasub, a say kabaliksan na ngaran to et “Sakey Labat a Nakdaan so Ompawil.” Anggan sanen nagba a siansia so panarian na Juda, mapangasin impawil na Dios so sakey a nakdaan ed dalin.
Aliwa Labat a Bakal na Saray Nasyon
8. Akin a say panangataki ed Jerusalem et aliwa labat a bakal na saray nasyon?
8 Panamegley nen Isaias, imparungtal nen Jehova so estratehiya na kakabusol na Juda. Onia so iplaplano ra: “Ontatdang itayo sumpad Juda tan guloen tayo, tan manggawa tayo na kutlaong diman nipaakar ed sikatayo, tan mangipasen itayo na ari ed pegley to, anggan say anak a laki nen Tabeal.” (Isaias 7:5, 6) Saray pakana na nanmuyong a Sirya tan Israel et pian konkestaen so Juda tan pian salatan si Ahaz, ya ilalak nen David, na mananguley a pinili ra. Malinew a say panangataki ed Jerusalem et aliwa labat a bakal na saray nasyon. Satan so nagmaliw a barangkaan ed baetan nen Satanas tan si Jehova. Akin? Lapud akisipanan si Jehova a Dios ed si Arin David, a pinaseguroan ton saray ilalak to so manguley ed totoo nen Jehova. (2 Samuel 7:11, 16) Agaylan pananalo nen Satanas no makapangiyan na sananey a maarin dinastiya diad trono ed Jerusalem! Nayarin naamper to ni ingen so gagala nen Jehova parad kapolian nen David a mamawala na permanentin mananawir, say “Prinsipe na Kareenan.”—Isaias 9:6, 7.
Saray Maaron Panamaseguro nen Jehova
9. Antoran panamaseguro so nepeg a mamabiskeg ed si Ahaz ontan met ed saray Kristiano natan?
9 Kasin ontalona so pakana na Sirya tan Israel? Andi. Inyabawag nen Jehova: “Sikato so agmansiansia, ni sikato met so agnagawa.” (Isaias 7:7) Panamegley nen Isaias, inkuan nen Jehova ya aglabat onsaew so pangubkob ed Jerusalem noagta “dia ed loob na anemaplo tan lima a taon say Efraim nabuybuyak, dia ed ontan aliwa naani a baley.” (Isaias 7:8) On, diad loob na 65 a taon et naandi la so Israel bilang sakey a bansa. * Sayan panamaseguro, tekep na espesipikon eskedyul a kagawa na satan, so nepeg a mamabiskeg ed si Ahaz. Ontan met, say totoo na Dios natan so napapabiskeg diad pakaamtan nauupot la so nakekeraan a panaon na mundo nen Satanas.
10. (a) Panon a naalig na saray tuan Kristiano natan si Jehova? (b) Anto so inyopresi nen Jehova ed si Ahaz?
10 Nayarin napatnagan ed lupa nen Ahaz a sikatoy agmakapanisia, lapud oniay inkuan nen Jehova panamegley nen Isaias: “No agkayo manisia, petepeteg ya agkayo niletneg.” Si Jehova so maan-anos a “nansalita lamet ed si Ahaz.” (Isaias 7:9, 10) Agaylan abig ya ehemplo! Natan, anggaman dakel so ag-onkiwas a tampol ed mensahe na Panarian, nepeg tayon aligen si Jehova diad ‘pansalita a nagkalalo’ legan na idalaw tayo a paulit-ulit. Insan inkuan nen Jehova ed si Ahaz: “Kerew ka na tanda ed Jehova a Dios mo; sikato so kerewen mo dia ed kaaralman, ni dia ed katageyan ed tagey.” (Isaias 7:11) Nayarin onkerew na sakey a tanda si Ahaz, tan gawaen nen Jehova itan bilang garantiya a salimbengan to so abung nen David.
11. Anton panamaseguro so naromog ed imbalikas nen Jehova a “Dios mo”?
11 Imanoen ya inkuan nen Jehova: ‘Kerew ka na tanda ed Dios mo.’ Si Jehova so peteg a mapangasi. Si Ahaz so kabkabat la a mandadayew ed palson dirios tan mangaagamil na makapadimlan paganon agagamil. (2 Arari 16:3, 4) Anggaman ontan tan anggaman ed inkapayakot nen Ahaz, tinawag nin siansia nen Jehova so inkasikato a Dios nen Ahaz. Saya so mangipapaseguro ed sikatayo ya agbengatbengat ipulisay nen Jehova iray totoo. Sikato so mabulos ya ontulong ed saramay akapankasalanan odino ed saramay kinmapuy so pananisia ra. Kasin sayan panamaseguro na aro na Dios so mamakiwas ed si Ahaz ya awaten so tulong nen Jehova?
Panduaruwa a Nagmaliw ya Isusunggay
12. (a) Anton matangsit ya awawey so inagamil nen Ahaz? (b) Imbes a patulongan ed si Jehova, siopa so nila nen Ahaz?
12 Situtungangan inmebat si Ahaz: “Agak onkerew, agko met tuksoen [“suboken,” NW] si Jehova.” (Isaias 7:12) Dia et ag-uunoren nen Ahaz iray salita ed ganggan ya: “Agyo nepeg a tuksoen si Jehova a Dios yo.” (Deuteronomio 6:16) Pigaran siglo ed saginonor, inaon nen Jesus itan a ganggan sanen sikatoy tutuksoen nen Satanas. (Mateo 4:7) Balet, diad kaso nen Ahaz, sikatoy iimbitaan nen Jehova ya ompawil ed tuan panagdayew tan iyoopresi Ton pabiskegen so pananisia to diad panggawa na sakey a tanda. Balet, mas nilabay nen Ahaz so pasalimbengan ed arum. Posiblen diad sayan panaon angipawit so ari na baleg a kantidad na kuarta diad Asirya, a papatulongan sumpad mamaamianen a kakabusol to. (2 Arari 16:7, 8) Kaleganan na satan, say armada na Sirya tan Israel so nanliktob ed Jerusalem tan peles so pangukobkob.
13. Anton pananguman so naimano tayo ed bersikulo 13, a mangipapatnag na anto?
13 Lapud sankanonot nen Isaias so kakulangan na pananisia na ari, inkuan to: “Dengel kayo natan, O abung nen David: Sikato ta so melag a bengatla a nipaakar ed sikayo so mamapaalipanes ed totoo, a paalipanesan yo so Dios ko met?” (Isaias 7:13) On, nayarin onsawa si Jehova ed lanang lan itutunganga. Imanoen met, ya inkuan na propeta natan a “Dios ko,” aliwan “Dios mo.” Sakey a makapakebbiew a pananguman! Sanen impulisay nen Ahaz si Jehova tan nampatulong ed Asirya, abalang to so maabig a pankanawnawa a napapawil so relasyon to ed Dios. Agtayon balot komon isasakripisyo so relasyon tayo ed Dios diad pangikompromiso ed Makasulatan a sisisiaen tayo pian makagamor labat na saray temporaryon bentaha.
Say Tanda nen Emmanuel
14. Panon ya impanengneng nen Jehova so inkamatoor to ed sipan to ed si David?
14 Nansiansian matoor si Jehova ed sipan to ed si David. Sakey a tanda so inyopresi, sakey a tanda so niiter! Intuloy nen Isaias: “Say Katawan lanlamang ikdan to kayo na tanda nia, sakey a birhen manlokon naani, tan mangiyanak na sakey ya anak a laki, tan natawag so ngaran to ya Emmanuel. Mantikella tan dilo so kanen to, sano amta to ya iwaklit so mauges, tan pilien so maong. Ta arapen a say ugaw agto ni amta ya iwaklit so mauges, tan pilien so maong, say dalin a saray duaran ari to a kagulam nikaindan.”—Isaias 7:14-16.
15. Anton duaran tepet so eebatan na propesiya nipaakar ed si Emmanuel?
15 Saya so maong a balita ed siopaman a natatakot a panganggaen na saray onlulubak so Davidikon linya na arari. Say kabaliksan na “Emmanuel” et “Say Dios Wala ed Sikatayo.” Say Dios so wala ed dapag na Juda tan agto abuloyan a nibaliwala so sipan to ed si David. Niarum ni, aglabat binagaan si Ahaz tan say totoo to no anto so gawaen nen Jehova noagta no kapigan to met itan gawaen. Antis a nasabi na ugaw nin Emmanuel so suston edad pian nibiig so maong tan mauges, naderal so kakabusol iran nasyon. Tan saya so apaneknekan a tua!
16. Akin ya agni imparungtal nen Jehova ed panaon nen Ahaz no siopa si Emmanuel?
16 Ag-ibabaga na Biblia no siopay makan-anak ed si Emmanuel. Balet lapud malangwer nin Emmanuel so onkana bilang tanda tan imbaga ed saginonor nen Isaias a sikato tan saray ilalak to so “tantanda,” nayarin si Emmanuel so ilalak na propeta. (Isaias 8:18) Nayarin agni imparungtal nen Jehova ed panaon nen Ahaz no siopa si Emmanuel pian agnisuawi so imano na saginonor iran kailalakan manlapud say Babaleg ya Emmanuel. Siopa itan?
17. (a) Siopa so Babaleg ya Emmanuel, tan anto so ipapatnag na inkianak to? (b) Akin a nikelyaw na totoo na Dios natan a “say Dios wala ed sikatayo”?
17 Likud ni ed libro na Isaias, say ngaran ya Emmanuel so pinmatnag labat ya aminsan diad Biblia, diad Mateo 1:23. Si Mateo so pinuyanan nen Jehova a mangiyaplika ed propesiya na inkianak nen Emmanuel ed inkianak nen Jesus, say makanepegan a Mananawir ed trono nen David. (Mateo 1:18-23) Say inkianak na inmunan Emmanuel so sakey a tanda ya agpinaulyanan na Dios so abung nen David. Mipadpara, say inkianak nen Jesus, say Babaleg ya Emmanuel, so sakey a tanda ya agpinaulyanan na Dios so sankatooan odino say sipanan to nipaakar ed Panarian diad abung nen David. (Lucas 1:31-33) Lapud say manunan manangilaman nen Jehova so walad limog na katooan natan, peteg a nikuan nen Mateo, ‘Say Dios wala ed sikatayo.’ Natan, manuuley la si Jesus bilang mangatatawen ya Ari tan walad dapag na kongregasyon to diad dalin. (Mateo 28:20) Maseguron say totoo na Dios so walaan na kaaruman a rason ed makpel a pangikelyaw: “Say Dios wala ed sikatayo!”
[Paimano ed leksab]
^ par. 9 Parad kaaruman iran detalye nipaakar ed kasumpalan na sayan propesiya, nengnengen so Insight on the Scriptures, Tomo 1, pahina 62 tan 758, ya impalapag na Watchtower Bible and Tract Society of New York, Inc.
[Tepetepet Parad Panagaral]
(Ituloy ed ontumbok a paway.)