Pakaaralan Manlapud Kiew a Palma

“MAKAPAAY-AYAT a porma a walaay makatantandan inkarakep.” Ontan so impaneskribe na sakey ya encyclopedia na Biblia ed say date palm (Phoenix dactylifera). Diad panaon na Biblia tan natan, saray date palm so mamaparakep ed Nile Valley na Ehipto, tan mamapawala iratan na makarepreskon sirum diad kaliberliber na mabunan pasen ed Negeb Desert.

Singa ed saray maslak a klase na kiew a palma, say date palm so mapmaptek a tuloy. Arum et sabien to so anggad 30 metro ed katagey tan ag-ontundan manbunga ed loob na 150 a taon. On, say date palm so marakdakep a nenengnengen tan makapadinayew so inkamabunga na satan. Kada taon et mamapawala itan na pigaran monil na datiles. Say sakey a monil labat et amugel na masulok a 1,000 a datiles. No nipaakar ed datiles, oniay insulat na sakey ya angaonan: “Saramay . . . makatataway labat na impamaga tan arepak a datiles a walad saray lakoan, et agda naisip ya agaylan satan so masamsamit no kanen a tariwa.”

Matukotukoy ya inyaliling na Biblia iray totoo ed saray kiew a palma. Pian magmaliw a makapaliket ed imaton na Dios, a singa ed mabungan kiew a palma, nepeg a say sakey a too so magmaliw a maptek ed moral tan nepeg lawas a mamawala na maabig iran gawa. (Mateo 7:17-20) Lapud saya, saray niukit a pigura na saray kiew a palma so inusar bilang parakep ed templo nen Solomon tan say templo ed pasingawey nen Ezequiel. (1 Arari 6:29, 32, 35; Ezequiel 40:14-16, 20, 22) Kanian, pian naabobonan so panagdayew na sakey ed Dios, say sakey so nepeg a nawalaan na maabig iran kalidad a singa say date palm. Isasalaysay na Salitay Dios: “Say matunong onsalindak a singa say kiew a palma.”​—Salmo 92:12.